Pinankakasakey na Panangaro ed Dios

SANEN aporma so Kristianon kongregasyon nen inmunan siglo na Komon a Panaon tayo, sakey ed saray matalonggaring a pakabidbiran ed satan, anggaman nanduruma iray membro na satan, et say pankakasakey. Saratan a mandadayew ed tuan Dios so nanlalapud Asia, Europa, tan Aprika. Irerepresenta ra so nanduruman kipapasen ed bilay​—saserdote, sundalo, aripen, takas, komikimey, propesyonal, tan negosyante. Walaray Judio, tan saray arum et Gentil. Dakel so datin mikakalugoran, homoseksual, buanges, matakew, odino managliput. Anggaman kuan, sanen nagmaliw iran Kristiano, inwaklit da iray mauges ya agamil da tan maapit iran nankakasakey ed pananisia.

Anto so tinmulong ed inmunan-siglon Inkakristiano pian napankakasakey iratan ya amin a totoo? Akin a mareen iran akideneng ed sakey tan sakey tan ed saray totoo ed inkalapagan? Akin ya ag-ira akibabali ed saray rebelyon tan panlalaban? Akin a nidumaruma so inmunan Inkakristiano ed saray manunan relihyon natan?

Anto so Amakasakey ed Saray Membro na Kongregasyon?

Say manunan amakasakey ed saray sanaagi ed pananisia nen inmunan siglo et say panangaro ed Dios. Binidbir na saratan a Kristiano so manunan  obligasyon da ya aroen so tuan Dios, si Jehova, ed interon puso, kamarerwa, tan nonot da. Singa bilang, si apostol Pedro, a sakey a Judio, so niganggan ya onla ed abung na sakey ya aliwan Judio, toon agto gendat a pililimogan. Say panangaro ed si Jehova so manunan amatulok ed sikato. Nanggayagaan nen Pedro tan saray arum ya inmunan Kristiano so maapit a pisisiglaotan ed Dios a nibase ed suston pikakabat ed personalidad, saray panlabayan, tan agpanlabayan na Dios. Sinmabi panaon et atalosan na amin a managdayew a kaliktan nen Jehova a ‘mannononong ira ed saksakey a nonot tan saksakey ya isip.’​—1 Corinto 1:10; Mateo 22:37; Gawa 10:1-35.

Saray mananisia so nankakasakey met lapud pananisia ra ed si Jesu-Kristo. Kinaliktan dan tumboken a maapit iray bakat to. Oniay ingganggan to ed sikara: “Manaaroan so sakey tan sakey ed sikayo; salanti unong na impangarok ed sikayo . . . Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:34, 35) Nepeg ya aliwa itan ya ataptapew ya emosyon, noagta panangaro ya atekepan na dilin-panagsakripisyo. Anto so resulta? Oniay impikasi nen Jesus parad saramay manisia ed sikato: “Pikasik . . . [a] saksakey iran amin salanti singa sika, Ama, wala ka ed siak, tan siak ed sika, pian wala ra met ed sikata.”​—Juan 17:20, 21; 1 Pedro 2:21.

Inkalbo nen Jehova so masanton espiritu to, odino aktibon puersa to, ed saray tuan lingkor to. Sayan espiritu so angiyalibansa na pankakasakey diad limog da. Tinmulong met itan ed sikara pian natalosan iray bangat ed Biblia ya inawat ed amin a kongregasyon. Saray mandadayew ed si Jehova so angipulong ed parehon mensahe, salanti, say kapasantos na ngaran nen Jehova panamegley na Mesianikon Panarian na Dios, sakey a mangatatawen a gobierno a manuley ed amin a katooan. Atalosan na saray inmunan Kristiano so obligasyon da a sikaray “aliwan taga dia ed mundo.” Kanian, sanen agawa iray impanrebeldi na ombaley odino panlalaban na militar, saray Kristiano so nansiansian neutral. Sikaray akikareenan ed amin a totoo.​—Juan 14:26; 18:36; Mateo 6:9, 10; Gawa 2:1-4; Roma 12:17-21.

Inako na amin a mananisia so responsabilidad dan mangiyalibansa na pankakasakey. Panon? Diad impaneguro a mitunosan ed Biblia so kondukta ra. Kanian, sinulat nen apostol Pablo iray Kristiano: “Ipulisay yo komon so nipaakar ed abangonan a panagbilay yo, say toon daan,” tan “ikawes yo so too a balo.”​—Efeso 4:22-32.

Nansiansia so Pankakasakey

Siempre, saray mananisia nen inmunan siglo so ag-ayadyari, tan linmesa iray situasyon ya anubok ed pankakasakey da. Alimbawa, insalaysay na Gawa 6:1-6 a linmesa so siblangan ed baetan na saray Judion Kristiano a mansasalitay Griego tan saramay mansasalitay Hebreo. Liknaen na saramay mansasalitay Griego a biktima ira na panaglabi. Balet, sanen nipakabat itan ed saray apostol, satan so niresolbin tampol diad maalas a paraan. Diad saginonor, say panusuppiat ed doktrina so nansumpal ed sangsangan nipaakar ed saray obligasyon na saray aliwan-Judio diad loob na Kristianon kongregasyon. Ginawa so desisyon base ed saray prinsipyo ed Biblia, tan satan a desisyon so nankakasakeyan ya inawat.​—Gawa 15:1-29.

Ipapatnag na sarayan alimbawa a saray agpantatalosan so agnansumpal ed etnikon inkaapag-apag odino agmanampot a gotgotan lapud doktrina diad Kristianon kongregasyon nen inmunan siglo. Akin? Lapud saray sengegan na pankakasakey​—salanti, say panangaro ed si Jehova, pananisia ed si Jesu-Kristo, panaaroan ya  atekepan na dilin-panagsakripisyo, impangawat ed panangiwanwan na masanton espiritu, saksakey a pakatalos ed saray bangat na Biblia, tan say inkaalisto na sakey a manguman ed kondukta to​—so mabiskeg a tuloy pian napansiansia a mankakasakey tan mareen so inmunan kongregasyon.

Nankakasakey ed Panagdayew Natan

Kasin nadampot so pankakasakey natan ed ontan a paraan? Kasin napankasakey nin siansia na saratan a sengegan iray sanaagi ed pananisia tan makatulong ed sikaran mikareenan ed amin a katooan diad sankamundoan? On! Saray Tasi nen Jehova so nankakasakey ed sankamundoan ya impanaagi diad masulok lan 230 a bansa, pulpulo, tan teritorya. Tan sikaray pankakasakeyen na pareho iran sengegan ya amakasakey ed saray Kristiano nen inmunan siglo.

Say manunan makatutulong ed pankakasakey na saray Tasi nen Jehova et say debosyon da ed si Jehova a Dios. Kabaliksan na saya a panggugunaetan day magmaliw a matoor ed sikato diad amin a sirkumstansya. Saray Tasi nen Jehova so mangaagamil met na pananisia ed si Jesu-Kristo tan ed saray bangat to. Ipapatnag na sarayan Kristiano so panangaro ya atekepan na dilin-panagsakripisyo ed saray kapananisiaan da tan ipupulong da ed amin a daldalin so parehon maong a balita na Panarian na Dios. Sayan Panarian so maliket dan itongtong ed saray totoo ed amin a relihyon, rasa, nasyonalidad, tan kipapasen na panagbilay. Mansiasiansia met a neutral iray Tasi nen Jehova diad saray pakurang na mundo, ya ontutulong ed sikaran natalonaan iray desdes ed politika, kultura, sosyedad, tan komersyo a pirmin mangaapag-apag ed katooan. Aawaten na amin a Tasi so obligasyon dan mangiyalibansa na pankakasakey diad pangitutunos ed kabibilay da ed saray estandarte na Biblia.

Say Pankakasakey so Manasagyat ed Arum

Sayan pankakasakey so mabetbet a manasagyat ed interes na saray indibidual ya aliwan Tasi. Sakey lan alimbawa si Ilse, * a datin Katolikon madre diad sakey a kombento ed Alemanya. Anto so akasagyatan to ed saray Tasi nen Jehova? Oniay inkuan nen Ilse: “Sikara lay sankamaongan a totoo ya akabat ko. Ag-ira mibabakal; anggapoy sasakitan da. Labay dan tulongan so totoo a manbilay a maliket ed paraison dalin diad uley na Panarian na Dios.”

Sakey met si Günther, a sundalon Aleman a nibaki ed Pransya legan na komaduan guerra mundial. Sakey ya agew et nampamisa so pari na Protestanti parad saray sundalo ed pangkat di Günther. Nampikasi so pari parad pakabendisyonan, pakasalimbengan, tan panalo ra. Kayari na misa, si Günther so impuesto bilang bantay. Diad panlalargabista to, anengneng to iray kalaban a sundalo diad biek a kampo ya onaatendi met ed sakey a misa ya ikokondukta na pari. Oniay inkuan nen Günther ed saginonor: “Nayarin nampikasi met iman a pari parad pakabendisyonan, pakasalimbengan, tan panalo ra. Inumameng ko no panon a saray Kristianon relihyon so mankalaban ed parehon bakal.” Sankanonot iraya nen Günther. Diad saginonor, sanen akatongtong to iray Tasi nen Jehova ya agmibibiang ed pambabakal, si Günther so nagmaliw a kabiangan na sankamundoan ya impanaagi ra.

Si Ashok tan Feema et datin kabiangan na sakey a relihyon ed Bukig. Diad abung da et walay sakey ya altar parad sakey a dios. Sanen adapoan na graben sakit so pamilya ra, inusisa ra lamet so relihyon da. Diad impakapitongtong da ed saray Tasi nen Jehova, nandinayewan di Ashok tan Feema iray bangat ed Biblia tan say panaaroan ed limog na saray Tasi. Sikara la natan so maseseg a manangipalapag na maong a balita na Panarian nen Jehova.

Si Ilse, Günther, Ashok, tan Feema so nikasakey la ed saray minilyon a Tasi nen Jehova ed sankamundoan ya impanaagi. Panisiaan da so sipan na Biblia ya agla manbayag et saramay sengegan ya angikasakey ed sikara ed panagdayew natan so mamakasakey met ed amin a matulok a katooan. Diad ontan, anggapo la ray nagawan inkaruksa, agpankakasakey, tan inkaapag-apag makasengeg ed relihyon. Say interon mundo so mankakasakey la ed panagdayew ed tuan Dios, si Jehova.​—Apocalipsis 21:4, 5.

[Paimano ed leksab]

[Saray litrato ed pahina  4, 5]

Anggaman nanlalapud nanduruman kipapasen na panagbilay iray inmunan Kristiano, sikaray nankakasakey