Kasin Nanonotan Yo?

Inapresya yo ta’n binasa so agano niran paway na Say Panag-bantayan? Sirin, imanoen no kasin naebatan yo so onggendan a tepetepet:

• Anto so rason ed impamili ed Disyembre 25 bilang petsa na panselebra ed inkianak nen Jesus?

Say Salita na Dios so ag-angitarya na petsa ed inkianak nen Jesus. Oniay inkuan na Enciclopedia Hispánica: “Say petsan Disyembre 25 a panseselebra ed Krismas so aliwan resulta na suston kronolohikon anibersaryo, noagta imbase ed saray piesta na winter solstice . . . a ginawan Makristiano.” Sinelebraan na saray Romano nensaman so imbutay na agew ed panaon na ambetel panamegley na panaakan, sobran panliliket, tan paniiteran na saray regalo.​—12/15, pahina 4-5.

• Kasin kabaliksan na Gawa 7:59 a si Jesus so nampikasian nen Esteban?

Andi. Ipapanengneng na Biblia a si Jehova a Dios lambengat so nepeg a pampikasian. Balet sanen anengneng nen Esteban si Jesus diad pasingawey, mapatnag ya agnansuyat si Esteban ya inmapela ed sikaton mismo, ya inkuan to: “Katawan a Jesus, akoen mo so espirituk.” Amta nen Esteban a naikdan si Jesus na autoridad a mamaoli ed inaatey. (Juan 5:27-29) Kanian si Esteban so kinmerew, odino akikasi ed si Jesus ya alwaran so espiritu to, odino puersa na bilay to anggad sikatoy paolien la.​—1/1, pahina 31.

• Panon tayon amta a say pansumpalan na too et ag-inggeter?

Inikdan na Dios so too na kawayangan a manpili, ya agbalot mitunosan ed predestinasyon. Magmaliw ya agmaaro tan agmakatunongan si Jehova no inggeter to la so kurang a gawaen tayo insan to itayo tetelen ed saray kiwas tayo. (Deuteronomio 32:4; 1 Juan 4:8)​—1/15, pahina 4-5.

• Akin ya inkamatangas so pangibagan imposible iray milagro?

Lapud bibidbiren na arum a sientista a samet labat so pikakabat da ed saray pakelaw ed siensia a naromog ed saray palsa na Dios, aaksobien da ya agda la nibaga tekep na inkaseguro ya imposible so sakey a bengatla. Mabetbet ya ibabaga ran mairap a nagawa itan.​—2/15, pahina 5-6.

• Akin ya imbaga nen Ukom a Samson ed atateng to a kaliktan ton asawaen so sakey ya anak a bii na saray Filisteo? (Uko-ukom 14:2)

Sumlang ed ganggan na Dios so pangasawa ed saray palson managdayew. (Exodo 34:11-16) Balet, say biin Filisteo so ‘makapaliket ed si Samson.’ Si Samson so ‘manaanap na sengegan a sumpa ed saray Filisteo,’ tan say bii et makapaliket odino dugaruga parad satan a gagala. Sinuportaan na Dios si Samson panamegley na espiritu To. (Uko-ukom 13:25; 14:3, 4, 6)​—3/15, pahina 26.

• Nayari kasin ikdan na Kristiano na tip odino antokaman a regalo so empleyado na gobierno parad saray serbisyo to?

Mauges so pampasuksok, odino pangiter na mablin bengatla ed opisyal pian gawaen to so ilegal a bengatla, pikeweten so hustisya, odino pian mangasikason maong. Balet aliwan panagpasuksok so pangiter na tip odino regalo ed empleyadoy gobierno sano gagawaen toy obligasyon to odino pian legal a napanlingkoran odino pian napaliisan so panaglabi.​—4/1, pahina 29.