Saray Pabitar ed Kanta nen Solomon
Say Salita nen Jehova et Mabilay
Saray Pabitar ed Kanta nen Solomon
“SINGA sakey a lirio ed leet na saray sabit, ontan so inarok ed leet na saray anak a bibii.” “Singa say mansanas ed leet na kiewkiew ed takel, ontan so inarok ed leet na saray anak a lalaki.” “Siopa so saya ya onnengneng a singa kabuasan, malimgas a singa say bulan, malinew a singa say banwa.” (Kanta nen Solomon 2:2, 3; 6:10) Agaylan makapasagyat irayan bersikulo ed libro na Biblia a Kanta nen Solomon! Say interon libro et sakey a makabkabaliksan tan marakdakep ya anlong a tinawag bilang “sankarakpan (sankaabigan) a kanta.”—Kanta nen Solomon 1:1.
Sayan kanta, a tinibukel na Ari na Israel nensaman a si Solomon nen manga 1020 B.C.E., diad kagapo na 40 taon ya uley to, et sakey a salaysay nipaakar ed aroan na lakin managpastol tan Sulamitan probinsyana. Sinalambit met ed satan ya anlong so ina tan saray agagin lalaki na Sulamita, ‘saray anak na Jerusalem [bibiin manag-imaton ed ari],’ tan “anak a bibii na Sion [saray bibii ed Jerusalem].” (Kanta nen Solomon 1:5; 3:11) Mairap a nabidbir na sakey a manbabasa na Biblia so amin a mansasalita diad Kanta nen Solomon, balet nabidbiran ira no konsideraen tayo so ibabaga ra odino say ibabaga ed sikara.
Bilang kabiangan na Salitay Dios, makanakana so mensahe na Kanta nen Solomon lapud duaran rason. (Hebreos 4:12) Unona, ibabangat na satan ed sikatayo no anto so tuan panangaro ed baetan na laki tan bii. Komadua, say kanta so mangiyiilustra ed klase na aroan ed baetan nen Jesu-Kristo tan say kongregasyon na saray alanaan a Kristiano.—2 Corinto 11:2; Efeso 5:25-31.
AGYO SASALIEN A “LIINGEN SO AROK”
“Angoban to ak komon ed saray angob na sangi to; ta say arom sikato so magmaong nen alak.” (Kanta nen Solomon 1:2) Ginmapo so tongtongan diad Kanta nen Solomon panamegley na saratan a salita na simplin probinsyana ya inawit ed loob na tolda nen Arin Solomon. Panon so impakakar to ditan?
“Saray anak a lalaki nen inak nampasnok ira a sumpa ed siak,” kuan to. “Ginawa ra ak a managbantay ed saray kaubasan.” Nampasnok iray kuya to lapud sikato so intagar na inaro to a lakin managpastol pian manpasyar iran dua legan na makapasagyat ya agew na primabera. Pian agmakaonla, sikatoy imbaki ran man-abol na ‘saray angkelag a zorra a manederal ed ubasan.’ Satan a kimey so angiyasingger ed sikato ed kampo nen Solomon. Naimano so inkaganggana to sanen linma ed “tanamanan na saray nueces,” tan sikato so inawit ed loob na kampo.—Kanta nen Solomon 1:6; 2:10-15; 6:11.
Sanen imbesngaw na marikit so pakakailiw to la ed inaro ton managpastol, inkuan na saray bibiin manag-imaton ed ari a sikatoy ‘ompaway la ed dalan to ed saray bakat na ayayep’ pian anapen so inaro to. Balet sikatoy ag-inabuloyan nen Solomon. Imbalikas na ari so pandinayew to ed inkaganggana na marikit, ya insipan ton ikdan to na “saray laga a balitok pati saray tompok a pilak.” Balet, ag-asagyat so marikit ed saratan. Say managpastol so linmoob ed kampo nen Solomon tan aromog to so marikit, insan inkuan to: “Nia malimgas ka, inarok, on, makapaliket ka.” Saray bibiin manag-imaton ed ari so impansamba na marikit, a kuan to: “Agyo met liingen so arok, angga ed labay to.”—Kanta nen Solomon 1:8-11, 15; 2:7; 3:5.
Makasulatan Iran Tepet a Naebatan:
1:2, 3—Akin a say pakanodnonotan ed saray balikas na panangaro na managpastol et singa alak tan say ngaran to et singa larak? No panon a mamaliket ed puso na too so alak tan nainawaan so ulo no kalboan na larak, say pakanodnonotan ed panangaro na saman a laki tan say ngaran to so makapabiskeg tan makapaligliwa ed marikit. (Salmo 23:5; 104:15) Saray tuan Kristiano, nagkalautla iray alanaan, so napapabiskeg tan napapaseseg met no nonodnonoten da so panangaro ya impatnag nen Jesu-Kristo ed sikara.
1:5—Akin ya inyaliling na probinsyana so mareret a baog to ed “saray tolda na Cedar”? Say bago na kanding, a gagawaen ya abel, so walaan na dakel ya usar. (Numeros 31:20) Alimbawa, uusaren ‘iray bago na kanding’ pian ‘pantarong ed tagey na abung-abung.’ (Exodo 26:7) Singa saray tolda na Bedouin natan a gawa ed andeket a bago na kanding, saray tolda na Cedar et nayarin gawa ed ontan met a materyal.
1:15—Antoy labay ya ibaga na managpastol sanen inkuan ton: “Saray matam sikara so singa palekpek”? Say labay ya ibaga na managpastol et maulimek tan maamo iray mata na inaro to, a singara mata na saray palekpek.
2:7; 3:5—Akin ya impansamba iray bibiin manag-imaton ed ari “lapu ed saray korzo, odino lapu ed saray ulsa ed uma”? Saray korzo (gazelle) tan ulsa so kabkabat lapud makapasagyat a galaw tan inkalimgas da. Singano oobligaen na biin Sulamita iray bibiin manag-imaton ed ari panamegley na amin a bengatlan makapasagyat tan malimgas ta pian agda liingen so aro to.
Saray Leksion Parad Sikatayo:
1:2; 2:6. Nayarin matukoy so masimpit a panangibalikas na panangaro legan na piiinaroan. Balet, nepeg a tandaan na saninaro a saraya et panangipatnag na puron panamabli tan aliwan panangipatnag na marutak a liknaan, a nayarin mangitonton ed seksual ya imoralidad.—Galacia 5:19.
1:6; 2:10-15. Ag-inmabuloy iray kuya na Sulamita a sikatoy mila ed lakin aaroen to diad niyarawin pasen ed kapalandeyan aliwan lapud sikatoy sakey ya imoral odino andian na susto iran motibo. Imbes, sikaray manaalwar lambengat pian sikatoy agnidunget ed sakey a situasyon a nayarin pakatuksoan to. Say leksion parad saray saninaro et nepeg a paliisan day manbukbukor ed pribado iran pasen.
2:1-3, 8, 9. Anggaman maganggana, say biin Sulamita so mapaabeban angipasen ed inkasikato bilang ‘sakey a bolaklak na Saron [sakey a kaslakan a rosas].’ Lapud inkaganggana to tan inkamatoor to ed si Jehova, sikatoy impasen na managpastol bilang “sakey a lirio ed leet na saray sabit.” Tan panon met so paneskribe ed managpastol? Lapu ed inkataraki to, sikatoy inyaliling na Sulamita ed “sakey a korzo.” Maseguron sikato met so maespiritual tan matoor ed si Jehova. “Singa say mansanas [a mangitatarya na sirom tan prutas] ed leet na kiewkiew ed takel,” so kuan na Sulamita, “ontan so inarok ed leet na saray anak a lalaki.” Agta say pananisia tan debosyon ed Dios so maabig iran kalidad ya anapen ed sakey a magmaliw a kapareha?
2:7; 3:5. Say biin probinsyana so andian na romantikon liknaan ed si Solomon. Impansamba to met iray bibiin manag-imaton ed ari ya agda sasalien a liingen so aro ed sikato parad siopaman nilikud ed say lakin managpastol. Agnayari odino agmanepeg a sikatoy nawalaan na romantikon liknaan ed anggan siopa labat. Say Kristianon walad kasuloan a manpipilalek a mangasawa odino miasawa so nepeg a mananap lambengat na sakey a matoor a lingkor nen Jehova.—1 Corinto 7:39.
“AKIN ET ONNENGNENG KAYO ED SULAMITA?”
Wala so bengatlan “ontatatdang a manlapu ed kalawakan a singa saray seklang ya asewek.” (Kanta nen Solomon 3:6) Anto so nanenengneng na saray bibii ed Jerusalem sanen pinmaway ira? Agayla, si Solomon tan saray katambayan to so ompapawil ed syudad! Tan kaiba na ari so marikit a Sulamita.
Tinumbok na lakin managpastol so marikit tan aromog to a siansia. Lapud pinaseguroan na managpastol so marikit nipaakar ed panangaro to, imbalikas na marikit so pilalek ton ompaway ed syudad, a kuan to: “Angga ed say agew ombetel, tan saray anino ombatik, onla ak ed palandey na mira, tan ed pukdol na insenso.” Intagar na marikit so managpastol ya ‘onloob ed tanamanan to tan mangan na saray mabli a bunga na satan.’ Et inmebat so managpastol: “Linmoob ak ed tanamanan ko, agik a bii, nobyak.” Oniay inkuan ed sikara na saray bibii ed Jerusalem: “Mangan kayo, O kakaaro; oninum kayo, on, oninum kayo ed daakan, O inaro.”—Kanta nen Solomon 4:6, 16; 5:1.
Kayarin inyistorya na Sulamita so kugip to ed saray bibiin manag-imaton ed ari, oniay inkuan to ed sikara: “Mabeblay ak ed aro.” Oniay intepet da: “Anto so inarom a lalo nen say sananey ya inaro?” Et sikatoy inmebat: “Say inarok sikato so amputi tan ambalanga, a sankamanunaan ed saray samplon libo.” (Kanta nen Solomon 5:2-10) Sanen alablabas so impangirayew ed sikato nen Solomon, oniay mapaabeban ebat to: “Akin et onnengneng kayo ed Sulamita?” (Kanta nen Solomon 6:4-13) Lapud inisip na ari a pankanawnawa to lan nagamoran so panangaro na marikit, lalon inrayew to so marikit. Balet ta ag-anguman so panangaro na marikit ed lakin managpastol. Diad kaunoran et sikatoy inabuloyan la nen Solomon ya onsempet.
Makasulatan Iran Tepet a Naebatan:
4:1; 6:5—Akin et inkompara so buek na marikit ed “pulok na saray kanding”? Sayan panangikompara so mangipapatnag a masileng tan makapal so buek to a singa andeket a bago na saray kanding.
4:11—Anto so makabkabaliksan nipaakar ed ‘saray bibil na Sulamita a manimey ira a singa kulaba na dilo’ tan ‘say dilo tan gatas et wala ra ed leksab na dila to’? Mas mataway tan mas masamit so kulaba na dilo nen samay dilo a nararageman. Sayan panangikompara, ontan met ed ideyan wala ed leksab na dila na marikit so dilo tan gatas, so mangidadanet a maabig tan makapaliket iray salitan imbalikas na Sulamita.
5:12—Anto so labay ya ibaga na balikas a “saray mata to singa ra malapati ed abay na saray kulos, a nanames ira ed gatas”? Tutukoyen na marikit so marakdakep a mata na inaro to. Nayarin diad maanlong a paraan et ikokompara to so andeket a bukel na mata na inaro to ya apaliberan na amputi dia ed saray malapati a kolor-asul tan dapol a manaames ed gatas.
5:14, 15—Akin ya oniay impaneskribe ed saray lima tan bikking na managpastol? Say marikit so mapatnag a manutukoy ed saray gamet na managpastol bilang balitok a silindro tan saray kuko to bilang crisolito. Inkompara to iray bikking na managpastol ed saray “sekseklang a marmol” lapud mabiskeg tan marakdakep iratan.
6:4—Akin a say marikit et inkompara ed “Tirsa”? Sayan syudad ed Canaan so asamsam nen Josue, tan kayari na panaon nen Solomon et nagmaliw itan a primeron kabisera na samploran-tribu a panarian na Israel. (Josue 12:7, 24; 1 Arari 16:5, 6, 8, 15) “Ompatnag a talagan marakdakep so syudad,” so kuan na sakey a libro, “a satan so rason no akin a sinalambit itan dia.”
6:13—Anto so “sayaw na Mahanaim”? Sayan balikas et nayarin ipatalos met a “sayaw ed duaran kampo.” Say syudad ya inngaran ed satan so walad nibukig na Ilog Jordan ya asingger ed lawak na Jabok. (Genesis 32:2, 22; 2 Samuel 2:29) “Say sayaw na Mahanaim” et nayarin manutukoy ed sakey a sayaw a gagawaen diad satan a syudad no wala so piesta.
7:4—Akin ya inyaliling nen Solomon so beklew na marikit a Sulamita ed “ilang a garing”? Diad akadkauna et oniay impangirayew ed Sulamita: “Say tenger [odino, beklew] mo sikato so singa say ilang nen David.” (Kanta nen Solomon 4:4) Say sakey ya ilang et pandukey tan mayapis, tan say garing (ivory) et pino. Nandinayewan nen Solomon so mayapis tan makinis a beklew na Sulamita.
Saray Leksion Parad Sikatayo:
4:7. Diad impangipulisay na Sulamita ed pananagyat nen Solomon, pinaneknekan to a sikatoy maptek ed moral, anggaman ag-ayadyari. Kanian say mabiskeg a talindeg to ed moral so lalon nampaganggana ed sikato. Ontan met komon iray Kristianon bibii.
4:12. Singa say marakdakep a hardin a naalar odino abakoran, a nalooban labat diad idalan ed akatalak a wangalan, sineguro na marikit a Sulamita ya ipatnag to labat so matamoy a panangaro to ed lakin magmaliw ya asawa to. Agaylan abig ya alimbawa parad saray Kristianon lalaki tan bibii ya andian ni na asawa!
‘SAY DALANG NEN JEHOVA’
“Siopa so saya ya ontatdang a manlapu ed kalawakan, ya akasaral ed inaro to?” so intepet na saray agagin lalaki na Sulamita sanen sikatoy anengneng dan onsesempet. Nensaman et oniay inkuan na sakey ed sikara: “No sikato so sakey komon a bakor, mamaalagey itayo ed tapew to na sakey ya ilang a pilak: et no sikato so sakey komon a pinto, sikato so kapotan tayo ed saray tapi a cedro.” Lapud asubok la tan apaneknekan lan matua so panangaro na Sulamita, onia so inkuan to: “Siak sakey ak a bakor, tan saray pagew ko singa saray ilang to: diad saman wala ak ed saray mata to a singa sakey ya akaromog na kareenan.”—Kanta nen Solomon 8:5, 9, 10.
Say tuan panangaro so “dalang nen Jehova.” Akin? Lapud say ontan a panangaro et nanlapu ed si Jehova. Sikato so angiter ed sikatayo na kapasidad a mangaro. Sakey itan a dalang ya agbalot naerep. Say Kanta nen Solomon so marakdakep a mangiyiilustra ed aroan na laki tan bii a nayarin magmaliw a “mabiskeg [ag-onsaew] a singa patey.”—Kanta nen Solomon 8:6.
Ibabangat met ed sikatayo na sankarakpan a kanta nen Solomon so nipaakar ed siglaotan nen Jesu-Kristo tan saray kabiangan na mangatatawen a “nobya” to. (Apocalipsis 21:2, 9) Say panangaro nen Jesus ed saray alanaan a Kristiano et alabas ni nen say antokaman ya aroan ed baetan na laki tan bii. Saray kabiangan na nobyan klase so agnagiing ed debosyon da. Ontan met, si Jesus so maaron angiter ed bilay to parad “arum a karnero.” (Juan 10:16) Nayarian sirin ya aligen na amin a tuan managdayew so alimbawa na Sulamita nipaakar ed agmanguman a panangaro tan debosyon.
[Litrato ed pahina 18, 19]
Anto so ibabangat ed sikatayo na Kanta nen Solomon ya anapen ed sakey a magmaliw a kapareha?