No Panon a Daegen na Kamaongan so Kaugsan

Si Arin David et maong a too. Walaan na aralem a panangaro ed Dios, walaan na pampilalek ed inkahustisya, tan walaan na maaron panangiyansakit ed saray mapaabeba. Ingen, saya lanlamang a maong ya ari so akapikalugoran ed asawan bii na sakey ed saray napanmatalkan a sundalo to. Tan sanen asukayan nen David ya alukonan to si Batseba, samay asawan bii, inmaneobra to so ipatey na masiken to. Insan to la’d satan inkasal si Batseba diad panasali ton sakbongan iray agawaan ton krimen.​—2 Samuel 11:1-27.

MABITAR a saray totoo et walaan na kapasidad a manggawa na dakel a kamaongan. Akin balet a makakagawa ira na amayamay a kaugsan? Tinukoy na Biblia so pigaran manunan rason. Ipaparungtal met na satan no panon a diad panamegley nen Kristo Jesus et permanente lan paandien na Dios so amin a kaugsan.

Say Tendensian Manggawa na Kaugsan

Tinukoy nen Arin David a mismo so sakey a sengegan na mauges iran gawa. Sanen niparungtal laray agawa ton krimen, inaksobi ton amin iratan. Insan oniay imbaga to tekep na pagbabawi: “Nia, nipaway ak ed kasulitan; tan dia ed kasalanan innginew ak nen inak.” (Salmo 51:5) Agbalot gagala na Dios a saray kainaan et manginginew na ananak a mankasalanan. Balet, sanen pinili nen Eva, insan si Adan, so nanrebelde ed Dios, naandian ira na kapasidad a manilalak na saray andiay kasalanan. (Roma 5:12) Diad idarakel na imperpekton rasa na katooan, binmitar a say tendensia ra et manggawa na kaugsan, lapud inkuan na Genesis 8:21 a say “panangisip na puso na too mauges a nanlapu ed inkaugaw to.”

No agnipetek, sayan tendensia a manggawa na mauges so manresulta ed “pikakalugoran, . . . pambubusolan, pankokolkol, imon, sanok, pansesepakan, inkaapag-apag, pamikpikewet ed  pananisia, saray sibletan,” tan arum nin makaderal iran ugali ya idedeskribe na Biblia bilang “saray gawa na laman.” (Galacia 5:19-21) Diad kaso nen Arin David, sikatoy nanpadaeg ed saray kakapuyan na laman tan akapanggawa na pikakalugoran, a nanresulta ed pankokolkol odino karawalan. (2 Samuel 12:1-12) Nayarian to komon a labanan so imoral a tendensia to. Balet, diad agto impangiwaklit ed pantindek to ed si Batseba, agawa ed sikato so proseson indeskribe na babangatan a si Santiago ed saginonor: “[Say] sinansakey a too natukso, no natangguyor tan naayat na kaibgan na laman to a dili. Et no say kaibgan na laman so nanlukon la yanak to so kasalanan, et no asabi to lay inkagnap to, say kasalanan yanak to so patey.”​—Santiago 1:14, 15.

Saray palanit a panamatey, panamasoot, tan panagsamsam ya asalambit ed inmunan artikulo et grabe iran alimbawa na saray nagawa no abuloyan na totoon nadaeg ira na mauges a pilpilalek da.

Onloor so Kaugsan Lapud Inkaandi Pikakabat

Impabitar na eksperiensya nen apostol Pablo so komaduan sengegan no akin a manggagawa so totoo na kaugsan. Diad samay impatey to, sikatoy akabkabat la bilang matamoy, tan maaron too. Mabulbulos ton insakripisyo so inkasikato pian panlingkoran iray Kristianon agagi ton lalaki tan bibii. (1 Tesalonica 2:7-9) Balet diad kasakbayan na bilay to, sanen Saulo ni so kabkabat a ngaran to, sikatoy “maningas ed pangigagaem tan panagpatey” ed saraya lanlamang a grupo. (Gawa 9:1, 2) Akin ya akinonong tan akibiang si Pablo ed sarayan kaugsan a ginawa ed saray inmunan Kristiano? “Lapud sikato so ginawak ya andi am-amta,” so kuanto. (1 Timoteo 1:13) On, si Pablo so datin ‘maseseg ed Dios, balet aliwa ya unong ed kakabatan.’​—Roma 10:2.

Singa si Pablo, dakel a masimoon a totoo so akagawa na saray kaugsan lapud andian iray suston kakabatan nipaakar ed linawa na Dios. Alimbawa, pinasakbayan nen Jesus iray papatumbok to: “Say oras ondateng a siopaman a mamatey ed sikayo isipen to a mangisaklang na panlingkor ed Dios.” (Juan 16:2) Naeeksperiensya na saray Tasi nen Jehova natan so katuaan na saray salita nen Jesus. Diad dakel iran bansa, sikaray pinasegsegang tan pinatey ni ingen na totoon mankuan a manlilingkor ed Dios. Mapatnag a say ontan a lingon seseg et agmakapaliket ed tuan Dios.​—1 Tesalonica 1:6.

Say Angigapo na Kaugsan

Impabidbir nen Jesus so manunan sengegan na kiwawalay kaugsan. Oniay inkuan to ed saray papangulo na relihyon a determinadon mamatey ed sikato: “Sikayo kien kayo na ama yo a Diablo, et saray kalikaliktan nen ama yo sikato so labay yo a gawaen. Sikato so akapatey nanlapu ed gapo.” (Juan 8:44) Si Satanas imay anukso ed si Adan tan Eva a manrebelde ed Dios lapud sinisiblet iran rason. Satan ya impanrebelde so angitarok ed amin a katooan na kasalanan tan sirin et pati patey.

Say manamatey a disposisyon nen Satanas so lalon binmitar diad paraan na impideneng to ed si Job. Sanen sikatoy inabuloyan nen Jehova a manubok ed katooran nen Job, si Satanas so ag-akontento ya angupot ed amin a kayarian nen Job. Sikato met so sengegan na impatey na samploran ananak nen Job. (Job 1:9-19) Diad agano  niran dekada, naeksperiensya na katooan so biglan inkasmak na kaugsan lapud ag-inkayadyari tan inkaandi pikakabat na too tan mapalalon pibabali nen Satanas ed kurang na katooan. Imparungtal na Biblia a say Diablo so “nibantak dia ed dalin, tan saray anghel to nibantak ira ya alanor ed sikato.” Susto so impasakbay na satan lanlamang a propesiya a lapud impakalimitaan dia nen Satanas et magmaliw a lalon ‘pakaskasi so dalin.’ Anggaman agnapaskar nen Satanas iray totoo a manggawa na kaugsan, sikatoy onsiano no nipaakar ed panamalikdo odino ‘panagtila ed lapag na sankamundoan.’​—Apocalipsis 12:9, 12.

Pangekal ed Tendensia a Manggaway Kaugsan

Ta pian permanentin naekal so kaugsan ed sosyedad na totoo, nepeg a naekal so nisipor a tendensia na too a manggawa na kaugsan, say kaandian to na suston kakabatan, tan say impluensya nen Satanas. Unona, panon a naekal ed puso na too so nisipor a tendensia ton mankasalanan?

Ag-itan nagawaan na siopaman a doktor odino medisinan inimbento na too. Balet, angitarya si Jehova a Dios na tambal na atawir a kasalanan tan ag-inkayadyari parad amin a mabulos a mangawat ed satan. Insulat nen apostol Juan: “Say dala nen Jesus . . . linisan to itayo ed amin a kasalanan.” (1 Juan 1:7) Sanen mabulbulos ya imbagat nen Jesus so perpekton bilay to, “inako to so kasalanan tayo ed laman to dia ed tapew na kiew, pian no inatey itayo ed kasalanan, manbilay itayo ed katunongan.” (1 Pedro 2:24) Satan a bagat nen Jesus so mangekal ed saray epekto na mauges a ginawa nen Adan. Imbaga nen Pablo a si Kristo Jesus so nagmaliw a ‘panondon ed amin a katooan.’ (1 Timoteo 2:6, Maung a Balita) On, say impatey nen Kristo so angilukas na dalan pian nipawil so inkaperpekto a pinirdi nen Adan.

Balet, nayarin itepet yo, ‘No nagmaliw a posible so kipawil na inkaperpekto diad impatey nen Jesus, 2,000 taon la so apalabas, akin a siansian wala ni kaugsan tan ipapatey?’ Makatulong so pakaebat ed satan a tepet pian naekal so komaduan sengegan na kaugsan​—say agpikabat na too ed saray gagala na Dios.

Ombulaslas so Kamaongan ed Suston Kakabatan

Say pakawalaan na suston kakabatan nipaakar ed gagawaen natan nen Jehova tan si Jesus pian naandi kaugsan et nayarin mangipaliis ed sakey a masimoon a too manlapud agginagalan pinonong ed kaugsan, odino alodloor ni, diad pagmaliw a ‘misesepakan ed Dios.’ (Gawa 5:38, 39) Mabulos a palampasen nen Jehova a Dios iray apalabas ya impankasalanan lapud inkaandi pikakabat. Oniay inkuan nen apostol Pablo dia ed Atenas: “Saray panaon sirin na andi pikakabat sikara so pinalabas na Dios, balet natan ibilin to ed amin a too, dia ed amin a pasen, a magbabawi ra. Bangta tinandaan to so sakey ya agew a sikato so pangukom to naani ed mundo unong ed katunongan, ed panamegley na saman a laki a tinandaan to; a sikato so pinaletan to ed saray amin, a sikato so pinaoli to ed bilay a nanlapu ed saray inatey.”​—Gawa 17:30, 31.

Amta nen Pablo manlapud eksperiensya ton mismo a si Jesus et pinaoli manlapud inaatey, lapud say apaolin Jesus a mismo so akitongtong tan amatunda ed sikato a mamasegsegang ed saray inmunan Kristiano. (Gawa 9:3-7) Sanen naawat nen Pablo so suston kakabatan nipaakar ed gagala na Dios, sikatoy tampol ya anguman tan nagmaliw a peteg a maong a too bilang panangalig ed Kristo. (1 Corinto 11:1; Colosas 3:9, 10) Niarum ni, maseseg ya impulong nen Pablo so “ebanghelyo na panarian.” (Mateo 24:14) Legan na ngalngali la 2,000 taon manlapud impatey tan inkioli nen Jesu-Kristo, sikatoy amili manlapud katooan na singa si Pablo a nakaiba ton manuley ed Panarian to.​—Apocalipsis 5:9, 10.

Manlapu la’d apalabas iran siglo anggad natan, maseseg a sinumpal na saray Tasi nen Jehova so ganggan nen Jesus ya: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a  naynay ed sikayo, ya angga ed kasampotan na mundo.” (Mateo 28:19, 20) Saramay onkiwas ed sayan mensahe so walaan na ilalon manbilay na andi-angga ed dalin diad silong na mangatatawen ya uley nen Kristo. Inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu Kristo. (Juan 17:3) Say panulong ed sakey pian nawalaan na sayan kakabatan so sankabalgan lan kamaongan a nagawaan na sakey a too ed arum.

Saramay mangawat ed sayan maong a balita na Panarian so mangipapatnag na saray kalidad a singa say “aro, liket, deen, kasungdoan, kauyamoan, kaabigan, sisia, tayadno” anggaman ed amin a kaugsan a walad kaliberliber da. (Galacia 5:22, 23) Bilang panangalig ed si Jesus, agda ‘itutumang ed anggan siopa so mauges ed mauges.’ (Roma 12:17) Balang sakey ed sikara so manggugunaet a ‘say maong so panaeg to ed mauges.’​—Roma 12:21; Mateo 5:44.

Say Unor lan Pananalo Sumpad Kaugsan

No bukor da lambengat, agbalot natalo na katooan so manunan promotor na kaugsan, salanti, si Satanas a Diablo. Balet, asingger la ya usaren nen Jehova si Jesus a manugat odino manmekmek ed ulo nen Satanas. (Genesis 3:15; Roma 16:20) Iganggan met nen Jehova si Kristo Jesus a ‘mamuyak tan mangupot’ ed amin a sistema na politika, a dakel ed saratan so nansengegan na amayamay a kaugsan ed interon awaran. (Daniel 2:44; Eclesiastes 8:9) Legan na sayan manasingger ya agew na panangukom, amin na saramay ‘ag-ontulok ed ebanghelyo na Katawan a Jesus so nadusa ed andi anggaan a kabalang.’​—2 Tesalonica 1:8, 9; Sofonias 1:14-18.

Diad bektan naandi la si Satanas tan saray manusuporta ed sikato, tulongan nen Jesus manlapud tawen iray aliktar a mangipawil ed orihinal a kipapasen na dalin. Paolien met nen Kristo iramay makanepegan na pankanawnawan manbilay ed naapiger lan dalin. (Lucas 23:32, 39-43; Juan 5:26-29) Diad panggawa ed satan, ekalen to so pigara ed saray epekto na kaugsan a sinagmak na katooan.

Agpaskaren nen Jehova iray totoo a mangunor ed maong a balita nipaakar ed si Jesus. Balet, sikatoy mangiiter ed totoo na pankanawnawa a mangala na kakabatan a mangitonton ed bilay. Importante ya anamoten mo la natan iyan pankanawnawa! (Sofonias 2:2, 3) No gawaen mo itan, naaralan mo no panon a talonaan so antokaman a kaugsan a manederal ed bilay mo. Nanengneng mo met no panon ya idaulo nen Kristo so unor a pananalo sumpad kaugsan.​—Apocalipsis 19:11-16; 20:1-3, 10; 21:3, 4.

[Litrato ed pahina 5]

Akinonong si Saulo ed kaugsan lapud anggapoy suston kakabatan to

[Litrato ed pahina 7]

Say panulong ed sakey a nawalaan na suston kakabatan nipaakar ed Dios so sankabalgan lan kamaongan a nagawaan na sakey a too ed arum