Mantultuloy a Manakar a Singa Impanakar nen Jesu-Kristo

“Say mankuan a mansiansia ed [Dios], nepeg to so manakar a singa impanakar [nen Jesus].”​—1 Juan 2:6.

1, 2. Antoy nalalanor ed inengneng a maong ed si Jesus?

 “BATIKEN tayo a siaanos komon so babatiken a niyan ed arap tayo,” so insulat nen apostol Pablo, legan a “nengnengnengen tayo si Jesus a nanggawa [“Manunan Ahente,” NW] tan manamayadyari na pananisia tayo.” (Hebreos 12:1, 2) Say panmatoor et mankakaukolan ed sikatayon onnengneng a maong ed si Jesu-Kristo.

² Say orihinal a lenguahen salita parad ‘onnengneng,’ unong a nausar ed Kristianon Griegon Kasulatan, et mankabaliksan na “pangipaarap na imano na sakey ya anggapoy makasbel,” “ag-imanoen so sakey a bengatla pian nanengneng so sananey,” “ag-alisan na mata.” Oniay inkuan na sakey a reperensya: “Bektaman a say Griegon bumabatik diad istadyum et agto iyapasakey so imano to ed babatiken tan ed kalat to a pamepelesan toy batik to, tan onlingaw ed saray manbabantay, ontantan so batik to. Ontan met ed sakey a Kristiano.” Saray pakasbelan so mangamper ed espiritual ya iyaligwas tayo. Nepeg ya onnengneng itayon maong ed si Jesu-Kristo. Tan antoy nengnengen tayo ed Manunan Ahente? Say Griegon termino ya impatalos a “manunan ahente” et mankabaliksan na “manunan lider, sakey a mangidadaulo ed amin a bengatla kanian sikatoy mangileletneg na ehemplo.” Say inengneng a maong ed si Jesus et mankaukolan na panumbok tayo ed ehemplo to.

3, 4. (a) Antoy kakaukolanen ed biang tayo na panakar a singa impanakar nen Jesu-Kristo? (b) Antoran tepet so manepeg tayon imanoen?

³ Ibabaga na Biblia: “Say mankuan a mansiansia ed [Dios], nepeg to so manakar a singa impanakar [nen Jesus].” (1 Juan 2:6) Nepeg itayon mansiansian mikasakey ed Dios diad pangunor ed saray ganggan nen Jesus a singa ed impangunor to met ed saray ganggan na Ama to.​—Juan 15:10.

⁴ Kanian, say panakar a singa impanakar nen Jesus et mankakaukolan a sikatoy imanoen tayon maong bilang Manunan Lider, tan maalwar tayon tumboken iray bakat to. Saray importantin tepet ya ikonsidera ed sayan pamaakaran et saraya: Panon so pangidadaulo nen Kristo ed sikatayo natan? Panon a say pangalig tayo ed impanakar to et mangapekta ed sikatayo? Antoray gunggona na itumbok ed padron ya inletneg nen Jesu-Kristo?

No Panon ya Idadaulo nen Kristo Iray Papatumbok To

5. Sakbay na insegep nen Jesus ed tawen, antoy insipan to ed saray papatumbok to?

⁵ Sakbay a sinmegep ed tawen, say apaolin Jesu-Kristo so nampanengneng ed saray babangatan to tan pinabtangan to ira na importantin kimey. Inkuan to: “Onla kayo sirin, tan manggawa kayo na saray babangatan ed amin a nasyones.” Diad saman a bekta, insipan met na Manunan Lider a kaiba to  ira legan dan susumpalen iyan nipabtang ed sikara, a kuanto: “Nia, wala ak a naynay ed sikayo, ya angga ed kasampotan na mundo.” (Mateo 28:19, 20) Panon a kaiba nen Jesu-Kristo iray papatumbok to ed sayan panaon na konklusyon na sistema na bengabengatla?

6, 7. Panon itayon idadaulo nen Jesus natan panamegley na masanton espiritu?

⁶ Inkuan nen Jesus: “Say managligliwa, salanti say espiritu santo, a sikato so ibaki dia na Ama ed ngaran ko, ibanga’to ed sikayo so amin a bengabengatla, tan ipanono’to ed sikayo so amin ya imbagak ed sikayo.” (Juan 14:26) Say masanton espiritu, a nibaki ed ngaran nen Jesus, so mangiwawanwan tan mamapabiskeg ed sikatayo natan. Satan so mangibabangat ed sikatayo diad espiritual a paraan tan ontutulong ed sikatayon natalosan “pati saray kaaralman na bengatla na Dios.” (1 Corinto 2:10) Sakey ni, saray maridios a kalidad a singa say “aro, liket, deen, kasungdoan, kauyamoan, kaabigan, sisia, tayadno, dangka” et “bunga na espiritu.” (Galacia 5:22, 23) Diad tulong na masanton espiritu, nabayuboan tayo irayan kalidad.

⁷ Legan tayon aaralen so Kasulatan tan panggugunaetan ya iyaplika so nanaaralan tayo, say espiritu nen Jehova so ontulong ed sikatayon ombulaslas ed kakabatan, pakatalos, pikakabat, tan kalakal odino abilidad a mannonot. (Uliran 2:1-11) Say masanton espiritu so ontutulong met ed sikatayon sungdoan iray tukso tan subok. (1 Corinto 10:13; 2 Corinto 4:7; Filipos 4:13) Saray Kristiano so bibilinen a ‘linisan day inkasikara ed amin a tilol na laman tan espiritu, a yadyarien na kasantosan.’ (2 Corinto 7:1) Peteg kasin nakapet tayoy kakaukolanen na Dios ed inkasanto, odino kalinisan, no anggapoy tulong na masanton espiritu? Say sakey ed saray paraan ya uusaren nen Jesus pian iwanwan itayo natan et say masanton espiritu, ya inyutorisa nen Jehova a Dios ya ikana na Anak to.​—Mateo 28:18.

8, 9. Panon ya uusaren nen Kristo so “matoor tan makabat ya aripen” a mangidaulo?

⁸ Konsideraen met so sananey ya uusaren nen Kristo diad panangidaulo ed kongregasyon natan. Oniay inkuan nen Jesus nipaakar ed kiwawala to tan say konklusyon na sistema na bengabengatla: “Siopa sirin so matoor tan makabat ya aripen, a sikato’y impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to? Mapalar so satan ya aripen, a sikatoy nasabian na katawan to ya ontay gagawaen to. Tua kuan ko ed sikayo, a sikatoy ipasento’d amin a wala ed sikato.”​—Mateo 24:3, 45-47.

⁹ Say “katawan” et si Jesu-Kristo. Say “aripen” et say grupo na alanaan iran Kristiano ed dalin. Sayan aripen a klase so angimatalkan na pangasikaso ed saray mangaraldalin ya intereses nen Jesus tan pangitarya na nipanpanaon ya espiritual a tagano. Sakey a melag a grupo na kualipikado iran manangasikaso a nanlapud limog na “matoor tan makabat ya aripen” so manibukel ed Mananguley ya Ulop, a mangirerepresenta ed aripen a klase. Iwawanwan da so sankamundoan a panangipulong ed Panarian tan pangitatarya na espiritual a tagano ed dugan panaon. Kanian idadaulo nen Kristo so kongregasyon panamegley na nilanaan na espiritu a “matoor tan makabat ya aripen” tan say Mananguley ya Ulop na satan.

10. Antoy nepeg ya awawey tayo ed saray mamatatken, tan akin?

¹⁰ Say sananey nin pakapatnagan na panangidaulo nen Kristo et ‘saray langkap a totoo,’ salanti, saray Kristianon mamatatken, odino manangasikaso. Sikaray niiter ya “onkana a pakayadyarian na saray sasantos, a nipaakar ed gawa na panaglingkor, angga ed kipaalagey na laman nen Kristo.” (Efeso 4:8, 11, 12) Nipaakar ed sikara, ibabaga na Hebreos 13:7: “Nonot yo so saray manuley ed sikayo, a sikara so nansalita ed sikayo na salitay Dios; tan motektek yo no anto so asumpalan na impanbilay da, alig yo so pananisia’ra.” Saray mamatatken so mangidadaulo ed kongregasyon. Lapud aaligen day Kristo Jesus, say pananisia ra so nagmaliw a makanan aligen. (1 Corinto 11:1) Nipanengneng tayoy pisasalamat tayo ed uksoyan na mamatatken diad inkamatulok tan inkamapasakop tayo ed sarayan ‘langkap a totoo.’​—Hebreos 13:17.

11. Antoray uusaren nen Kristo diad panangidaulo ed saray papatumbok to natan, tan anto so nalalanor ed panakar a singa ed impanakar to?

¹¹ On, idadaulo nen Jesu-Kristo iray papatumbok  to natan diad panamegley na masanton espiritu to, “say matoor tan makabat ya aripen,” tan saray mamatatken ed kongregasyon. Say panakar a singa impanakar nen Kristo et laktipen toy pantalos ed paraan na panangidaulo to tan pampasakop ed satan. Mankakaukolan met itan na pangalig tayo ed paraan na impanakar to. Insulat nen apostol Pedro: “Saya so inkatawag yo: ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Diad anton dalan a mangapekta ed sikatayo so panumbok ed naspot a modelo nen Jesus?

Magmaliw a Makatunongan Sano Agamilen so Autoridad

12. Anton aspekto na ehemplo nen Kristo so nagkalautlan paninteresan na saray mamatatken ed kongregasyon?

¹² Anggaman si Jesus et inikdan na Ama to na agnaparaan ya autoridad, sikatoy makatunongan ed paraan na impangusar to ed satan. Amin ed kongregasyon​—nagkalalo la ed saray manangasikaso​—et nepeg dan ‘ipakabat ed amin a totoo so kasungdoan [“inkamakatunongan,” NW].’ (Filipos 4:5; 1 Timoteo 3:2, 3) Lapud walaan met na autoridad iray mamatatken ed kongregasyon, importante a tumboken day bakat nen Kristo diad pangikana ra ed satan.

13, 14. Diad anton dalan a naalig na saray mamatatken si Kristo legan dan papasesegen so arum a manlingkor ed Dios?

¹³ Inkonsidera nen Jesus iray limitasyon na saray babangatan to. Agto impasoot ed sikara so agda nayarian. (Juan 16:12) Imbes a desdesen nen Jesus iray papatumbok to, pinaseseg to iran ‘pampilitan day onloob ed pinto a mainget.’ (Lucas 13:24) Ginawa to iya panamegley na impangidaulo to tan diad impamakiwas ed kapusoan da. Mipadpara, saray Kristianon mamatatken natan so agmamapagyaw ed arum a manlingkor ed Dios diad pamabaing odino pangonsiensia ed sikara. Imbes, papasesegen da iran manlingkor ed si Jehova lapud panangaro ed sikato tan ed si Jesus, ontan met ed kapara ran too.​—Mateo 22:37-39.

¹⁴ Ag-inabuso nen Jesus so autoridad ya impabtang ed sikato diad impangontrol ed kabibilay na totoo. Agmet angiletneg na agnagawaan iran estandarte tan dakerakel a totontonen. Say paraan to et say pamakiwas ed arum diad panabi ed kapusoan da panamegley na saray prinsipyo a naromog ed saray ganggan a niiter panamegley nen Moises. (Mateo 5:27, 28) Diad pangalig ed si Jesu-Kristo, saray mamatatken so agmanggagawa na dili ran totontonen odino agmangipipilit ed saray personal a panmoria ra. Diad pamaakaran na panangawes tan panag-ayos odino panligliwaan, panggugunaetan na saray mamatatken a sabien so kapusoan diad pangusar na maridios iran prinsipyo, a singa saramay nidatak ed Miqueas 6:8; 1 Corinto 10:31-33; tan 1 Timoteo 2:9, 10.

Magmaliw a Miaambegya tan Manamerdona

15. Antoy reaksion nen Jesus ed saray insaew na papatumbok to?

¹⁵ Si Kristo so angitilak na modelo a tumboken tayo diad paraan na impantrato to ed saray insaew tan lingo na saray babangatan to. Konsideraen so duaran agawa ed unor lan labi na bilay to ed dalin bilang too. Sanen akasabi ed Getsemani, “[impila nen Jesus si] Pedro tan Santiago tan Juan” tan inkuan to ed sikara a “manbantay” ira. Insan “inmakar na daiset, tan dinmakmomo ed dalin, tan akikasi.” Diad impawil to et ‘asabian to ran naugip.’ Antoy reaksion nen Jesus? Inkuan to: “Say espiritu tua a maabuloy, balet say laman makapuy.” (Marcos 14:32-38) Imbes a pampasnokan toy Pedro, Santiago, tan Juan, imbalikas toy piaambegya! Diad saman lanlamang a labi, amitlon  imburi nen Pedro si Jesus. (Marcos 14:66-72) Panon so impantrato nen Jesus ed si Pedro kayari na saman? “Say Katawan inmoli ed bilay a tua, tan pinmayawar ed Simon [Pedro].” (Lucas 24:34) Kuan na Biblia: “[Sikatoy] pinmanengneng ed Cefas; insan dia ed saray labindua.” (1 Corinto 15:5) Imbes a nan-imbel, pinerdona nen Jesus so magbabawin apostol tan pinabiskeg to. Diad saginonor, inmatalek nen Jesus ed si Pedro so angkabaleg iran responsabilidad.​—Gawa 2:14; 8:14-17; 10:44, 45.

16. Panon itayon makapanakar a singa impanakar nen Jesus sano dinismaya odino asakitan itayo na saray kapananisiaan tayo?

¹⁶ Sano dinismaya odino asakitan itayo na kapananisiaan tayo lapud ag-inkayadyari, agta nepeg tayoy magmaliw met a miaambegya tan manamerdona a singa si Jesus? Pinaseseg nen Pedro iray kapara ton mananisia: “Mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan: Aleg ya ibales so mauges ed mauges, ni say ayew ed ayew; noag ingen say panamaabig lawas; ta amta yon peteg ya atawag kayon amin ya ontawir na bendisyon.” (1 Pedro 3:8, 9) Panon to no agmipara ed impantrato nen Jesus so pantrato ed sikatayo na sananey a too, ya agto labay so miambegya odino mamerdona? Siansia nin obligado tayon panggunaetan ya aligen si Jesus tan onkiwas a singa ed ginawa to.​—1 Juan 3:16.

Iyuna so Intereses na Panarian

17. Antoy mangipapanengneng ya inyuna nen Jesus ed bilay to so panggawa ed linawa na Dios?

¹⁷ Wala ni sananey a paraan a kaukolan itayon manakar a singa impanakar nen Jesu-Kristo. Say pangiyabawag ed maong a balita na Panarian na Dios et manuna ed bilay nen Jesus. Kayari ton pinulongan so Samaritana diad asingger ed syudad na Sicar ed Samaria, inkuan nen Jesus ed saray babangatan to: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Say panggawa ed linawa na Ama to so anustini ed si Jesus; singa itan masustansia, makapenek, tan makapabiskeg a tagano ed sikato. Kasin say pangalig ed si Jesus diad pansiansian akasentro ed panggawa na linawa na Dios et mansumpal ed bilay ya aliwan peteg a makabaliksan tan makapenek?

18. Antoran bendisyon so nagamoran diad pamaseseg ed ananak a mangala na sigpot-panaon a serbisyo?

¹⁸ Sano papasesegen na atateng iray ananak da a mangala na sigpot-panaon a serbisyo, sikara pati saray ananak da so makagamor na dakel a bendisyon. Sakey ya ama so amaseseg ed kambal ya ilalak ton lalaki a gawaen dan kalat so panagpayunir a serbisyo manlapu nen ugugaw ni ra. Kapangraduar da ed sekular ya edukasyon, nampayunir iray kambal. Diad panmomolimoli ed gayaga a naeksperiensya to bilang resulta, insulat na ama: “Agak dinismaya na saray ilalak mi. Tekep na pisasalamat et nayarian min ibaga, ‘Saray ananak so tawir manlapud si Jehova.’” (Salmo 127:3) Tan panon a nagugunggonaan iray ananak ed pangemtan na sigpot-panaon a serbisyo? Inkuan na sakey ya ina a walaan na limaran ananak: “Say panagpayunir so tinmulong ed amin ya ananak ko pian nabayuboan day mas maapit a relasyon ed si Jehova, amaaligwas ed ugali ra ed personal a panagaral da, tinmulong ed sikaran naaralan no panon ya usaren so panaon da ed makabat a paraan, tan tinmulong ed sikaran naaralan ya iyuna ed bilay da iray espiritual a bengatla. Anggaman amin da et kaukolan a manggawa na dakel a pananguman, anggapo ed sikara so magbabawi ed dalan a pinili ran tumboken.”

19. Antoran plano ed arapen so nepeg a makabat ya ikonsidera na saray kalangweran?

 ¹⁹ Sikayoran kalangweran, antoray plano yo ed arapen? Kasin panggugunaetan yoy ontalona ed pigaran karera? Odino panggugunaetan yon nadampot so kareran sigpot-panaon a serbisyo? “Nengneng yo sirin a tinekepan na panlikas no panon so panakar yo,” so imbilin nen Pablo, “aliwan singa andi kalakal, noag ingen singa makalakal; ya anamoten yo so panaon, ta saray agew sikara so mauges.” Inyarum to ni: “Kanian aliwa kayo komon a makulangkulang, noag ingen talosan yo no anto so linawa na Katawan.”​—Efeso 5:15-17.

Magmaliw a Matoor

20, 21. Diad anton dalan a matoor si Jesus, tan panon tayon naalig so inkamatoor to?

²⁰ Say panakar a singa impanakar nen Jesus so mankakaukolan na pangalig ed inkamatoor to. Nipaakar ed inkamatoor nen Jesus, ibabaga na Biblia: “Bangta sikatoy wala ed ereng na Dios, agto imbilang a say inkaparpara to ed Dios sakey a bengatlan bebembenan to nensaman. Noag ingen nilukpos to so inkasikato, ya inala to so ereng na sakey ya aripen, ya agawan kaulibay na saray totoo; tan bangta aromog a singa nengneng na sakey a too, nampaabeba a nagmaliw a matulok ya anggad say ipapatey, on, say ipapatey ed krus [“panamairapan a kiew,” NW].” Sitotoor ya intandoro nen Jesus so inkasoberano nen Jehova diad impanpasakop to ed no antoy linawa na Dios ed sikato. Sikatoy nagmaliw a matulok anggad impanagmak toy patey ed panamairapan a kiew. Nepeg tayon ‘iyatol iyan kalakal’ tan sitotoor a manpasakop ed panggawa na linawa na Dios.​—Filipos 2:5-8.

²¹ Impatnag met nen Jesus so inkamatoor to ed saray matoor ya apostol to. Anggaman ed saray kaleteyan tan agda inkayadyari, sikaray inaro nen Jesus “angga ed kasampotan.” (Juan 13:1) Mipadpara, nepeg ya ag-itayo makritiko ed saray agagi tayo lapud saray agda inkayadyari.

Tumboken so Padron ya Inletneg nen Jesus

22, 23. Antoray gunggona ed panumbok ed padron ya inletneg nen Jesus?

²² Siempre, bilang ag-ayadyarin totoo et agtayo eksakton natumbok iray bakat na ayadyarin Ehemplo tayo. Balet, sarag tayon panggunaetan a tumboken a maapit iray bakat to. Say panggawa ed satan et mankaukolan ed sikatayon mantalos tan manpasakop ed paraan na panangidaulo nen Kristo tan mansiansia ed padron ya inletneg to.

²³ Say pangalig tayo ed si Kristo et manresulta ed dakel a bendisyon. Say bilay tayo so magmaliw a lalon makabaliksan tan makapenek lapud iyaapasakey tayoy panggawa ed linawa na Dios imbes a say panlabayan tayon dili. (Juan 5:30; 6:38) Walaan itayo na malinis a konsiensia. Magmaliw a napanuliranan so panakar tayo. Iimbitaan nen Jesus iray amin a nakekesawan tan nabebelatan ya ondago ed sikato pian nainawaan iray kakamarerwa ra. (Mateo 11:28-30) Sano tumboken tayoy ehemplo nen Jesus, nainawaan met so arum diad pilimog tayo. Itultuloy tayo sirin so manakar a singa impanakar nen Jesus.

Kasin Nanonotan Yo?

• Panon ya idadaulo nen Kristo iray papatumbok to natan?

• Panon a natumbok na saray mamatatken so panangidaulo nen Kristo diad pangagamil da ed inter na Dios ya autoridad?

• Panon tayon natumbok so ehemplo nen Jesus sano pidedenengan iray kakulangan na arum?

• Panon a niyuna na saray kalangweran so intereses na Panarian?

[Tepetepet Parad Panagaral]

[Litrato ed pahina 23]

Saray Kristianon mamatatken so ontutulong ed sikatayon tumboken so panangidaulo nen Kristo

[Saray litrato ed pahina 24, 25]

Sikayoran kalangweran, antoray plano yo pian nawalaan kayo na makatumang a bilay bilang Kristiano?