Sakey a Biglan Trahedya

SI OWEN, a duara tan kapalduay taon ni labat ya ugaw a laki, so manggagalaw ed loob na banyo ra. Akalab to so kabinet na saray tambal ya abaloan na saray ateng to et agto naabot. Anengneng to ditan so sakey a botelya ya agustoan to. Nilukasan to insan to ininum so karga na satan. Et biglan agawa so trahedya.

Say karga na botelya et makatunaw ya asido, tan makapaermen ta inatey so uga-ugaw nin Owen. Maer-ermen so atateng to. Say ama ton si Percy so nananap na ligliwa ed relihyon da. “Akin et agawa iya?” so intepet to. Inmebat so pari, “Kaukolan na Dios so sakey nin melag ya anghel ed tawen.” Lapud pirmin ermen na sayan ateng, liknaen to ya agbalot makatunongan itan. Talaga kasin ginetma na Dios a nagawa itan a trahedya? Lapud impakadismayan maong nen Percy, denesidi toy onekal la ed relihyon da.

Legan a nononoten nen Percy so agawa, inumameng to: ‘Kasin maniirap so ana’ko anggad natan? Kasin napinengnengan ko ni lamet?’

Nayarin uumamengen mo met no anto so nagawa diad ipatey tan no kasin napilimogan lamet diad arapen iray inaatey ya inad-aro. Sarayan tepet so eebatan na Salitay Dios, say Biblia. Satan so mangitatarya na malinew tan makaligliwa iran ebat parad amin ya akaeksperiensya na mipara iran trahedya. Nagkalalon importante, ipaparungtal na satan so makapaliket ya ilalon insipan na Dios​—say kikioli.

Ipangasin basaen so onggendan ya artikulo pian lalon natalosan iyan makapakelkelaw ya ilalo.