Panagtipon ed Saray Bengatlan Walad Tawen tan Saray Bengatlan Walad Dalin

“Unong ed apaabig [“panlabayan,” NW] to . . . say pantipon [lamet]ed saray amin a bengatla ed Kristo, na saray bengatlan wala ed tawen, a singa met saray wala ed tapew na dalin.”​—EFESO 1:9, 10.

1. Anto so “panlabayan” nen Jehova parad tawen tan dalin?

 KAREENAN ED INTERON UNIBERSO! Ontan so maglorian gagala nen Jehova, “say Dios na kareenan.” (Hebreos 13:20) Pinuyanan to si apostol Pablo a mangisulat a say “panlabayan” To et say ‘pantipon lamet ed saray amin a bengatla ed Kristo, na saray bengatlan wala ed tawen, a singa met saray wala ed tapew na dalin.’ (Efeso 1:9, 10) Anto so talagan kabaliksan na verb ed sayan bersikulo a nipatalos a ‘tiponen lamet’? Oniay inkuan na iskolar na Biblia a si J. B. Lightfoot: “Saratan a balikas et mankabaliksan na sigpot a pantutunosan ed uniberso, ya anggapo laray bengatlan misumlangan tan pansengegan na inkaapag-apag, noagta amin a kabiangan et nisentro tan nikasakey la ed Kristo. Naandi la so kasalanan tan ipapatey, ermen tan isasaew tan kairapan.”

“Saray Bengatlan Walad Tawen”

2. Siopa ‘iray bengatlan walad tawen’ a nakaukolan a natipon?

² Sinegek nen apostol Pedro so alay abig ya ilalo na saray tuan Kristiano sanen oniay insulat to: “Unong ed sipan to alagden tayo so saray tawen a balo tan dalin a balo, a sikara so panayaman na katunongan.” (2 Pedro 3:13) Say tutukoyen dia a nisipan a “saray tawen a balo” et say balon manuley a gobierno, say Mesianikon Panarian. “Saray bengatlan walad tawen” a sinalambit nen Pablo ed sulat to ed saray taga-Efeso so kaukolan a natipon ‘dia ed Kristo.’ Sikara imay totoo a limitado so bilang da, ya apilin miuley ed si Kristo diad katawenan. (1 Pedro 1:3, 4) Sarayan 144,000 ya alanaan a Kristiano so ‘asaliw diad dalin,’ ‘asaliw ed limog na totoo,’ pian magmaliw a kaiba nen Kristo a manawir diad mangatatawen a Panarian to.​—Apocalipsis 5:9, 10; 14:3, 4; 2 Corinto 1:21; Efeso 1:11; 3:6.

3. Panon a nibaga a saray alanaan et ‘akayurong la ed saray pasen a mangatatawen’ anggaman wadia ni ira ed dalin?

³ Saray alanaan a Kristiano so napawala, odino nianak lamet, diad panamegley na masanton espiritu pian magmaliw ya espiritual ya ananak nen Jehova. (Juan 1:12, 13; 3:5-7) Lapud tinagibi ira nen Jehova bilang “ananak” to, sikara so magmaliw ya agagi nen Jesus. (Roma 8:15; Efeso 1:5) Kanian, anggaman wadia ni ira ed dalin, nibaga a sikara so ‘binangon tan pinayurong ya impiulop ed saray pasen a mangatatawen, dia ed si Kristo Jesus.’ (Efeso 1:3; 2:6) Wala ira ed ontan a nipaatagey ya espiritual a posisyon lapud ‘atatakan ira na nisipan a masanton espiritu, a satan so sanla na tawir da’ a nigana ed sikara diad katawenan. (Efeso 1:13, 14; Colosas 1:5) Sikara sirin so “saray bengatlan walad tawen,” a say kompleton bilang da ya inggeter la nen Jehova et nakaukolan a natipon.

Ginmapo la so Panagtipon

4. Kapigan tan panon a ginmapo so panagtipon ed “saray bengatlan walad tawen”?

⁴ Mitunosan ed ‘pangipapakurang,’ odino pangaasikaso nen Jehova ed saray bengatla, say panagtipon ed “saray bengatlan walad tawen” so onggapo diad “sigpot a panganggaan na saray aturon panaon.” (Efeso 1:10, NW) Satan ya aturon  panaon so sinmabi la nen Pentecostes 33 K.P. Diad saman ya agew, niyibung so masanton espiritu ed saray apostol tan ed grupo na saray babangatan a lalaki tan bibii. (Gawa 1:13-15; 2:1-4) Satan so amaneknek a say balon sipanan so ginmapo lan kinmurang, ya ananda sirin ed gapoan na Kristianon kongregasyon tan say balon nasyon ed espiritual ya Israel, “say Israel na Dios.”​—Galacia 6:16; Hebreos 9:15; 12:23, 24.

5. Akin a pinalsa nen Jehova so balon “nasyon” ya onsalat ed nasyon na Israel nensaman?

⁵ Say Ganggan a sipanan ed nasyon na Israel nensaman so ag-amawala na “sakey a panarian na saray saserdote, tan sakey a masimpit a nasyon” a manlingkor ya andi-anggaan diad tawen. (Exodo 19:5, 6) Oniay imbaga nen Jesus ed saray Judion relihyoson lider: “Say panariay Dios naekal naani ed sikayo, tan niiter naani ed sakey a nasyon a mamapaway na saray bungabunga to.” (Mateo 21:43) Satan a nasyon, say espiritual ya Israel, so tugyopen na saray alanaan a Kristiano a nagmaliw a kabiangan na balon sipanan. Insulat nen apostol Pedro ed sikara: “Sikayo so apili a kapolian, peteg ya inkasaserdote, masantos a nasyon, sakey a baley na Dios a dilin kayarian to, a mangibelyaw na karlangan na saman so angekal ed sikayo ed kabilungetan, ta tinawag to kayo ed makapakelaw a silew to: Sikayo a dia ed saray apalabas a panaon aliwa kayo nensaman a baley, natan balet baley kayo na Dios.” (1 Pedro 2:9, 10) Aliwa lan say nasyon na Israel nensaman so totoon akisipanan nen Jehova. (Hebreos 8:7-13) Unong ya impasakbay la nen Jesus, say pribilehyon magmaliw a kabiangan na Mesianikon Panarian so inekal ed sikara tan initer ed 144,000 a membro na espiritual ya Israel.​—Apocalipsis 7:4-8.

Nagmaliw a Kabiangan na Sipanan Parad Panarian

6, 7. Anto so nikaduman impisipanan nen Jesus ed saray nailalak ed espiritun agagi to, tan anto so kabaliksan na satan parad sikara?

⁶ Diad samay labi ya inletneg nen Jesus so Memoryal na impatey to, oniay inkuan to ed saray matoor ya apostol to: “Sikayo so nansiansia ed siak ed saray inkatuktuksok. Et manuro ak ed sikayo na sakey a panarian, a singa say Amak anuro ed siak. Pian makapikan tan makapiinum kayo ed dulang ko dia ed panarian ko; et onyurong kayo ed saray trono a mangukom ed labindua a poli na Israel.” (Lucas 22:28-30) Tinukoy dia nen Jesus so nikaduman impisipanan to ed 144,000 a nailalak ed espiritun agagi to, a ‘mansiansia anggad patey’ tan napaneknekan day inkasikara a ‘mananalo.’​—Apocalipsis 2:10; 3:21.

⁷ Inikbanan na saramay kabiangan ed sayan limitadon grupo so ilalo ran manbilay na andi-anggaan diad dalin bilang totoo. Sikara so miuley ed si Kristo diad tawen, ya onyurong ira ed saray trono pian mangukom ed katooan. (Apocalipsis 20:4, 6) Usisaen tayo natan so arum niran teksto ya onaaplika labat ed sarayan alanaan tan mangipapabitar no akin ya agmibibiang so ‘arum iran karnero’ diad saray emblema na Memoryal.​—Juan 10:16.

8. Anto so ipapabitar na saray alanaan diad pangan da na tinapay? (Nengnengen so kahon ed pahina 23.)

⁸ Saray alanaan so managmak na irap a singa si Kristo tan mabulos ira a managmak na ipapatey a singa sikato. Bilang kabiangan ed satan a grupo, inkuan nen Pablo a sikato so akaparaan a manggawa na antokaman a panangisakripisyo ta pian ‘nagamoran to si Kristo, a makapikabat ed sikato tan ed pakayari na inkioli to, tan mikasakey ed impanlilikna to.’ On, si Pablo so mabulos ya ‘ompatey a kaulibay ed [Kristo].” (Filipos 3:8, 10) Dakel ya alanaan a Kristiano so akapansungdo sanen silalaman ni ira diad “ipapatey nen Jesus.”​—2 Corinto 4:10.

9. Anton laman so irerepresenta na tinapay ed Memoryal?

⁹ Sanen inggapo nen Jesus so Pangdem na Katawan, oniay inkuanto: “Saya sikatoy laman ko.” (Marcos 14:22) Tutukoyen to dia so literal a laman to, a napairap tan naparala. Say tinapay ya anggapoy lebadura so matukoy a simbolo na satan a laman. Akin? Lapud diad Biblia, say lebadura so mankabaliksan na kasalanan odino karelmengan. (Mateo 16:4, 11, 12; 1 Corinto 5:6-8) Si Jesus so ayadyari, tan say laman to so andiay kasalanan. Isaklang to itan ya ayadyarin laman to bilang manamakepan bagat. (Hebreos 7:26;  1 Juan 2:2) Say panggawa to ed satan so mangunggona ed amin a matoor a Kristiano, balanglan say ilalo ra et manbilay ed tawen odino manbilay ya andi-anggaan diad paraison dalin.​—Juan 6:51.

10. Diad anton paraan a ‘minabang ed dala nen Kristo’ iramay oninum na alak ed Memoryal?

¹⁰ Nipaakar ed alak ya inumen na saray alanaan a Kristiano diad Memoryal, oniay insulat nen Pablo: “Say kopa na bendisyon a sikatoy bendisyonan tayo, aliwa ta’n sikato so pakapinabangan tayo ed dala nen Kristo?” (1 Corinto 10:16) Diad anton paraan a saramay oninum ed alak so ‘minabang ed dala nen Kristo’? Seguradon ag-ira mibiang ed pangitarya na dondon bagat, lapud sikaran mismo et nakaukolan a narondon. Lapud pananisia ra ed mananondon a pakayari na dala nen Kristo, saray kasalanan da so naperdona, tan niyabawag ira a matunong parad bilay ed tawen. (Roma 5:8, 9; Tito 3:4-7) Diad panamegley na niyibung a dala nen Kristo, saray 144,000 a kaiban mananawir nen Kristo so “nisaklangan” odino apasantos, nibiig, alinisan manlapud kasalanan pian magmaliw ira a ‘sasanto.’ (Hebreos 10:29; Daniel 7:18, 27; Efeso 2:19) On, diad panamegley na niyibung a dala to, ‘sinaliw nen Kristo ya inggana ed Dios iray totoo a nanlapud balang kailalakan, tan salita tan baley tan nasyon, tan agawa ira a panarian tan saserdote nipaakar ed Dios tayo, tan manari ira ed tapew na dalin.’​—Apocalipsis 5:9, 10.

11. Anto so ipapatnag na saray alanaan diad iyiinum da na alak ed Memoryal?

¹¹ Sanen inggapo nen Jesus so Memoryal na ipatey to, impasa to so kopa na alak ed saray matoor ya apostol to tan oniay inkuan to: “Oninum kayo ya amin ed saya. Ta sikato yay dalak ed sipan a sikatoy naibung nipaakar ed amayamay a pangekal ed saray kasalanan.” (Mateo 26:27, 28) No panon ya apaletan so Ganggan a sipanan ed baetan na Dios tan say nasyon na Israel panamegley na dala na saray baka tan kanding, apaletan met so balon sipanan a ginawa nen Jehova ed espiritual ya Israel panamegley na dala nen Jesus, a ginmapo nen Pentecostes 33 K.P. (Exodo 24:5-8; Lucas 22:20; Hebreos 9:14, 15) Diad iyinum da ed alak a mangisisimbolo ed “dala na sipanan,” ipapabitar na saray alanaan a sikara so kabiangan na balon sipanan tan aawaten da la iray gunggona na satan.

12. Panon a nabautismoan iray alanaan ed impatey nen Kristo?

¹² Saray alanaan so napapanonotan met nipaakar ed sakey nin bengatla. Oniay inkuan nen Jesus ed saray matoor a babangatan to: “Say kopa ya inuman ko inuman yo naani; tan say binyag ya akabinyagan ko so kabinyagan yo naani.” (Marcos 10:38, 39) Diad saginonor et sinaglawi nen apostol Pablo iray Kristiano a ‘nabinyagan ed impatey nen Kristo.’ (Roma 6:3) Saray alanaan so manbilay a walaan na panangisakripisyo. Say ipatey da et masakripisyo diad pantalos ya insakripisyo ra so ilalon andi-anggaan a bilay diad dalin. Say bautismo na sarayan alanaan a Kristiano ed impatey nen Kristo so nasumpal sano sikara so matoor ya ompatey tan napaoli bilang espiritun pinalsa a “manari” a kaiba nen Kristo diad tawen.​—2 Timoteo 2:10-12; Roma 6:5; 1 Corinto 15:42-44, 50.

Pibiang ed Saray Emblema

13. Akin ya agmibibiang ed saray emblema na Memoryal iramay walaan na mangaraldalin ya ilalo, balet akin ya onaatendi ira ed Memoryal?

¹³ Lapud satan ya amin so lalanoren na pangan na tinapay tan iyinum na alak a nipapasa legan na Memoryal, mapatnag ya agmanepeg a mibiang iramay walaan na mangaraldalin ya ilalo. Natetebek na saramay walaan na mangaraldalin ya ilalo ya aliwa iran alanaan a membro na laman nen Kristo, tan ag-ira kabiangan ed balon sipanan a ginawa nen Jehova parad saramay miuley ed si Jesu-Kristo. Lapud say “kopa” et mangirerepresenta ed balon sipanan, saraman lambengat so kabiangan na balon sipanan so mibiang ed saray emblema. Saramay maniilalo ed andi-anggaan a bilay bilang ayadyarin totoo diad dalin a walad silong na Panarian so agnabinyagan ed impatey nen Jesus nisay miuley ira ed sikato diad tawen. No mibiang ira ed saray emblema, ipatnag na satan a nanggawa ira na bengatlan agda kanepegan. Kanian, ag-ira mibibiang, anggaman onaatendi ira ed Memoryal bilang marespeton maniimaton. Sikara so misalsalamat ed amin a ginawa la nen Jehova parad sikara diad panamegley na Anak To, pati ed pameperdona To base ed niyibung a dala nen Kristo.

14. Panon a napapabiskeg iray alanaan diad espiritual a paraan no mibibiang ira ed tinapay tan alak?

¹⁴ Asingger lan nasumpal so unor a panagtatak ed daiset laran Kristiano ya atawag a miuley ed si Kristo diad tawen. Angga ed pansampot na masakripisyon bilay da diad dalin, saray alanaan so napapabiskeg ed espiritual no mibibiang ira ed saray emblema na Memoryal. Nalilikna ra so malet a pikakasakey ed saray agagi ra bilang membro na laman nen Kristo. No mibibiang ira ed masimbolikon tinapay tan alak, nipapanonot ed sikara so responsabilidad dan manmatoor anggad patey.​—2 Pedro 1:10, 11.

Panagtipon ed “Saray Bengatlan Walad Dalin”

15. Siopa so natitipon ed dapag na saray alanaan a Kristiano?

¹⁵ Manlapu la’d kapegleyan na dekaday 1930, say ondarakel a bilang na “arum a karnero,” ya agkabiangan na “melag a pulok” tan say ilalo ra et say andi-anggaan a bilay diad dalin, so manusuporta ed saray alanaan. (Juan 10:16; Lucas 12:32; Zacarias 8:23) Sikara so nagmaliw a matoor a kakaiba na agagi nen Kristo, a makanakana so itutulong da diad panangipulong ed “ebanghelyo na panarian” bilang pantasi ed amin a nasyones. (Mateo 24:14; 25:40) Lapud ontan a gagawaen da, sikara so awalaan na paborablin talindeg ed si Kristo bilang saray “karnero” to, a walad ‘nikawanan a lima’ to sano ukomen to laray nasyon. (Mateo 25:33-36, 46) Diad panamegley na pananisia ra ed dala nen Kristo, tugyopen da so “baleg ya ulop,” a makaliktar ed ‘baleg a kairapan.’​—Apocalipsis 7:9-14.

16. Siopa so tugyopen na “saray bengatlan walad dalin,” tan panon iran amin a nawalaan na pankanawnawan magmaliw ya ‘ananak na Dios’?

¹⁶ Sano atatakan lan amin so nakekeraan na 144,000, ibulos la so “dagem” na kadederal sumpad marelmeng a sistema na bengabengatla nen Satanas diad dalin. (Apocalipsis 7:1-4) Legan na Sanlibon Taon ya Uley nen Kristo tan saray kaiba ton arari tan saserdote, say baleg ya ulop so piulopan na dakerakel nin napaoli. (Apocalipsis 20:12, 13) Sikara so nawalaan na pankanawnawan magmaliw a permanentin sakop na Mesianikon Ari, a si Kristo Jesus, diad dalin. Diad panampot na Sanlibon Taon ya Uley, amin na “saray bengatlan walad dalin” so nipaarap ed unor a subok. Saramay manmatoor so natagibi bilang mangaraldalin ya ‘ananak na Dios.’​—Efeso 1:10; Roma 8:21; Apocalipsis 20:7, 8.

17. Panon a nasumpal so gagala nen Jehova?

¹⁷ Sirin, diad panamegley na makabat a tuloy a ‘pangipapakurang,’ odino pangaasikaso nen Jehova ed saray bengatla, sumpalen to la so gagala ton ‘tiponen so amin a bengatla dia ed Kristo, saray bengatlan walad tawen tan saray bengatlan walad dalin.’ Amin a matudion pinalsa ed tawen tan ed dalin so natipon diad kareenan ed interon uniberso, a maliket ira a manpapasakop ed matunong a pananguley na Matalonggaring a Managgagala, si Jehova.

18. Panon a nagunggonaan iray alanaan tan saray kaiba ra diad iyatendi ed Memoryal?

¹⁸ Agaylan makapabiskeg so pandaragup na daiset laran alanaan tan say kaiba ran minilyon ya arum nin karnero no Abril 12, 2006! Sikara so manselebra ed Memoryal na impatey nen Kristo, unong ya ingganggan nen Jesus: “Gawa yo’ ya a pakanodnonotan ed siak.” (Lucas 22:19) Nepeg a nodnonoten na amin ya onatendi no anto so ginawa nen Jehova parad sikara diad panamegley na pinabpabli ton Anak, si Kristo Jesus.

 Bilang Panrepaso

• Anto so gagala nen Jehova parad saray bengatlan walad tawen tan saray bengatlan walad dalin?

• Siopa iray “bengatlan walad tawen,” tan panon ira a natipon?

• Siopa iray “bengatlan walad dalin,” tan anto so ilalo ra?

 [Tepetepet Parad Panagaral]

[Kahon ed pahina 23]

“Say Laman nen Kristo”

Diad impangipaliwawa nen Pablo ed 1 Corinto 10:16, 17 nipaakar ed kabaliksan na tinapay parad saray alanaan na espiritu ya agagi nen Kristo, tinukoy to so “laman” diad nikabkabiig a pantalos. Oniay inkuan to: “Say tinapay a pisagen tayo, aliwa ta’n sikato so pakapinabangan tayo ed laman nen Kristo? Ta anggan dakel itayo, saksakey itayo a tinapay, saksakey a laman: ta amin tayo minabang itayo ed saksakey a tinapay.” Sano mangan iray alanaan a Kristiano ed tinapay ed Memoryal, iyaabawag da so pankakasakey da ed loob na kongregasyon na saray alanaan, a singa sakey a laman a kaiba si Kristo bilang Ulo.​—Mateo 23:10; 1 Corinto 12:12, 13, 18.

[Saray litrato ed pahina 23]

Akin a saray alanaan lambengat so mamangan ed tinapay tan oniinum ed alak?

[Litrato ed pahina 25]

Diad panamegley na panangipakurang nen Jehova, amin a pinalsa ed tawen tan diad dalin so mankakasakey