Tepetepet Manlapud Saray Managbasa

No say sakey a too et gogonigonen na saray demonyo, anto so nayarin gawaen to pian makablos ed satan?

Ipapabitar na Salitay Dios a nayarin nibulos manlapud pakakagonigon iramay aatakien na saray demonyo. Importantin tuloy so pampikasi pian nibulos ed satan. (Marcos 9:25-29) Balet wala niray kaaruman a kundang a nayarin gawaen na sakey a gogonigonen na saray demonyo. Saray agawa ed saray Kristiano nen inmunan siglo so mangiyilustra ed no anto ni so nakaukolan a gawaen.

Walaray indibidual ed Efeso nensaman ya alanor ed demonismo sakbay iran nagmaliw a patumbok nen Kristo. Balet, sanen denesidi da la so manlingkor ed Dios, “saray maanito so nantipon na saray libro ra, et pinoolan da ra ed arap da ya amin.” (Gawa 19:19) Diad impaneral da ed saray libro ra nipaakar ed panagparles, saraman a balon mananisia ed Efeso so angipatnag na alimbawa parad siopaman a mankaliktan a nibulos ed panangataki natan na saray demonyo. Kapilitan ya ibantak da so amin a bengatlan misiglaotan ed espiritismo. Laktipen na satan iray libro, magasin, pelikula, saray elektronikon impormasyon, musika a walaan na pisiglaotan ed espiritismo, ontan met ed saray anting-anting odino arum niran kagawaan ya isusulong parad “proteksion” odino nisiglaot ed saray agamil ed espiritismo.​—Deuteronomio 7:25, 26; 1 Corinto 10:21.

Pigaran taon kayarin dineral na saratan a Kristiano ed Efeso iray libro ra nipaakar ed mahiko, oniay insulat nen apostol Pablo: “Mitulot [itayo] . . . sumpa ed saray mauges ya espiritu.” (Efeso 6:12) Oniay impaseseg nen Pablo ed saray Kristiano: “Isulong yo so sankabukel a kinlong na Dios, pian nayarian yo so ontalindeg ya onsumpa ed saray pangalot na Diablo.” (Efeso 6:11) Onaplika nin siansia itan a simbawa. Nepeg a pabiskegen na saray Kristiano so espiritualidad da pian naprotektaan day inkasikara manlapud saray marelmeng ya espiritu. Oniay indanet nen Pablo: ‘Nagkalalo la, egnaan yo so kinlong na pananisia, a sikato so nayarin pangerep yo naani ed saray amin a mandarlang a gayang na mauges.’ (Efeso 6:16) Napabiskeg na sakey a too so pananisia to diad panamegley na panagaral na Biblia. (Roma 10:17; Colosas 2:6, 7) Kanian, say regular a panagaral ed Biblia so makatulong ed sikatayo pian napabiskeg so pananisia ya onkanan proteksion sumpad impluensya na marelmeng iran espiritu.​—Salmo 91:4; 1 Juan 5:5.

Saramay Kristiano ed Efeso so kinaukolan a manggawa ni na sananey ya importantin kundang. Oniay imbaga ed sikara nen Pablo: “Onkerew kayo . . . ed amin a nengneng na pikakasi tan pikekerew ed amin a panaon.” (Efeso 6:18) On, say pampikasin naynay pian nagamoran so pananalimbeng nen Jehova et importantin tuloy parad saramay malabay a nibulos ed panangataki na saray demonyo natan. (Uliran 18:10; Mateo 6:13; 1 Juan 5:18, 19) Oniay matukoy ya ibabaga na Biblia: “Ontulok kayo sirin ed Dios; balet onsumpa kayo ed diablo, et sikato so onarawi ed sikayo.”​—Santiago 4:7.

Bangta nepeg a magunaet a manpikasi so sakey ya aatakien na demonyo parad kibulos, saray arum a tuan Kristiano so nayari met a mangipikasi ed indibidual a manpipilalek a manlingkor ed si Jehova tan maseet a manreresisti ed saray marelmeng ya espiritu. Nayarian dan kerewen ed Dios ya ombiskeg ed espiritual imay papairapen na saray demonyo pian naresistian to iray panangataki na demonyo. Lapud idadalatdat na Salitay Dios a ‘say pikakasi na sakey a matunong a too et manalonggaring na dakel ed pankimey to,’ saray pikakasi na saray lingkor na Dios so seguradon mangunggona ed saray napapairap a manggagawa ed anggaay nayarian da pian ‘sumpaen so Diablo.’​—Santiago 5:16.

[Litrato ed pahina 31]

Dineral na saray mananisia ed Efeso iray libro ra nipaakar ed mahiko