Iner so Aaplikaan na Saray Bangat nen Kristo Natan?

SI Jesu-Kristo so momoriaen ed inkalapagan bilang sakey ed saray sankatalonggaringan a totoo a nambilay ed kapiganman. Dakel so mangipapasen ed sikato bilang say sankatalonggaringan a too. Diad ngalngali la duan libon taon, inimpluensyaan a maong na saray bangat to so bilabilay na katooan​—“ordinaryo ya agnaim-imanon bilabilay [na totoo a nanggawa] na kaabigan tan kamaongan ontan met na angkakabaleg a gawan pananulong,” so insulat na Ingles ya autor a si Melvyn Bragg.

Antoy Panmoria na Totoo ed Inkakristiano?

Antoy panmoria na totoo ed Inkakristiano? Satan so deneskribe bilang “sakey ed saray sankatalonggaringan ya inaligwasan na katooan ed espiritual.” Sakey a panmoria so imbalikas nen David Kelso na Glasgow Caledonian University, diad Scotland. Insulat to: “Say duan libon taon ya awaran na satan so napno na agnaparaan iran agawaan diad mundo na arte, arkitektura, pilosopiya, musika tan pakurang ed sosyedad.”

Miduma balet so panmoria na dakel nin arum. Say susuppiaten da et aliwan say Inkakristianon inikday kabaliksan na sakey a diksionaryo a: “Sakey a relihyon base ed saray bangat nen Jesu-Kristo tan ed sisiaen a sikato so anak na Dios.” (Collins Cobuild) Noagta, say kabkabusol da et say kondukta na saray relihyoson institusyon tan organisasyon a mangibabagan irerepresenta ra so Inkakristiano.

Alimbawa, say koma-19 siglon Aleman a pilosopo a si Friedrich Nietzsche so aneskribe ed Inkakristiano dia ed onian panmoria bilang “say magnayon a matik na katooan.” Insulat ton satan “so baleg ya ayew, pirmi tan alablabas ya inkauges, . . . a popolaingan na mauge-uges,  masatsaol, maamo-amot, tan marukruksa.” Tua, alabas iray panmoria nen Nietzsche, balet ontan met so panmoria na pigaran mas makatunongan a manag-obserba. Akin? Lapud diad inlabas na saray siglo, mabitabitar ed kondukta na saramay mangibabagan Kristiano so kasmak a “kabulokan, makapatalagnaw iran krimen tan kabandayan” imbes a saray kualidad nen Jesu-Kristo.

Kasin Wala si Kristo ed Inkakristiano?

Makatunongan labat sirin ya itepet so “Kasin wala si Kristo ed Inkakristiano?” “On, siempre!” so tampol ya ibaga na arum. “Agta insipan to ed saray patumbok to a sikatoy wala ed sikara ‘angga ed kasampotan na mundo’?” (Mateo 28:20) Tua ya imbaga nen Jesus itan. Balet kasin say labay ton ibaga et sikatoy wala ed amin a mangibabagan patumbok to, anggan anto la ditay kondukta na satan a too?

Tandaan, arum ed saray relihyoson lider nen panaon nen Jesus so kombinsido ya anggan antoy nagawa et say Dios so wala ed sikara. Lapud pinili na Dios so Israel parad nikaduman betang, abaloan na pigaran relihyoson lider ya ag-iran balot ikaindan na Dios​—antokaman so gawaen da. (Miqueas 3:11) Balet, diad kaunoran, alablabas lay ginawa ra diad panangipulisay ed saray ganggan tan estandarte na Dios. Say resulta et prangkan inkuan nen Jesu-Kristo ed sikara: “Nia say abung yo nataynan ed sikayo ya andi lugan.” (Mateo 23:38) Naandi pabor na Dios ed interon relihyoson sistema. Impulisay to itan tan inabuloyan to iray armada na Roma a maneral ed kabiseran syudad na satan, say Jerusalem, tan say templo na satan nen 70 K.P.

Kasin nagawa met itan ed Kakristianoan? Usisaen tayo no antoray kondisyon ya inlaktip nen Jesus ed sipan to a sikatoy wala ed saray patumbok to “angga ed kasampotan na mundo.”

 [Saray litrato ed pahina 2, 3]

Inimpluensyaan a maong na saray bangat nen Jesu-Kristo so minilyon diad interon mundo