Saray Makapakelkelaw ed Palsa so Mangitatandoro ed si Jehova

AGNAISIP a maong na ag-ayadyarin totoo so nitandoron kipapasen nen Jehova a Dios. Saray pinalsa to diad dalin tan ed katawenan so mangidadalangirang ed sikato tan pandindinayewan tayo.​—Salmo 19:1-4.

Bilang Manamalsa tan Soberano ed Uniberso, si Jehova so talagan makanepegan a dengelen sano sikatoy mansasalita. Balet agaylay pankelkelaw tayo no sikato so mansalita ed sikatayon totoo labat diad dalin! Ipasen pa a sikatoy mitongtong ed sika, a nayarin diad panamegley na anghel. Seguradon manimano kan maong. Dinmengel a maong so maptek a toon si Job sanen sikatoy kinatongtong na Dios manga 3,500 a taon lay apalabas. Anto so naaralan tayo ed saray imbaga na Dios ed si Job nipaakar ed dalin tan say pisikal a katawenan?

Siopa so Angiletneg ed Dalin, tan say Mangokontrol ed Dayat?

Manlapud aloboob et nantepet so Dios ed si Job nipaakar ed dalin tan dayat. (Job 38:1-11) Anggapo so toon arkitekto a nandesidi ed kabaleg na dalin insan tinmulong a manggawa ed satan. Pian ikompara so dalin ed sakey a paalagey, oniay intepet na Dios: “Siopa so angigaton na panukong a bato to?” Aliwan say too! Maniimaton iray anghel ya ananak nen Jehova tan manliket ira sanen papalsaen to iyan planeta.

Say dayat et aganggano ni no ikompara ed kabayag la nen Jehova, a piguratibo ton kakawesan itan. Satan so “linmetaw, a singa binmutay ed eges.” Impasen na Dios so dayat ed nepeg a pangipasenan a singano binalewetan tan kinapotan to itan, tan aapektaen na bulan tan agew so iyaatagey odino iyaabeba na danum.

Oniay kuan na The World Book Encyclopedia: “Say dagem so pansesengegan na saray maslak a daluyon ed dayat, manlapud angkelag anggad angkakabaleg iran daluyon legan na bagyo a masulok a 100 piye (30 metro) ed kaatagey. . . . Sano ondeen so dagem, mantultuloy ya onagus iray daluyon ed dayat tan arawdawi so nasasabi na saratan. Magmaliw la iratan a mareen tan andukey. Diad kaunoran et makasabi iray daluyon diad asingger ed gilig na dayat insan nabuyak tan magmaliw iratan a burakan (surf).” Uunoren na dayat so ganggan na Dios: “Angga dia so sabien mo, balet agka onlabas; tan dia saray malangas a daluyon mo mangangga.”

Siopa so Mamapelnak ed Palbangon?

Say tinmumbok a tepet na Dios ed si Job et nipaakar ed saray epekto na liwawa tan arum niran bengatla. (Job 38:12-18) Anggapo so too a makapangiganggan ed pantumbokan na agew tan labi. Diad piguratibon salita et singa eegnaan na liwawa ed kabuasan iray sampot na dalin a singa aysing insan ipayag to itan pian napagpag iray mauges. Saray managkasalanan so manggagawa na kaugsan diad “pansirunget” odino ambilunget a labi. (Job 24:15, 16) Balet  sibwaken na palbangon so dakel a managgaway-mauges.

Diad lima na Dios, say liwawa ed kabuasan et singa sakey a panagtatak a marakdakep so marka na satan ed dalin. Ipaparungtal na sinag na agew so dakel a kolor, kanian say globo et singa asulongan na marakdakep iran kawes. Anggapo so ginawa nen Job ed satan tan agto nanakar ed dalem na danum pian sansakeyen ton bilangen iray mablin kayamanan a wadtan. On, anggad sayan panaon et limitado labat so pikakabat na saray managsukimat ed bilay diad dayat!

Siopa so Walaan na Saray Kamalir na Niebe tan Graniso?

Anggapo so too ya akapangulop ed impawil na liwawa odino bilunget diad nanlapuan to odino linmoob ed saray kamalir na niebe tan graniso ya irereserba na Dios parad “agew na tulot tan bakal.” (Job 38:19-23) Sanen inusar nen Jehova so graniso sumpad saray kakabusol to diad Gabaon, “dakdakel so inatey ed uran a yelo [odino graniso] nen saray pinatey na saray anak na Israel ed kampilan.” (Josue 10:11) Nayarin usaren to met iray graniso, ya ag-amta ni ed kabaleg, pian deralen to iray mauges a totoo ya idauloan nen Gog, odino si Satanas.​—Ezequiel 38:18, 22.

Saray graniso a singa-iknol kabaleg so amatey ed 25 a totoo tan anugat ed 200 nin totoo diad sentral a Probinsya na Henan, Tsina, nen Hulyo 2002. Nipaakar ed sakey a bagyon walay uran a graniso nen 1545, oniay insulat na Italyanon iskultor a si Benvenuto Cellini: “Sakey ya agew et wala kami ed lugar ya arawi ed Lyons . . . sanen ginmapo so makmaksil a karol ed katawenan. . . . Kayari na karol, say katawenan so maung-ungol tan makapataktakot ya abaloan ko et anggaan lay mundo; kanian pinatundak ya agano so kabayok, sanen inmuran lay graniso ya anggapoy kaiban danum. . . . Insan say graniso so nagmaliw lan angkakabaleg a singa dalayap. . . . Kinmasil ya agano so bagyo, balet tinmundan siansia . . . Nampapanengnengan kami na saray sugat tan akutkutdisan a baog; balet ta sanen akaarawi kami na manga sakey milya et anengneng mi so aderalderal ya agmipara ed asagmak mi, tan agnadeskribe iman. Naarurot so bulobulong na amin a kakiewan tan aluplupak iratan: inaatey iray ayep a walad uma; dakel ed saray manpapastol so inatey met; anengneng mi so dakerakel a graniso ya agnaakop na duaran lima mi.”​—Autobiography (Libro II, 50), Harvard Classics, Tomo 31, pahina 352-3.

Anto kasi so nagawa sano lukasan la nen Jehova iray kamalir ton napnoy niebe tan graniso sumpad saray kakabusol to? Ag-ira nabilay sano usaren to so niebe odino graniso pian gawaen so panlabayan to.

Siopa so Nanggawa ed Uran, Linaew, Musiak, tan Yelo?

Say tinmumbok a tepet nen Jehova ed si Job et nipaakar ed uran, linaew, musiak (frost), tan yelo. (Job 38:24-30) Say Dios so Nanggawa ed uran, tan anggan say “dalin ya anggapo so too” et minanabang ed uran. Say uran, yelo, tan musiak so andian na ama a too odino nanlapuan.

Inkuan na Nature Bulletin: “Say nikadkaduma tan nayarin say sankaimportantian a nagagawa [ed yelo] et singa onlelebag so danum legan ya onkikigtel itan . . . Lapud onkikigtel tan  onleletaw so yelo ed sakey a linok legan na panaoy-ambetel, posiblin makapambilay iray tanaman tan ayayep (sira, tan arum nira) diad dalem na danum. No . . . say danum et onawet legan ya onyeyelo, say yelo so mas ambelat nen say danum tan onlereg itan. Mas dakel a yelo so naporma ed tapew anggad sigpot lan onkigtel so linok. . . . Diad saray ambetebetel a parte na mundo et permanente lan kinmigtel iray ilog, linok, tan anggan saray dayat.”

Agaylay pisalamat tayo ta ag-onkikigtel a singa inmawet a yelo iray akatiponan na danum! Tan seguradon misalamat itayo lapud say pinalsa nen Jehova ya uran tan yelo et mamapabuna na tanaman ed dalin.

Siopa so Angiletneg ed Saray Uksoy na Katawenan?

Intepet met na Dios ed si Job so nipaakar ed katawenan. (Job 38:31-33) Say ulop na bibitewen a Kimah so kaslakan a tatawagen a Pleyades, sakey a grupo na pitoran angkakabaleg a bitewen tan pigaran angkekelag a bitewen, a say kaarawi na saratan manlapud agew et 380 light-years. Agnayarian na too a ‘bedberen so siglaot na Pleyades’ pian pantitiponen iratan. Anggapo so toon makasarag a ‘manlukak ed saray bedber na Orion’ odino grupo na bibitewen a tinawag met a Kesil. Antokaman so kaplesan a pananawag ed saray Mazzaroth tan Ash a grupo na bibitewen, ag-iratan nakontrol tan nigiya na too. Agnauman na totoo iray “uksoy na saray tawen,” saray ley a mangigigiya ed uniberso.

Inletneg na Dios iray ley a mangigigiya ed saray palsa ed tawen, a mangaapekta ed klima, iyatagey-iyabeba na danum, atmospera, tan say mismon kiwawala na bilay diad sayan planeta. Konsideraen pa so agew. Nipaakar ed satan et oniay kuan na The Encyclopedia Americana (1996 ya Edisyon): “Say sinag na agew so mangisusuplay na petang tan liwawa diad dalin, mamapabuna ed saray tanaman, mamapasengaw ed danum manlapud dayat tan arum niran akatiponan na danum, mamapawala met na nanduruman klase na dagem, tan dakel niran bengatla ya importante ed kiwawala na bilay diad dalin.” Inkuan met na satan a reperensya: “Pian natalosan so kabiskeg na enerhiya na agew, nakaukolan ya umamengen na sakey a too a say agew so nanlapuan na amin ya enerhiya a wala ed dagem tan saray dam tan il-ilog tan  amin ya enerhiya a papawalaen na saray natural a bengatla a singa say kiew, karbon, tan oil ya atipon diad melmelag a planeta [say dalin] a 150 milyon kilometro kaarawi manlapud agew.”

Siopa so Angiyan na Kakabatan ed Saray Lurem?

Imbaga nen Jehova ed si Job ya umamengen to iray lurem. (Job 38:34-38) Agnasarag na too ya iganggan so katibukel na sakey a lurem tan say pangipelag na satan ed uran. Balet ta akadependin maong so totoo ed sikulo na danum a ginawa na Manamalsa!

Anto so sikulo na danum? Oniay kuan na sakey a reperensya: “Say sikulo na danum et walaan na apatiran nanduruman proseso: pantipon, isengaw (evaporation), ipelag na uran (precipitation), tan iyagus. Say danum so temporaryon natipon ed leksab: diad saray dayat, linok, tan ilog; tan diad saray yelo ed toktok na kapalandeyan tan saray yelo ed lawak. Onsengaw itan manlapud tapew na dalin, onkigtel ed saray lurem, ompelag lamet ed dalin bilang uran odino niebe, tan diad kaunoran et onagus ed dayat odino onsengaw lamet ed atmospera. Amin lawarin danum a walad dalin so dinmalan ed sikulo na danum ed agnabilang a danay.”​—Microsoft Encarta Reference Library 2005.

Saray lurem a napnoy uran et singa kargaan na danum diad tawen. Sano ipariking nen Jehova iratan, iyibung na saratan so dakerakel ya uran tan say dabok et magmaliw a pitek tan onkulnet so dalin. Sarag na Dios a pawalaen odino kontrolen so uran.​—Santiago 5:17, 18.

Say uran et mabetbet a kabansag na kirmat, balet agnasarag na too ya ipagawa ed kirmat iray mismon panlabayan to. Saray kirmat et nirepresenta a singa ra manrereport ed Dios, a kuan da, “Wadia kami!” Oniay kuan na Compton’s Encyclopedia: “Say kirmat et mamapawala na importante iran kemikal a pananguman diad atmospera. Legan a manbabaroy so kirmat diad dagem, pawalaen na satan so pirmin petang a pantekepen to so nitroheno tan oksiheno pian natibukel so nitrate tan arum niran nantekep a kemikal. Saratan a nantekep a kemikal so ompelag ed Dalin a kaiba ed uran. Diad onian paraan, say atmospera so makapantultuloy ya ontulong ed pangisuplay lamet na saray nutrina a nakaukolan na dalin diad pamatubo na saray tanaman.” Say too so andian nin siansia na nagnap a kakabatan nipaakar ed kirmat balet ta kabkabisado itan na Dios.

Saray Makapakelkelaw ed Palsa so Mangidadayew ed Dios

Saray makapakelaw ed palsa so talagan mangidadalangirang ed Manamalsa na amin a bengatla. (Apocalipsis 4:11) Agaylay pandinayew nen Job ed saray salita nen Jehova nipaakar ed dalin tan saray palsa a walad liwang!

Saray makapakelkelaw ed palsa a kinonsidera tayo so pigara lambengat ed dakerakel a tepet tan deskripsion a niparungtal ed si Job. Balet ta saray kinonsidera tayo dia et mamakiwas la ed sikatayon mangikelyaw na: “Agtayo natalosan a sigpot so talonggaring na Dios.”​—Job 36:26, Maung a Balita.

[Picture Credit Line ed pahina 14]

Niebe: snowcrystals.net

[Picture Credit Lines ed pahina 15]

Pleyades: NASA, ESA and AURA/Caltech; sira: U.S. Fish & Wildlife Service, Washington, D.C./William W. Hartley