Aligen so Inkaanos nen Jehova

“Say Katawan agto bayagen so sipan to, . . . noag ingen masungdo [“maanos,” NW].”​—2 PEDRO 3:9.

1. Anton agnaparaan a regalo so iyoopresi nen Jehova ed katooan?

 OOPRESIAN itayo nen Jehova na bengatlan agniiter na siopaman. Satan a bengatla et makasagyat tan mablin tuloy, balet ta agnasaliw nisay naalmo. Say iyoopresi to et say regalon maando a bilay​—parad maslak ed sikatayo, saya et mankabaliksan na andi-anggaan a bilay ed paraiso diad dalin. (Juan 3:16) Agaylan makapaliket itan! Naandi laray pansesengegan na pirmin ermen​—gulaan, karawalan, kairapan, krimen, sakit, tan anggan say ipapatey. Saray totoo so manbilay ed nagnap a kareenan tan pankakasakey ed silong na maaron uley na Panarian na Dios. Agaylan pipirawaten tayo itan a Paraiso!​—Isaias 9:6, 7; Apocalipsis 21:4, 5.

2. Akin ya agni dineral nen Jehova so mundo nen Satanas?

² Pitamitam met nen Jehova so arapen a panaon a pangiletneg to ed Paraiso diad dalin. Tua itan, lapud sikatoy maaro ed inkatunong tan hustisya. (Salmo 33:5) Agto panliketan so pakanengneng ed mundon agmangikabkabilangan odino onsusumlang ed matunong iran prinsipyo to, mundon mangipupulisay ed autoridad to tan mamapasegsegang ed saray totoo to. Balet, walaray maabig a rason no akin a sikatoy agni kinmiwas pian deralen so marelmeng a mundo nen Satanas. Saratan a rason et saglawien toray moral ya isyu a mangilalanor ed inkasoberano to. Diad panosolbar ed sarayan isyu, ipapatnag nen Jehova so nagkalautlan makasagyat a kalidad, sakey a kalidad ya anggapo ed maslak a totoo natan, salanti, say inkaanos.

3. (a) Antoy kabaliksan na Griego tan Hebreo iran salita a nipatalos ya “inkaanos” diad Biblia? (b) Antoran tepet so konsideraen tayo natan?

³ Walay Griegon salita a diad New World Translation et amitlon impatalos ya “inkaanos.” Diad literal et mankabaliksan itan na “inkarukey na espiritu” tan mabetbet ya impatalos bilang “andukey a panagtepel” tan impatalos ya aminsan a “pangagamil na anos.” Saglawien met na Griego tan Hebreon salita parad “inkaanos” so ideyan pantepel tan inkatantan ya isanok. Panon itayon nagugunggonaan ed inkaanos nen Jehova? Antoran leksion so naaralan ed inkaanos tan panagsungdo nen Jehova tan saray matoor a lingkor to? Panoy pakaamta tayo a walay anggaan na panaanos nen Jehova? Imanoen tayo.

Konsideraen so Inkaanos nen Jehova

4. Nipaakar ed inkaanos nen Jehova, antoy insulat nen apostol Pedro?

⁴ Nipaakar ed inkaanos nen Jehova, insulat nen apostol Pedro: “Inarok ira, agyo lilingwanan so sakey a bengatla: a say sanagew dia ed arap na Katawan singa sanlibon taon, tan say sanlibo a taon singa sanagew. Say Katawan agto bayagen so sipan to, a singa say arum igaton da a mabayag; noag ingen masungdo [“maanos,” NW] ed sikayo, agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:8, 9) Ipangasin imanoen so duaran punto a nibalikas dia ya ontulong ed sikatayon natalosan so inkaanos nen Jehova.

5. Panon a mangaapekta ed saray kiwas nen Jehova so panmoria to ed panaon?

⁵ Say unonan punto et agmomoriaen nen Jehova so panaon a singa ed panmoria tayo. Parad Sakey a manbibilay ya ando lan ando, say sanlibon taon et singa sanagew. Sikatoy agnalimitaan odino agnadesdes na panaon, balet sikatoy aliwan matantan ya onkiwas. Lapud walaan si Jehova na andiay-geter a karunongan, amta to so eksakton sankaabigan a panaon ya ikiwas  parad pakagunggonaan na amin a nalalanor, tan maanos ton aalagaren so isabi na satan a panaon. Balet, agtayo nepeg ya ibagan agmangiyaansakit si Jehova ed paniirap na saray lingkor to a nayarin naeksperiensya da ed kaleganan ni. Sikatoy Dios na “matamoy a panangasi,” say personipikasyon na aro. (Lucas 1:78; 1 Juan 4:8) Sarag ton kanselaen a maminpinsan tan permanente so dinanman a makapasakit a nayarin resulta na sayan temporaryon pangiyaabuloy ed kairapan.​—Salmo 37:10.

6. Antoy agtayo nepeg ya isipen nipaakar ed Dios, tan akin?

⁶ Siempre, aliwan mainomay so panalagar ed bengatlan pirawrawat la na sakey. (Uliran 13:12) Kanian, no agsumpalen a tampol na totoo iray sipan da, nayarin isipen na arum ya agda getman sumpalen itan. Agaylan agmakabat so pangipasen ya ontan so Dios! No lingon ipasen tayoy inkaanos na Dios bilang inkatantan, diad ilabas na panaon et manduaruwa tan nadismaya itayo la, tan satan so mamatayer na espiritualidad tayo. Mas alodloor ni, nayarin nibalang itayo na saramay inmuna lan impasakbay nen Pedro, salanti saray managludlurey tan andian na pananisia. Saratan ya indibidual so mabalaw a mangibabagan: “Iner so kawalaan na sipan ed idateng to? Ta nanlapu la ed saman so agew ya inkaplag da’d ugip na atateng, ganagana a bengatla, ontutuloy a singa nen gapo na inkapalsa.”​—2 Pedro 3:4.

7. Panon a mikonekta so inkaanos nen Jehova ed pilalek ton magbabawi iray totoo?

⁷ Say komaduan punto a naala tayo manlapud saray salita nen Pedro et si Jehova so maanos lapud pilalek ton magbabawi so amin. Deralen nen Jehova iramay agmalabay a mangiwaklit ed mauges iran kagagawa ra. Balet, agnaliketan so Dios ed ipatey na marelmeng a too. Imbes, panliketan ton nanengneng a magbabawi iray totoo, mangibeneg ed mauges iran kagagawa ra, tan mansiansian manbilay. (Ezequiel 33:11) Kanian, sikatoy manaanos tan paipupulong toy maong a balita ed interon dalin ta pian nawalaan na pankanawnawan manbilay iray totoo.

8. Antoy naaralan tayo ed inkaanos na Dios diad impideneng to ed nasyon na Israel?

⁸ Say inkaanos na Dios so nanengneng met ed impideneng to ed nasyon na Israel nensaman. Diad loob na saray siglo, intepel toy inkamasugnar da. Diad panamegley na saray propeta to, aminpigapiga toran pinaseseg: “Manpataoli kayo manlapu ed saray mauges a dalan yo, tan unoren yo so saray ganggan ko tan saray panontonan ko, unong na amin a ganggan ya ingganggan ko ed saray ateng yo, tan sikato so impawit ko ed sikayo ed panamegley na saray ariripen ko a propeta.”  Antoy resulta? Makapaermen lapud ‘agdinmengel’ iray totoo.​—2 Arari 17:13, 14.

9. Panon ya impatnag na inkaanos nen Jesus so inkaanos nen Ama to?

⁹ Kaunoran, imbaki nen Jehova so Anak to, ya agtinmundan inmapelo ed saray Judio a mipulangan ira ed Dios. Say inkaanos nen Jesus so nagnap a pakapatnagan na inkaanos nen Ama to. Lapud sigpot lan amta nen Jesus a sikatoy magano lan ompatey, maermen ya inkuanto: “O Jerusalem, Jerusalem, a mamatey ed saray propetas, tan tupaken to ray nibaki ed sikato! Aminpigapigan nilabay ko komon a tinipon ya impandaragup iray anak mo a singa sakey a nganak a tiponen to ’ray siwsiw to ed silong na saray payak to, et agmo nilabay!” (Mateo 23:37) Agnanlapu iyan makatenyeg na liknaan iran salita ed andiay panangasi a husgado a maganat a manusa ed siopaman noagta nanlapu ed sakey a maaron kaaro a maanos ed totoo. Si Jesus, a singa met si Ama to ed tawen, et labay ton magbabawi iray totoo pian napaliisan day pirmin panangukom. Walaray tinmalineng ed saray pasakbay nen Jesus tan apaliisan day pirmin panangukom ya agawa ed Jerusalem nen 70 K.P.​—Lucas 21:20-22.

10. Diad anton dalan ya agunggonaan itayo ed inkaanos na Dios?

¹⁰ Agta makapakelkelaw so inkaanos na Dios? Anggaman ed mabitabitar lan inkamasugnar na katooan, balang sakey ed sikatayo et inikdan ni nen Jehova, pati arum nin minilyon a totoo, na pankanawnawa a sikatoy nakabat tayo tan awaten so ilalon kililiktar. ‘Ibilang yo a kilalaban so sungdo [“inkaanos,” NW] na Katawan,’ so insulat nen Pedro ed saray kaparan Kristiano. (2 Pedro 3:15) Agtayo ta misalsalamat a say inkaanos nen Jehova et angilukas na dalan parad kiliktar tayo? Agtayo ta ipipikasi a mantultuloy komon so inkaanos nen Jehova ed sikatayo legan tayon panlilingkoran kada agew?​—Mateo 6:12.

11. Napakiwas itayon manggawa na anto lapud natatalosan tayoy inkaanos nen Jehova?

¹¹ No natatalosan tayo no akin a maanos si Jehova, natulongan itayon maanos a manalagar ed panangiliktar to, ya agtayon balot isipen a sikatoy matantan a manumpal ed saray sipan to. (Tagleey 3:26) Diad pantultuloy tayon pangipikasi ed isabi na Panarian na Dios, matalek itayo ya amta na Dios so sankaabigan a panaon a pangebat to ed satan a pikakasi. Sakey ni, napapakiwas itayon mangalig ed si Jehova diad pangipatnag na maridios ya inkaanos diad saray pidedeneng tayo ed saray agagi tayo tan ed saramay pupulongan tayo. Agtayo met pilalek a naderal so siopaman noagta labay tayon nanengneng a magbabawi ira pian nawalaan met ira na ilalon andi-anggaan a bilay.​—1 Timoteo 2:3, 4.

Ikonsidera so Inkaanos na Saray Propeta

12, 13. Mitunosan ed Santiago 5:10, panon a matalonan inagamil nen propeta Isaias so inkaanos?

¹² Diad pangikokonsidera ed inkaanos nen Jehova, natutulongan itayon mangapresya tan mamayubo ed satan a kalidad. Aliwan mainomay parad ag-ayadyarin totoo a bayuboan so inkaanos, balet nagawaan itan. Makaaral itayo manlapud saray lingkor na Dios nensaman. Oniay insulat na babangatan a Santiago: “Pan-uliranan yo, agagik, so impantepel tan say anos na saray propetas, a nansalita’ra ed ngaran na Katawan.” (Santiago 5:10) Makaligliwa tan makapaseseg a naamtaan a matalonan inarap na arum so kipapaarapan tayo met natan.

¹³ Alimbawa, seguradon kinaukolan nen propeta Isaias so inkaanos diad asainmin to. Napatnagan itan ed imbaga nen Jehova ed sikato: “Onla ka, tan ibagam ed saya a baley, Dengdengelen yo a tua, balet agyo natalosan; et nengnengen yo a tua, balet agyo nibiig. Gawaen mo so puso na saya a baley a mataba, tan gawaen mo so saray layag da ya ambelat, tan saniban mo so saray mata ra; ompan makanengneng ira ed saray mata ra, tan makadngel ira ed saray layag da, tan makatalos ira ed puso ra, tan magbabawi ra, tan natambal ira.” (Isaias 6:9, 10) Anggaman ag-onkiwas iray totoo, maanos ya inyabawag nen Isaias so manamasakbay a mensahe nen Jehova ed ngalngali 46 a taon! Mipadpara, say inkaanos so ontulong ed sikatayon makapansungdo ed kimey tayon panangipulong ed maong a balita, anggaman dakel so agmangawat.

14, 15. Antoy tinmulong ed si Jeremias a natalonaan iray kairapan tan impakadismaya?

¹⁴ Siempre, legan a gagawaen na saray propeta so ministeryo ra, aliwa labat a say inkaandian na interes na totoo so kaukolan dan talonaan; anagmak ira na panamasegsegang. Si Jeremias so impisok ed “panangipangawan,” tan imbantak ed bobon. (Jeremias 20:2; 37:15; 38:6) Sinagmak to iyan panamasegsegang ed lima na mismon totoo a pinirawat ton tulongan. Ingen, agnan-imbel si Jeremias, nisay binmawi. Sikatoy maanos a nansungdo ed loob na saray dekada.

¹⁵ Say panamasegsegang tan panagbalaw so ag-amatunda ed si Jeremias, tan agmet iratan makapatunda ed sikatayo natan. Siempre, nayarin nadismaya itayo no maminsan. Adismaya met si Jeremias. “Say salita nen Jehova agawa a pangibabaing ed siak, tan sakey a ludlurey, ed amin ya agew,” so insulat to. “Et no kuan ko, Say ngaran to agko naani uliten, agak met mansalita la naani dia ed ngaran to.” Antoy agawa balet? Kasin tinmundan nampulong si Jeremias? Onia so intuloy to: “Dia ed pusok [say salita na Dios] so singa mandarlang ya apoy ya akapotan ed saray pukel ko et nakesawan ak a mantepel et agko nitepel.” (Jeremias 20:8, 9) Imanoen a sanen say piimano to et say panagludlurey na totoo, naandi gayaga to. Sanen say inimano to et say karakpan tan kaimportantian na mensahe a mismo, apapawil toy gayaga to. Sakey ni, si Jehova so walad si Jeremias “a singa sakey a makapanyari,” a mamapabiskeg ed sikaton mangiyabawag ed salita na Dios tekep na seseg tan inkakpel.​—Jeremias 20:11.

16. Panon tayon napansiansia so gayaga tayo ed kimey a panangipulong na maong a balita?

¹⁶ Kasin nanggayagaan nen propeta Jeremias so kimey to? Segurado! Inkuan to ed si Jehova: “Saray salitam aromog ira, et kinan ko ra; et saray salitam sikara nensaman ed siak so sakey a liket tan gayaga na pusok; ta natawag ak ed panamegley na ngaran mo, O Jehova.” (Jeremias 15:16) Nanliketan nen Jeremias so pribilehyo ton mangirepresenta ed tuan Dios tan mangipulong ed salita to. Naliketan itayo met. Niarum ni, singa saray anghel ed tawen, panliketan tayo a diad sankamundoan et dakerakel so mangaawat ed mensahe na Panarian, magbabawi, tan onggagapon manakar ed dalan a mamaarap ed andi-anggaan a bilay.​—Lucas 15:10.

‘Say Impantepel nen Job’

17, 18. Diad anton paraan a nansungdo si Job, tan antoy nansumpalan?

¹⁷ Kayari ton kinomentoan so nipaakar ed saray propeta nensaman, insulat nen babangatan a Santiago: “Nadngelan yo so impantepel nen Job, tan anengneng yo so anggaan ya initer na Katawan; no panon a say Katawan maabagey a tuloy, tan mapangasi.” (Santiago 5:11) Say Griegon salita dia a nipatalos ya “impantepel” odino impansungdo et walaan na kabaliksan a mipara ed salitan inusar nen Santiago parad ‘inkaanos’ diad akaunan bersikulo. Onia so insulat na sakey ya iskolar diad pangipapabitar to ed pandumaan na say duaran salita: “Samay sakey et ontutukoy ed inkaanos sano lalameslamesen itayo na totoo, say komadua et ontutukoy ed pirmin panagtepel ed makapagonigon iran bengatla a nasasagmak tayo.”

¹⁸ Asagmak nen Job so pirmin gonigon. Sikatoy akaeksperiensya na impanirap ed pinansyal,  impatey na saray ananak to, tan makapaot-ot a sakit. Akikatunongan met ed palso iran akusasyon a sikatoy dudusaen nen Jehova. Imbesngaw nen Job so paniirap to; inyey-ey to so situasyon to tan impasagilig to ni ingen a sikatoy mas matunong nen say Dios. (Job 35:2) Balet, agbalot naandi so pananisia to, nisay inkamatoor to. Aliwan singa ed imbaga nen Satanas, agto inayew so Dios. (Job 1:11, 21) Say nansumpalan? Si Jehova “benendisyonan to so kaunoran a kasampotan nen Job a lalo nen say gapo to.” (Job 42:12) Impawil nen Jehova so bunigas nen Job, dinoble toy kayamanan to, tan benendisyonan to na daakan tan maliket a bilay kaiba iray inad-aro to. Say matoor a panagsungdo nen Job so tinmulong met ed sikaton natalosan si Jehova a nagkalalo.

19. Antoy naaralan tayo ed maanos ya impansungdo nen Job?

¹⁹ Antoy naaralan tayo ed maanos ya impansungdo nen Job? Singa si Job, nayarin mansakit itayo odino managmak na arum niran kairapan. Nayarin agtayo tanto natalosan no akin ya iyaabuloy nen Jehova ya ondalan itayo ed sakey a subok. Ingen, segurado itayo ed sakey a bengatla: no mansiansia itayon matoor, nabendisyonan itayo. Seguradon tumangan nen Jehova iramay masimoon a manaanap ed sikato. (Hebreos 11:6) Inkuan nen Jesus: “Say misungdo ya angga ed kasampotan, sikato lanlamang so nilaban naani.”​—Mateo 10:22; 24:13.

“Say Agew na Katawan Onsabi”

20. Akin a makaseguro itayon onsabi so agew nen Jehova?

²⁰ Anggaman maanos si Jehova, sikato so matunong met tan agto abuloyan so kaugsan ed ando lan ando. Walay anggaan na panaanos to. Insulat nen Pedro: “Ag-intepel [na Dios] so daan a mundo.” Bangta akaliktar si Noe tan say pamilya to, saman ya agmaridios a mundo so niyanep na danum. Intarok met nen Jehova so panangukom ed Sodoma tan Gomorra, a sigpot to iran dineral. Sarayan panangukom so angiletneg na “panuliranan na saray [agmaridios a] totoo.” Lapud saya, makaseguro itayon: “Say agew na Katawan [“Jehova,” NW] onsabi.”​—2 Pedro 2:5, 6; 3:10.

21. Panon tayon ipatnag so inkaanos tan panagsungdo tayo, tan anton tema so singbaten tayo ed ontumbok ya artikulo?

²¹ Aligen tayo sirin so inkaanos nen Jehova diad panulong ed arum a magbabawi pian sikaray nayarin nilaban. Aligen tayo met iray propeta panamegley na maanos a pangiyabawag ed maong a balita anggaman ag-onkiwas iray totoon pupulongan tayo. Sakey ni, no sungdoan tayoray subok tan mansiansia itayon matoor, a singa si Job, makaseguro itayo a bendisyonan itayo nen Jehova na daakan. Walay rason pian manliket itayo ed ministeryo tayo sano namoria tayo no panon a daakan a bebendisyonan nen Jehova iray sagpot na totoo to a mangipulong ed maong a balita ed interon dalin. Imanoen tayo iya ed ontumbok ya artikulo.

Kasin Natandaan Yo?

• Akin ya ipapatnag nen Jehova so inkaanos?

• Antoy naaralan tayo ed inkaanos na saray propeta?

• Panon ya impatnag nen Job so panagsungdo, tan antoy nansumpalan?

• Panoy pakaamta tayo a walay anggaan na panaanos nen Jehova?

[Tepetepet Parad Panagaral]

[Litrato ed pahina 18]

Nagnap a nipatnag na inkaanos nen Jesus so inkaanos nen Ama to

 [Saray litrato ed pahina 20]

Panon a tinumangan nen Jehova so inkaanos nen Jeremias?

[Saray litrato ed pahina 21]

Panon a tinumangan nen Jehova so panagsungdo nen Job?