Agyo Papalongkitan so Diablo

“Agkayo mangiiter na pankanawnawa’d kinen Diablo.”​—EFESO 4:27, Maung a Balita.

1. Akin a nanduaruwaan na dakel a totoo so kiwawala na Diablo?

 DIAD loob na dakel a siglo et iisipen na dakel a totoo a say Diablo et sakey a pinalsan nansaklor tan walaan na petdak a salisali, akakawes na ambalanga, tan manguusar na baleg a tinidor pian ibuntok to iray mauges a totoo diad mandarlang ya impierno. Satan ya ideya so ag-ibabangat na Biblia. Balet ta makasengeg ed saratan a lingon pantalos, nanduaruwaan na minilyon a totoo so kiwawala na Diablo odino inisip da ya onaplika labat itan a termino diad kalidad a mauges.

2. Anto so pigaran Makasulatan a katuaan nipaakar ed Diablo?

² Itatarya na Biblia so paneknek na akaimaton tan say malinew a panamatua ed kiwawala na Diablo. Sikato so anengneng nen Jesu-Kristo ed mangatatawen ya ayaman na saray espiritu tan akisalita ed sikato diad dalin. (Job 1:6; Mateo 4:4-11) Anggaman ag-ipaparungtal na Kasulatan so orihinal a ngaran na sayan espiritun pinalsa, sikato so tinawag a Diablo (a mankabaliksan na “Managpauges”) lapud pinauges to so Dios. Sikato so tinawag met a Satanas (a mankabaliksan na “Sumusumpa”), lapud lalabanan to si Jehova. Si Satanas a Diablo so atukoy met bilang “say daan ya uleg,” a mapatnag ya ontan lapud inusar to so uleg a mamalikdo ed si Eva. (Apocalipsis 12:9; 1 Timoteo 2:14) Sikato met so kabkabat bilang say ‘mauges a sakey.’​—Mateo 6:13. *

3. Anton tepet so konsideraen tayo?

³ Bilang lingkor nen Jehova, agtayon balot labay ya aligen si Satanas, say manunaan a kabusol na alenleneg a tuan Dios. Nepeg tayo sirin a talinengen so simbawa nen apostol Pablo: “Agkayo mangiiter na pankanawnawa’d kinen Diablo.” (Efeso 4:27, MB) Anto sirin so pigara ed saray kagagawa nen Satanas ya agtayo nepeg ya aligen?

Ag-aaligen so Manunaan a Managpauges

4. Panon a pinauges na ‘mauges a sakey’ so Dios?

⁴ Say ‘mauges a sakey’ so makanepegan a tawagen a Diablo, lapud sikato so managpauges. Say panagpauges et sakey a palson balikas, panagderal, tan panagpabanday sumpad arum. Oniay ingganggan na Dios ed si Adan: “Say kiew na pakaamtaan mo na maong tan mauges, agmo nepeg a panganan: ta dia ed agew na pangan mo ed satan ompatey ka.” (Genesis 2:17) Nipaamta la itan ed si Eva, balet diad panamegley na sakey ya uleg et oniay imbaga na Diablo ed sikato: “Agkayo ompatey: Noagta amta na Dios a dia ed agew a pangan yo ed saman, nalukasan so saray mata yo ed satan, et singa kayo Dios, ya amta yo so maong tan mauges.” (Genesis 3:4, 5) Satan so makaderal a panagpauges ed si Jehova a Dios!

5. Akin a si Diotrefes et walaan na eebatan lapud impamauges to?

⁵ Niganggan iray Israelita ya: “Agmo nepeg so mamatulo tan mamaleksab a singa managtongtong na panalabutob ed saray katooan mo.” (Levitico 19:16) Oniay imbaga nen apostol Juan  nipaakar ed sakey a managpauges ed panaon to: “Siak sinulat ko na daiset so iglesia: balet si Diotrefes, ya aroen to a wala ed sikatoy katagtageyan ed sikara ed kalimog da, agto kami akoen. Kanian no onsabi ak, ipanonot ko so kagagawa to, a gagawaen to, a pitalabutob to itayo na maramsak iran salita.” (3 Juan 9, 10) Si Juan so pinauges nen Diotrefes tan sikato so walaan na eebatan lapud satan a ginawa to. Wala kasi so matoor a Kristiano a malabay a mangalig ed si Diotrefes tan ed si Satanas, say baleg a managpauges?

6, 7. Akin ya agtayo labay a paugesen so arum?

⁶ Saray lingkor nen Jehova so mabetbet a napupuntirya na saray panagpauges tan palson akusasyon. “Inmalagey so saray manunaan a saserdotes tan saray eskribas a [si Jesus] so indalem dan sankapilitan.” (Lucas 23:10) Si Pablo so palson inakusaan na Atagey a Saserdote a si Ananias tan arum nira. (Gawa 24:1-8) Tan sasaglawien na Biblia si Satanas bilang say “mangaakusan agew-labi ed saray agagi tayo, diad arap na Dios.” (Apocalipsis 12:10, MB) Saratan ya agagi a palson inakusaan et saray alanaan a Kristiano diad dalin diad sarayan kaunoran ya agew.

⁷ Anggapo so Kristiano a malabay a mamauges ed siopaman odino manggawa na palso iran akusasyon. Ingen, satan so nagawa no mantestigo itayo sumpad sananey a too, ya agtayo balet amta so amin a detalye. Diad Mosaikon Ganggan, say ginagala tan palson panag-akusa so manresulta ed ipatey na sakey a manag-akusa. (Exodo 20:16; Deuteronomio 19:15-19) Niarum ni, kabiangan ed saray kagulgula nen Jehova so “matila a tasi a manbitla na tilatila.” (Uliran 6:16-19) Segurado sirin ya agtayo labay ya aligen so manunaan a managpauges tan palson manag-akusa.

Ipulisay Iray Paraan na Sankaunaan a Managpatey

8. Diad anton paraan a say Diablo et “akapatey nanlapu ed gapo”?

⁸ Say Diablo et sakey a managpatey. “Sikato so akapatey nanlapu ed gapo,” so kuan nen Jesus. (Juan 8:44) Manlapu la’d primeron ginawa to ya impanagyat ed si Adan tan Eva ya ombeneg ed Dios, si Satanas so nagmaliw lan managpatey. Sikato so makasengeg ed impatey na inmunan paris a too tan saray ilalak da. (Roma 5:12) Nibaga tayon satan a kiwas et nagawaan lambengat na sakey a persona, ya aliwa labat itan a kalidad a mauges.

9. Unong a nipabitar ed 1 Juan 3:15, panon so nayarin pagmaliw tayon managpatey?

⁹ Oniay nidatak ed sakey ed Samploran Ganggan a niiter ed Israel: “Agka mamatey.” (Deuteronomio 5:17) Tan si apostol Pedro et nansulat ed saray Kristiano: “Aleg komon ya anggan siopa ed sikayo manlikna na irap a singa sakey ya akapatey.” (1 Pedro 4:15) Kanian bilang lingkor nen Jehova, ag-itayo mamatey. Ingen ta mankasalanan itayo ed arap na Dios sano busolen tayo so kapara tayon Kristiano tan pilaleken tayo so ipatey to. “Anggan siopa a mamusol ed agi to sikato so akapatey: tan amta yo a siopaman ya akapatey anggapo so bilay ya andi-angga a mansiansia ed sikato.” (1 Juan 3:15) Niganggan iray Israelita ya: “Agmo naani busolen so agim ed pusom.” (Levitico 19:17) Komon ta alisto itayon manresolbe ed antokaman a problema a linmesa ed baetan tayo tan ed sakey a kapanisiaan, ta pian agderalen na managpatey a si Satanas so pankakasakey tayo bilang Kristiano.​—Lucas 17:3, 4.

Ontalindeg a Malet Sumpad say Manunan Managtila

10, 11. Anto so nepeg tayon gawaen ta pian makatalindeg itayon malet sumpad manunan managtila, si Satanas?

¹⁰ Say Diablo et managtila. Inkuan nen Jesus: “Bangno mansalita na tila, mansalita nipaakar ed kayarian to, ta sikato matila, tan ama na tila.” (Juan 8:44) Si Satanas so nantila ed si Eva, bangta si Jesus so linma diad dalin pian mantasi nipaakar ed katuaan. (Juan 18:37) No ontalindeg itayon malet sumpad Diablo bilang papatumbok nen Kristo, agtayo mantila odino mamalikdo. Nepeg itayon ‘mansalita na tua.’ (Zacarias 8:16; Efeso 4:25) Say bendisyonan lambengat nen ‘Jehova a Dios na katuaan’ et saray matuan Tasi to. Anggapo so kanepegan na saray marelmeng a mangirepresenta ed sikato.​—Salmo 31:5; 50:16; Isaias 43:10.

¹¹ No papablien tayo so espiritual a kawayangan tayo manlapud saray satanikon katilaan, sikatayo  so mansiansia ed Inkakristiano, “say dalan na katuaan.” (2 Pedro 2:2; Juan 8:32) Say interon tugyop na saray Makristianon bangat so manibukel ed “say katuaan na ebanghelyo.” (Galacia 2:5, 14) Say mismon kilalaban tayo so akadepende ed ‘panakar tayo ed katuaan’​—a tumboken itan tan ontalindeg a malet sumpad say “ama na tila.”​—3 Juan 3, 4, 8.

Kontraen so Manunaan ya Apostata

12, 13. Panon so nepeg tayon pangitrato ed saray apostata?

¹² Say espiritun pinalsa a nagmaliw a Diablo so datin walad katuaan. Balet sikato so “agtinmalindeg ed katuaan,” so kuan nen Jesus, “ta anggapo ed sikato so katuaan.” (Juan 8:44) Sayan manunaan ya apostata so andi-tundan onsusumpa ed ‘say Dios na katuaan.’ Arum a Kristiano nen inmunan siglo so naplag ed “kalot na Diablo,” a mapatnag ya abiktima ira lapud apalikdo tan kinmasipa ira ed katuaan. Kanian impaseseg nen Pablo ed kakimeyan ton si Timoteo a bilinen to ira tekep na kaumildian ta pian onabig ira ed espiritual tan makablos ira ed kalot nen Satanas. (2 Timoteo 2:23-26) Siempre, sankaabigan la so pansiansian malet ed katuaan tan agbalot pakakalotan ed saray inaapostatan panmoria.

¹³ Lapud dinengel da so Diablo tan agda impulisay iray katilaan to, say inmunan paris a too so nanapostata. Kanian, nepeg tayo kasin dengelen iray apostata, basaen iray literatura ra, odino usisaen iray Web site da diad Internet? No aaroen tayo so Dios tan say katuaan, agtayo itan gawaen. Agtayo nepeg ya abuloyan iray apostata ya onloob ed kaabungan tayo odino anggan ibano ni ingen ira, lapud say ontan a kiwas et manggawa ed sikatayon ‘mibiang ed saray mauges a gawa ra.’ (2 Juan 9-11) Agtayon balot papapalikdo ed Diablo diad pangitalirak ed Makristianon “basbas na katuaan” pian ontumbok ed saray palson managbangat a manggugunaet a “mangiparungtal ed makaderal iran ideolohiya” ra tan “mangaanamot ed sikatayo panamegley na pinikewet iran salita.”​—2 Pedro 2:1-3, Byington.

14, 15. Anto so impasakbay nen Pablo ed saray mamatatken a taga-Efeso tan ed kakimeyan ton si Timoteo?

¹⁴ Oniay imbaga nen Pablo ed saray Kristianon mamatatken a taga-Efeso: “Alwaran yo so inkasikayon dili, tan say amin a kasimpukokan ya anginan na espiritu santo ed sikayo a managbantay, pian pastolan yo so Iglesia na Dios, a sikato so sinaliw to ed dala [na Anak] ton dili. Amtak a kayari itaynan ko, onloob naani ed pegley yo so saray masiban lobo, ya agda perdonaen so kasimpukokan. Et dia ed sikayo met lanlamang wala ra so onalagey naani a totoon mansalita na saray bengatlan mabanday, pian tangguyoren da so saray binangatan ya ontumbok ed sikara.” (Gawa 20:28-30) Sinmabi panaon et linmesa iratan ya apostata tan ‘nansalita na saray mabanday’ o pikewet.

¹⁵ Nen manga 65 K.P. pinaseseg na apostol si Timoteo ya ‘agamilen to ed matunong so salita a tua.’ “Bangbalet,” insulat nen Pablo ya “arawian [to] so salsalita ya agmanepeg ed Dios tan anggapo so kabaliksan da: ta ondenden ira ya ondenden ed aliwan inkamaridios, tan say salita ra manderal a singa say gangrena: tan sakey ed sikara di Himeneo tan Fileto. Totoo a sinmipa’ra nipaakar ed tua, ya ibabaga ra a say kioli ed bilay apalabas la, tan gogotgoten da so pananisia na saray arum.” Ginmapo ed saman so apostasya! “Anggaman  ontan,” so inyarum nen Pablo, “say malet a semento na Katawan magnayon.”​—2 Timoteo 2:15-19.

16. Anggaman ed saray kasiliban na manunaan ya apostata, akin a manmamatoor itayo ed Dios tan ed Salita to?

¹⁶ Mabetbet ya usaren nen Satanas iray apostata ta pian deralen so tuan panagdayew, balet ta ag-iratan tinmalona. Nen taon 1868, ginmapo si Charles Taze Russell ed maalwar ya impangusisa to ed abayag laran doktrina na saray simbaan na Kakristianoan tan aromog to iray lingon impangipaliwawa ed Kasulatan. Pinorma di Russell tan pigara niran manaanap na katuaan so sakey a grupo na panagaral ed Biblia diad Pittsburgh, Pennsylvania, E.U.A. Diad loob na ngalngali 140 taon manlapu la’d saman, saray lingkor nen Jehova so binmulaslas ed pikakabat tan panangaro ra ed Dios tan ed Salita to. Anggaman ed saray kasiliban na manunaan ya apostata, saray inkaliing ed espiritual na matoor tan makabat ya aripen a klase so akatulong ed sarayan tuan Kristiano pian mansiansian matoor ed si Jehova tan ed Salita to.​—Mateo 24:45.

Agkayo Papaimpluensyaan ed Manuley na Sayan Mundo

17-19. Anto so mundo a walad pakayari na Diablo, tan akin ya agtayo nepeg ya aroen itan?

¹⁷ Say sakey nin paraan na pamapatit nen Satanas ed sikatayo et diad pangiiganyo to ed sikatayon mangaro ed sayan mundo​—say agmatunong a sosyedad na totoo a niyarawi ed Dios. Tinawag nen Jesus so Diablo bilang say manuley odino “prinsipe na sayan mundo” tan inkuan ton: “Anggapo so pibibiang to ed siak.” (Juan 14:30) Agtayon balot komon aabuloyan si Satanas a mangimpluensya ed sikatayo! Siempre, amta tayon “walad silong na pakauley na [satan a] mauges so sankamundoan.” (1 Juan 5:19, MB) Kanian iyoopresi na Diablo ed si Jesus so “amin a panarian na mundo” parad sakey a maapostatan gawa na panagdayew, a mabitar tan mapekder ya impulisay na Anak na Dios. (Mateo 4:8-10) Say mundon uuleyan nen Satanas so mamubusol ed saray patumbok nen Kristo. (Juan 15:18-21) Agpanduaruwaan no akin a pinasakbayan itayo nen apostol Juan ya agtayo aaroen so mundo!

¹⁸ Oniay insulat nen Juan: “Aleg ya aroen yo so mundo, ni saray bengatla a wala ed mundo. No siopaman a too aroen to so mundo say aro na Ama andi ed sikato. Ta amin a wala ed mundo, kilalawan  na laman tan kilalawan na mata tan maapan gloria na bilay, aliwa a kien na Ama noag kien na mundo. Et say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:15-17) Agtayo nepeg ya aroen so mundo, lapud say dalan na kabibilay na satan et manasagyat ed makasalanan a laman tan sigpot a mikontraan ed saray estandarte nen Jehova a Dios.

¹⁹ Panon to no onsusulming ed puso tayo so panangaro ed sayan mundo? Manpikasi itayo sirin pian tulongan itayo na Dios a manaeg ed satan ya aro tan ed saray kagletan na laman a misiglaotan ed satan. (Galacia 5:16-21) Seguradon panggunaetan tayo so mansiansian ‘andi-mantsa ed mundo’ no nodnonoten tayon “saray mauges ya espiritu” et saray agnanengneng a “manuley ed mundo” a manguuley ed agmatunong a sosyedad na totoo.​—Santiago 1:27; Efeso 6:11, 12; 2 Corinto 4:4.

20. Akin a nibaga tayon ag-itayo kabiangan na mundo?

²⁰ Oniay imbaga nen Jesus nipaakar ed saray babangatan to: “Ag-ira taga mundo, salanti unong ya agak taga mundo.” (Juan 17:16) Pambabanikelan na saray alanaan a Kristiano tan saray dedikadon kakaiba ra so mansiansian malinis ed moral tan espiritual, a biig ira manlapud mundo. (Juan 15:19; 17:14; Santiago 4:4) Sayan agmatunong a mundo so mamubusol ed sikatayo lapud mansiasiansia itayon biig ed satan tan sikatayo so ‘mangipupulong na inkatunong.’ (2 Pedro 2:5) Tua, manbibilay itayo ed utel na sosyedad na totoo a managlawan, managkalugoran, managkikil, managtalintao, managtakew, managtila, tan managbuanges. (1 Corinto 5:9-11; 6:9-11; Apocalipsis 21:8) Balet agtayo susungapen so “espiritu na mundo,” lapud ag-itayo kokontrolen na satan a makasalanan ya impluensya.​—1 Corinto 2:12.

Agbalot Papalongkitan so Diablo

21, 22. Panon yon niyaplika so simbawa nen Pablo a nikurit ed Efeso 4:26, 27?

²¹ Imbes a paimpluensyaan ed “espiritu na mundo,” sikatayo so iwawanwan na espiritu na Dios, a mamapawala ed sikatayo na saray kalidad a singa say aro tan dangka. (Galacia 5:22, 23) Saratan so ontulong ed sikatayo pian nalabanan so pangaataki na Diablo ed pananisia tayo. Labay ton ‘natangguyor itayo a manggawa na mauges,’ balet say espiritu na Dios so ontutulong ed sikatayo a ‘tundaan so petang na ulo tan ikaindan so sanok.’ (Salmo 37:8) Tua, no maminsan et walay makatunongan a rason tayo pian onsanok, balet oniay isisimbawa nen Pablo: “Onsanok kayo, ingen ta agkayo mankakasalanan: agkomon onselek so agew a sipapasnok kayo ni: Tan agyo palongkitan so Diablo.”​—Efeso 4:26, 27.

²² Say isanok tayo et nayarin manresulta ed kasalanan no mansiansia itayon walaan na petang na ulo. No mansiansia itayo ed ontan a kanonotan, iikdan tayo na pankanawnawa so Diablo a mangiyalibansa na pansisiblangan ed loob na kongregasyon odino managyat ed sikatayo a manggawa na mauges. Kanian, nakaukolan tayon resolbien a tampol iray pambabalingaan diad maridios a paraan. (Levitico 19:17, 18; Mateo 5:23, 24; 18:15, 16) Komon ta paiwanwan itayo ed espiritu na Dios, agamilen tayo so panagdangka tan agtayon balot aabuloyan so anggan say makatunongan ya isanok a manresulta ed panangigagaem, panamasakit, tan panagbusol.

23. Antoran tepet so konsideraen tayo ed ontumbok ya artikulo?

²³ Asingbat tayo so pigaran kagagawa na Diablo ya agtayo nepeg ya aligen. Balet nayarin oniay panumamengan na saray manbabasa: Nepeg tayo kasin takotan si Satanas? Akin ya isasagyat to so panamasegsegang ed saray Kristiano? Tan panon tayon napaliisan so panalonggaring ed sikatayo na Diablo?

[Paimano ed leksab]

Anto so Ebat Yo?

• Akin ya agtayo nepeg a paugesen so arum?

• Mitunosan ed 1 Juan 3:15, panon tayon napaliisan so pagmaliw a managpatey?

• Panon so nepeg a panmoria tayo ed saray apostata, tan akin?

• Akin ya agtayo nepeg ya aroen so mundo?

[Tepetepet Parad Panagaral]

[Litrato ed pahina 23]

Agtayon balot aabuloyan so Diablo a maneral ed pankakasakey tayo bilang Kristiano

[Saray litrato ed pahina 24]

Akin a pinaseseg itayo nen Juan ya agtayo aaroen so mundo?