Akin a Nepeg a Bidbiren No Siopa so Antikristo?

‘Nadngelan yo ya onsabi so antikristo,’ so insulat na pinuyanan ya apostol nensaman nin panaon. (1 Juan 2:18) Agaylan makapasagyat na imano iratan a salita! Diad loob na saray siglo, nanumamengan na saray totoo so kabaliksan na saratan. Siopa so antikristo? Kapigan so isabi to? Anto so gawaen to sano sinmabi la?

ANDUKERUKEY so listaan na saramay inakusaan bilang antikristo. Diad apalabas, kabiangan ed saramay tinawag ya “antikristo” et saray Judio, saray magmamaliw a papa na Katoliko, tan saray Romanon emperador.” Alimbawa, sanen denesidi nen Emperador Frederick II (1194-1250) so agmibiang ed Krusada a parad iglesia, sikatoy tinawag nen Pope Gregory IX bilang antikristo tan inekal to ed iglesia. Si Innocent IV, a sinmublay ed si Gregory, so angekal lamet ed sikato manlapud iglesia. Bilang bales, si Frederick so angiyabawag ed si Innocent IV bilang antikristo.

Si apostol Juan lambengat so managsulat na Biblia ya angusar ed salitan “antikristo.” Diad duaran sulat a ningaran ed sikato, aminliman danay a pinmatnag itan a salita, a walad porman singular tan plural. Saray bersikulon pakabasaan ed satan a salita so nidatak diad kahon a walad ontumbok a pahina. Naimano tayo ed saratan a bersikulo a say antikristo et matila tan manamalingo, a porsigidon maneral ed relasyon na too ed si Kristo tan ed Dios. Lapud satan, oniay impaseseg na apostol ed saray kapara ton Kristiano: “Inararok ira, agyo ra sisiaen so amin ya espiritu [“impuyan a balikas,” NW]; noag ingen salien yo so saray espiritu no kien ira na Dios; ta dakel ya aliwan peteg a propeta so pinmaway dia ed mundo.”—1 Juan 4:1.

Si Jesus so amasakbay met sumpad saramay manamalingo, odino palson propeta, a kuan to: “Onla ra’d sikayo a sikakawes na kawes na karnero, balet dia ed loob da sikaray lobon mangasiba. Napatnagan yo ra lapud saray bunga [odino, gawa] ra.” (Mateo 7:15, 16) Kasin pinasakbayan met nen Jesus iray papatumbok to sumpa ed piguratibon antikristo? Nengnengen tayo no panon tayon nabidbiran iyan mauge-uges a manamalikdo.