Natulongan Ka na Biblia a Naromog so Liket

ANGGAMAN say Biblia et aliwan manual ed medisina, satan so peteg a mangipapaliwawa ed nayarin epekto na liknaan​—positibo man odino negatibo​—diad mental tan pisikal a bunigas na too. “Say magayaga a puso sikato so maong a tambal,” so ibabaga na Biblia, “balet say binmetag a puso pamagaen to so saray pukel.” Onia ni so nabasa tayo: “No onkapuy ka ed agew na kasegsegang, say kasil mo sikato so melag.” (Uliran 17:22; 24:10) Say pakakadismaya so makapangupot na biskeg tayo, a diad ontan et sikatayoy onkapuy tan mainomay a nasakitan, ya anggapo lay pilalek tayon manguman odino patulongan.

Say pakakadismaya so makaapekto met ed espiritualidad na sakey a too. Saramay makakalikna ya anggapoy kakanaan da et mabetbet a maniisip ya ag-iran balot nawalaan na maabig a pisisiglaotan ed Dios tan ag-ira makagamor na pabor to. Si Simone, ya asalambit diad akaunan artikulo, so nanduaruwa no sikato imay “klase na toon abobonan na Dios.” Balet, sano usisaen tayo so Salitay Dios, say Biblia, naromog tayo a say Dios et paborablin mangiimano ed saramay manggugunaet a mamaliket ed sikato.

Kasin Mangiyaansakit so Dios

Ibabaga ed sikatayo na Biblia a “si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.” Agmudmoraen na Dios so “sakey a puso a maralit tan mansisibkel,” noagta insipan to a ‘bilayen to lamet so espiritu na mauyamo tan bilayen to lamet so puso na mansisibkel.’​—Salmo 34:18; 51:17; Isaias 57:15.

Diad sakey ya inkagawa et kinaukolan na Anak na Dios, a si Jesus, ya ipaimano ed saray babangatan  to a nenengnengen na Dios so kaabigan ed saray lingkor To. Insalaysay to diad panamegley na ilustrasyon a naiimano na Dios so kapelag na sakey ya anuyaw diad dalin, ya ipapasen na maslak a totoo ya agtanto importante. Impabitar to met ya amta na Dios so sankamelagan a detalye nipaakar ed totoo, a pati say bilang na saray buek ed ulo ra. Sinampotan nen Jesus so ilustrasyon diad impangibaga ton: “Agkayo antakot sirin; ta mamabli kayo nen saray amayamay ya anuyaw.” (Mateo 10:29-31) * Impalinew met nen Jesus ya antokaman so nalilikna na totoo ed inkasikaran dili, sikaray mabmabli ed imaton na Dios no walaan iray pananisia. Diad tua, ipapanonot ed sikatayo nen apostol Pedro ya ‘anggapoy lalabien na Dios, a panliketan to so siopaman a walay takot ed sikato tan manggaway inkatunong.’​—Gawa 10:34, 35, Maung a Balita.

Pansiansiaen so Inkasimbang

Papasesegen itayo na Salitay Dios a nawalaan na asimbang a pakanengneng ed inkasikatayon dili. Si apostol Pablo so apuyanan a mangisulat: “Lapu ed grasya a niiter ed siak, kuan ko sirin ed balang sakey a too ed sikayo, ya agto nonoten so inkasikaton dili ya atagtagey nen say kanepegan a nonoten; noag ingen nonoten to ed kaabebaan na linawa, unong ed sukat na pananisia a say Dios inyutob to ed sakey tan sakey.”​—Roma 12:3.

Seguradon agtayo labay ya isipen ya atagtagey so inkasikatayon dili, ya anggad magmaliw itayo lan mapasirayew; odino agtayo labay ya ipasen so inkasikatayo ya abebbeban tuloy, ya isipen tayon anggapo lay kakanaan tayo. Imbes, nepeg a say getma tayo et nawalaan na asimbang a pakanengneng ed inkasikatayon dili, ya ikonsidera tayo iray kabiskegan tayo ontan met ed saray limitasyon tayo. Oniay impangikuan ed satan na sakey a Kristianon bii: “Aliwa ak a mauges a too; tan aliwa ak met a sankamaongan a too. Walaray maabig ya ugalik tan wala met iray makapuy, a singa ed arum a totoo.”

Siempre, say pakawalaan na ontan ya asimbang a panmoria et mainomay ya ibaga balet mairap a gawaen. Nakaukolan so pirmin pansagpot pian niwaklit so negatibon tuloy a panmoria ed inkasikatayon dili a nayarin abayuboan tayo diad apalabas a dakel a taon. Anggaman kuan, diad tulong na Dios et nauman tayo so personalidad tayo pati say iilaloan tayo ed bilay. Diad tua et ontan so ipapaseseg na Salitay Dios a gawaen tayo. Oniay nabasa tayo: “Ipulisay yo komon so nipaakar ed abangonan a panagbilay yo, say toon daan, a sikato so manderal unong ed saray panamalingo na kagletan na laman; tan napasimbalo kayo komon ed espiritu na kalakal yo, tan ikawes yo so too a balo, a sikato so pinalsay Dios ed loob na kaptekan tan matuan kasantosan.”​—Efeso 4:22-24.

Diad pansagpot tayon umanen so ‘espiritu na kalakal tayo,’ salanti, say manunan inklinasyon na nonot tayo, napagmaliw tayon positibo so negatibon tuloy a personalidad tayo. Sanen niwaklit la nen Lena, ya asalambit diad akaunan artikulo, so kanonotan ya anggapoy siopaman a nayarin mangaro odino ontulong ed sikato, amoria to ya anggapoy makapanguman  ed liknaan to nipaakar ed inkasikaton dili. Anton praktikal a simbawa ed Biblia so akatulong ed si Lena, Simone, tan arum ni ra pian makapanguman?

Saray Prinsipyo na Biblia a Mamapawalay Liket

“Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.” (Salmo 55:22) Manuna ed amin, makatulong ed sikatayo so pikakasi pian naromog so tuan liket. Oniay inkuan nen Simone: “Sano nadidismaya ak, onaasingger ak ed si Jehova pian patulongan ed sikato. Diad amin a kipapasen, sikato so naynay a mamapabiskeg tan mangiwawanwan ed siak.” Sanen pinaseseg itayo na salmista ya ipaawit tayo ed si Jehova so awit tayo, singano papanonotan to itayo a si Jehova et aglambengat mangiyaansakit ed sikatayo noagta ipapasen to itayo met bilang indibidual a makana ed tulong tan suporta to. Diad samay labi na Paskua 33 K.P., naermenan a tuloy iray babangatan nen Jesus lapud inkuan to a sikatoy magano lan ontaynan. Pinaseseg to iran manpikasi ed Ama, insan oniay inyarum to: “Kerew kayo, et awaten yo, pian say gayaga yo nayadyari.”​—Juan 16:23, 24.

“Lalo a mapalar so mangiter nen say mangawat.” (Gawa 20:35) Unong ya imbangat nen Jesus, say panangiter so sekreto ed pakaromog na tuan liket ed bilay. Say pangiyaplika ed sayan prinsipyo na Biblia so ontulong ed sikatayon niyapasakey so imano tayo ed saray pankaukolan na arum imbes a diad saray dilin kakulangan tayo. Sano tutulongan tayo so arum tan naiimano tayon misalsalamat ira, balibali so liknaan tayo. Kombinsido si Lena a say regular a panginanabang to na maong a balita ed Biblia diad arum so ontutulong ed sikato ed duaran paraan. “Unona, naliliknak so klase na liket tan inkapnek a tinukoy nen Jesus,” so inkuan to. “Komadua, positibo so ikikiwas na arum ed ibabagak, a satan so mamapaliket ed siak.” Diad mabulos a pangisekar tayoy inkasikatayo, naeksperiensya tayo so katuaan na Uliran 11:25: “Say mapalabo a kamarerwa napataba; et say mansalog nasalog met.”

‘Amin iray agew na apasegsegang et mauges; balet say magayaga so puso to et walaan a naynay na liket.’ (Uliran 15:15) Amin tayo so makapampili no panon tayon moriaen so inkasikatayon dili tan saray kipapasen tayo. Nayarian tayoy magmaliw a singa samay toon negatibo lay pakanengneng to ed amin a bengatla kanian makalikna na segsegang, odino nayarian tayoy mannonot na positibo, ‘manggayaga diad puso,’ tan magmaliw a maliket a singano wala itayo ed ponsia. Oniay inkuan nen Simone: “Panggugunaetan koy mansiansian positibo anggad posible. Mantutultuloy ak ya okupado ed personal a panagaral tan diad ministeryo, tan naynay ak a manpipikasi. Manggugunaet ak met a milimog ed saray positibon totoo, tan ontutulong ak ed arum.” Say ontan ya awawey na puso so manreresulta ed tuan liket, unong ya ontan so impaseseg na Biblia ed sikatayo: “Manliket kayo ed Jehova tan manggayaga kayo a matunong; tan oneyag kayo nipaakar ed gayaga, amin yo a maptek a puso.”​—Salmo 32:11.

“Say kaaro mangaro ed saray amin a panaon, et say agi nianak nipaakar ed kasumlangan.” (Uliran 17:17) Say pangibesngaw na liknaan ed sakey ya inad-aro odino ed sakey a napanmatalkan a managkonseho  et makatulong ed sikatayo pian natalonaan so negatibon liknaan tan agla mangapekta ed sikatayo. Say pitongtong met ed arum so makatulong ed sikatayo pian magmaliw ya asimbang tan positibo so pakanengneng tayo ed bengabengatla. “Say pangitotongtong koy naliliknak diad arum et makakatulong a maong,” so inaksobi nen Simone. “Kaukolan mon ibalikas ed arum so naliliknam. Mabetbet et nainawaan ka la no nibesngaw mo la itan.” No ontan so gawaen mo, naeksperiensyam so katuaan na proverbio a mangibabagan: “Say kabelatan ed puso na too mamatuek ed sikato; balet say maong a salita mamagayaga ed sikato.”​—Uliran 12:25.

No Anto so Nagawaan Mo

Akonsidera tayo so pigara lambengat ed dakel ya alay abig tan praktikal a prinsipyo ed Biblia a makatulong ed sikatayo pian natalonaan so negatibon liknaan tan naromog so tuan liket. No sakey ka ed saramay makakalikna ya anggapoy kakanaan da, pasesegen mi ka a mangusisan maong ed Salita na Dios, say Biblia. Aral mon bayuboan so realistiko tan asimbang a liknaan nipaakar ed inkasika tan ed pisisiglaotan mo ed Dios. Masimoon min iilaloan a diad panangiwanwan na Salitay Dios et naromog mo so tuan liket diad amin a gagawaen mo.

[Paimano ed leksab]

[Litrato ed pahina 7]

Say pambilay unong ed saray prinsipyo na Biblia so mamawala na liket