Sikayo so Agbalot Paulyanan nen Jehova

SARAY Kristiano ed Judea so manasagmak na maruksan isusumpa, tan kinaukolan iran mipuligesgesan ed materyalistikon panmoria na totoo ed kaliberliber da. Pian napabiskeg ira, inaon nen apostol Pablo iray imbalikas nen Jehova ed saray Israelita sanen paloob la ra ed Insipan a Dalin. Oniay insulat nen Pablo: “Agtaka naani taynan, tan agtaka naani ikaindan.” (Hebreos 13:5; Deuteronomio 31:6) Sayan sipan et seguradon amabiskeg ed saray Hebreon Kristiano nen inmunan siglo.

Satan met a sipan so mamabiskeg komon ed sikatayo pian natalonaan iray kapagaan lapud pambibilay tayo la ed “saray panaon a maatap [a mairap a pidenengan].” (2 Timoteo 3:1) No manmatalek itayo ed si Jehova tan onkiwas itayo unong ed satan, sikatoy ontulong ed sikatayo anggan diad sankairapan iran kipapasen. Pian napaneknekan tayo a talagan totooren nen Jehova iyan sipan to, imanoen tayo so alimbawa na sakey a toon biglan naandian na anapan.

Pangarap ed Ag-inilaloan a Pananguman

Diad sankamundoan et ondarakel so andian na trabaho. Unong ed sakey a magasin ed Poland, say inkaandi na trabaho so ipapasen a “sakey ed saray sankairapan a problema ed sosyedad tan ekonomya.” Apektado met iray maasenso lan bansa. Alimbawa, anggan diad saray membro na Organization for Economic Cooperation and Development, say bilang na saray andian na trabaho kasabi 2004 et “sinmulok ed 32 a milyon, ya atagtagey itan nen say diad panaon na Baleg a Depresyon nen dekada na 1930.” Diad Poland, say Central Statistical Office so akapangilista na taloran milyon ya andian na trabaho nen Disyembre 2003, a “manutugyop [itan] ed 18 porsiento na saray ombaley a wala la’d edad a mantrabaho.” Inkuan na sakey a report a say bilang na saray ombaley ed Abalaten Aprika ya andian na trabaho et inmabot ed 47.8 porsiento nen 2002!

Dakel so peteg a naaapektoan ed biglan pakakaandi tan pakakaekal ed trabaho, pati saray lingkor nen Jehova. “Say panaon tan ag-iilaloan a nagagawa” et onsasabi ed anggan siopa. (Eclesiastes 9:11, NW) Nayarin nibalikas tayo met iray salita nen salmistan David: “Saray gonigon na pusok apabaleg ira.” (Salmo 25:17) Natalonaan mo kasi iratan ya agmakapaliket a sirkumstansya? Nayarin mangapekta iratan ed sika diad emosyonal, espiritual, tan materyal a paraan. No naandian ka na trabaho, kasin makapawil ka ed datin kipapasen mo?

 Panalona ed Detdet ed Emosyon

“Mas ansakit parad lalaki so pakaandian na trabaho,” lapud sikaray gendat ya ipapasen a managlegpet na pamilya, so impaliwawa na sikolohistan si Janusz Wietrzyński. Inkuan to a nayarin pansengegan itan na “pirmin panguman-uman na liknaan” na laki, a magmaliw a maisasanok ya anggad naandian la na ilalo. Say ama a nakal ed trabaho et nayarin naandian na dilin-kompiyansa tan magmaliw a “makolkol ed pamilya to.”

Oniay impaliwawa nen Adam, sakey a Kristiano a walaan na duaran ilalak, nipaakar ed alikna to sanen naandian na trabaho: “Nagmaliw ak a mapayunget; amin lan bengatla et makapaingongot ed siak. Anggan diad labi et nakukugip kon naynay so nipaakar ed trabaho tan no panon kon nalegpet so ananak ko tan say asawak, ya ag-inilaloan a nakal met ed trabaho.” Sanen naandian na anapan so sanasawan Ryszard tan Mariola, a walaan na sakey ya anak, balbaleg so utang da ed banko. Oniay inkuan nen Mariola: “Nagogonigon ak a naynay, tan nakokonsiensia ak lapud alingo kami ed inyutang mi. Lanang kon iisipen a kasalanan kon amin itan.” No nidunget itayo ed ontan iran situasyon, nayarin magmainomay itayon onsanok, manaburido, odino nasakitan, tan nayarin nadaeg itayo na liknaan tayo. Kanian panon tayon nakontrol iratan a negatibon liknaan?

Say Biblia so epektibon manisimbawa no panon tayon pansiansiaen so positibon awawey. “Agkayo mapaga ed antokaman,” so insimbawa nen apostol Pablo, “noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo [panamegley nen] Kristo Jesus.” (Filipos 4:6, 7) No onasingger itayo ed si Jehova diad pikakasi, niwala ed sikatayo so “deen na Dios,” sakey a kalmadon kanonotan a nibase ed pananisia tayo ed sikato. Oniay inkuan nen Irena, ya asawa nen Adam: “Diad saray pikakasi mi, imbalikas mi ed si Jehova so kipapasen mi tan no panon min napasimpli a nagkalalo so kabibilay mi. Say masiken ko, a kaslakan et mainomay a manaburido, so nanisip a walan siansia so solusyon.”

No bilang ta biglan naandian ka na trabaho, pankanawnawam itan pian iyaplika so simbawa nen Jesu-Kristo diad Sermon ed Palandey: “Agkayo mapaga’d panagbila’yo no anto so kanen yo, ono anto so inumen yo; agyo met kapagaay laman yo, no anto so ikawes yo. . . . Anapen yo nin unona so panarian, tan say inkatunong to; et amin iraya a bengatla niarum ira ed sikayo.” (Mateo 6:25, 33) Satan a simbawa so inyaplika di Ryszard tan Mariola diad impanalona ra ed nalilikna ra. “Siak so mabetbet a liligliwaen nen masiken ko tan ipupurek to ya agkami ikaindan nen Jehova,” so nanonotan nen Mariola. Oniay inkuan met nen masiken to: “Lapud agkami ontutundan manpikasi a sankaiba, sikami so lalon apaapit ed Dios tan ed sakey tan sakey, a satan so angiter na kakkaukolan min ligliwa.”

Ontulong met ed sikatayo so masanton espiritu na Dios pian ontalona. Say dangka, a nayarin pawalaen ed sikatayo na espiritu, so makatulong ed sikatayo a mansiansian kalmado. (Galacia 5:22, 23) Nayarin mairap itan, balet ta posible, lapud insipan nen Jesus a ‘say mangatatawen ya Ama tayo so mangiter na masanton espiritu ed saraman so onkerew ed sikato.’​—Lucas 11:13; 1 Juan 5:14, 15.

 Agpapaulyanan Iray Espiritual a Pankaukolan Yo

Say ag-iilaloan a pakasisante ed trabaho so nayarin diad gapo et makadismaya ed anggan say sankabalansian lan Kristiano, balet nepeg ya agtayo papaulyanan iray espiritual a pankaukolan tayo. Imanoen pa so alimbawa na 40-años a si Moises, a sigpot ya anguman so bilay to sanen naandian na posisyon diad loob na sankaabungan na ari tan kinaukolan toy magmaliw a pastol, sakey a klase na trabahon leleglemewen na saray Ehipsio. (Genesis 46:34) Kinaukolan ya itukoy nen Moises so inkasikato ed saray balon kipapasen to. Diad tinmumbok ya 40 a taon, inabuloyan toy Jehova a manmoldi ed sikato tan mangiparaan ed sikato parad balon kimkimey ed arapen. (Exodo 2:11-22; Gawa 7:29, 30; Hebreos 11:24-26) Anggaman nidunget si Moises ed saray kairapan, inteen toy nonot to ed espiritual iran bengatla tan mabulos ton inawat so panangipasal nen Jehova. Komon ta agtayon balot abuloyan a napaulyanan so espiritualidad tayo lapud mairap iran kipapasen!

Anggaman makapaermen a tuloy so biglan pakaandian na trabaho, maabig a pankanawnawa itan pian paeleten so relasyon tayo ed si Jehova a Dios tan ed totoo to. Ontan so impanmoria nen Adam, ya asalambit diad gapo. Inkuan to: “Sanen sikamin sanasawa so naandian na trabaho, agbalot sinmebang ed nonot mi so onliwat ed Makristiano iran pantitipon odino matalag lan mibiang diad panagpulong. Lapud satan a panmoria, agkami nagmaliw a mapagpaga nipaakar ed arapen.” Ontan met so liknaan nen Ryszard: “No agkami miaaral tan manpupulong, agmin balot natalonaan so problema; maseguron adaeg kami la na kapagaan. Say pitotongtong mi ed arum nipaakar ed espiritual so makapabiskeg, lapud nipapaimano ed sikami iray pankaukolan  da, aliwan saray dilin pankaukolan mi.”​—Filipos 2:4.

On, imbes a panaburidoan so pananap na trabaho, panggunaetan ya usaren so ekstran panaon parad espiritual iran aktibidad, personal a panag-aral, pibiang ed kimkimey na kongregasyon, odino pamalaknab na ministeryom. Imbes a manbilay labat ya andiay trabaho, nayarian mon ‘padaaken so kimey mo ed Katawan’​—a satan so mamaliket ed sika tan ed siopaman iran masimoon ya indibidual a mangawat ed mensahe na Panarian ya ipupulong mo.​—1 Corinto 15:58.

Panlegpet ed Pamilya Yo

Anggaman ontan, agnapenek so pisikal a pankaukolan panamegley na espiritual a tagano. Nepeg tayon tandaan so onggendan a prinsipyo: “No wala so agmanagano ed anak to, tan lalo la ed saray kakaamong to a dili, pinaandi to la so pananisia, et sikato so lalon mauges nen say agmanisia.” (1 Timoteo 5:8) “Anggaman akaparaan iray agagi ed kongregasyon ya ontulong parad pisikal iran pankaukolan mi,” so inaksobi nen Adam, “bilang Kristiano et obligado kami a mananap na trabaho.” Makapanilalo itayo ed tulong nen Jehova tan saray totoo to, balet nepeg tayon tandaan a sikatayoy kaukolan ya onkiwas ya unona pian mananap na trabaho.

Panon tayon nagawaan itan? “Agbasta manalagar ed Dios a tulongan to ka, a manilalo labat na milagro,” so impaliwawa nen Adam. “Sano manaanap ka na trabaho, ipakabat mon tampol a sikay sakey ed saray Tasi nen Jehova. Kaslakan et papablien itan na saray amo.” Oniay insimbawa nen Ryszard: “Mantepet ka ed siopaman a kabat mo no wala kasi amta ton napantrabahoan, naynay ya onla ed ahensia parad trabaho, basaen iray paimano, a singa say: ‘Mankaukolan na biin mangasikaso na baldado’; odino, ‘Temporaryon trabaho: Manburbor na strawberry.’ Agka onsasawan mananap! Agka mapili, anggan say iter ed sikan trabaho et abebbeba odino ag-ontukoy ed samay pipirawaten mo.”

On, ‘si Jehova so mananulong mo.’ ‘Agto ka naani taynan tan agto ka naani ikaindan.’ (Hebreos 13:5, 6) Agmo kaukolan so magmaliw a mapagpaga. Oniay insulat na salmistan David: “Ipiam ed Jehova so dalan mo; manmatalek ka met ed sikato: et sikato igawa to.” (Salmo 37:5) Say ‘pangipiya na dalan tayo ed si Jehova’ et mankabaliksan a sikatayoy manmatalek ed sikato tan manggawa ed saray bengatla unong ed paraan to, anggaman ompatnag a mairap parad sikatayo iray kipapasen.

Ayarian nen Adam tan Irena a legpeten so inkasikara panamegley na panaglinis na bintana tan stairwell tan aliwa iran magastos sano mansasaliw ira na bengabengatla. Sikaray naynay met ya oonla ed ahensia parad trabaho. “Naynay ya onsasabi so tulong sano kakkaukolan mi itan,” so inkuan nen Irena. Oniay inkuan met na masiken to: “Amoria mi diad inlabas na panaon a saray bengatlan impipikasi mi et aliwan eksakton mitunosan ed linawa na Dios. Saya so angibangat ed sikami a manmatalek ed kakabatan to tan ag-onkiwas unong ed dilin pakatalos mi. Magmaong so kalmadon panalagar ed Dios a mangitarya na solusyon.”​—Santiago 1:4.

Si Ryszard tan Mariola so angawat na nanduruman trabaho a temporaryo labat, balet ta kaleganan na satan et manpupulong ira diad saray teritoryan babaleg so pankaukolan. “Makakaromog kami na kakkaukolan iran trabaho diad saray panaon ya anggapo lay naakan mi,” so inkuan nen Ryszard. “Agmi aawaten iray trabahon atagey so sueldo, a mamuger ed sikami ed teokratiko iran responsabilidad mi. Mas nilabay mi so manalagar ed si Jehova.” Panisiaan da ya inmaneobra nen Jehova so bengabengatla pian makapan-abang ira na mamurmuran apartment tan diad kaunoran et akalmo na trabaho si Ryszard.

Talagan ansakit so naandian na trabaho, balet akin ta no ipasen itan bilang pankanawnawa pian naeksperiensyam a mismo ya agkan balot ikaindan nen Jehova? Sika so asikasoen nen Jehova. (1 Pedro 5:6, 7) Oniay insipan to panamegley nen propetan Isaias: “Agka napagaan, ta siak so Dios mo; pabiskegen ta ka naani; on, tulongan ta ka.” (Isaias 41:10) Agmo aabuloyan a manderal ed sika so ag-iilaloan a nagawa, anggan say pakaandian na trabaho. Gawam so anggaay nayarian mo, tan ipalimam so arum ed si Jehova. Manalagar ka a “mareereen” ed si Jehova. (Tagleey 3:26) Seguradon nagamoran mo so daakan a bendisyon.​—Jeremias 17:7.

[Litrato ed pahina 9]

Usaren so panaon parad espiritual a kimkimey

[Saray litrato ed pahina 10]

Aralen so magmaliw a magimper, tan agmapilipili sano manaanap na trabaho