‘Maliket Ak ed Kipapasal Ko’

AG-AKASEL so kalangweran a si Kazuna sanen insuheri na maestro to a sikatoy mibiang ed sakey a kontis na panagsalita ed Ingles. Say kontis so lukas parad amin a haiskul diad baleg ya isla na Hapon a Hokkaido ed bandad amianen, ingen ta agnin balot angikontis na estudyante so eskuelaan to nensaman. Diad samay agew na kontis, nanenerbiyos si Kazuna lapud walay manga 50 ya arum niran estudyante a kaukolan ton pikompetensiaan. Sikatoy lalon anerbiyos sanen naimano to so duaran hurado a say lenguahe ran mismo et Ingles.

Inyanunsio iray analo, a ginmapo ed akaawat na sankaabebaan a premyo. Sanen diad kaunoran et atawag so ngaran nen Kazuna, sikatoy agmakapanisia. Sikato tan say maestro ton akayurong ed abay to, so mankelkelaw a nannengnengan. Si Kazuna so sinmegep ed entablado a siansia nin agmakapanisia, pian awaten so tropi​—parad sankatagyan a premyo!

“Saya so nagmaliw a posible lapud panangipasal ya itatarya na organisasyon nen Jehova panamegley na Teokratikon Eskuelaan Parad Ministeryo,” so maliket ya impaliwawa nen Kazuna. “Malikeliket ak ta makakagamor ak na onian kipapasal.” Satan ya eskuelaan a pibibiangan nen Kazuna manlapu la’d inkaugaw to, so sakey ed saray pantitipon ed kongregasyon na saray Tasi nen Jehova. Sanen manpaparaan parad kontis, si Kazuna so nagkalautlan angimano ed panangusar na mikropono, pansalita tekep na petang na liknaan tan entusiasmo, panag-andawes, inengneng ed saray dumerengel, tan arum niran bengatlan imbangat ed Teokratikon Eskuelaan Parad Ministeryo.

Ipangasin awaten so imbitasyon mi ya imatonan iyan eskuelaan, a sinimban ikokondukta ed Kingdom Hall na saray Tasi nen Jehova ed lokal. Imano yon mismo no panon a nagugunggonaan iray kalangweran tan mamatakken. Say pantitipon so lukas ed publiko. Parad kaaruman ya impormasyon ed sankaasinggeran ya eskuelaan ed abung yo, ipangasin mitalosan ed saray Tasi nen Jehova ed lugar yo.