Tepetepet Manlapud Saray Managbasa

Kawalaan na saray demonyo legan na Sanlibon Taon ya Uley nen Kristo?

Agdirektan eebatan na Biblia iyan tepet. Balet, nawalaan itayo na lohikal a konklusyon nipaakar ed kawalaan na saray demonyo legan na Milenyon Uley nen Kristo.

Oniay inkuan nen apostol Juan sanen mangiiter na pasingawey a nagawa diad gapo tan kasampotan na sayan Milenyo: “Akanengneng ak na sakey ya anghel ya inmepas a nanlapu ed tawen, a wala ed sikato so tombok na kaaralman, tan sakey a gulonggulong dia ed lima to. Tan inerel to so dragon, saman so uleg a daan, a sikato so Diablo tan Satanas, tan sikato so binalor to ed sanlibon taon. Tan sikato so imbantak to ed kaaralman, tan sikato so impukok to, tan tinatakan to ed tapew to, pian agto la tilaan so saray nasyones, angga ed kasumpal na sanlibon taon: kayari na saraya kaukolan a sikato so nabulos ed daiset a panaon.” (Apocalipsis 20:1-3) Sarayan bersikulo so manasaglawi labat ed kipangaw nen Satanas ed kaaralman tan say magano a kibulos to diad kaunoran. Anggaman ag-asalambit iray demonyo, ompatnag a makatunongan a sano say anghel a wala ed sikato so tombok na kaaralman, salanti, say niglorian si Jesu-Kristo, so mangerel tan mangipukok la ed Diablo diad kaaralman, gawaen to met so ontan ed saray demonyo.​—Apocalipsis 9:11.

Sanen nagmaliw ya Ari ed tawen nen 1914, walay ginawa nen Jesus-Kristo a pirmin angapekto ed si Satanas tan ed saray demonyo. Oniay inkuan na Apocalipsis 12:7-9: “Agawa so sakey a baleg a bakal ed tawen: si Miguel tan saray anghel to pinmaway iran akibakal ed dragon: et samay dragon tan saray anghel to [saray demonyo] akibakal ira. Et ag-ira analo, tan agmet la aromog so dinanman a pasen da ed tawen. Tan nibantak dia ed dalin so baleg a dragon, say daan ya uleg, a manngaran na Diablo tan Satanas, a sikato so mantila ed lapag na sankamundoan; nibantak dia ed dalin, tan saray anghel to nibantak ira ya alanor ed sikato.” Nanlapu la’d saman, si Satanas tan saray demonyo to so nipukok diad kaliberliber na dalin. Makatunongan a nipasen tayo a sano pegetan la nen Jesu-Kristo a nagkalalo iray aktibidad nen Satanas pian agla naimpluensyaan na karelmengan so dalin, gawaen To met so ontan ed saray demonyo.

Konsideraen met so sankaunaan a propesiya ed Biblia. Oniay nabasa ditan: “Mangiyan ak [Dios] na gulaan ed sika [Satanas] tan say bii [mangatatawen ya organisasyon nen Jehova], tan gulaan ed saray ilalak mo [nen Satanas] tan ilalak to [si Jesu-Kristo]; sikato sugaten to so ulom, et sika sugaten mo so mukor to.” (Genesis 3:15) Lalanoren na say panugat ed ulo na serpiente so pangipukok ed si Satanas ed kaaralman legan na Sanlibon Taon ya Uley nen Kristo. Ibabaga met na propesiya a walay gulaan ed baetan na Samay manugat tan say ilalak odino bini nen Satanas. Kaiba ed sayan bini, odino organisasyon, so agnanengneng a kabiangan a tugyopen na marelmeng ya angheles, odino saray demonyo. Kanian makatunongan a nibaga a sano ipukok nen Jesus si Satanas ed kaaralman, baloren tan ipukok to met ditan iray demonyo. Say katuaan ya antako-takot iray marelmeng ya espiritu ed kaaralman so mangipatnag a kabat da iyan magano lan nagawa a panamuger.​—Lucas 8:31.

 Balet, posible kasi ya ag-asaglawi ed Apocalipsis 20:1-3 iray demonyo lapud aderal la ra ed Armagedon kaiba iray nanengneng a kabiangan na bini nen Satanas? Ipapanengneng na Biblia a nayarin aliwan ontan. Oniay ibabaga na satan nipaakar ed kaunoran a pansumpalan nen Satanas: “Say tukso [“Diablo,” NW] a manisilib ed sikara nibantak ed dayat na apoy tan asupre, a sikato so kawalaan na atap ya ayep tan aliwan tua a propeta; tan sikara so napairap ed agew tan labi ed ando lan ando.” (Apocalipsis 20:10) Say atap ya ayep tan say palson propeta et mapolitika iran pakayari tan kabiangan iratan ed nanengneng ya organisasyon nen Satanas. (Apocalipsis 13:1, 2, 11-14; 16:13, 14) Naderal iratan ed Armagedon, sano mekmeken tan panganggaen na Panarian na Dios so amin a panarian na mundo. (Daniel 2:44) Sinaglawi na Biblia so “andi-anggaan ya apoy a sikato so imparaan ed Diablo tan saray angheles to.” (Mateo 25:41) Si Satanas tan saray demonyo to so nibantak ed satan met a “dayat na apoy tan asupre” a singa ed say atap ya ayep tan palson propeta diad paraan a sikara met so andi-anggaan a naderal. No aderal la ed Armagedon so mas mabiskeg ya agnanengneng a kabiangan na bini nen Satanas, asalambit komon a wala la’d satan a simbolikon dayat iray demonyo kaiba so atap ya ayep tan say palson propeta. Mapatnag ya ag-ira aderal ed Armagedon lapud ag-ira abitla ed Apocalipsis 20:10.

Lapud agdirektan abitla a nibantak iray demonyo ed kaaralman, agmet espisipikon asaglawi so kibulos da manlapud satan. Balet, say pansumpalan da tan say Diablo et pareho. Kayari na kibulos da a kaiba so Diablo tan pitulongan da ed sikato kaleganan na unor a pananubok ed katooan diad panampot na sanlibon taon, nibantak met iray demonyo ed dayat na apoy tan asupre tan sirin et andi-anggaan a naderal.​—Apocalipsis 20:7-9.

Kanian, anggaman say asalambit labat ed Apocalipsis 20:1-3 et say kaerel tan kibantak nen Satanas ed kaaralman na inka-inaktibo, makatunongan a nipasen tayon saray anghel to so nabalor tan nipukok met ed kaaralman. Agnaabuloyan si Satanas tan saray alipores to a demonyo a mangamper ed pakasumpal na gagala na Dios a pagmaliwen a paraiso so dalin tan ipawil so katooan ed inkayadyari legan na Sanlibon Taon ya Uley nen Kristo.