Leksion Nipaakar ed Inkamapaatagey tan Inkamapaabeba

WALAY agawa ed bilay nen Arin David a mangipapabitar ed pandumaan na tuan inkamapaabeba tan mauges a kinon odino inkamapaatagey. Agawa itan kayarin kinobkob tan pinagmaliw nen David a kabisera so Jerusalem. Minoria nen David si Jehova bilang say peteg ya Ari na Israel, kanian impaiyalis to ed syudad so Kaban, a mangisisimbolo ed kiwawala na Dios. Ontan lan kaimportante ed si David iyan ebento kanian impatnag to so gayaga to ed imaton na amin legan ton tumtumboken iray saserdote ya angalsa ed Kaban. Anengneng na saray taga-Jerusalem so ari ra a “mansasayaw” tan “sinmayaw . . . ed amin a pakapanyari to.”—1 Awaran 15:15, 16, 29; 2 Samuel 6:11-16.

Balet say asawa nen David a si Micol so ag-akibiang ed satan a makapaliket a prosesyon. Sikatoy nambantay manlapud bintana, tan imbes a panliketan to so paraan a pangidadayew nen David ed si Jehova, “sikato so binalaw to ed puso to.” (2 Samuel 6:16) Akin ya onman so liknaan nen Micol? Mapatnag ya atagtagey so pakanengneng to ed inkasikato bilang anak a bii na sankaunaan ya ari na Israel, si Saul, tan natan et asawa na komaduan ari na Israel. Nayarin inisip to a say asawa to, ya ari, so agnepeg ya akibiang ed saray ordinaryon totoo ed paraan na panagselebra ra, lapud mangiyabeba itan ed kagalangan to. Nipatnag to so ontan a mapaatagey a liknaan diad impangibano to ed si David sanen sinmempet la. Tekep na panleglemew, oniay inkuanto: “Panon la so inkagayaga na ari ed Israel natan ya agew, a sikato so nanlakseb natan ya agew ed saray mata na saray bibii ya ariripen na saray aripen to, a singa sakey ed saray maapa a totoo a makapabaing a manlakseb!—2 Samuel 6:20.

Antoy reaksion nen David ed ontan a panamalaw? Binaat nen David si Micol diad impangibagan impulisay nen Jehova so ama ton si Saul, diad impangabobon ed sikato na Dios. Inyarum ni nen David: “Nagmaliw ak ni a lalon mabanday nen saya, tan siak naani abeba ed dili a pakanengneng ko: balet ed saray bibii ya ariripen a sinalitam, siak naani napagalangan ed sikara.”—2 Samuel 6:21, 22.

On, determinado si David a mantultuloy a manlingkor ed si Jehova tekep na kapaabebaan. Satan ya awawey so makatulong ed sikatayo pian natalosan no akin a si David et tinawag nen Jehova bilang “laki a maunor ed pusok.” (Gawa 13:22; 1 Samuel 13:14) Diad tua, tinumbok nen David so sankaabigan ya ehemplo na kapaabebaan, salanti, si Jehova a Dios a mismo. Makapainteres, say inusar nen David a balikas ed si Micol ya “siak naani abeba” so nanlapud Hebreon verb a nausar met a maneskribe ed mismon panmoria na Dios ed katooan. Anggaman si Jehova so sankatagyan a Persona ed uniberso, sikato so dedeskribien na Salmo 113:6, 7 bilang “manpaabeba [say iyabeba na sakey manlapud posisyon odino kagalangan to pian mideneng ed sakey a mas abeba] ya onnengneng ed saray bengabengatla ed tawen, tan dia ed dalin? Sikato ipaalagey to so duka ya agwaten ed dabok, tan lakeyen to so naukolan ya agwaten ed dumsis.”

Lapud mapaabeba si Jehova, agpankelawan a kagula to so “mapangta a mata” na saray totoon mapaatagey. (Uliran 6:16, 17) Sanen impatnag nen Micol so ontan a mauges ya ugali tan agto nirespeto so ari a pinili na Dios, sikato so ag-apribilehyoan a mangilukon na anak a laki parad si David. Sikato so inatey ya andian na anak. Agaylan importantin leksion parad sikatayo! Amin a malabay ya abobonan na Dios so nepeg a manumbok ed sarayan salita: “Balkesan yo so inkasikayo na panagpaabeba, a manlilingkoran so sinansakey: ta say Dios kaingli’to so saray atatagey a linawa, et ikdan to na grasya so saray mapaabeba.”—1 Pedro 5:5.