Mausa-usar a Katulongan ed Panagpatalos

LINAWA nen Jehova a Dios, say Autor na Biblia, a say maong a balita na Panarian et niyabawag “diad balang nasyon tan poli tan salita tan baley.” (Apocalipsis 14:6) Kaliktan to ya amin a katooan et mainomay a makala na nisulat a Salita to. Pian nadampot itan, say Biblia so impatalos ed mas dakel a lenguahe nen say arum nin libro diad mundo. Nilibo iran managpatalos so angusar na dakel a panaon odino pirmin nansagpot pian nipasabi so kanonotan na Dios ed sananey a lenguahe.

Balet say Biblia so aglambengat ginetma ya ipatalos. Mabetbet ya uusaren itan a mismo bilang katulongan ed pangipatalos ed arum a lenguahe. Impankokompara na dakel a managpatalos iray terminon inusar ed Biblia diad nanduruman lenguahe pian susto ran nipatalos so pigaran salita. Say Biblia bilang alay abig a katulongan ed panagpatalos et uusaren met la natan ed panangipatalos panamegley na kompyuter.

Peteg a nairapan so kompyuter a mangipatalos. Ibabaga ni ingen na arum ya eksperto ya agnayarian na kompyuter so mangipatalos. Akin? Lapud say lenguahe et aliwa labat a grupo na saray salita. Kada lenguahe et walaan na saray dilin kombinasyon na salita, totontonen, eksepsion ed sarayan totontonen, saray idyom, tan panangipasagilig. Saray sagpot a mangiprograma ed sarayan amin diad kompyuter et mabetbet ya onsasaew. Maslak ed saray ompapaway a patalos na kompyuter et mair-irap a talosan.

Balet, saray sientista na kompyuter natan so manaanap na balo iran paraan. “Say metodo mi et manguusar na saray sistema na estatistika pian naromog so sankamatukoyan a patalos,” so inkuan nen Franz Josef Och, say manunaan ya espisyalista ed panangipatalos panamegley na kompyuter. Ipasen pa a labay mon ipatalos so Hindi diad Ingles. Unona, mangala na pigaran teksto a wala la ed saratan a lenguahe. Insan iloob iratan ed kompyuter. Kayari na satan, pankomparaen na kompyuter so duaran teksto. Alimbawa, sano naromog na kompyuter so miparan salitan Hindi diad pigaran pasen tan no naromog na satan so salitan Ingles a “house” diad kada kapetekan iran balikas, desidien la ed satan na kompyuter a say salitan Hindi et maseguron kapetekan na salitan “house.” Tan maseguro a saray salitan kaabay na satan et adjective, a singa say “big,” “small,” “old,” odino “new.” Kanian, say  kompyuter so manggawa na listaan na saray manpepetekan a termino tan kombinasyon na salita. Kayarin makatipon na ontan a magenap a listaan, a nayarin ombayag ed pigaran agew odino simba, nayarian la na kompyuter ya iyaplika ed balon teksto so “naaralan” na satan. Anggaman nayarin aliwliwa so ompaway a patalos no nipaakar ed gramatika tan estilo, kaslakan lan nabasa itan pian nipasabi so kabaliksan tan saray importantin detalye.

Say kalidad na patalos so manunan akadepende ed kinarakel tan kalidad na tekston inloob ed kompyuter diad gapo. Tan diad sayan aspekto et mausa-usar so mismon Biblia. Satan so maalwar ya impatalos ed dakel a lenguahe, mainomay a naala, tan walaan na dakerakel a teksto. Kanian say Biblia so manunan pipilien na saray managsukimat sano manproprograma ra ed kompyuter parad sakey a balon lenguahe.