Nandinayewan so Interes Da ed Biblia

SI Marianna, a sakey ed saray Tasi nen Jehova diad abalaten na Italya, so 18 años la tan kaunoran lan taon to ed haiskul. Diad paneeskuelaan to et wala met so arum a kalangweran iran Tasi a manaaral ditan.

Oniay insulat nen Marianna: “Diad loob na pigay taon la, arum ed sikami so manbabasa na teksto ed Biblia diad kada agew manlapud Usisaen so Kasulatan ya Inagew-agew legan na recess mi. Nagawaan mi lambengat itan diad saray pasilyo ya asingger ed kuarto na saray managbangat. Aliwan mareen ditan. Sikami so nadadalan na maslak ed saray managbangat, tan arum ed sikara so onsasamar pian nengnengen no antoy gagawaen mi. Diad ontan et mabetbet kamin nawawalaan na pankanawnawa pian ebatan iray tepet da. Diad kada agew et walay sakey a managbangat ya onsasamar. Walaray ondedengel ed saray pantotongtong mi nipaakar ed teksto ed Biblia tan ibabalikas day apresasyon da ed sikami ran Tasi lapud pangipapatnag mi na interes ed espiritual iran bengatla. Aminsan et inimbitaan kami na assistant principal a dia la’d kuarto na saray managbangat so panggawaan mi ed satan.

“Sanen anengneng na maestro mi so pasen na pambabasaan mi na teksto ed Biblia, kinerew to ed prinsipal no nayarin gawaen mi itan diad sakey a kuarton panklaklasean, a mas mareen. Inmabuloy so prinsipal, tan say maestro mi so nandinayew ed sikami diad arapan na interon klase lapud maabig ya ehemplon ipapatnag mi. Malikeliket kami lapud alay abig a pribilehyo ya inter nen Jehova ed sikami.”