‘Mantultuloy Yon Salien so Inkasikayon Dili’

“Dalepdep yo ed sikayon dili, no wala kayo ed pananisia, sali yo so sikayon dili.”​—2 CORINTO 13:5.

1, 2. (a) Panon itayon naapektoan no walaray panduaruwa tayo ed saray sisiaen tayo? (b) Anton situasyon diad inmunan-siglon Corinto so nayarin sengegan na impanduaruwa na arum no dinan a dalan so pankurangan da?

 SAKEY a toon manbiabiahe ed nikaumaan a lugar so akasabi ed nansangaan na karsada. Lapud agto amta no dinan so ompugta ed destinasyon to, sikato so nantepet ed saray ondadalan balet ta nanduruma so imbaga ran direksion. Diad inkawetwet to et agto la intuloy so biahe to. Ontan met so epekto ed sikatayo no manduaruwa itayo ed saray sisiaen tayo. Say ontan a panduaruwa so nayarin mangamper ed abilidad tayon mandesisyon, a magmaliw itayon agmaseguro no dinan a dalan so pankurangan tayo.

² Linmesa so sakey a situasyon ya amawala na ontan ya epekto ed pigaran indibidual diad Kristianon kongregasyon ed Corinto, Gresya nen inmunan siglo. Sinuppiat na ‘saray manunan apostol’ so autoridad nen apostol Pablo, ya imbaga ran: ‘Saray sulat to et maiyan tan mabiskeg ira, balet say inkatoo to a silalaman et makapuy, tan say salita to so namudmora.’ (2 Corinto 10:7-12; 11:5, 6) Satan a panmoria so nayarin sengegan na impanduaruwa na pigara ed kongregasyon na Corinto nipaakar ed pankukurang da.

3, 4. Akin a nepeg a makapainteres ed sikatayo so simbawa nen Pablo ed saray taga-Corinto?

³ Inletneg nen Pablo so kongregasyon na Corinto sanen sikatoy binmisita diman nen 50 K.P. Sikato so nanayam ed Corinto diad loob na “sakey taon tan anem bulan, ya imbabanga’to ed pegley da so Salita na Dios.” On, “dakel ed saray taga-Corinto so nandengel, et anisia ra, tan abinyagan ira.” (Gawa 18:5-11) Si Pablo so interesadon tuloy ed espiritual a pankaabigan na saray kapananisiaan to ed Corinto. Niarum ni, saray taga-Corinto so sinmulat ed si Pablo pian onkerew na simbawa nipaakar ed pigaran pamaakaran. (1 Corinto 7:1) Kanian sikato so angiter ed sikara na alay abig a simbawa.

⁴ “Dalepdep yo ed sikayon dili, no wala kayo ed pananisia,” so insulat nen Pablo, “sali yo so sikayon dili.” (2 Corinto 13:5) Say pangiyaplika ed sayan simbawa so mangipaliis ed saray agagi ed Corinto manlapud agpakaseguro no dinan a dalan so pankurangan da. Ontan met so nagunggona tayo natan. Panon tayo sirin a natumbok so bilin nen Pablo? Panon tayon nasali odino nasubok no kasin wala itayo ed pananisia? Tan anto so nalalanor ed panali odino panubok tayo ed inkasikatayo?

“Dalepdep Yo ed Sikayon Dili, No Wala Kayo ed Pananisia”

5, 6. Anton estandarte so panubokan tayo no kasin wala itayo ed pananisia, tan akin ya alay abig itan ya estandarte?

⁵ Diad sakey a subok et kaslakan a walay sakey a too odino bengatla a sasalien tan walay pangibabasiyan odino estandarte a pangisubokan. Diad sayan kipapasen, say bengatlan susuboken et aliwan say pananisia, noagta say tugyop na saray sisiaen ya inawat tayo la. Say susuboken et sikatayo bilang indibidual. Pian nagawaan itan a pananubok, walay naspot ya estandarte tayo. Oniay nikuan ed kantan insulat nen salmistan David: “Say katunongan nen Jehova nagnap, tan pampataolien to so kamarerwa: say panamatua nen Jehova matua, gawaen to a makalakal so andi amta. Saray panontonan  nen Jehova maptek ira, pagayagaen da so puso: say ganggan nen Jehova malinlinew, liwawaan to so saray mata.” (Salmo 19:7, 8) Lugan na Biblia iray naspot a ganggan tan maptek a pananontonan nen Jehova, saray napanmatalkan a panonot tan maralus iran bilibilin to. Say mensahen naromog ditan so alay abig ya estandarte a panubokan.

⁶ ipaakar ed mensahen impuyan na Dios, oniay inkuan nen apostol Pablo: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Hebreos 4:12) On, nayarian na salitay Dios a suboken so puso tayo​—no anton talaga so inkatoo tayo. Panon tayon niyaplika iyan mabitabitar tan mapuersan mensahe? Malinew ya indalatdat na salmista no panon tayon niyaplika itan. Oniay inkanta to: “Mapalar so too . . . [a] say gayaga to wala ed ganggan nen Jehova; tan diad ganggan to mandalepdep ed agew tan labi.” (Salmo 1:1, 2) Say “ganggan nen Jehova” so naromog ed nisulat a Salita na Dios, say Biblia. Nepeg tayon panliketan a basaen so Salita nen Jehova. On, nepeg tayon ipanaon so pambasa tan pandalepdep ed satan. Legan tayon gagawaen itan, nakaukolan tayon ipausisa so inkasikatayo​—bilang saray susuboken​—unong ed nisulat ditan.

7. Anto so manunan paraan pian nasubok tayo no kasin wala itayo ed pananisia?

⁷ Say manunan paraan sirin pian nasubok tayo no kasin wala itayo ed pananisia et say pambasa tan pandalepdep ed Salitay Dios tan pangusisa no panon kalaknab so pakasusumpal tayo ed nanaaralan tayo. Maliket itayo lapud walaan itayo na dakel a tulong pian natalosan so Salitay Dios.

8. Panon itayon natulongan na saray publikasyon ya ipaparaan na “matoor tan makabat ya aripen” pian nasubok tayoy inkasikatayo no kasin wala itayo ed pananisia?

⁸ Itatarya nen Jehova iray bangat tan panamilin diad panamegley na saray publikasyon ya ipaparaan na “matoor tan makabat ya aripen,” a mangipapaliwawa ed Kasulatan. (Mateo 24:45) Alimbawa, konsideraen pa so kahon ya apauloan na “Saray Tepet a Dalepdepen” diad sampot na saray kapitulo ed libron Onapit ed si Jehova. * Agaylan abig a pankanawnawa so itatarya na sayan kabiangan na libro parad personal a panagdalepdep! Makatulong met ed sikatayo so dakerakel a tema a siningbat ed saray dyurnal tayo, Say Panag-Bantayan tan Awake!, pian nasubok tayo no kasin wala itayo ed pananisia. Nipaakar ed saray artikulo ed libro na Uliran diad apalabas iran isyu na Say Panag-Bantayan, oniay inkuan na sakey a Kristianon bii: “Aromog kon praktikal a tuloy irayan artikulo. Saratan so akatulong ed siak a manusisa no talaga kasin mitutunosan so panagsalitak, konduktak, tan awawey ko ed saray matunong ya estandarte nen Jehova.”

9, 10. Antoran probisyon nen Jehova so ontulong ed sikatayo pian nasubok tayoy inkasikatayo no kasin wala itayo ed pananisia?

⁹ Makakaawat itayo met na daakan a panangiwanwan tan panamaseseg diad saray pantitipon na kongregasyon, asamblea, tan kombension. Kabiangan iraya ed saray espiritual a probisyon na Dios a parad saramay impropesiya nen Isaias: “Nagawa dia ed saray kaunoran ya agew, a say palandey na abung nen Jehova niletneg ed toktok na saray palandey, tan nipatagey ed labas na saray pukdol; et saray amin a nasyon onagus ira ya angga ed sikato. Et dakerakel a baley so onla tan kuan da, Dago kayo, tan ontatdang itayo ed palandey nen Jehova, . . . ta ibangat to itayo dia ed saray dalan to, tan manakar itayo dia ed saray basbas to.” (Isaias 2:2, 3) Talagan sakey a bendisyon so pakaawat na ontan a panamilin nipaakar ed saray dalan nen Jehova.

¹⁰ Sakey nin paraan et say simbawa na saramay walaan na saray espiritual a kualipikasyon, a mangilaktip ed saray Kristianon mamatatken. Oniay inkuan na Biblia nipaakar ed sikara: “Agagi, no wala so nasagmakan ed anton pankasalananan, sikayo a naespirituan sikato  komon so ipawil yo ed espiritu na tayadno; a motekteken mo so inkasikan dili, ta ompan lamang natukso ka met.” (Galacia 6:1) Agaylay pisasalamat tayo ed sayan probisyon a mangipepetek ed sikatayo!

11. Say panubok ed no kasin wala itayo ed pananisia so mankaukolan na anto?

¹¹ Saray publikasyon tayo, Makristianon pantitipon, tan saray aturon lalaki so alay abig a probisyon nen Jehova. Balet, say panubok no kasin wala itayo ed pananisia so mankaukolan na dilin-panangusisa. Kanian sano manbabasa itayo na saray publikasyon odino ondedengel itayo ed Makasulatan a simbawa, nakaukolan a tepetan tayo so inkasikatayo: ‘Kasin saya so manideskribe ed siak? Kasin gagawaen ko iya? Kasin uunoren ko so tugyop na saray Makristianon sisiaen?’ Say awawey tayo nipaakar ed impormasyon a naaawat tayo diad panamegley na sarayan probisyon so walaan met na epekto ed espiritual a kipapasen tayo. “Say too a gendat agto awaten so bengatla na espirituy Dios: ta kakulangkulangan ira ed sikato,” so inkuan na Biblia. “Et say too a maespiritu, sumalen to so ami’ bengatla.” (1 Corinto 2:14, 15) Agta nepeg a panggunaetan tayon pansiansiaen so positibo tan maespiritual a panmoria ed saray nababasa tayo ed saray libro, magasin, tan arum niran publikasyon tayo tan ed saray narerengel tayo ed saray pantitipon tan ed saray mamatatken?

“Sali Yo so Sikayon Dili”

12. Anto so nalalanor ed pamaneknek ed inkasikatayon dili?

¹² Say panali odino pamaneknek ed inkasikatayon dili so mangilalanor ed dilin-panangusisa. On, nayarin wala itayo ed katuaan, balet ta komusta so espiritualidad tayo? Pian napaneknekan tayo so inkasikatayon dili, ipatnag tayo so ebidensya na inkatatken tayo ed espiritual tan ed peteg ya apresasyon tayo ed saray espiritual a probisyon.

13. Unong ed Hebreos 5:14, anto so onkanan paneknek na inkatatken tayo?

¹³ Anto so mamaneknek ed pagmamaliw tayon matatken bilang Kristiano? Oniay insulat nen apostol Pablo: “Say taganon anawet sikato so kien na saray ayadyarin totoo, salanti saraman so lapud panangagamil, saray pakalikna ra apasal ed panangibiig na maong tan mauges.” (Hebreos 5:14) Ipatnag tayo so ebidensya na inkatatken tayo diad pangipasal tayo ed pakayari tayon manebek. No panon a saray masel na sakey ya atleta et nakaukolan ya ipasal diad maminpigan pangikana ed satan antis a sikatoy ondunong ed isport, say pakayari tayon manebek so nakaukolan met a nipasal ya ikana diad pangiyaplika ed saray prinsipyo na Biblia.

14, 15. Akin a nepeg tayon panseetan ya aralen so mas aralem iran bengatla na Salitay Dios?

¹⁴ Balet, antis tayon ipasal so pakayari tayon manebek, nepeg tayon gamoran so pikakabat. Lapud saya, nakaukolan so maseet a personal a panagaral. Sano regular so personal a panagaral tayo​—nagkalalo la ed saray aragdalem a bengatla na Salitay Dios​—onaligwas so pakayari tayon manebek. Diad inlabas na saray taon, dakel so araralem a tema a siningbat ed Say Panag-Bantayan. Panon so ikiwas tayo sano nabasa tayo iray artikulon manisingbat ed mas aralem iran katuaan? Kasin lalabsanan tayo la iratan lapud ‘arum ed saratan et mairap a talosan’? (2 Pedro 3:16) Diad pisunian, lalon pansagpotan tayon talosan no anto so nibabaga ditan.​—Efeso 3:18.

 ¹⁵ Panon to no naiirapan itayo a manaral a personal? Makana so panggunaet tayo pian nawalaan odino nabayuboan so pampirawat ed satan. * (1 Pedro 2:2) Pian ontakken itayo ed espiritual, nakaukolan tayon aralen so onggamor na anawet a tagano, salanti, saray aragdalem a katuaan na Salitay Dios. Ta no andi et say pakayari tayon manebek so limitado lambengat. Balet, pian nipatnag so ebidensya na itatatken ed espiritual, aliwa lambengat a say pakawalaan na pakayarin manebek so nakaukolan. Diad inagew-agew a bilay tayo et nepeg tayon iyaplika so pikakabat a nagagamoran tayo diad maseet a personal a panagaral.

16, 17. Anto so insimbawa nen babangatan a Santiago nipaakar ed pagmaliw a ‘mananumpal na salita’?

¹⁶ Say paneknek ed no anto itayo so napatnagan met ed panangipanengneng tayo na apresasyon ed katuaan​—saray gawa na pananisia tayo. Diad impangusar nen babangatan a Santiago ed mapuersan ilustrasyon pian deskribien no panon so panusisa tayo ed inkasikatayon dili, oniay imbaga to: “Mananumpal kayo komon na salita, ya aliwan dumerengel labat, a tilatilaan yo so inkasikayon dili. Ta no say siopaman ompasen a dumerengel na salita, et aliwan mananumpal, kapara to so sakey a too a nenengnengen to so sipor a lupa to ed sakey a salming; Ta nengnengen to so lupa to, insan onarawi, et tampol a nalingwanan to no anto so nengneng to a too. Bangbalet siopaman a manimano ed ayadyarin katunongan, say katunongan na pankanawnawa, tan mansiansiad’tan, sikato so bangta aliwa a maililingwan a dumerengel, mananumpal ingen ed gawa, sayan too mapalar naani ed gawa to.”​—Santiago 1:22-25.

¹⁷ Say ibabaga nen Santiago et: ‘Onnengneng ed espiho na salitay Dios, tan usisaen yoy inkasikayo. Mantultuloy yon gawaen itan, tan surien yoy inkasikayo unong ed no anto so naroromog yo ed salitay Dios. Insan, agtampol lilingwanan so anengneng yo. Manggawa na nakaukolan iran panametek.’ Nayarin mairap no maminsan so panumpal ed sayan bilin.

18. Akin a sakey ya angat so pangunor ed simbawa nen Santiago?

¹⁸ Alimbawa, konsideraen pa so kakaukolanen a mibiang ed panangipulong ed Panarian. “Say too sisiaen to ed puso to so katunongan,” so insulat nen Pablo, “tan say sangi so manggawa na panangipatua na onkana ed kilalaban.” (Roma 10:10) Say mapublikon panangipatua odino panangiyabawag ed kilalaban diad panamegley na sangi tayo so mankaukolan na pigaran pananguman. Maslak ed sikatayo et naiirapan a mibiang ed panagpulong a kimey. Say pagmaliw a maseseg tan say pangiyuna ed satan diad bilay tayo so mankaukolan na nagkalalo nin pananguman tan panagsakripisyo. (Mateo 6:33) Balet no nagmaliw tayo lan mananumpal ed sayan inter na Dios a kimey, maliket itayo lapud kirarayewan itan nen Jehova. Sirin, kasin maseseg kayon mangiyaabawag ed Panarian?

19. Anto so nepeg ya ilaktip ed saray gawa na pananisia tayo?

 ¹⁹ Panon kalaknab iray gawa na pananisia tayo? Oniay imbaga nen Pablo: “Saray bengabengatlan inaral yo tan inawat yo tan nadngel yo tan anengneng yo ed siak, sikara so gawaen yo; et say Dios na kareenan miulop-ulop ed sikayo.” (Filipos 4:9) Napaneknekan tayo no anto itayo diad pangiyaplika ed saray naaralan, inawat, nadngelan, tan naimatonan tayo​—say sigpot a lalanoren na Makristianon dedikasyon tan inka-babangatan. “Saya so dalan, ondalan kayo ed sikato,” so imbilin nen Jehova diad panamegley nen propeta Isaias.​—Isaias 30:21.

20. Antoran klase na indibidual so baleg a bendisyon ed kongregasyon?

²⁰ Saray lalaki tan bibii a maseet a manaaral na Salitay Dios, maseseg a mangipupulong ed maong a balita, andi-matik ed katooran da, tan matoor a mangitatandoro ed Panarian so baleg a bendisyon ed kongregasyon. Say kiwawala ra so mangarum na biskeg ed kongregasyon a pililimogan da. Papaneknekan da so inkasikara bilang baleg a katulongan, nagkalalo la lapud wala so dakel a balo ni a nepeg ya asikasoen. Sano ipapuso tayo so bilin nen Pablo a ‘dalepdepen yo so inkasikayo no wala kayo ed pananisia, a salien yo so inkasikayon dili,’ magmaliw itayo met a maong ya impluensya ed arum.

Panliketan so Panggawa na Linaway Dios

21, 22. Panon tayon napanliketan so panggawa ed linawa na Dios?

²¹ ‘Panliketan ko so mangunor ed linawam, O Dios ko,’ so inkanta nen Arin David na kadaanan ya Israel, ‘tan say ganggan mo wala ed dalem na pusok.’ (Salmo 40:8) Nanliketan nen David so panggawa ed linawa na Dios. Akin? Lapud say ganggan nen Jehova et walad puso nen David. Segurado si David ed no dinan a dalan so pankurangan to.

²² Sano say ganggan na Dios et walad akindalem tayo, segurado itayo ed no dinan a dalan so pankurangan tayo. Panliketan tayo so panggawa ed linawa na Dios. Diad anggaay nayarian tayo sirin, “pampilitan” odino isekar tayon maong so inkasikatayo legan itayon manlilingkor ed si Jehova manlapud puso.​—Lucas 13:24.

[Saray paimano ed leksab]

Kasin Natandaan Yo?

• Panon tayon nasubok no kasin wala itayo ed pananisia?

• Anto so nalalanor ed pamaneknek ed no anto itayo?

• Anton ebidensya so nipatnag tayo no matatken itayo bilang Kristiano?

• Panon a saray gawa na pananisia tayo so ontulong pian nasuri tayo so inkasikatayo?

[Tepetepet Parad Panagaral]

[Litrato ed pahina 23]

Kasin amta yo so sankaepektiboan a paraan na panubok ed inkasikatayon dili no wala itayo ed pananisia?

[Litrato ed pahina 24]

Ipatnag tayo so ebidensya na inkatatken tayo bilang Kristiano diad pangikana tayo ed pakayari tayon manebek

[Saray litrato ed pahina 25]

Paneknekan tayo no anto itayo diad pagmaliw ya ‘aliwan malingwan a dumerengel, noagta mananumpal na salita’