Ag-itayo la Manbilay Parad Inkasikatayon Dili

‘[Si Kristo] so inatey lapud amin, pian saray manbilay ag-ira manbilay komon na andukdukey parad sikaran dili.’​—2 CORINTO 5:15.

1, 2. Anton Makasulatan a ganggan so amakiwas ed saray inmunan-siglon patumbok nen Jesus a manaeg ed inkasiblet?

 KAUNORAN lan labi nen Jesus ed saman diad dalin. Pigaran oras labat la et iter to lay bilay to nisesengeg ed amin a mangagamil na pananisia ed sikato. Diad saman a labi et dakel ya importantin bengatla so imbaga nen Jesus ed saray matoor ya apostol to. Sakey la ed saratan et say ganggan nipaakar ed kalidad a pakabidbiran ed saray patumbok to. “Sakey a balon ganggan so iter ko ed sikayo,” so inkuan to, “a manaaroan so sakey tan sakey ed sikayo; salanti unong na impangarok ed sikayo, pian manaaroan met so sakey tan sakey ed sikayo. Lapu ed saya amin a too nabidbiran da a sikayoray babangatan ko, no wala so aro yo ed sakey tan sakey.”​—Juan 13:34, 35.

² Nepeg ya ipatnag na saray tuan Kristiano so aron walaay panangisakripisyo ed dili parad balang sakey tan iyuna da iray pankaukolan na kapananisiaan da. Nepeg ni ingen ya ag-ira masuyat a ‘mangitalaga ed bilay da parad kakaaro ra.’ (Juan 15:13) Panon so inkiwas na inmuunan Kristiano ed balon ganggan? Dia ed bantog a sulat ton Apology, say managsulat nen komaduan siglo a si Tertullian so angaon ed imbaga na arum nipaakar ed saray Kristiano: ‘Nengneng yo no panon so panangaro ra ed balang sakey; no panon ya akaparaan ni ingen ira ya ompatey parad sakey tan sakey.’

3, 4. (a) Akin a nepeg tayon talonaan so inkasiblet? (b) Anto so aralen tayo ed sayan artikulo?

³ Nepeg met a “mantatarokan [itayo] na awit na sinansakey, tan sumpalen [tayo] ya ontan so ganggan nen Kristo.” (Galacia 6:2) Balet ta say inkasiblet so sakey ed sankabalegan iran babeng diad pangunor ed ganggan nen Kristo tan ‘pangaro ed Katawan a Dios tayo ed masimoon a puso, kamarerwa, tan nonot tayo tan pangaro ed kapara tayon too unong ed sikatayon dili.’ (Mateo 22:37-39) Lapud ag-itayo ayadyari, sikatayo so walaan na tendensian magmaliw a masiblet. Niarum ni,  onloloor itan ya ag-ayadyarin tendensia lapud pakadedetdetan ed inagew-agew a panagbilay, say kompetensiaan ed eskuelaan odino diad pantratrabahoan, tan say pantatalikarkar pian manbilay. Ompapalalo iyan tendensia na inkasiblet. Oniay impasakbay nen apostol Pablo: “Dia ed saray kaunoran ya agew . . . saray totoo sikara naani so mangaro ed saray lamalaman da.”​—2 Timoteo 3:1, 2.

⁴ Diad kaunoran a parte na mangaraldalin a ministeryo nen Jesus, inter to ed saray babangatan to so nankatlon proseso a makatulong ed sikara pian nadaeg da so inkasiblet. Anto itan, tan panon itayon nagunggonaan ed saray imbilin to?

Sakey ya Epektibon Pangontra!

5. Sanen manpupulong si Jesus ed amianen a Galilea, anto so impaamta to ed saray babangatan to, tan akin a makapabigla itan ed sikara?

⁵ Si Jesus so nampulong ed amianen a Galilea ya asingger ed Cesarea Filipos. Sayan mareen tan alay dakep a lugar so ompatnag a mas matukoy a pampasyaran nen say pakaaralan na pangiburi ed dili. Balet sanen wadman si Jesus, imparungtal to ed saray babangatan to a “kaukolan toy onla ed Jerusalem, tan mantepel na amayamay a bengatla ed saray mamasiken, tan manunaan day saserdote tan saray eskribas, tan sikatoy pateyen da et diad komatlon agew onoli ed bilay.” (Mateo 16:21) Talagan makapabigla itan ed saray babangatan nen Jesus, lapud say abaloan da et iletneg la na Lider da so Panarian to ed dalin diad saman a panaon!​—Lucas 19:11; Gawa 1:6.

6. Akin a mapuersan binaat nen Jesus si Pedro?

⁶ Si Jesus so tampol ya “inala nen Pedro, tan ginapoan ton banoen, a kuanto, Sikato so niarawi komon ed sika [“Kasian mo so inkasika,” NW], Katawan; saya agkomon nagawa anggan kapigan ed sika.” Panon so inkiwas nen Jesus? “[Sikatoy] linmingay tan inkuan to ed Pedro, Ekal ka’d arap ko, Satanas; sikay sakey a makapagapol ed siak: ta agmo nononoten iray bengatlan nipaakar ed Dios, noag saray bengatlan nipaakar ed saray totoo.” Agaylay pandumaan na awawey dan dua! Si Jesus so mabulos a mangisakripisyo ed sikaton dili lapud satan so pagagawa na Dios ed sikato, sakey a kurang a diad loob na pigaran bulan et mangitonton ed ipapatey to ed panamairapan a kiew. Balet say irerekomenda nen Pedro et say mainawan kurang. “Kasian mo so inkasika,” so inkuan to. Andi-duaruwa a maabig iray getma nen Pedro. Balet, sikato so binaat nen Jesus lapud diad satan ya inkagawa et nampaimpluensya si Pedro ed si Satanas. Si Pedro et ‘agnannonot ed saray bengatlan nipaakar ed Dios, noag saray bengatlan nipaakar ed saray totoo.’ ​—Mateo 16:22, 23.

7. Unong a nikurit ed Mateo 16:24, anton kurang so indatak nen Jesus a nepeg a gawaen na saray patumbok to?

⁷ Satan ya imbaga nen Pedro ed si Jesus so mipadpara met ed saray walad kanonotan na totoo natan. Naynay ya ipupurek na mundo ed too a ‘kasian moy inkasika’ odino ‘gawam so sankainomayan parad sika.’ Diad biek a dapag, inrekomenda nen Jesus so midumaan a tuloy a panag-isip. Oniay inkuan to ed saray babangatan to: “No say siopaman a too et labay toy ontumbok ed siak benegan toy dili ya inkasikato, et alaen toy krus to [“sakbaten toy panamairapan a kiew to,” NW], tan tumboken to ak.” (Mateo 16:24) “Saratan a salita et aliwan imbitasyon parad saramay aliwa nin babangatan,” so inkuan na The New Interpreter’s Bible, “noagta panamaseseg ed saramay tinmumbok la ed tawag nen Kristo pian umamengen so kabaliksan na impagmaliw dan babangatan.” Unong a nisulat ed satan a teksto, say taloran kundang ya indatak nen Jesus so nepeg a tumboken na saray mananisia. Sansakeyen tayon aralen so kada kundang.

8. Ipaliwawa no anto so kabaliksan na pangibeneg yo ed inkasikayon dili.

⁸ Unona, nepeg tayon iburi odino benegan so inkasikatayon dili. Say Griegon salita parad ‘benegan toy inkasikaton dili’ so mangipapabitar ed inkamabulos a mangipulisay ed sinisiblet iran pilalek odino personal iran bentaha. Say pangibeneg tayo ed sikatayon dili so aliwa lambengat a  sagpaminsan a pangisakripisyo ed pigaran panliliket; nisay mankabaliksan itan na pagmaliw ya ermitanyo odino pamairap ed dili. Agtayo la ‘kien so inkasikatayon dili’ diad pantalos a mabulos tayon iter so interon bilay tayo tan say amin a bengatla parad si Jehova. (1 Corinto 6:19, 20) Imbes a say pinonot tayo et dili tayo, nepeg ya akasentro so bilay tayo ed panaglingkor ed Dios. Say pangibeneg tayo ed inkasikatayon dili so mangipatnag ed determinasyon tayon manggaway linawa na Dios, anggaman satan so nayarin misumlangan ed ag-ayadyarin tendensia tayo. Nipanengneng tayo a nikabkabiig so debosyon tayo ed Dios sano manggawa itayo na dedikasyon ed sikato insan manpabautismo. Pampelengan tayo sirin a sumpalen so dedikasyon tayo ed interon bilay tayo.

9. (a) Sanen wadiad dalin si Jesus, anto so irerepresenta na panamairapan a kiew? (b) Diad anton paraan so panakbat tayo ed panamairapan a kiew tayo?

⁹ Say komaduan kundang et nepeg tayon sakbaten so panamairapan a kiew tayo. Nen inmunan siglo, say panamairapan a kiew et mangirerepresenta ed kairapan, kababaingan, tan ipapatey. Kaslakan a saray kriminal lambengat so papateyen ed panamairapan a kiew odino ibibitin iray bangkay da ed sakey a palitek. Diad satan a balikas, impabitar nen Jesus a nepeg ya akaparaan so sakey a Kristiano a managmak na panamasegsegang, panagbusol, odino ipapatey ni ingen, lapud sikatoy agkabiangan na mundo. (Juan 15:18-20) Nibibiig itayo lapud saray estandarte tayo bilang Kristiano, kanian say mundo so nayarin ‘mamabanday ed sikatayo.’ (1 Pedro 4:4) Saya so nayarin nagawa ed eskuelaan, diad pantratrabahoan tayo, odino anggan diad loob na pamilya. (Lucas 9:23) Anggaman kuan, sikatayo so mabulos a mansungdo ed panagbusol na mundo lapud ag-itayo la manbibilay parad inkasikatayon dili. Oniay imbaga nen Jesus: “Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpad sikayo, nisengeg ed siak, a mantila ra. Manggayaga kayo tan manliket kayon mapalalo; ta balbaleg so tumang yo ed tawen.” (Mateo 5:11, 12) On, sankaimportantian so pakawalaan na panangabobon na Dios.

10. Anto so nalalanor ed pantultuloy ya itumbok ed si Jesus?

¹⁰ Komatlo, imbaga nen Jesus a nepeg itayon mantultuloy ya ontumbok ed sikato. Unong ed An Expository Dictionary of New Testament Words, nen W. E. Vine, say itumbok et mankabaliksan na pagmaliw a kaulop​—“say sakey a mamapaarap ed parehon direksion.” Oniay kuan na 1 Juan 2:6: “Say mankuan a mansiansia ed [Dios], nepeg to so manakar a singa impanakar [nen Kristo].” Panon so impankurang nen Jesus? Say aro nen Jesus ed mangatatawen ya Ama to tan ed saray babangatan to so angamper ed pagmaliw ton masiblet. Oniay insulat nen Pablo: “Si Kristo met agto pinaliket so inkasikaton dili.” (Roma 15:3) Anggano naksawan odino narasan si Jesus, inyuna to iray pankaukolan na arum imbes a saray pankaukolan to. (Marcos 6:31-34) Nansagpot met a maong si Jesus diad panangipulong ed Panarian tan ed panagbangat a kimey. Agta sikatoy nepeg tayon aligen legan a maseseg tayon susumpalen so ganggan ed sikatayo a ‘manggawa na babangatan ed amin a totoo na nasyones, a bangatan ira a mangunor ed amin a bengatlan ingganggan nen Jesus’? (Mateo 28:19, 20) Diad amin a ginawa nen Kristo, sikatoy angitilak na pangaligan tayo, tan nepeg tayon ‘tumboken a maapit so bakat to.’​—1 Pedro 2:21.

11. Akin ya importante a benegan tayoy inkasikatayo, sakbaten so panamairapan a kiew tayo, tan mantultuloy a tumboken si Jesu-Kristo?

¹¹ Importante a benegan tayoy inkasikatayon dili, sakbaten so panamairapan a kiew tayo, tan mantultuloy a tumboken so Ehemplo tayo. Say panggawa tayo ed satan so mangontra ed inkasiblet​—say mangaamper ed panangipatnag na aron atekepay dilin-panangisakripisyo. Niarum ni, oniay imbaga nen Jesus: “Siopaman a mangilaban komon na bilay nabalang to naani; et siopaman a makabalang naani na bilay to nisengeg ed siak sikatoy naalmo to. Ta anto tay pinanabang na sakey a too, no naala toy sankamundoan, et nabalang toy bilay to? Ono anto kasi iter na too ya isandi to’d bilay to?”​—Mateo 16:25, 26.

Agtayo Makapanlingkor ed Duaran Katawan

12, 13. (a) Anto so mas importante parad say malangwer a manuley a kinmerew na bilin ed si Jesus? (b) Anto so insimbawa nen Jesus ed malangwer a laki, tan akin?

¹² Kayari na pigaran bulan sanen indanet nen Jesus ed saray babangatan to a nakaukolan dan ibeneg so inkasikaran dili, walay mayaman tan  malangwer a manuley ya inmasingger ed sikato tan angikuan: “Managbangat, antoy maong a bengatlan gawaen ko, ta pian nagamoran koy bilay a maando?” Imbaga nen Jesus ed sikato ya itultuloy ton ‘unoren iray ganggan’ insan inaon to so arum ed saratan. Oniay inkuan na malangwer a laki: “Amin so saraya inuunor ko ra.” Say laki so ompatnag a masimoon tan ginawa to lay anggaay nayarian to pian unoren iray nidatak ed Ganggan. Kanian oniay intepet to: “Dinan ni kakulangan ko?” Bilang ebat, innatnat nen Jesus ed kalangweran a laki so nikadkaduman imbitasyon, a kuan to: “No pirawat mo so kayadyarim, laka, ilakom so walad sika, tan iter mo’d saray duruka, et wala naani kayamanan mo ed tawen; et gala, tumbok mo ak.”​—Mateo 19:16-21.

¹³ Atebek nen Jesus a say manepeg a gawaen na malangwer a laki pian makapanlingkor ed si Jehova ed interon-kamarerwa to et say pangekal to ed baleg a pakasbelan ed bilay to​—say materyal a kayamanan to. Say tuan babangatan nen Kristo so agmakapanlingkor ed duaran katawan. Agto “nayarian so manlingkor ed Dios tan saray kayamanan.” (Mateo 6:24) Nakaukolan to so ‘maralus a mata’ ya akasentro ed espiritual iran pamaakaran. (Mateo 6:22) Sakey a gawa na dilin-panagsakripisyo so pangipulisay na sakey ed saray kaykayarian to tan iter iratan ed saray mairap-bilay. Bilang kasalat ed satan a panangisakripisyo ed materyal, inyopresi nen Jesus ed malangwer a manuley so mablin pribilehyo a pantipon na kayamanan ed tawen​—sakey a kayamanan a mangitonton ed sikato diad andi-anggaan a bilay tan ed ilalon manuley a kaiba nen Kristo diad tawen. Say kalangweran a laki so ag-akaparaan a mangibeneg ed inkasikaton dili. Sikato so “linma la a maermen a tuloy; ta sikatoy sakey a walaan na baleg a kaykayarian.” (Mateo 19:22) Balet, duma so inkiwas na arum iran patumbok nen Jesus.

14. Panon so inkiwas na apatiran managsigay ed imbitasyon nen Jesus ya ontumbok ed sikato?

¹⁴ Manga duay taon ni ed akadkauna, innatnat la nen Jesus so ontan ya imbitasyon ed apatiran managsigay a manngaray Pedro, Andres, Santiago, tan Juan. Duara ed sikara so mansisigay ed saman, tan say duara met et okupadon mangaapiger ed saray iket da. Oniay inkuan nen Jesus ed sikara: “Tumbo’ kayo ed siak, tan gawaen ta kayon sumisigay na totoo.” Sikaran apat so anaynan a siansia ed anapan dan panagsigay tan tinmumbok ira ed si Jesus diad interon nakekeraan a bilay da.​—Mateo 4:18-22.

15. Panon so impansakripisyo na sakey a Tasi nen Jehova ed modernon panaon pian ontumbok ed si Jesus?

¹⁵ Dakel a Kristiano natan so angalig ed alimbawa na apatiran managsigay imbes a say alimbawa na mayaman tan malangwer a manuley. Insakripisyo ra so kayamanan tan pankanawnawan onaligwas ed sayan mundo ta pian makapanlingkor ira ed si Jehova. “Sanen 22 años ak, kinaukolan ko so manggawa na baleg a desisyon,” so inkuan nen Deborah. Oniay insalaysay to: “Nanaral ak na Biblia ed ngalngali anem bulan, tan labay kon idedika so bilay ko ed si Jehova, balet ta onsusumpan maong ed siak so pamilyak. Milyonaryo ira, tan isipen da a say pagmaliw kon Tasi et mangiter ed sikara na kababaingan. Inikdan da ak na 24 oras pian mandesisyon no dinan so pilien ko​—bilay a main-inawa odino say katuaan. No agak ontunda a milimog ed saray Tasi, anggapo so ipatawir ed siak na pamilyak. Tinulongan ak nen Jehova a manggawa na dugan desisyon tan pinabiskeg to ak  pian nagawaan ko itan. Natan et 42 a taon ko la ed sigpot-panaon a serbisyo, tan anggapon balot so pagbabawian ko. Diad impangipulisay ko ed sinisiblet tan mapaglet ed liket ya estiloy-kabibilay, apaliisan ko so andiay-gagala tan agmaliket a panagbilay a naiimatonan ko ed saray kapamilyaan ko. Kaibak so masiken ko, atulongan ko so masulok a sanlasus a totoo a makapanaral na katuaan. Sarayan espiritual ya ananak so mas mabli ed siak nen say antokaman a materyal a kaykayamanan.” Ontan met so liknaan na minilyon niran Tasi nen Jehova. Komusta ka balet ey?

16. Panon tayon nipatnag ya agtayo la manbibilay parad inkasikatayon dili?

¹⁶ Say pilalek ya agla manbilay parad inkasikaran dili et amakiwas ed nilibon Tasi nen Jehova pian manlingkor bilang payunir, odino sigpot-panaon a manangiyabawag na Panarian. Balet saray arum, ya ag-iyabuloy na kipapasen da so pibiang ed sigpot-panaon a ministeryo, so amayubo ed espiritu na panagpayunir tan anuporta ed panangipulong ed Panarian diad anggaay nayarian da. Ontan met so awawey na atateng sano manguusar ira na dakel a panaon da tan isasakripisyo da iray personal ya interes da pian nipasal ed espiritual so ananak da. Diad pigaran paraan et nipatnag tayon amin ya iyuuna tayo ed bilay tayo iray intereses na Panarian.​—Mateo 6:33.

Siopan Aro so Mamapakiwas ed Sikatayo?

17. Anto so mamakiwas ed sikatayo pian mansakripisyo?

¹⁷ Say pangipatnag na aro ya atekepan na dilin-panagsakripisyo so aliwan mainomay a tumboken. Balet isipen pa no anto so mamapakiwas ed sikatayo. Oniay insulat nen Pablo: “Say aro nen Kristo pasooten to kami; ta isipen mi, a no inatey so sakey lapu ed amin, . . . Tan sikato so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara tan inmolin binmilay lamet.” (2 Corinto 5:14, 15) Say aro nen Kristo so mamakiwas ed sikatayo ya agla manbilay parad inkasikatayon dili. Talagan mabiskeg itan a manamakiwas! Lapud inatey si Kristo parad sikatayo, agta natebek tayo met so moral ya obligasyon tayo a manbilay parad sikato? On, say pisalsalamat tayo lapud kinaaralem na aro ed sikatayo na Dios tan si Kristo so mamakiwas ed sikatayon mangidedika na bilay tayo ed Dios tan magmaliw a babangatan nen Kristo.​—Juan 3:16; 1 Juan 4:10, 11.

18. Akin a makagunggona so kurang a dilin-panagsakripisyo?

¹⁸ Kasin makagunggona so agtayo la pambilay parad inkasikatayon dili? Sanen ag-inawat na mayaman tan malangwer a manuley so imbitasyon nen Kristo tan inmalis la, oniay inkuan nen Pedro ed si Jesus: “Nia, sikami tinaynan mi ya amin, tan tinumbok mi ka; anto sirin so wala naani ed sikami?” (Mateo 19:27) Si Pedro tan saray arum ya apostol so peteg ya angibeneg ed inkasikaran dili. Anto so magmaliw a tumang da? Say unonan sinaglawi nen Jesus et say pribilehyo ran manuley a kaiba to diad tawen. (Mateo 19:28) Diad saman met a kipapasen, tinukoy nen Jesus iray bendisyon a panggayagaan na kada sakey ed saray patumbok to. Oniay inkuan to: “Anggapoy too ya anaynan na abung, ono agagin lalaki, ono agagin bibii, ono ina, ono saray anak, ono daldalin, nisengeg ed siak, tan nisengeg ed ebanghelyo. Ingen awaten to so maminlasus natan ed sayan panaon . . . tan dia ed mundo ya onsabi say bilay a maando.” (Marcos 10:29, 30) Mas dakel ni so nagamoran tayo nen say insakripisyo tayo. Agta mabmabli ni iray espiritual ya ama, ina, agagin bibii, agagin lalaki, tan ananak nen say antokaman ya insakripisyo tayo nisesengeg ed Panarian? Siopa so awalaan na makatumang a tuloy a bilay​—si Pedro odino samay mayaman tan malangwer a manuley?

19. (a) Anto so akadependian na tuan liket? (b) Anto so konsideraen ed ontumbok ya artikulo?

 ¹⁹ Diad panamegley na saray salita tan gawa nen Jesus, impatnag to a nagamoran so liket diad pangiter tan panlingkor, aliwan diad inkasiblet. (Mateo 20:28; Gawa 20:35) No ag-itayo la manbilay parad sikatayon dili insan mantultuloy tayon tumboken si Kristo, naeksperiensya tayo so baleg a liket ed bilay natan tan nawalaan itayo na ilalon andi-anggaan a bilay diad arapen. Siempre, sano iburi tayo so inkasikatayo, si Jehova la so magmaliw a Makankayarian ed sikatayo. Magmaliw itayo la sirin ya ariripen to. Ingen ta akin a makatumang so pagmaliw ya aripen to? Panon itan a mangapekta ed saray desisyon tayo ed bilay? Saratan a tepet so singbaten ed ontumbok ya artikulo.

Kasin Natandaan Yo?

• Akin a nepeg tayon daegen iray sinisiblet a tendensia?

• Anto so kabaliksan na pangibeneg ed dili, panakbat ed panamairapan a kiew, tan tuloytuloy ya itumbok ed si Jesus?

• Anto so mamakiwas ed sikatayo pian ag-itayo la manbilay parad sikatayon dili?

• Akin a makagunggona so pambilay a walaan na dilin-panagsakripisyo?

[Tepetepet Parad Panagaral]

[Litrato ed pahina 11]

“Kasian mo so inkasika, Katawan”

[Litrato ed pahina 13]

Anto so akasbel ed malangwer a manuley pian ontumbok ed si Jesus?

[Saray litrato ed pahina 15]

Say aro so mamapakiwas ed saray Tasi nen Jehova pian manlingkor bilang maseseg a manangiyabawag na Panarian