Say Mogmon Solusyon!

SI Lazaro tan say duaran agagi to, si Marta tan Maria so manaayam ed Betania, sakey a baley a manga taloran kilometro manlapu ed Jerusalem. Sakey ya agew, sanen anggapo diman si Jesus a kaaro ra, naninagem na grabe si Lazaro. Napapagaan lan maong iray agagi to ed sikato. Kanian nambaki ra na mangipaamta ed si Jesus nipaakar ed satan. Duaran agew kayarin nadngelan nen Jesus so balita, nila toy Lazaro. Legan dan walad dalan, imbaga nen Jesus ed saray babangatan to a sikatoy onla diman pian liingen si Lazaro ed ugip. Diad primero, si Jesus so ag-atalosan na saray babangatan to, balet impalinew to itan, a kuanto: “Si Lazaro inatey.”—Juan 11:1-14.

Kasabi nen Jesus ed angiponponan ed si Lazaro, ingganggan to nin unona ya ekalen da so baton akasara ed satan. Kayari na maksil ya impanpikasi to, ingganggan to: “Lazaro, paway ka!” Tan si Lazaro so pinmaway. Samay toon inatey ed apatira lan agew so inmoli.—Juan 11:38-44.

Ipapabitar na salaysay nipaakar ed si Lazaro a say seguradon solusyon na patey et kikioli. Balet ta, talaga kasin agawa so milagron impamilay ed si Lazaro? Impresenta itan na Biblia bilang katuaan. Basaen so salaysay ed Juan 11:1-44, tan naimano yo no panon kalinew iray detalye. Niburi yo kasi ya agawa itan? No ontan et nayarin naikdan kayo met lay rason pian kuestionen so katuaan na amin a milagron nirekord ed Biblia, pati say inkioli nen Jesu-Kristo a mismo. Tan inkuan na Biblia a “no si Kristo agpinaoli a binmilay, say pananisia yo et andi kabaliksan.” (1 Corinto 15:17) Say kikioli so sakey a manunan bangat na Kasulatan. (Hebreos 6:1, 2) Balet, anto ta so kabaliksan na terminon “kikioli”?

Anto so Kabaliksan na “Kikioli”?

Dia ed Kristianon Griegon Kasulatan, say salitan “kikioli” so pinmatnag ed masulok ya 40 danay. Nipatalos itan manlapud salitan Griego a literal a mankabaliksay “iyalagey lamet.” Say kapetekan na satan a Hebreon salita et mankabaliksay “ibilay na inaatey.” Sano ompatey so too, anto so napaoli ed sikato? Agnayari a say laman to, lapud nabubulok itan tan ompapawil ed dabok na dalin. Say napaoli et aliwan say datin laman noagta say datin inkapersona na samay inatey. Kanian, say kikioli et lalanoren toy kipawil na interon inkatoo na samay indibidual—say personalidad to, paraan na impanbilay to, tan say amin a detalye na pakabidbiran ed sikato.

Si Jehova a Dios, a naspot odino perpekto so memorya to, et sarasarag ton nanonotan so interon inkatoo na saramay inaatey la. (Isaias 40:26) Lapud si Jehova so Manangigapo na bilay, main-inomay ton pabilayen iman a parehon persona diad sakey a balon palsan laman. (Salmo 36:9) Niarum ni, inkuan na Biblia a si Jehova a Dios so walaan na ‘pilalek’—sakey a masimoon a pampirawat tan pankaliktan—a mamaoli ed inaatey. (Job 14:14, 15) Agaylan liket tayo ya aliwa labat a nayarian nen Jehova a pabilayen lamet so too noagta kaliktan to met a gawaen itan!

Si Jesu-Kristo so walaan met na manunan betang ed pamaoli na inaatey. Kalabas na masulok a sakey taon kayari ton inggapoy ministeryo to, inkuan nen Jesus: “Unong a say Ama paolien to ray inatey tan ikdan to ra na bilay, ontan to met niay Anak mangiter na bilay ed labay to.” (Juan 5:21) Agta ipapanengneng na eksperiensya nen Lazaro a si Jesu-Kristo so walaan na pakayari tan pankaliktan a mamaoli ed inaatey?

Panon to balet imay ideya a walay bengatla ed dalem tayo a mansiansian mabilay kayari  ipatey? Say bangat nipaakar ed kikioli tan say ideyan imortalidad na kamarerwa odino espiritu na too so, diad tua et agmantunosan odino mankontraan. No walay bengatla ed dalem tayo a mansiansian manbilay kayari ipatey, parad anto ni sirin so kikioli? Say agi nen Lazaro a si Marta et ag-anisia a sanen inatey si Lazaro et nantultuloy nin nambilay ed mundo na saray espiritu. Si Marta so anisia ed kikioli. Sanen sikatoy pinaseguroan nen Jesus: “Si agim onoli ed bilay,” inkuan nen Marta: “Amtak ya onoli ed bilay sano kioli ed kaunoran ya agew.” (Juan 11:23, 24) Tan sanen binmilay si Lazaro, agto angistorya na antokaman ya eksperiensya nipaakar ed bilay kayari patey. Sikatoy inatey la. “Saray inatey [et] agda amta so bengatla,” so kuan na Biblia. “Anggapo so gawa, no kanonotan, no pakaamta, no kakabatan, dia ed Sheol, a laen mo.”—Eclesiastes 9:5, 10.

Unong ed Biblia sirin, say mogmon solusyon ed ipapatey et say kikioli. Balet, diad kinarakel na saray inaatey, siopa iray napaoli, tan iner so kiolian da?

Siopa Iray Napaoli?

“Onsabi so oras ya amin so saray wala ed saray lubok [“pakanodnonotan a lubok,” NW] narengel da so boses [nen Jesus], et ompaway ira,” so kuanen Jesus. (Juan 5:28, 29) Unong ed sayan sipan, saramay wala ed pakanodnonotan a lubok—saramay walad pakanodnonotan nen Jehova—so napaoli. Say tepet sirin et, Diad amin na saray inaatey, siopa so peteg a walad pakanodnonotan na Dios, a manaalagar na kikioli?

Say kapitulo 11 ed libro na Biblia a Hebreos so angidalatdat na kangaranan na lalaki tan bibii a matoor a nanlingkor ed Dios. Sikara a pati saray matoor a lingkor na Dios ya inatey ed agano niran taon so kabiangan ed saramay paolien. Komusta balet iray totoon agda akapet iray estandarte na Dios ed kaptekan, a nayarin lapud agda itan apikabatan? Wala met ira kasi ed pakanodnonotan na Dios? On, dakel ed sikara, lapud isisipan na Biblia: “Wala naani so kioli ed bilay na saray matunong tan agmatunong.”—Gawa 24:15.

 Anggaman ontan, aliwan amin a nambilay et napaoli. Say kuan na Biblia et “no kasumpal tin naamtaay katuaan et gagalaen tayo ni mankasalanan, anggapo lay bagat a makapaandi’d saray kasalanan tayo. Anggapo lay atilak noag say itakot tayo’d panalagar na onsabin ukom.” (Hebreos 10:26, 27, Maung a Balita) Walaray nankasalanan na agla naperdona. Tan aliwan diad Hades (say kaslakan a lubok na katooan) so kawalaan da noag diad Gehena, sakey a simbolikon pasen na permanente lan kaderal. (Mateo 23:33, NW) Balet, nepeg itayon manalwar pian agtayo manhusga no kasin napaoli so sakey a too odino andi. Say Dios labat so makankanepegan ed satan. Amta to no siopa so walad Hades tan walad Gehena. diad biang tayo, makabat so manbilay unong ed linawa na Dios.

Kikioli ed Bilay Diad Tawen—Parad Siopa?

Say sankatalonggaringan ya inkioli et samay inkioli nen Jesu-Kristo. Sikato so “inatey unong ed laman” balet ta “pinaoli’d bilay unong ed espiritu.” (1 Pedro 3:18, Maung a Balita) Anggapo ni so toon akaeksperiensya na ontan a kikioli antis na satan. Inkuan nen Jesus a mismo: “Anggapo so too a sinmegep ed tawen, noag say linmasur nanlapu ed tawen, salanti, Anak na too, a wala ed tawen.” (Juan 3:13) On, say Anak na too so sankaunaan a pinaoli bilang espiritun persona. (Gawa 26:23) Tan wala niray ontumbok. Inkuan na Kasulatan: “Balang sakey dia ed dilin bilang to: si Kristo so inmuna; insan saray kien nen Kristo ed isabi to.”—1 Corinto 15:23.

Sakey a melag a grupo na totoo, salanti, “saray kien nen Kristo,” so paolien ed bilay diad tawen parad nikabkabiig a gagala. (Roma 6:5) Sikaray manuley a kaiba nen Kristo bilang ‘arari ed dalin.’ (Apocalipsis 5:9, 10) Niarum ni, sikaray manlingkor bilang saserdote lapud mibiang ira ed pangekal ed saray epekto na kasalanan ya atawir na katooan ed inmunan too, si Adan. (Roma 5:12) Say bilang na saramay manuley a kaiba nen Kristo bilang arari tan saserdote et 144,000. (Apocalipsis 14:1, 3) Anton klase na laman so awaten da sano napaoli ira? “Maespiritun laman,” so kuan na Biblia. Saya so manggawan posible a nabilay ira ed tawen.—1 Corinto 15:35, 38, 42-45.

Kapigan so kagawa na mangatatawen a kikioli? ‘Diad isabi na Kristo,’ so ebat na 1 Corinto 15:23. Saray nagagawa ed sankamundoan manlapu la’d 1914 so mangipapabitar a say kiwawala nen Kristo tan “say anggaan na [“sistema na bengabengatla,” NW ]” so parehon ginmapo ed satan a taon. (Mateo 24:3-7) Kanian, walay rason pian ipasen a ginmapo la so kikioli ed tawen na matoor iran Kristiano, anggaman siempre, ag-itan nanengneng na totoo. Kabaliksan na satan a saray apostol tan inmuunan Kristiano so pinaoli la ed mangatatawen a bilay. Panon to balet iray Kristianon manbibilay natan a walaan na segurado, inter-Dios ya ilalo a manuley a kaiba nen Kristo ed tawen? Sikaray paolien “dia ed sankakirem,” odino kayarin tuloy na ipatey da. (1 Corinto 15:52) Lapud say kikioli na sayan melag a grupo na 144,000 et tumbokan na baleg a bilang na saray napaoli ed bilay diad dalin, satan so tinawag ya “unona a kioli ed bilay.”—Apocalipsis 20:6.

Siopa Iray Napaoli ed Bilay Diad Dalin?

Unong ed Kasulatan, maslak ed saray inaatey et napaoli ed bilay diad dalin. (Salmo 37:29; Mateo 6:10) Oniay insulat nen apostol Juan sanen indeskribe to so makapadinayew a pasingawey to nipaakar ed saray apaoli: “Say dayat initer to so inaatey a wala ed sikato; tan say patey tan Hades nibantak ira ed dayat ya apoy. Saya sikato so ipapatey a komadua, a salanti dayat ya apoy.” (Apocalipsis 20:11-14) Saramay walad Hades, odino Sheol—say kaslakan a lubok na katooan—so walad pakanodnonotan na Dios. Balang sakey ed sikara so nibulos ed gemgem na patey. (Salmo 16:10; Gawa 2:31) Tan balang sakey so naukom unong ed saray ginawa to kayari inkioli to. Anto so nagawa la’d satan ed patey tan Hades? Saratan so  nibantak ed “dayat ya apoy.” Kabaliksan na saya a say ipapatey ya atawir na katooan ed si Adan et agla mangapekta ed sikara.

Isipen pa labat so maliket ya ilalon inlukas na kikioli ed saramay naandian na inad-aro! Sanen pinaoli nen Jesus so alenleneg ya anak a laki na balo ed Nain, maseguron agaylan liket so alikna na balo! (Lucas 7:11-17) Tan nipaakar met ed atateng na 12-taon ya ugaw a bii a binilay nen Jesus, oniay inkuan na Biblia: “Et atalagnaw ira ed baleg ya inkatalagnaw [“lapud pinasyan liket,” NW].” (Marcos 5:21-24, 35-42; Lucas 8:40-42, 49-56) Petepeteg a diad balon mundo na Dios, makapaliket ya abrasaen lamet iray inad-aro tayo.

Anto so epekto ed sikatayo natan na impakaamta ed katuaan nipaakar ed kikioli? “Maslak a totoo et antakot day patey tan sasalien dan paliisan so pannonot ed satan,” so inkuan na The World Book Encyclopedia. Akin? Lapud, parad maslak a totoo, say patey et sakey a misteryo—bengatlan ag-amta a tatakotan. Say pakapikabat ed katuaan nipaakar ed kipapasen na inaatey tan say pakawalaan na ilalon kioli so mamakasil ed liknaan tayo sano nipaarap itayo ed “kaunoran a kabusol . . . say patey.” (1 Corinto 15:26) Sayan kakabatan et gawaen to met a mas mainomay tayon itepel so sakit a naeksperiensya ed ipatey na sakey a maapit a kaaro odino kanayon.

Kapigan so igapo na kikioli diad dalin? Say dalin natan so napnoy karawalan, kolkolan, panagpaagus na dala, tan polusyon. No saray inaatey et paolien ed onian klase na dalin, seguradon maganggano so antokaman a liket a nitarok na satan. Anggaman ontan, insipan na Manamalsa a magano to lan panampoten iyan kaplesan a mundo a walad panangontrol nen Satanas. (Uliran 2:21, 22; Daniel 2:44; 1 Juan 5:19) Asingger lan nasumpal so gagala na Dios parad dalin. Tan diad satan a mareen a mundon gawaen na Dios, saray binilyon a naugip natan ed patey so napaoli.

[Litrato ed pahina 7]

Maslak ya inaatey so napaoli ed bilay diad dalin