Ombiskeg Komon Iray Lima Yo

“Ombiskeg komon so saray lima yo, sikayo ya ondengel ed saraya ya agew na saraya a salita a manlapu ed sangi na saray propeta.”​—ZACARIAS 8:9.

1, 2. Akin a makanepegan na imano tayo so libro na Aggeo tan Zacarias?

 SARAY propesiya nen Aggeo tan Zacarias so nisulat manga 2,500 a taon lay apalabas, ingen ta seguradon makabkabaliksan iratan ed bilay yo. Saray salaysay na Biblia a naromog ed sayan duaran libro et aliwa lambengat ya awaran. Kabiangan iratan ed ‘saray bengatla a nisulat nensaman ya onkanan kibangatan tayo.’ (Roma 15:4) Karaklan ed saray nabasa tayo ed saratan et mangipapanonot nipaakar ed peteg iran situasyon a nagagawa manlapu la’d inkiletneg na Panarian diad tawen nen 1914.

² Nipaakar ed saray ebento tan saray sirkumstansya a naeksperiensya na saray totoo na Dios nensaman, onia so inkuan nen apostol Pablo: “Natan sarayan bengatla agawa ed sikara a singa uliran; tan nisulat ira a bilin ed sikatayo, ya asabian da so kasumpalan na sayan panaon.” (1 Corinto 10:11) Kanian nayarin oniay panumamengan yo: ‘Anto kasi so kablian na libron Aggeo tan Zacarias diad panaon tayo?’

3. Anto so angiyapasakeyan nen Aggeo tan Zacarias?

³ Singa impabitar la na inmunan artikulo, saray propesiya nen Aggeo tan Zacarias so anaglawi ed panaon sanen pinmawil iray Judio diad dalin da ya inter na Dios kayari na inkibulos da manlapud impakakautibo ed Babilonia. Say duaran propeta so angipaimano ed panangipaalagey lamet ed templo. Inletneg na saray Judio so pundasyon na templo nen 536 K.K.P. Anggaman walaray mamasiken a Judio ya angiteen na imano ra ed apalabas, karaklan ed sikara so “inmeyag na maksil nipaakar ed liket.” Balet, diad tua et walay mas makatantanda ni ingen ya agawa ed panaon tayo. Panon ya ontan?​—Esdras 3:3-13.

4. Anto so agawan tampol kayarin tuloy na Guerra Mundial I?

⁴ Kayarin tuloy na Guerra Mundial I, nibulos iray nilanaan nen Jehova manlapud impakakautibo ed Babilonia a Baleg. Satan so angirepresenta ed manunan pakabidbiran na pananuporta nen Jehova. Diad asasakbay, ompatnag ya apatunda na saray relihyoson papangulo tan saray mapolitikon kaalyansa ra so mapublikon panagpulong tan panagbangat na saray Estudyante na Biblia. (Esdras 4:8, 13, 21-24) Balet, inekal nen Jehova a Dios iray makasbel ed panagpulong tan panaggaway-babangatan a kimey. Diad apalabas iran dekada manlapula’d 1919, binmulaslas so panangipulong ed Panarian tan anggapon balot so akapatunda ed iyaaligwas na satan.

5, 6. Anton engranden kasumpalan so ipapabitar na Zacarias 4:7?

⁵ Makapanseguro itayo a say panagpulong tan panagbangat a gagawaen na saray matulok a lingkor nen Jehova diad panaon tayo so mantultuloy lapud pananulong to. Diad Zacarias 4:7, onia so nabasa tayo: “Sikato yakar to naani so akintagey a bato a tekep na saray paneyag a grasya, grasya, ed sikato.” Anton engranden kasumpalan diad panaon tayo so tutukoyen na saya?

⁶ Ipapabitar na Zacarias 4:7 so panaon sano say tuan panagdayew ed Soberanon Katawan so nitarok ed nagnap a kipapasen na satan diad mangaraldalin iran saban na espiritual a templo to. Satan a templo et uksoyan nen Jehova parad iyaasingger ed sikato diad panagdayew base ed pipupulangan a bagat nen Kristo Jesus. Tua, say baleg ya espiritual a templo so niwala la manlapu la nen inmunan siglo K.P. Ingen ta say tuan panagdayew ed mangaraldalin a saban na satan so magmaliw ni lambengat a nagnap. Minilyon a  managdayew natan so manlilingkor ed mangaraldalin a saban na espiritual a templo. Saraya tan say dakerakel a napaoli so magmaliw ya ayadyari legan na Sanlibon Taon ya Uley nen Jesu-Kristo. Diad pansampot na sanlibon taon, saray tuan managdayew na Dios lambengat so natilak diad alinisan a dalin.

7. Anto so betang nen Jesus nipaakar ed panangitarok ed tuan panagdayew diad nagnap a kipapasen na satan ed panaon tayo, tan akin a makapaseseg itan ed sikatayo?

⁷ Naimatonan a mismo nen Gobernador Zorobabel tan say Atagey a Saserdote a si Josue, so inkasumpal na templo nen 515 K.K.P. Impasakbay na Zacarias 6:12, 13 so mipadparan betang nen Jesus ed pangitatarok ed tuan panagdayew diad nagnap a kipapasen na satan: “Onia so salita nen Jehova na saray ehersito a kuan to, Nia, say laki a say ngaran to sikato so Sanga: et sikato ombaleg naani a manlapu ed pasen to; et sikato ipaalagey to naani so templo nen Jehova. . . . Et manawit naani na gayaga, tan onyurong naani tan manuley naani ed tapew na trono to; et sikato naani sakey a saserdote ed trono to.” Lapud si Jesus, a walad tawen tan sengegan na inlesa na saray arari manlapud linya nen David, so ontutulong ed panangipulong na Panarian diad espiritual a templo, wala kasi so makaamper ed iyaaligwas na satan? Anggapon balot! Agta satan so mamaseseg ed sikatayon mantultuloy ed ministeryo tayo, ya ag-itayo paisuawi ed inagew-agew iran kapagaan?

Saray Prayuridad

8. Akin a nepeg ya iyuna tayo ed bilay tayo so kimey diad espiritual a templo?

⁸ Ta pian nagamoran so pananulong tan panamendisyon nen Jehova, nepeg tayon pansiansiaen a manuna ed bilay tayo so kimey ed espiritual a templo. Aliwan singa saray Judio ya angikuan ya, “Aliwa nin panaon,” nepeg tayon tandaan a manbibilay itayo la ed ‘kaunoran iran agew.’ (Aggeo 1:2; 2 Timoteo 3:1) Impasakbay nen Jesus a saray matoor a papatumbok to so mangipulong ed maong a balita na Panarian tan manggawa na babangatan. Nepeg tayon alwaran ya agnapaulyanan so pribilehyo tayo ed panaglingkor. Nituloy nen 1919 so panagpulong tan panagbangat a kimey kayari na temporaryon impamatunda ed satan na isusumpa na mundo, balet ta agni asumpal itan. Balet, makapanseguro kayo a talagan nasumpal itan!

9, 10. Anto so akadependian na panamendisyon nen Jehova, tan anto so kabaliksan na satan parad sikatayo?

⁹ Mandependi ed laknab na pantutultuloy tayon mankimey a magunaet, nabendisyonan itayo  bilang grupo tan indibidual. Imanoen pa so sipan nen Jehova a pakagamoran tayo na panamaseguro. Manlapud samay panaon a pinmawil iray Judio ed interon-kamarerwan panagdayew tan intuloy da so magunaet a kimey da nipaakar ed pundasyon na templo, oniay imbaga nen Jehova: “Manlapu ed saya ya agew bendisyonan ta kayo.” (Aggeo 2:19) Panggayagaan da so nagnap a kipawil na panangabobon to ed sikara. Konsideraen natan iray bendisyon ya insipan na Dios: “Wala naani so bini na deen; say ubas iter to naani so bunga to, tan say dalin iter to naani so munat to, tan saray tawen iter da naani so linaew da; et gawaen ko naani so kera na saya a baley a manawir na saraya ya amin a bengatla.”​—Zacarias 8:9-13.

¹⁰ No panon a benendisyonan nen Jehova iratan a Judio diad espiritual tan materyal a paraan, bendisyonan to itayo met legan tayon pampepelengan so kimey a pagagawa to ed sikatayo, ya atekepan na maliket a puso. Sarayan bendisyon so mangilaktip ed deen diad limog tayo, kaligenan, inkaaligwas, tan espiritual ya ibubulaslas. Balet, makaseguro kayo a say mantultuloy a panamendisyon na Dios so akadepende ed panusumpal tayo ed kimey diad espiritual a templo unong ed panlabayan nen Jehova a pakagawa na satan.

11. Panon tayon analisaen so inkasikatayo?

¹¹ Natan la so panaon pian ‘isipen tayo iray dalan tayo.’ (Aggeo 1:5, 7) Kaukolan a mangigana itayo na panaon pian analisaen iray prayuridad tayo ed bilay. Say panamendisyon nen Jehova ed sikatayo natan so akadepende ed laknab na pangitatandoro tayo ed ngaran to tan pangitutuloy tayo ed kimey tayo diad espiritual a templo to. Nayarin oniay itepet yo ed inkasikayo: ‘Anguman la kasi iray prayuridad ko? Komusta kasi so seseg ko parad si Jehova, ed katuaan to, tan ed kimey to no ikompara ed seseg ko sanen abautismoan ak? Kasin naaapektoan lay atension ko parad si Jehova tan ed Panarian to lapud interes ko ed mainawan panagbilay? Kasin say takot ed too​—panagpaga ed no anto so isipen na arum​—so mangaamper ed siak?’​—Apocalipsis 2:2-4.

12. Anto so situasyon ed limog na saray Judio a nipabitar diad Aggeo 1:6, 9?

¹² Agtayo labay ya ikibot na Dios so mapalabon panamendisyon to ed sikatayo lapud pamapaulyan tayo ed kimey a panangitandoro ed ngaran to. Nonoten pa a kayari na maseseg ya impangigapo ra ed panagpaalagey ed templo, saray pinmawil a Judio so ‘binmatik a balang too ed dili ya abung to,’ unong ya ibabaga na Aggeo 1:9. Sikaray nagmaliw ya okupado ed inagew-agew iran pankaukolan dan dili tan ed kabibilay da. Kanian, “daiset so niloob” da, daiset so maong a natagano tan iinumen, tan maimeng a kawesen. (Aggeo 1:6) Inkibot nen Jehova so bendisyon to. Wala kasi so naaralan tayo ed saya?

13, 14. Panon tayon niyaplika so leksion a nagamoran ed Aggeo 1:6, 9, tan akin ya importante itan?

¹³ Agkayo kasi onabobon a pian mantultuloy a panggayagaan so panamendisyon na Dios, nepeg tayon resistian so pananap ed saray bengatlan parad inkasikatayon dili a sengegan lay pakapaulyan tayo ed panagdayew ed si Jehova. Gawaen tayo itan balanglan say kimey odino  paniinteresan a mangisusuawi ed imano tayo et say panggegemtan ya onyaman, saray pakana a biglan-iyaman, maambisyon iran plano parad atagtagey nin edukasyon pian nawalaan na marakep a karera ed sayan sistema, odino saray kurso a mamenek ed inkasikatayon dili.

¹⁴ Saratan a bengatla et nayarin aliwa met a kasalanan a mismo. Balet, agyo kasi natetebek a no misiglaotan ed andi-anggaan a bilay et saratan so peteg ya “inatey a gawa”? (Hebreos 9:14) Diad anton pantalos? Saratan so inatey ed espiritual a paraan, maapa, tan andian na kakanaan. No pampoporsigian itan na sakey, saratan a kimey so mangitonton ed espiritual ya ipapatey. Agawa itan ed pigaran alanaan a Kristiano diad panaon na saray apostol. (Filipos 3:17-19) Agawa met itan ed pigaran indibidual diad panaon tayo. Nayarin walaray kabat yo a kalkalnan nisuawi manlapud saray Makristianon kimey tan ed kongregasyon tan natan et anggapoy ipapatnag dan ipawil ed panaglingkor ed si Jehova. Ilaloan tayo ya ompawil ira ed si Jehova, balet say katuaan et manresulta ed pakaandi na pabor tan panamendisyon nen Jehova so panggegemtan ed saray “inatey a gawa.” Natebek yo no panon a makapaermen itan a nagawa. Mankabaliksan itan na pakabalang na liket tan kareenan a papawalaen na espiritu na Dios. Tan isipen pa so nasaew no makaarawi ed maapit a Kristianon impanaagi!​—Galacia 1:6; 5:7, 13, 22-24.

15. Panon ya ipapabitar na Aggeo 2:14 so inkaseryoso na panagdayew tayo?

¹⁵ Satan so seryoson tuloy a pamaakaran. Imanoen pa ed Aggeo 2:14 so panmoria nen Jehova ed saray Judio ya amaulyan ed abung a panagdayewan ed sikato pian parakepen da so kaabungan dan dili, literal man odino piguratibo. “Ontan so satan a baley, tan ontan so saya a nasyon ed arap ko, kuan nen Jehova; et ontan so balang gawa na saray lima; et saman so yapay dad’man sikato so marutak.” Antokaman iran maparungtal a bagat ya inyapay na saray pasaray a Judio diad temporaryon altar ed Jerusalem so agnaabobonan no papaulyanan da so tuan panagdayew.​—Esdras 3:3.

Nigarantiyan Pananulong

16. Unong ed saray pasingawey a naawat nen Zacarias, anto so naseseguro na saray Judio?

¹⁶ Saray matulok a Judio a nankimey diad panangipaalagey lamet ed templo na Dios so apaseguroan na pananulong to, unong ya impabitar na Dios diad nantutumbokan a waloran pasingawey a naawat nen Zacarias. Say unonan pasingawey so angigarantiya ed pakasumpal na templo tan say iyaaligwas na Jerusalem tan Juda daput no matulok iray Judio a manumpal ed kimey da. (Zacarias 1:8-17) Say komaduan pasingawey so angisipan a mangangga so amin a gobierno ya onsusumpa ed tuan panagdayew. (Zacarias 1:18-21) Arum a pasingawey so angipaseguro ed pananalimbeng na Dios ed panagpaalagey a kimey, say idagsa na totoo manlapud dakel a nasyon diad asumpal ya abung a panagdayewan ed si Jehova, say tuan kareenan tan kaligenan, tan say kaekal na ompatnag ya agnatalonaan iran babeng ed kimey ya impabtang na Dios, say pakaandi na karelmengan, tan say pangimaton tan pananalimbeng na anghel. (Zacarias 2:5, 11; 3:10; 4:7; 5:6-11; 6:1-8) Natalosan yo no akin a diad sarayan garantiya na pananulong na Dios et inuman la na saramay matulok so estilo na kabibilay da tan insentro ra so imano ra ed panumpal ed kimey a sengegay impangibulos na Dios ed sikara.

17. Nipaakar ed saray nigarantiya ed sikatayo, anto so nepeg ya itepet tayo ed inkasikatayo?

¹⁷ Mipadpara, say garantiya na seguradon pambiktorya na tuan panagdayew so nepeg a mamakiwas ed sikatayon mankimey tan managdag  ed sikatayon manumameng nipaakar ed abung a panagdayewan ed si Jehova. Oniay itepet yo ed inkasikayo: ‘No panisiaan ko a natan la so panaon pian gawaen so kimey a panangipulong ed maong a balita na Panarian tan panggawa na babangatan, kasin saray kalat ko tan estilo na panagbilay ko et mitunosan ed kombiksion ko? Kasin malaem so panaon ya uusaren ko ed panagaral ed mapropetikon Salita na Dios, a pampapagaan ko itan, tan itotongtong ko itan ed kapara iran Kristiano ontan met ed arum a nakakatongtong ko?

18. Anto so nagawa ed arapen, unong ed Zacarias kapitulo 14?

¹⁸ Tinukoy nen Zacarias so kaderal na Babilonia a Baleg a tumbokan na bakal na Armagedon. Onia so nabasa tayo: “Sikato naani sakey ya agew a naamtaan ed Jehova; aliwa ya agew, tan aliwa a labi; balet nagawa naani, a dia ed mankapisdem wala naani liwawa.” On, say agew nen Jehova so talagan magmaliw ya ambilunget, ambetel ya agew parad saray kakabusol to ed dalin! Balet magmaliw itan a panaon na mantultuloy a liwawa tan pabor parad saray matoor a managdayew ed si Jehova. Deneskribe met nen Zacarias no panon ya iyabawag na amin a bengatla diad balon mundo so kasantosan nen Jehova. Say tuan panagdayew ed baleg ya espiritual a templo na Dios so magmaliw ya alenleneg a panagdayew diad dalin. (Zacarias 14:7, 16-19) Agaylan garantiya itan! Naeksperiensya tayo so kasumpalan na nipasakbay la tan nanengneng tayo so kiyalangon na inkasoberano nen Jehova. Agaylan nikadkaduman agew itan parad si Jehova!

Saray Magnayon a Bendisyon

19, 20. Akin a makapaseseg ed sikayo so Zacarias 14:8, 9?

¹⁹ Kayari na satan a makapakelkelaw ya agawaan, si Satanas a Diablo tan saray demonyo to so nikalinsurong ed singa-inatey a kipapasen. (Apocalipsis 20:1-3, 7) Insan onagus iray bendisyon legan na Sanlibon Uley nen Kristo. Onia so ibabaga na Zacarias 14:8, 9: “Nagawa naani dia ed saman ya agew, a mabilay ira a danum so ompaway naani a manlapu ed Jerusalem; say kapaldua ra mamaarap ed dayat ed bukig, tan say kapaldua ra mamaarap ed dayat ed sagur; sikato naani dia ed panaon na tiagew tan betel. Et si Jehova sikato naani so Ari ed amin a dalin; dia ed saman ya agew si Jehova sikato naani saksakey, tan say ngaran to saksakey.”

²⁰ Saray ‘mabilay a danum,’ odino “ilog na danum na bilay,” a mangililitrato ed saray probisyon nen Jehova a manustuni na bilay, so mantultuloy ya onagus manlapu ed sentro na Mesianikon Panarian. (Apocalipsis 22:1, 2) Sakey a baleg ya ulop na saray managdayew ed si Jehova, ya akaliktar ed Armagedon, so nagunggonaan diad kibulos ed panangondena na Adamikon ipapatey. Anggan saramay inaatey so nagunggonaan diad panamegley na kioli. Diad ontan et onggapo so balon kabiangan na pananguley nen Jehova ed sankadalinan. Saray totoo ed interon dalin so mamidbir ed si Jehova bilang say Sankatalbaan a Soberano, say alenleneg a sakey a nepeg a dayewen.

21. Anto so nepeg a determinasyon tayo?

²¹ Nisengeg ed amin ya impasakbay nen Aggeo tan Zacarias tan ed amin ya asumpal la, walaan itayo na makatunongan a rason pian mantultuloy ed kimey ya ingganggan na Dios ed sikatayo a gawaen diad mangaraldalin iran saban na espiritual a templo to. Anggad isabi na panaon a magmaliw lan nagnap so kipapasen na tuan panagdayew, komon ta panggunaetan tayon amin so pangiyuna ed intereses na Panarian. Onia so ipapaseseg ed sikatayo na Zacarias 8:9: “Ombiskeg komon so saray lima yo, sikayo ya ondengel ed saraya ya agew na saraya a salita a manlapu ed sangi na saray propeta.”

Kasin Nanonotan Yo?

• Anto so maawaran a pipadparaan natan na saray libro na Aggeo tan Zacarias?

• Anton leksion nipaakar ed saray prayuridad so itatarya di Aggeo tan Zacarias?

• Akin a say pangonsidera ed Aggeo tan Zacarias so mangiter ed sikatayo na rason pian manmatalek nipaakar ed arapen?

[Tepetepet Parad Panagaral]

[Litrato ed pahina 26]

Pinaseseg nen Aggeo tan Zacarias iray Judio ya interon-kamarerwan mankimey ta pian makaawat na bendisyon

[Saray litrato ed pahina 27]

Kasin ‘ombabatik kayo parad dilin abung yo’?

[Litrato ed pahina 28]

Walay sakey a bendisyon ya insipan nen Jehova tan inter to la itan