‘Say Tulong Ko et Manlalapu ed si Jehova’

Maabig so Kalidad na Bilay na Saray Kalangweran a Mandadayew ed si Jehova

“LABAY kon nagamoran iray sankaabigan a bengatla ed bilay!” Ontan so impaneskribe na sakey a tin-edyer a laki ed saray iilaloan to. Balet panon a nayarin nagamoran na sakey a kalangweran iray sankaabigan a bengatla ed bilay? Mangitatarya na malinew ya ebat so Biblia: ‘Nonot mo so Manamalsam dia ed agew na inkaugaw mo.’​—Eclesiastes 12:1.

Say pandayew tan panlingkor ed si Jehova et aliwa labat a parad saray wala la’d edad. Si Samuel, ya anak di Elkana tan Ana, so uga-ugaw ni sanen nanlingkor ed si Jehova diad tabernakulo. (1 Samuel 1:19, 20, 24; 2:11) Impatnag na sakey nin malangwer a biin Hebreo so naspot a pananisia to ed si Jehova sanen insuheri to a say hepe na armada na Sirya a si Naaman et onla ed propetan si Eliseo ta pian napaabig so kating to. (2 Arari 5:2, 3) Diad Salmo 148:7, 12, parehon igaganggan iray tobonbalon lalaki tan bibii a mangidayew ed si Jehova. * Sanen 12 años ni labat nen Jesus, sikatoy interesadon maong ed panlingkor ed si Ama to. (Lucas 2:41-49) Lapud inkipasal na pigaran ugugaw manlapud Kasulatan, oniay inkelyaw da sanen anengneng day Jesus diad templo: “Hosanna ed [“Mangiliktar ka, pikasi mi,” NW] anak nen David!”​—Mateo 21:15, 16.

Pangidadayew ed si Jehova Natan

Natan et ikikinon na dakel a kalangweran ed limog na saray Tasi nen Jehova iray sisiaen da tan makpel dan itotongtong iratan ed arum dia ed eskuelaan tan ed inerman a pasen. Konsideraen pa so duaran alimbawa.

Diad Britanya, sisingbaten ed klase di Stephanie a 18 años so aborsion tan arum niran isyu nipaakar ed moral. Impilit na maestro ya aawaten la natan na karaklan so aborsion kanian anggapo lay nikatunongan na sakey a malangwer a bii pian ag-onabobon ed satan ya agamil. Sanen akipakna so interon klase ed satan a panmoria, apaskar si Stephanie a mangidepensa ed talindeg to a nibase’d Biblia. Niwala itan a pankanawnawa sanen tinepetan na maestro si Stephanie no antoy opinyon to. Anggaman nanenerbiyos ed gapo, inanamot nen Stephanie so pankanawnawa pian ipresenta so Makasulatan a panmoria. Indalatdat to so akasulat ed Exodo 21:22-24 tan impaliwawa to a no mauges so pamasakit ed agni nianak ya ugaw, say aborsion sirin et mabitar a sumlang ed linawa na Dios.

Satan a teksto so agnin balot abasa na maestro, a sakey a membro na klero. Say makpel ya impantasi nen Stephanie so angitonton ed dakel a maabig ya impakapitongtong ed saray kaklase to nipaakar ed nanduruman tema. Bilang resulta, walay sakey a biin kaklase to a regular la natan a mangaawat na sankabaloan iran paway na Say Panag-Bantayan tan Awake!, tan duara ni so inmatendi ed distriton kombension na saray Tasi nen Jehova pian imatonan so pampabautismo nen Stephanie bilang simbolo na dedikasyon to ed Dios.

Si Vareta, a mantaon na 6 tan manaayam ed Suriname, Abalaten ya Amerika, so anganamot ed pankanawnawan nidayew si Jehova sanen kakkaukolan na maestra to so ligliwa manlapud Kasulatan. Kayari taloy agew ya inliwat na maestra ed klase ra, tinepetan to iray eskuela to no kasin amta ra so sengegan na inliwat to. Inmebat ira, “Agta  nansakit kayo?” “Andi,” so ebat na maestra. “Inatey si atsik, tan maer-ermen ak. Kanian mandeen kayo.”

Kasabi ngarem legan ya onlilirep so nanay to, si Vareta so okupadon manbubukait na saray daan a magasin, a babasaen to iray paulo na saratan. Aromog to so Hulyo 15, 2001 a Say Panag-Bantayan ya apauloan na “Wala tay Bilay Kayari Ipatey?” Sikatoy malikeliket, a niliing toy ina to tan inkuan to, “Nay, Nay, nengneng yo! Akaromog ak na magasin nipaakar ed ipapatey ya iter ko’d maestrak!” Impawit nen Vareta so magasin ed maestra to a nilaktipan toy sulat. Oniay insulat to: “Talagan parad sikayo iya. Diad Paraiso et nanengneng yo lamet so atsi yo ta agbalot mantila si Jehova. Insipan to a pawalaen toy paraiso diad dalin, aliwan diad tawen.” Imbalikas na maestra so baleg a pisasalamat to ed sayan nibase’d Biblia a ligliwa ya intarya na saratan ya artikulo.

Manplano Parad Arapen

Si Jehova so “maliket a Dios,” tan kaliktan ton manliket iray kalangweran. (1 Timoteo 1:11, NW) Oniay ibabagan mismo na Salita to: “Tobonbalo, manliket kayo legan a wala kayo ni’d kalangweran.” (Eclesiastes 11:9, Maung a Balita) Aliwa labat a say kaplesan so nanenengneng nen Jehova, natetebek to met so arapen iran pansumpalan na maong tan mauges a kiwas. Lapud satan et oniay insimbawa na Salita to ed saray kalangweran: “Nonoten mo met so Manamalsam dia ed saray agew na inkaugaw mo, ed arapen a saray mauges ya agew onsabi, tan saray taon onasingger ira, sano ikuan mo, Andian ak na liket ed sikara.”​—Eclesiastes 12:1.

On, kaliktan nen Jehova a sigpot a panggayagaan na saray kalangweran so mablin langkap a bilay. No nonoten tan dayewen na saray kalangweran so Dios, nawalaan ira na makabkabaliksan tan makapatumang a bilay. Anggan sano nipaarap ira ed subsubok, matalek iran mangibagan: ‘Say tulong ko et manlalapu ed si Jehova.’​—Salmo 121:2.

[Paimano ed leksab]

[Blurb ed pahina 9]

“Idayew yo si Jehova manlapu dia ed dalin, . . . balangla so tobonbalo a lalaki, tan birhenes.”​—SALMO 148:7, 12

[Kahon ed pahina 8]

TUTULONGAN NEN JEHOVA IRAY KALANGWERAN

“Sika so ilalok, O Katawan a Jehova: sika so nanmatalkan ko a nanlapu ed inkaugaw ko.”​—Salmo 71:5.

“[Say Dios] peselen to so pirawat mo na maong ira a bengabengatla, say kaugawan mo napasimbalo a singa say agila.”​—Salmo 103:5.