“Nakaukolan ya Unoren Mi so Dios, nen Saray Totoo”

“Say Bakal Kien nen Jehova”

SAY duaran mankalaban ya armada so walad biek tan biek na sakey a lawak. Saray sundalo na Israel so 40 ya agew lan papagyawen tan kakantyawan nen Goliat, say mabiskeg a mibabakal na saray Filisteo.​—1 Samuel 17:1-4, 16.

Si Goliat so maneyag a manaangat ed saray Israelita, a kuan to: “Mamili kayo na sakey a laki nipaakar ed sikayo, tan sikato so palasoren yo ed siak. No onsarag a mibakal ed siak, tan pateyen to ak, sirin sikami so ariripen yo, balet no ontalona ak sumpa ed sikato, tan sikato so pateyen ko, sirin sikayo so ariripen mi, tan manlingkor kayo ed sikami. . . . Ayaten ko so saray inayuraan na Israel ed sayan agew, ikdan yo ak na sakey a laki pian manbakal kami.”​—1 Samuel 17:8-10.

Nensaman a panaon, kaslakan lan irerepresenta na saray mabiskeg a mibabakal so armada ra diad labanan a sakey-kontra-sakey. Say dapag na manalo ed satan so akanbetang na pambiktorya. Balet ta aliwan ordinaryon sundalo iyan manaangat ed Israel. Sikatoy sakey a higante, a masebeg tan makapataktakot a kalaban. Balet diad impanmudmora to ed armada na totoo nen Jehova, indunget la ingen nen Goliat so inkasikato ed kaderal to.

Aliwa labat iyan labanan na militar. Say manlalaban dia et si Jehova tan saray dirios na saray Filisteo. Balet, imbes a makpel ya idaulo nen Arin Saul so armada to sumpad kakabusol na Dios, sikato so pinmayakot.​—1 Samuel 17:11.

Sakey a Kalangweran a Nanmatalek ed si Jehova

Legan na saman ya enkuentro, sakey a lakin kalangweran a nilanaan lan magmaliw ya ari na Israel, so dinmalaw ed saray agagi to a kaiba ed armada nen Saul. Say ngaran to et David. Sanen nadngel to iray imbabalikas nen Goliat, oniay intepet to: “Siopa so saya ya ag-agalsiman a Filisteo, a mangayat ed saray inayuraan na mabilay a Dios?” (1 Samuel 17:26) Diad panmoria nen David, si Goliat so mangirerepresenta ed saray Filisteo tan saray dirios da. Makatunongan a sinmanok si David, a pinilalek ton iyagel so ngaran nen Jehova tan say Israel tan milaban sumpad sayan paganon higante. Balet oniay inkuan nen Arin Saul: “Agka masarag ya onla sumpa ed saya a Filisteo a mibakal ed sikato, ta ugaw ka ni.”​—1 Samuel 17:33.

Agaylan mandumaan so panmoria nen Saul tan si David! Parad si Saul, si David et sakey labat a managpastol ya onlalaban ed sakey a masebeg a higante. Balet parad si David, si Goliat et too lambengat ya onsusumpa ed Soberanon Katawan a Jehova. Makmakpel si David lapud sikatoy kombinsido ya ag-abuloyan na Dios a walay manludlurey ed ngaran to ya agnadusa. Impangaya nen Goliat so inkabiskeg to, bangta si David so nanmatalek ed si Jehova, a minoria to so situasyon unong ed punto de bista na Dios.

“Ondago Ak ed Sika Dia ed Ngaran nen Jehova”

Malmalet so basiyan na pananisia nen David. Ninonot to a sikatoy tinulongan na Dios nensaman a mangiyagel ed saray karnero to sumpad sakey ya oso tan sakey a leon. Agnanduaruwa iyan malangwer nin managpastol a sikatoy tulongan natan nen Jehova diad pilaban to ed sayan makapataktakot a Filisteon kabusol. (1 Samuel 17:34-37) Say ayura nen David et sakey labat a lampasot odino palsot tan limaran pino a bato sanen inmarap ed si Goliat.

Diad impanmatalek nen malangwer a David ed biskeg ya ipapagamor nen Jehova, sikatoy angawat ed sayan ompatnag ya imposiblin  angat. Oniay makmakpel ton inkuan ed Filisteo: “Ondago ka ed siak ya akakampilan, tan pati gayang, tan pati kinlong balet ondago ak ed sika dia ed ngaran nen Jehova na saray ehersito, say Dios na saray inayuraan na Israel, a sikato so inayat mo. Dia ed sayan agew si Jehova sika so yawa’to ed limak . . . Naamtaan na amin a dalin a wala so Dios dia ed Israel. Tan naamtaan na saya ya amin a dagup a si Jehova agmangilaban ed panamegley na kampilan tan gayang: ta say bakal kien nen Jehova.”​—1 Samuel 17:45-47.

Anto so nansumpalan? Oniay inkuan na impuyan a salaysay: “Dia ed ontan si David tinmalona ed Filisteo ed panamegley na lampasot tan sakey a bato, tan kinabil to so Filisteo, tan sikato so pinatey to; balet anggapo so kampilan ed lima nen David.” (1 Samuel 17:50) On, anggapo so awit ton kampilan, balet walad sikato so mabiskeg a pananulong nen Jehova a Dios. *

Agaylan niyalangon so pananisia nen David ed si Jehova diad satan a labanan! Sano nepeg itayon manpili no kasin ontakot itayo ed totoo odino manmatalek itayo ed pakayari nen Jehova a mangilaban, oniay mabitar a pilien tayo: “Nakaukolan ya unoren [tayo] so Dios nen saray totoo.” (Gawa 5:29) Niarum ni, sano moriaen tayo iray makapaangat a situasyon unong ed panmoria nen Jehova a Dios, nawalaan itayo na asimbang a panmoria ed anggan angkakabaleg a problema.

[Paimano ed leksab]

[Kahon/​Litrato ed pahina 9]

KAUNONGAN KABALEG SI GOLIAT?

Ibabaga ed sikatayo na salaysay diad 1 Samuel 17:4-7 a say kaatagey nen Goliat et masulok a siameran piye​—ngalngalin 3 a metro. Napatnagan so kabaleg tan kabiskeg na sayan Filisteo dia ed gansan kabal to. Manbelat itan na 57 a kilo! Say putan na gayang to et singa kiew a baras tan say balatyang a tarem na satan et manbelat na 7 a kilo. Agayla, nayarin mas ambelat ni so ayura nen Goliat nen si David a mismo!