Tepetepet na Saray Manbabasa

Akin ya inkuan na New World Translation diad Deuteronomio 31:2 a si Moises et “agla naabuloyan ya ompaway tan onloob” bilang pangulo na Israel, bangta ipapatnag na arum iran patalos ya agto la nayarian a gawaen itan?

Anggaman say nasusuppiat a Hebreon salita et nayarin ipatalos ed balanglan paraan, say impangipatalos na pigaran Ingles a bersion na Biblia et mangipaparungtal a diad pansamposampot lay bilay nen Moises, sikatoy maletey la ed pisikal, ya agto la sarag a gawaen iray responsabilidad to bilang pangulo. Alimbawa, inaon na The New English Bible so imbaga nen Moises bilang: “Siak so sanlasus tan duamploy taon la natan tan agko la nayarian so onkiwas unong ed labay ko.” Mipadpara, onia so ibabaga na Maung a Balita: “Sanlasus tan duamploy taon ko la natan kanian agko la nayarian so mangipangulo’d sikayo.”

Balet, ipapanengneng na Deuteronomio 34:7 ya anggano masiken lay Moises, sikatoy aliwa nin maletey. Oniay inkuan na satan: “Si Moises mantaon na sanlasus tan duamplo nen ompatey: Say mata to ag-akulabaan, nisay abawasan so gendat a kasil to.” Kanian maksil ni ed pisikal si Moises pian idaulo so nasyon, balet aglinawa nen Jehova ya itultuloy ton gawaen itan. Napaneknekan iya diad tinmumbok ya imbaga nen Moises: “Si Jehova inkuan to ed siak, Sika agka naani ombaliw ed saya so Jordan.” Mapatnag ya inulit labat nen Jehova imay ingganggan to makalanor ed saray danum na Meriba.—Numeros 20:9-12.

Andukey tan makatantanda so impanbilay nen Moises, a nayarin apagen ed taloran peryodo. Diad unonan 40 a taon, sikatoy nanayam ed Ehipto, a diman et sikatoy ‘binangatan ed amin a kakabatan na saray taga-Ehipto’ tan sikatoy “makapanyari ed saray salita tan gawa to.” (Gawa 7:20-22) Diad tinmumbok ya 40 a taon, sikatoy nanayam ed Madian. Binayuboan to diman so nakaukolan iran espiritual a kalidad pian nidaulo to iray totoo nen Jehova. Kaunoran, diad loob na 40 a taon et inggiya tan indaulo nen Moises iray Israelita. Balet natan, denesidi nen Jehova a si Josue, aliwa lan si Moises so mangidaulo ed nasyon diad ibeltang ed Ilog Jordan a mamaarap ed Insipan a Dalin.—Deuteronomio 31:3.

Kanian, susto so impangipatalos na New World Translation ed Deuteronomio 31:2. Agla nantultuloy si Moises bilang pangulo na Israel, aliwan lapud onkukulang la ed abilidad ed pisikal, noagta sikatoy agla inabuloyan nen Jehova a gawaen itan.