Tepetepet Manlapud Saray Managbasa

Akin a say bilang a 144,000 ya asalambit diad libro na Apocalipsis so ipapasen na saray Tasi nen Jehova a literal, aliwan simboliko?

Si apostol Juan so nansulat: “Nadngel ko so bilang na saray tinatakan, sanlasus tan apataplo tan apat a libo.” (Apocalipsis 7:4) Diad Biblia, say balikas a “saray tinatakan” et ontutukoy ed sakey a grupo na saray indibidual a pinili ed limog na katooan pian manuley a kaiba nen Kristo ed tawen diad onsabin Paraison dalin. (2 Corinto 1:21, 22; Apocalipsis 5:9, 10; 20:6) Say bilang dan 144,000 so ipapasen a literal lapud pigaran rason. Say sakey et naromog diad mismon konteksto na Apocalipsis 7:4.

Kayarin nibaga ed si apostol Juan diad panamegley na pasingawey so nipaakar ed sayan grupo na 144,000 ya indibidual, nipanengneng ed sikato so sananey a grupo. Deneskribe nen Juan iyan komaduan grupo bilang “baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita.” Sayan baleg ya ulop so ontutukoy ed saraman so makaliktar ed onsabin ‘baleg a kairapan,’ a maneral ed peles a marelmeng a mundo.​—Apocalipsis 7:9, 14.

Balet, imanoen so impabitar nen Juan a pandumaan na bersikulo 4 tan 9 na Apocalipsis kapitulo 7. Sinalambit to a walaan na espisipikon bilang so primeron grupo, ‘saramay tinatakan.’ Balet, andian na espisipikon bilang so komaduan grupo, say “baleg ya ulop.” Base ed satan, makatunongan ya ipasen a literal so bilang a 144,000. No say bilang a 144,000 et simboliko tan ontutukoy ed sakey a grupo a peteg ya andian na bilang, naandi so puersa na pandumaan na satan a duaran bersikulo. Kanian, malinew ya ipapabitar na konteksto a nepeg ya ipasen a literal so bilang a 144,000.

Ontan met so impangipasen na nanduruman iskolar na Biblia, diad apalabas tan diad kaplesan​—salanti, say bilang et literal. Singa bilang, oniay inkomento na Britanon leksikograpo a si Dr. Ethelbert W. Bullinger nipaakar ed Apocalipsis 7:4, 9, manga 100 taon lay apalabas: “Simplin salaysay itan na katuaan: sakey ya pihon bilang a miduma ed say aliwan pihon bilang a walad sayan mismon kapitulo.” (The Apocalypse or “The Day of the Lord,” pahina 282) Agano ni labat et oniay insulat nen Robert L. Thomas, Jr., a propesor na Balon Sipan diad The Master’s Seminary ed Estados Unidos: “Andian na malet a basiyan so pangipapasen [ed satan] a simboliko.” Inkuan to ni: “Sakey itan a pihon bilang a miduma ed say aliwan pihon bilang a naromog ed 7:9. No ipasen itan a simboliko, anggapo la so numero ed libro a nayarin ipasen a literal.”​—Revelation: An Exegetical Commentary, Tomo 1, pahina 474.

Walaray mangisusuppiat a lapud lugan na Apocalipsis iray simbolikon tuloy a lenguahe, amin a numero a naromog ed sayan libro, pati say bilang a 144,000, so nepeg a simboliko. (Apocalipsis 1:1, 4; 2:10) Balet, malinew ya aliwan susto itan a konklusyon. Tua a lugan na Apocalipsis so dakerakel a simbolikon numero,  balet lugan met na satan iray literal a numero. Singa bilang, sinalambit nen Juan so nipaakar ed “saray ngaran na saray labindua ya apostoles na Kordero.” (Apocalipsis 21:14) Malinew, say bilang a 12 ya asalambit ed sayan bersikulo et literal, aliwan simboliko. Niarum ni, nansulat si apostol Juan nipaakar ed “sanlibon taon” ya uley nen Kristo. Satan a bilang so nepeg ya ipasen met a literal, unong ya ipapabitar na maalwar ya impangusisa ed Biblia. * (Apocalipsis 20:3, 5-7) Kanian, mandependi ed kipapasen tan konteksto na satan no kasin ipasen a literal odino simboliko so numero ed Apocalipsis.

Say konklusyon a say bilang a 144,000 et literal tan ontutukoy ed limitadon bilang na saray indibidual, a melmelag a grupo no ikompara ed “baleg ya ulop,” so mitunosan met ed arum a teksto ed Biblia. Singa bilang, diad saginonor et adeskribe ed pasingawey a naawat nen apostol Juan a say 144,000 so “asaliw dia ed saray totoo, a pinagka-unonan bungabunga.” (Apocalipsis 14:1, 4) Say balikas a “pinagka-unonan bungabunga” so ontutukoy ed daiset a pinilin manangilaman. Ontan met, legan a wadia ni’d dalin si Jesus, sinalambit to so nipaakar ed saray manuley a kaiba to diad mangatatawen a Panarian tan tinawag to ira a “daiset a papastolan.” (Lucas 12:32; 22:29) On, saramay nanlapu ed limog na katooan a manuley ed tawen et dagdaiset no ikompara ed saray katooan a manayam ed onsabin Paraison dalin.

Kanian, say konteksto na Apocalipsis 7:4 tan saray misiglaotan a balikas a naromog ed inerman a libro ed Biblia so mamepekder a say bilang a 144,000 so nepeg ya ipasen a literal. Tutukoyen na satan iramay manuley ed tawen a kaiba nen Kristo diad paraison dalin, a napano na dakdakel tan agnapadesiran a bilang na saray maliket a totoo a mandadayew ed si Jehova a Dios.​—Salmo 37:29.

[Paimano ed leksab]

[Blurb ed pahina 31]

Say bilang na saray walaan na mangatatawen a tawir et 144,000 labat

[Litrato ed pahina 31]

Anggapoy nigetar a bilang na “baleg ya ulop”

[Picture Credit Lines ed pahina 31]

Saray bitewen: Diad impangiyabuloy na Anglo-Australian Observatory, nilitrato nen David Malin