Tepetepet na Saray Manbabasa

Anto so responsabilidad na kongregasyon sano say sakey a Kristiano a manmamaneho na luganan et akaaksidente ya inateyan na arum a too?

Nepeg a konsideraen so posiblin impankasalanan ed dala lapud nakaukolan a paliisan na kongregasyon so nawalaan na eebatan ed komunidad lapud pankasalanan ed dala. (Deuteronomio 21:1-9; 22:8) Say drayber ya akaaksidente, a nanresulta ed impatey so makapankasalanan ed dala no sikato so agmaalwar odino ginagala ton sumlangen so sakey ed saray ley na gobierno nipaakar ed ipaliis ed disgrasya odino trapiko. (Marcos 12:14) Balet wala niray arum a nepeg a konsideraen.

Kinaukolan ya usayen so sakey ya akapatey a binmatik ed sakey ed saray syudad na salimbengan ed Israel. No naamtaan a say impakapatey et agginagala, sikato so naabuloyan a mansiansia ed syudad, ya agnakabil na manangibales na dala. (Numeros 35:6-25) Kanian no walay Kristiano a responsable ed impatey na sakey a too diad aksidente, nepeg ya usisaen na saray mamatatken iray pamaakaran pian nadetermina ra no walay agawan impankasalanan ed dala. Say kundang a gawaen na kongregasyon et agsigpot ya akadepende ed panmoria na gobierno odino desisyon na korte.

Singa bilang, nayarin say desisyon na korte et nankasalanan so sakey a too diad impakasumlang to ed sakey a ley, balet nayarin desisyonan na saray mangiimbestigan mamatatken ya anggapo so impankasalanan ed dala lapud nayarin agtanton nakontrol odino anggapoy kontrol na drayber ed saray kipapasen a nanresulta ed impatey. Balet, anggano ag-inaksionan na korte so kaso, saray mamatatken so nayarin mandesisyon a sikatoy nankasalanan ed dala.

Say desisyon na saray mamatatken a mangiimbestiga ed kaso so nepeg a nibase ed Kasulatan tan unong ed saray malinlinew ya impormasyon—say impangaksobi na drayber tan/odino say testimonya na duara odino taloran napanmatalkan a testigo. (Deuteronomio 17:6; Mateo 18:15, 16) No talagan walay agawan impankasalanan ed dala, kaukolan a pormaen so hudisyal a komite. No adetermina na komite a nagbabawi so toon nankasalanan ed dala, sikato so makaawat na manepeg a panamaat manlapud Kasulatan tan walaray restriksion ed sikato nipaakar ed saray pribilehyo ed kongregasyon. Sikato so agla makapanlingkor bilang matatken odino ministeryal a lingkor. Nayarin gawaen met so arum iran restriksion. Tan sikato so mikuentaan ed Dios lapud agto impanalwar, impamaulyan to, odino agto impanasigta a nanresulta ed aksidente tan impatey na arum.—Galacia 6:5, 7.

Pian niyilustra: No aliwan marakep so panaon sanen agawa so aksidente, say drayber so nepeg komon a nanalwar a maong. No sikato so manteglep, nepeg a sikatoy tinmunda tan nampainawan agano anggad sikatoy alerto la, odino impamaneho to la itan ed arum.

Ipasen pa a mapmaples so impanmaneho na drayber. No siopaman a Kristiano et linmampas ed nigeter a kapeles, satan so agpangiiter ed ‘saray bengatlan kien nen Cesar.’ Satan so pakapatnagan na panangibaliwala ed inkasagrado na bilay, lapud walay posibilidad a nagawa so makapatey ya aksidente. (Mateo 22:21) Nipaakar ed saya, konsideraen so sakey nin bengatla. Anton klase na alimbawa so ipapatnag na sakey a matatken ed pulok no sikato so agmaalwar ya ontutumbok ed saray reglamento na gobierno nipaakar ed trapiko odino ginagala ton sumlangen iratan?—1 Pedro 5:3.

Nepeg ya agpanaapuraen iray Kristiano ya onsabi ed sakey a pasen diad suston oras a sengegan lay pakalampas da ed kapeles ya inggeter na ley. Balet diad kaslakan a kipapasen et nakaukolan so igapon masakbay ed pambiahe odino umanen so eskedyul na sakey pian nawalaan na magenap a panaon ed pambiahe to. No onia so gawaen, agnaingganyo so Kristiano a manmaneho na maples nen say manepeg ton gawaen, noagta nayarian ton tuloken iray ley na “saray atagtagey a pakauley” na gobierno nipaakar ed trapiko. (Roma 13:1, 5) Saya so makatulong ed drayber pian napaliisan to iray makapatey ya aksidente a posiblin pakapankasalananan ed dala. Nipatnag to met so maabig ya alimbawa tan napansiansia to so maong a konsiensia.—1 Pedro 3:16.