Panon Karukey so Pakapambilay na Totoo?

NEN Marso 3, 1513, ginapoan na Kastilan managdiskobre a si Juan Ponce de León so sakey a makatantandan ekspedisyon. Sikatoy binmuat a nanlayag manlapud Puerto Rico diad paniilalon makasabi ed isla na Bimini. Unong ed istorya, inanap to so mamilagron subol​—say Subol na Inkaugaw. Balet ta sikatoy nisakda ed say tatawagen natan ya estado na Florida, E.U.A. Siempre, agton balot aromog so subol lapud anggapon talaga itan.

Natan, say kaslakan a karukey na bilay na totoo et angga labat ed 70 odino 80 a taon. Anggaman indatak na Biblia iray totoon nambilay na andukerukey, say 2002 Guinness Book of World Records so angikuan a say edad na sankatakkenan a too a nambilay et 122 a taon tan 164 ya agew. (Genesis 5:3-32) Balet, oniay inkuan na bioethicist a si John Harris: “Ipapatnag na modernon panagsukimat a nayarin niwala so sakey a sosyedad a say itatakken​—pati say ipapatey​—so napaliisan la.” Tutukoyen na pigaran managsukimat ed koma-21 a siglo so “singano agla manampot a bilay,” “andi-geter a panat na bilay na totoo kasabi 2099,” “kapasidad ya agmanampot a pamawala na saray selula,” tan saray bengatlan mipadpara.

Diad libro ton The Dream of Eternal Life, oniay inkuan nen Mark Benecke: “Say interon laman lawari so maminpiga a napapasimbalo legay bilay. . . . Kayari na manga pitoran taon, sikatayo so literal a walaan na balon laman.” Anggaman ontan, ag-itan mantultuloy lawas lapud saray selula so ontunda lan manparakel sano asabi la so nigetar a pakaapag-apag na saray selula. Balet, no aliwan ontan so kipapasen, so kuan nen Benecke, “nayarian na laman na too a pasimbaloen so inkasikato ed loob na andukdukey a panaon​—magnayon ni ingen.”

Imanoen met so makapakelaw a kapasidad na utek na too, a palumbasan ton tuloy so antokaman a pakapangusar tayo ed satan legan na antiktikey a bilay tayo. Unong ed Encyclopædia Britannica, say utek na too “et walaan na mas abalbaleg a potensyal nen say nayarin pangusar ed satan na sakey a too legay bilay to.” (1976 ya Edisyon, Tomo 12, pahina 998) Oniay ibabaga  na libron How the Brain Learns, nen David A. Sousa: “Ngalngalin andian na limitasyon so kapasidad na utek a mangisimpen na impormasyon.”​—Pahina 78, Komaduan Edisyon, copyright 2001.

Akin ya anggapoy naromog na saray managsukimat a rason diad inkagawa na laman tayo a mangipaliwawa no akin ya ontatakken tan ompapatey itayo? Tan akin a say utek na too so walaan na ontan lan abalbaleg a kapasidad? Posible kasi a denesinyo itayo pian mantultuloy ya onggamor na pikakabat diad ando lan ando? Akin et naiisip tayo ni so nipaakar ed bilay ya andi-anggaan?

Oniay ibabaga na Biblia: “Ontan met impasen [na Dios] so kaandoan ed puso ra, anggan say too agto natontonan so gawa a ginawa na Dios a manlapu ed gapo angga ed sampot.” (Eclesiastes 3:11) Ipapabitar na sarayan salita ya insipor na Dios ed sikatayo so ideyan manbilay ya andi-angga. Lapud satan, naynay a wala so balon bengatla a naaralan tayo nipaakar ed Dios tan ed saray gawa to. No manbibilay itayo ed loob na agnapadesiran a binilyon a taon, on, diad andi-angga, lawas itayon makaaral na dakel ni nipaakar ed saray makapakelaw a palsa na Dios.

Ipapatnag met na saray salita nen Jesu-Kristo a posiblin manbilay a maando so too. Oniay inkuan to: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Komusta ka balet? Labay mo ta so manbilay ya andi-angga?

[Saray litrato ed pahina 3]

Inanap nen Juan Ponce de León so subol na inkaugaw

[Credit Line]

Ponce de León: Harper’s Encyclopædia of United States History