Say Probisyon na Dios a Pananakbong ed Kasalanan

SAY salitan Ingles ya “atonement” (pananakbong) et inaon ed balikas ya “at one” (katunosan), tan mankabaliksan itan na panakbong ed saray kasalanan, unong ed impangusar na Biblia. Diad Hebreon Kasulatan et aminpigan pinmatnag iray terminon misiglaotan ed pananakbong, nagkalalo la diad libro na Levitico tan Numeros. Say ka·pharʹ et salitan Hebreo parad panakbong, tan nayarin say orihinal a kabaliksan na satan et “sakoban,” anggaman nisuheri met so “punasen.”

Say Pankaukolan na Too Parad Pananakbong ed Kasalanan

Say too so mankaukolan na pananakbong lapu ed atawir a kasalanan (1 Arari 8:46; Salmo 51:5; Eclesiastes 7:20; Roma 3:23), a satan so eebatan na mismon too, aliwan say Dios. (Deuteronomio 32:4, 5) Si Adan, ya imbalang to so bilay ya andi-anggaan bilang ayadyarin too, so angipatawir na kasalanan tan ipapatey ed ilalak to (Roma 5:12), kanian saray kailalakan to so akondena ed ipapatey. Pian napanggayagaan lamet na katooan so bilay ya andi-anggaan, nakaukolan sirin so eksakton panakbong ed abalang nen Adan, a mitunosan ed legal a totontonen ya inlaktip ed saginonor nen Jehova dia ed Mosaikon Ganggan, salanti, nepeg ya ibayar so kasimbangan.​—Deuteronomio 19:21.

Say impakausar na “pananakbong” diad Biblia so walaan na manunan ideya a “sakbong” odino “kasalat,” kanian say nepeg ya isalat, odino ‘panakbong,’ ed sananey a bengatla et say kapara na satan. Pian nipawil sirin so bengatlan naandi odino abalang, nepeg ya usaren so ‘mitunosan’ ed satan, a nagnap a makasakbong ed satan bilang say eksakton kasimbangan to. Nepeg ya anggapo so onsulok odino onkulang. Anggapo so ag-ayadyarin too a makapangitarya ed ontan a pananakbong pian nipawil so ayadyarin bilay ed siopaman odino ed amin a katooan. (Salmo 49:7, 8) Ta pian nagnap a nasakbongan so abalang nen Adan, nepeg a say itarya bilang bagat parad kasalanan et samay mipara ed balor na ayadyarin bilay na too.

Si Jehova a Dios so angigapo ed uksoyan a pananakbong diad limog na saray Israelita ya angiyanino ed babaleg a probisyon a pananakbong. Kanian si Jehova, aliwan say too, so nepeg a bidbiren a nandesidi tan angiparungtal ed paraan na pananakbong ed atawir a kasalanan tan say kibulos manlapud resulta na satan a dusan ipapatey.

Saray Bagat Parad Pananakbong

Unong ya ingganggan na Dios, saray Israelita so kaukolan a mangiyapay na saray bagat parad kasalanan ta pian nasakbongan itan. (Exodo 29:36; Levitico 4:20) Makabkabaliksan so tinaon ya Agew na Pananakbong, sanen say atagey a saserdote na Israel so angibagat na ayayep tan nanggawa na pananakbong parad inkasikato, parad arum a Levita, tan parad saray tribu na Israel ya aliwan saserdote. (Levitico 16) Nepeg ya andiay pakabalawan iray ayayep ya ibagat, a mangipatnag a nakaukolan met ya ayadyari imay iyaanino ra. Nipabitar met a mabmabli so nalalanor ed satan a panakbong lapud say niiter et bilay na ayep, tan say dala na satan so nipaagus pian manakbong ed kasalanan. (Levitico 17:11) Saray apay parad kasalanan a ginawa na saray Israelita tan say nanduruman aspekto na tinaon ya Agew na Pananakbong et seguradon angipaslep ed kanonotan da nipaakar ed inkaseryoso na makasalanan a kipapasen da tan kakkaukolan da so nagnap a pananakbong. Balet, saray bagat ya ayayep et agsigpot a makasakbong ed kasalanan na katooan lapud saray ayayep so abebbeba nen say too, ya angimatalekan a manguley ed saratan.​—Genesis 1:28; Salmo 8:4-8; Hebreos 10:1-4.

Asumpal ed si Kristo Jesus

Mabitabitar ya isisiglaot na Kristianon Griegon Kasulatan ed kinen Jesu-Kristo so nagnap a pakasakbongan na saray kasalanan na too. Diad sikato so kasumpalan na saray iyaanino na Mosaikon Ganggan, lapud Sikaton mismo imay irerepresenta na nanduruman bagat ya ayayep. Lapud si Jesus et ayadyari tan andiay-kasalanan a too, sikato so kinmanan apay parad kasalanan na amin a kailalakan nen Adan a diad saginonor et nibulos manlapud kasalanan tan ipapatey. (2 Corinto 5:21) Si Kristo so ‘angisaklang na saksakey a bagat lapu ed saray kasalanan dia ed andi-anggaan’ (Hebreos 10:12), tan andi-duaruwan sikato so “Korderoy Dios, a mangekal na kasalanay mundo.” (Juan 1:29, 36; 1 Corinto 5:7; Apocalipsis 5:12; 13:8; ipareng so Isaias 53:7.) Akadepende so pakaperdona diad kiyibung na dala (Hebreos 9:22), tan saray Kristianon  mankukurang ed liwawa et makaseguro a “say dala nen Jesus ya Anak [na Dios], linisan to itayo ed amin a kasalanan.”​—1 Juan 1:7; Hebreos 9:13, 14; Apocalipsis 1:5.

Say inyapay ya ayadyarin bilay nen Jesus bilang bagat so anino na apay parad kasalanan. Importante itan pian nasaliw so katooan, salanti, narondon ira manlapud atawir dan kasalanan tan ipapatey. (Tito 2:13, 14; Hebreos 2:9) Oniay inkuan a mismo nen Jesus: “Say Anak na too aglinma dia a panlingkoran, noag say manlingkor, tan mangiter na bilay to a sakey a dondon [lyʹtron ed salitan Griego] nipaakar ed amayamay.” (Marcos 10:45) Lapud si Jesus et ayadyari, a sikatoy kasimbangan nen Adan sakbay a nankasalanan, say bagat to so eksakton anakbong ed abalang nen makasalanan ya Adan.​—1 Timoteo 2:5, 6; Efeso 1:7.

Nagmaliw a Posible so Pipupulangan

Diad impankasalanan na too, sikatoy nisian ed Dios, lapud ag-aabobonan nen Jehova so kasalanan. Sikatoy makapipulangan lambengat ed Manamalsa to no nasumpal so kakaukolanen nipaakar ed tuan ‘sakbong,’ odino pananakbong, parad satan a kasalanan. (Isaias 59:2; Habacuc 1:13; Efeso 2:3) Balet ginawan posible nen Jehova a Dios so pakapipulangan ed sikato na makasalanan a katooan diad panamegley na ayadyarin too, si Jesu-Kristo. Kanian, oniay insulat nen apostol Pablo: “Manliket itayo ed Dios ed panamegley nen Katawan tayo a Jesu-Kristo, a lapu ed sikato inako tayo natan so impipulangan.” (Roma 5:11) Pian nagamoran so panangabobon nen Jehova, nakaukolan ya awaten so probisyon na Dios parad pipupulangan panamegley nen Jesu-Kristo. Diad sayan paraan lambengat a sikatayoy nipawil ed datin kipapasen a singa ed kipapasen nen Adan sakbay a nankasalanan. Impatnag na Dios so panangaro to diad impanggawa ton posible ed satan a pipupulangan.​—Roma 5:6-10.

Akapet so Hustisya Panamegley na Panamakepa

Anggaman ontan, kinaukolan a nakapet so hustisya. Anggaman say too et pinalsan ayadyari, abalang to itan a kipapasen lapud kasalanan, kanian si Adan tan saray ilalak to so niiyan ed panangondena na Dios. Kinaukolan na hustisya tan katooran ed saray prinsipyo na inkatunong a say Dios so manusa ed matungangan Adan unong ed ganggan to. Balet lapud aro, say Dios so amawala na kasandin uksoyan a makakapet ed hustisya, tan saray magbabawin ilalak na makasalanan ya Adan so naperdona tan makapikareenan ed Dios, ya anggapo so antokaman a pakasumlang ed hustisya. (Colosas 1:19-23) Kanian, “imbaki [nen Jehova] so Anak to a makapamaandi kasalanan tayo.” (1 Juan 4:10; Hebreos 2:17) Nagmaliw itan a makapaabig, odino makagunggona lapu ed panamakepa. Lapud manamakepan bagat nen Jesus, say Dios so agla mangondena ed toon pinalsa tan nagamoran la ed satan na too so panangabobon tan panangasi na Dios. Sayan panamakepa so mamaandi ed kasalanan tan dusan ipapatey ed biang na espiritual ya Israel tan ed arum nira a mangaawat ed satan a probisyon.​—1 Juan 2:1, 2; Roma 6:23.

Say ideyan panalat ed abalang so mabitabitar diad pigaran teksto ed Biblia a misiglaotan ed pananakbong. Singa bilang, inkuan nen Pablo a “si Kristo inatey lapu ed saray kasalanan tayo unong ed saray sulat” (1 Corinto 15:3), tan “si Kristo dinondon to itayo ed ayew na ganggan, dia ed inkaayew to lapu ed gawa tayo [saray Judio]: ta wala a nisulat, Inayew so lapag [“balang too,” NW] a nibitin ed kiew.” (Galacia 3:13; Deuteronomio 21:23) Oniay inkuan nen Pedro: “Sikaton dili inako to so kasalanan tayo ed laman to dia ed tapew na kiew, pian no inatey itayo ed kasalanan, manbilay itayo ed katunongan: atambal kayo na saray suga’to.” (1 Pedro 2:24; Isaias 53:5) Onia ni insulat nen Pedro: “Aminsan si Kristo nanlikna met na irap [“anagmak na ipapatey,” NW] a nisesengeg ed saray kasalanan; say matunong lapu ed saray agmatunong pian itarok to itayo ed Dios.”​—1 Pedro 3:18.

Kaukolan so Pangagamil na Pananisia ed Maaron Probisyon

Impatnag na Dios tan si Kristo so panangaro diad impangitarya ra na sigpot a pakasakbong na saray kasalanan ya atawir na too. (Juan 3:16; Roma 8:32; 1 Juan 3:16) Balet, pian nagunggonaan ed satan so sakey a too, nepeg a sikatoy peteg a magbabawi tan mangagamil na pananisia. Ag-aliketan si Jehova ed saray bagat na Juda lapud aliwan duga iray motibo ra sanen inyapay da iratan. (Isaias 1:10-17) Imbaki na Dios si Kristo ‘bilang bagat pian diad panamegley na tinmerter a dala to et naperdona so kasalanan na totoo lapud pananisia ra’d sikato.’ (Roma 3:21-26, Maung a Balita) Saramay mangawat ed probisyon na Dios parad pananakbong panamegley nen Jesu-Kristo lapud pananisia so makagamor na kilalaban, balet ag-itan nagamoran na saramay mangipulisay. (Gawa 4:12) Tan, siopaman a ‘mankasalanan manlapu ed linawa to kayari ton naamtaan so katuaan, anggapo la so pankaukolan to parad bagat nisengeg ed saray kasalanan, noag say makapataktakot a panalagar na kaukom.’​—Hebreos 10:26-31.