Tumboken so Pangaligan ya Inletneg nen Jesus

“Inikdan ta kayo na sakey a pangaligan, pian sikayo gawaen yo met so singa ginawak ed sikayo.”​—JUAN 13:15.

1. Akin a si Jesus et matukotukoy a pangaligan na saray Kristiano?

 DIAD interon awaran na katooan, saksakey lambengat a too so nambilay ya agnankasalanan, salanti, si Jesus. Nilikud ed si Jesus et ‘anggapo la so too ya agmankakasalanan.’ (1 Arari 8:46; Roma 3:23) Lapud satan, si Jesus so momoriaen na saray tuan Kristiano bilang naspot a pangaligan da. On, sakbay a tuloy na impatey to nen Nisan 14, 33 K.P., imbagan mismo nen Jesus ed saray patumbok to a sikatoy aligen da. Inkuan to: “Inikdan ta kayo na sakey a pangaligan, pian sikayo gawaen yo met so singa ginawak ed sikayo.” (Juan 13:15) Diad saman ya unor a labi nen Jesus, sinalambit to so pigaran paraan a nepeg a panggunaetan ya aligen ed sikato na saray Kristiano. Diad sayan artikulo et konsideraen tayo so pigara ed saratan.

Nakaukolan so Kapaabebaan

2, 3. Diad antoran paraan a si Jesus et naspot ya ehemplo na kapaabebaan?

² Sanen pinaseseg nen Jesus iray babangatan to a manumbok ed inletneg ton pangaligan, sikato so espisipikon anaglawi ed kapaabebaan. Diad aminpigan agawa, binilin to iray patumbok to a magmaliw a mapaabeba, tan diad samay labi na Nisan 14 et impatnag to so inkapaabeba to diad impanguras to ed salisali na saray apostol to. Insan oniay imbaga nen Jesus: “No siak sirin so Katawan tan Managbangat, et inurasan ko so saray sali yo, sikayo met nepeg yo so manuurasan na sali’ sakey tan sakey.” (Juan 13:14) Kayari na satan, imbaga to ed saray apostol to a tumboken da so pangaligan ya inletneg to. Tan agaylay abig itan ya ehemplo na kapaabebaan!

³ Imbaga nen apostol Pablo ed sikatayo a sakbay na inyakar nen Jesus diad dalin, sikato so ‘niwala unong ed ereng na Dios.’ Anggaman kuan, nilukpos to so inkasikato tan nagmaliw ya abeban too. Nagkalalo ni, sikato so “nampaabeba a nagmaliw a matulok ya anggad say ipapatey, on, say ipapatey ed krus” odino panamairapan a kiew. (Filipos 2:6-8) Isipen pa itan. Si Jesus, a komaduan sankatageyan a persona ed uniberso, so inmabobon a magmaliw a mas abeba nen saray anghel, nianak bilang andiay-depensan ugaw, ombaleg tan manpasakop ed ag-ayadyarin atateng, tan diad kaunoran et ompatey a singa inayew a kriminal. (Colosas 1:15, 16; Hebreos 2:6, 7) Agaylan kapaabebaan itan! Posible kasin naalig  itan a “kalakal” tan nabayuboan so ontan a “kaabebaan na kalakal”? (Filipos 2:3-5) Posible, balet ta aliwan mainomay.

4. Antoray sengegan na pagmamaliw na totoo a makinon, tan akin a mapeligro so inkakinon?

⁴ Say kasunian na kapaabebaan et say kinon odino inkamapaatagey. (Uliran 6:16-19) Inkakinon so sengegan na inkaplag nen Satanas. (1 Timoteo 3:6) Mainomay itan a nabayuboan ed kapusoan na totoo, tan no abayuboan la et mairap itan ya ekalen. Saray totoo so mangikikinon ed bansa ra, rasa ra, kaykayarian da, edukasyon da, agawaan da, say kipapasen da ed sosyedad, say itsura ra, saray abilidad da ed isport, tan dakel niran bengatla. Ingen ta anggapo ed saratan so importante ed si Jehova. (1 Corinto 4:7) Tan no pansengegan la itan na pagmaliw tayon makinon, deralen na satan so relasyon tayo ed sikato. “Anggan si Jehova et atagey wala so panangimano to ed makabos [“mapaabeba,” NW] a too: bangbalet say mankinon kabat to . . . ed arawi.”​—Salmo 138:6; Uliran 8:13.

Magmaliw a Mapaabeba ed Limog na Saray Agagi Tayo

5. Akin ya importantin magmaliw a mapaabeba iray mamatatken?

⁵ Anggan saray nitutulong tan nagagawaan tayo ed serbisyo ed si Jehova so agnepeg a manggawa ed sikatayon makinon, ontan met ed saray responsabilidad tayo ed kongregasyon. (1 Awaran 29:14; 1 Timoteo 6:17, 18) Diad tua, no mas ambelat iray responsabilidad tayo, nakaukolan a mas mapaabeba itayo. Pinaseseg nen apostol Pedro iray mamatatken ya ‘agpakatawan ed nimatalek a nitanda’d sikara, noag ingen gawaen day inkasikara a pinagkauliran a tumboken na saray pulok.’ (1 Pedro 5:3) Saray mamatatken so aturon magmaliw a managlingkor tan ehemplo, aliwan kakatawan.​—Lucas 22:24-26; 2 Corinto 1:24.

6. Diad antoran aspekto na Makristianon kabibilay a nakaukolan tayo so kapaabebaan?

⁶ Aliwa labat a saray mamatatken so nakaukolan a mangipatnag na kapaabebaan. Parad saray kalangweran a lalaki, a nayarin makinon lapud mas maples so panagnonot da tan mas mabiskeg so laman da no ikompara ed saramay maedad la, oniay insulat nen Pedro: “Balkesan yoy inkasikayo na panagpaabeba, a manlilingkoran so sinansakey: ta say Dios kaingli’to so saray atatagey a linawa, et ikdan to na grasya so saray mapaabeba.” (1 Pedro 5:5) On, importante ed amin so singa-Kriston kapaabebaan. Nakaukolan so kapaabebaan pian nipulong so maong a balita, nagkalalo la no nidunget itayo ed agpananginenen odino agpanagrespeto. Nakaukolan so kapaabebaan diad pangawat ed simbawa odino pamasimple ed bilay ta pian napalaknab tayo so pibibiang ed ministeryo. Niarum ni, nakaukolan tayo so kapaabebaan ontan met ed makpel a pananisia sano susungdoan tayo iray panagpauges, legal iran panangataki, odino maramsak a panamasegsegang.​—1 Pedro 5:6.

7, 8. Anto so pigaran paraan a nabayuboan tayo so kapaabebaan?

⁷ Panon a nadaeg na sakey a too so inkakinon pian manugali tekep na ‘kaabebaan na kalakal ya ibilang to so arum a magmaong’ nen say sikato? (Filipos 2:3) Nakaukolan a moriaen toy inkasikato unong ed panmoria nen Jehova ed sikato. Impalinew nen Jesus so suston panmoria ed dili sanen imbaga ton: “Ontan kayo met, sano agawa yo so amin a niganggan ed sikayo, kuan yo, Ariripen  kami, ya andi kakanaan; ginawa mi so nepeg mi a gawaen.” (Lucas 17:10) Tandaan, agtayon balot nagawaan so agawaan nen Jesus. Ingen, si Jesus so mapaabeba.

⁸ Niarum ni, nayarian tayo so patulongan ed si Jehova pian nabayuboan so suston panmoria ed inkasikatayon dili. Singa say salmista, nayarian tayo ya ipikasi: “Bangatan mo ak na maong a panangis-isip, tan kakabatan; ta sinisiak so saray ganggan mo.” (Salmo 119:66) Sikatayo so tulongan nen Jehova pian nabayuboan so makatunongan tan asimbang a panmoria ed inkasikatayon dili, tan bendisyonan to itayo lapud mapaabeban awawey tayo. (Uliran 18:12) Inkuan nen Jesus: “Siopaman a mangitandoro na inkasikato, napaabeba naani; et siopaman a mangipaabeba na inkasikato, nitandoro naani.”​—Mateo 23:12.

Say Manepeg a Panmoria ed Maong tan Mauges

9. Panon so impanmoria nen Jesus ed maong tan mauges?

⁹ Anggaman nambilay si Jesus ed loob na 33 a taon diad limog na ag-ayadyarin totoo, sikato so nansiansian “anggapo so kasalanan.” (Hebreos 4:15) Diad tua, onia so imbaga na salmista sanen nampropesiya nipaakar ed Mesias: “Sika aroen mo so inkatunong, tan gulaen mo so kabaglan.” (Salmo 45:7; Hebreos 1:9) Diad sayan aspekto met et panggugunaetan na saray Kristiano ya aligen si Jesus. Agda lambengat nibiig so maong manlapud mauges noagta kagula ra met so mauges tan inaro ra so maong. (Amos 5:15) Saya so ontutulong ed sikara a mibarangkaan ed nisipor iran makasalanan a tendensia ra.​—Genesis 8:21; Roma 7:21-25.

10. No sikatayo so agmagbabawin manggagawa na “mauges” a bengatla, anton awawey so ipapatnag tayo?

¹⁰ Imbaga nen Jesus ed Fariseon si Nicodemo: “Balang sakey a manggawa na mauges gulaen to so silew et ag-ondago ed silew, ompan nabalaw so saray gawa to. Balet say manggawa na tua ondago ed silew, ta saray gawa to niparungtal ira a sikara so agawa dia ed Dios.” (Juan 3:20, 21) Isipen pa iya: Abidbir nen Juan si Jesus bilang say “tua a silew, salanti, silew a sikato so manilew na balang sakey a totoo.” (Juan 1:9, 10) Balet, imbaga nen Jesus a no agamilen tayo iray “mauges” a bengatla, salanti, saray bengatlan lingo tan ag-abobonan na Dios, bubusolen tayo so liwawa. Nilitrato yo kasi ed isip yo so pamusol ed si Jesus tan ed saray estandarte to? Ingen ta ontan so gagawaen na saramay agmagbabawin manggagawa na kasalanan. Nayarin agda momoriaen iray bengatla ed ontan a paraan balet ta malinew ya ontan so panmoria nen Jesus.

No Panon a Naalig so Panmoria nen Jesus ed Maong tan Mauges

11. Anto so nakaukolan ta pian nabayuboan tayo so panmoria nen Jesus ed maong tan mauges?

¹¹ Nakaukolan tayo so malinew a pakatalos ed no anto so maong tan mauges diad imaton nen Jehova. Nagamoran tayo lambengat itan a pakatalos diad panaral ed Salitay Dios, say Biblia. Legan tayon itutultuloy so manaral, nakaukolan tayo met ya ipikasi so impikasi na salmista: “Iparungtal mo ed siak so saray dalan mo, O Jehova; ibangat mo ed siak so saray basbas mo.” (Salmo 25:4) Balet, nodnonoten a mapalikdo si Satanas. (2 Corinto 11:14) Sarag ton umanen tan pagmaliwen a singano duga so mauges diad imaton na sakey ya agmaalwar a Kristiano. Kanian, nakaukolan tayon dalepdepen a maong so naaaralan tayo tan maapit a tumboken so simbawa na “matoor tan makabat ya aripen.” (Mateo 24:45-47) Say panagaral, pikakasi, tan panagdalepdep ed naaaralan tayo so ontulong pian ontakken itayo ed espiritual tan magmaliw itayon kabiangan na saramay “lapud panangagamil, saray pakalikna  ra apasal ed panangibiig na maong tan mauges.” (Hebreos 5:14) Diad ontan et nipasal itayo a manggula ed mauges tan mangaro ed maong.

12. Anton simbawa na Biblia so ontulong ed sikatayo pian ag-itayo manggawa na kaugsan?

¹² No kabusol tayo so mauges, agtayo abuloyan a nabayuboan ed kapusoan tayo so pilalek ed mauges iran bengatla. Kayari na dakel a taon manlapud impatey nen Jesus, oniay insulat nen apostol Juan: “Aleg ya aroen yo so mundo, ni saray bengatla a wala ed mundo. No siopaman a too aroen to so mundo say aro na Ama andi ed sikato. Ta amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo.”​—1 Juan 2:15, 16.

13, 14. (a) Akin a say panangaro ed saray bengatla ed mundo so mapeligro ed saray Kristiano? (b) Panon tayon napaliisan so pangaro ed saray bengatla ed mundo?

¹³ Nayarin ikatunongan na arum a totoo ya aliwan amin a bengatla ed mundo et mauges. Anggaman tua itan, say mundo tan saray pakasagyatan ditan so mainomay a mangisuawi ed sikatayo manlapud panagserbi ed si Jehova. Tan anggapo so niyoopresi na mundo a mamaapit ed sikatayo ed Dios. Kanian, no naaaro tayo la iray bengatla ed mundo, anggan saray bengatlan agmet mauges, sikatayoy mankukurang a mapeligro. (1 Timoteo 6:9, 10) Nilikud ni ed satan, maslak ed mundo et talagan mauges tan nayarin mangapekta ed sikatayo. No manbabantay itayo na saray pelikula odino programa ed telebisyon a mangipaparungtal na karawalan, materyalismo, odino seksual ya imoralidad, saratan so nayarin awaten tayo la tan magmaliw a tukso ed sikatayo. No milimog itayo ed totoon say manunan interes da et say iyaligwas na estilo na kabibilay da odino iyasenso na negosyo ra, saratan a bengatla so magmaliw met lan manunaan ed sikatayo.​—Mateo 6:24; 1 Corinto 15:33.

¹⁴ Diad biek a dapag, no panliketan tayo so Salita nen Jehova, agmagmaliw a makapasagyat ed sikatayo so “kilalawan na laman tan kilalawan na mata tan maapan gloria na bilay.” Niarum ni, no milimog itayo ed saramay mangiyuuna ed intereses na Panarian na Dios, magmaliw itayon singa sikara, a mangaro ed aaroen da tan ompaliis ed papaliisan da.​—Salmo 15:4; Uliran 13:20.

15. Singa ed kipapasen nen Jesus, panon itayon napabiskeg diad pangaro ed inkatunong tan panggula ed kaugsan?

¹⁵ Say panggula ed kaugsan tan pangaro ed inkatunong so akatulong ed si Jesus pian niteen to so imano to ed “gayaga a niyan ed arap to.” (Hebreos 12:2) Tua met itan natan. Amta tayo a “say mundo mangangga, tan saray penel to.” Temporaryo lambengat so antokaman a panliketan ya iyoopresi na sayan mundo. Balet, samay “mangunor ed linawa na Dios onsiansia lawas.” (1 Juan 2:17) Lapud ginawa nen Jesus so linawa na Dios, inlukas to ed totoo so dalan pian nagamoran da so andi-anggaan a bilay. (1 Juan 5:13) Komon ta sikatoy aligen tayo ta pian nagunggonaan ed impanmatoor to.

Pansungdo ed Panamasegsegang

16. Akin a pinaseseg nen Jesus iray patumbok to a manaaroan ira?

¹⁶ Impabitar nen Jesus so sananey nin bengatla ya aligen ed sikato na saray babangatan to, a kuanto: “Saya so ganggan ko, a manaaroan so sakey tan sakey ed sikayo, salanti singa impangarok ed sikayo.” (Juan 15:12, 13, 17) Dakel so rason no akin ya aroen na saray Kristiano so agagi ra. Diad sayan kipapasen, say manunan walad kanonotan nen Jesus et say panagbusol ya arapen da ed mundo. Oniay inkuan to: “No say mundo busolen to  kayo, amta yo a binusol to ak ya akauna nen sikayo. Say aripen aliwan babaleg nen say katawan to. No pinasegsegang da ak, pasegsegangen da kayo met.” (Juan 15:18, 20) On, anggan sano napasegsegang ira, saray Kristiano et singa si Jesus. Nakaukolan a bayuboan da so mabiskeg tan maaron siglaotan ed balang sakey pian nasungdoan da itan a panagbusol.

17. Akin a bubusolen na mundo iray tuan Kristiano?

¹⁷ Akin a busolen na mundo iray Kristiano? Lapud aliwa iran “taga-mundo,” a singa si Jesus. (Juan 17:14, 16) Neutral ira ed guerra tan politika, tan susumpalen da iray prinsipyo na Biblia, a rerespetoen da so inkasagrado na bilay tan pansiasiansiaen da so atagey iran estandarte ed moral. (Gawa 15:28, 29; 1 Corinto 6:9-11) Saray manunan kalat da et maespiritual, aliwan materyal. Manaayam ira ed mundo, balet unong ed insulat nen Pablo, ‘agda itan aagamilen ya alabas.’ (1 Corinto 7:31) Tua, arum so angibalikas na pandinayew da ed saray atagey ya estandarte na saray Tasi nen Jehova. Balet agmikokompromiso iray Tasi nen Jehova pian pandinayewan odino pian awaten na arum. Bilang resulta, sikara so agnatatalosan na maslak a totoo ed mundo, tan dakel so mamubusol ed sikara.

18, 19. Diad panumbok ed pangaligan ya inletneg nen Jesus, panon ya arapen na saray Kristiano so isusumpa tan panamasegsegang?

¹⁸ Naimatonan na saray apostol nen Jesus so pambusol a maong na mundo sanen inerel tan impapatey si Jesus, tan anengneng da met no panon ton inarap itan a panagbusol. Diad hardin na Getsemani, si Jesus so inerel na saray relihyoson kakabusol to. Sinali nen Pedro ya iyagel si Jesus, balet oniay imbaga to ed si Pedro: “Ipawil mo so kampilan mo ed pasen to; ta saray amin a mangala na kampilan ompatey ira naani ed kampilan.” (Mateo 26:52; Lucas 22:50, 51) Nensaman a panaon, akibakal iray Israelita ed saray kakabusol da panamegley na kampilan. Balet ta duma la natan so kipapasen. Say Panarian na Dios et ‘aliwan kabiangan na mundo’ tan andian itan na saray nasyonal a ketegan a protektaan. (Juan 18:36) Agnambayag, si Pedro so nagmaliw a kabiangan na espiritual a nasyon, a saray membro na satan et walaan na mangatatawen a pibabaley. (Galacia 6:16; Filipos 3:20, 21) Kanian manlapud saman, arapen na saray patumbok nen Jesus so panamusol tan panamasegsegang diad makpel tan mareen a paraan, singa ginawa nen Jesus. Nepeg a matalek dan ipalima ed si Jehova so pansumpalan na saray pamaakaran tan manilalo ira ed sikato parad biskeg pian makapansungdo ira.​—Lucas 22:42.

¹⁹ Kayari na pigaran taon, oniay insulat nen Pedro: “Si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to. . . . Sanen ayew-ayewen da agto binmales ya angayew; sanen apadpairap agnan-ingongot; noag ingen inmatalek to so laman to ed manangiter na tunong.” (1 Pedro 2:21-23) Unong ed impasakbay nen Jesus, naeksperiensya na saray Kristiano so maruksan panamasegsegang diad ilabas na saray taon. Nen inmunan siglo tan diad panaon tayo, tinumbok da so ehemplo nen Jesus tan amawala ira na alay abig a rekord na matoor a panagsungdo, ya impatnag dan mareen ira ya amemben ed katooran da. (Apocalipsis 2:9, 10) Komon ta ontan met so gawaen tayon amin sano kakaukolanen na saray kipapasen.​—2 Timoteo 3:12.

“Ikawes Yo so Katawan Tayo a Jesu-Kristo”

20-22. Panon a saray Kristiano et ‘nikawes da so Katawan tayon Jesu-Kristo’?

²⁰ Oniay insulat nen Pablo ed kongregasyon ed Roma: “Ikawes yo so Katawan tayo a Jesu-Kristo, tan agyo papagaan so laman.” (Roma 13:14) Si Jesus so isusulong na saray Kristiano a singano kawes. Panggugunaetan dan aligen iray kalidad tan kiwakiwas to anggad punton nipatnag da la so Katawan da, anggaman ag-ira ayadyari.​—1 Tesalonica 1:6.

 ²¹ Matalona tayon ‘nikawes so Katawan tayo a Jesu-Kristo’ no nakabisado tayo so impanbilay to tan panggunaetan tayo so manbilay a singa sikato. Aaligen tayo so kapaabebaan to, say aro to ed inkatunong, say panggula to ed inkauges, say panangaro to ed agagi to, say impagmaliw ton agkabiangan na mundo, tan say maanos ya impansungdo to ed kairapan. Ag-itayo manplaplano odino ‘manpapaga parad laman,’ salanti, agtayo gagawaen a manunan gagala tayo ed bilay so pakadampot ed sekular iran kalat odino pamenek ed kagletan na laman. Imbes, sano manggawa itayo na desisyon odino arapen tayo so sakey a problema, oniay itepet tayo: ‘Anto so gawaen nen Jesus no onia so kipapasen? Anto so labay nen Jesus a gawaen ko?’

²² Diad kaunoran, aaligen tayo si Jesus no mansiansia itayon okupado ed ‘panangipulong ed ebanghelyo.’ (Mateo 4:23; 1 Corinto 15:58) Diad ontan met a paraan, tutumboken na saray Kristiano so pangaligan ya inletneg nen Jesus, tan singbaten diad ontumbok ya artikulo no panon.

Kasin Nipaliwawa Yo?

• Akin ya importante a magmaliw a mapaabeba so sakey a Kristiano?

• Panon tayon nabayuboan so manepeg a panmoria ed maong tan mauges?

• Diad anton paraan ya aaligen na saray Kristiano si Jesus sano aarapen da so isusumpa tan panamasegsegang?

• Panon a posible a ‘nikawes so Katawan a Jesu-Kristo’?

[[Tepetepet Parad Panagaral]

[Litrato ed pahina 7]

Inletneg nen Jesus so naspot ya ehemplo na kapaabebaan

[Litrato ed pahina 8]

Nakaukolan so kapaabebaan diad amin ya aspekto na bilay na Kristiano, kalaktip lay panagpulong

[Litrato ed pahina 9]

Nayarian nen Satanas a gawaen a singa duga so sakey ya agmanepeg a panliliket diad imaton na sakey a Kristiano

[Litrato ed pahina 10]

Say panangaro na saray agagi so mamabiskeg ed sikatayo sumpad isusumpa