Say Panaanap na Too ed Andi-Anggaan a Bilay

MANLAPU LA’D sankasakbayan a panaon, pirpirawat la na katooan so magnayon a bilay. Ingen, anggad natan et agni agamoran itan a pirawat lapud anggapo ni so akaromog na paraan pian naamper so ipapatey. Balet, diad agano ni, say panagsukimat ed medikal so amabiskeg na ilalo lapud posiblin talaga a parukeyen so panat na bilay na too. Imanoen pa iray nasusukayan ed nanduruman lawak na panagaral ed siensia nipaakar ed saya.

Pan-eeksperimentoan na saray biologo so kemikal a substansian telomerase lapud getma ran ninatnat ni so pamaparakel na saray selula. Amta na saray sientista a saray tinmakken tan nabubulok lan selula so naeekal tan sasalatan na balo iran selula. Diad tua et maminpigan napapasimbalo so maslak a kabiangan na laman na too legan a mabilay. Papadesiran na saray managsukimat a no ninatnat ni so proseso na panamasimbalo, “nayarian na laman na too a pasimbaloen so inkasikato ed loob na andukdukey a panaon—a magnayon ni ingen.”

Unong ed teorya, say therapeutic cloning, sakey a kontrobersial a lawak na panagsukimat, so makapawala na balo tan mipadparan tuloy iran organo na saray pasyente a singa say altey, bato, odino puso a nausar da no manpa-transplant ira. Napawala iratan a mipadparan organo manlapud saray mismon stem cell na pasyente.

Ibabaga met na saray managsukimat ed nanotechnology ya onsabi panon et saray doktor so mangusar la na saray robot a singa-kamelag na selula ya iloob ed aagusan na dala pian mananap tan maneral ed makakanser iran selula tan makapuy a bakterya. Panisiaan na arum a lapu ed sayan lawak na siensia, tan saray gene therapy, nayarian la na laman na too a tuloytuloy a tambalen so inkasikato.

Saramay mangaagamil na cryonics so mamapakigtel ed laman na inaatey. Gagawaen da itan lapud iisipen da a sano inmaligwas lan tuloy so kakabatan ed medikal, nayarian la na saray doktor a tambalen iray sakit, amperen iray epekto na itatakken, tan ipawil so bilay tan bunigas na saraman ya inaatey. Sayan paraan so tinukoy na American Journal of Geriatric Psychiatry bilang “modernon-panaon a kasimbangan na panangipreserba ed bangkay ya inagamil na saray Ehipsio nensaman.”

Say andi-tundan panaanap na too ed imortalidad et mangipatnag a mair-irap ton awaten so ideyan manampot so kiwawala to. Talaga kasin posible a nagamoran na katooan so bilay ya andi-anggaan? Anto so ibabaga na Biblia nipaakar ed saya? Ebatan iratan na onggendan ya artikulo.