Tepetepet na Saray Managbasa

Agsinalambit na Biblia so panangitagay na iinumen (toasting), kanian akin ya ag-itan gagawaen na saray Tasi nen Jehova?

Say panangitagay ed baso na alak (odino arum niran de-alkohol ya iinumen) so abayag lan gagawaen ed nanduruman pasen, anggaman nanduruma iray paraan ed kada pasen. No maminsan et saramay mangitatagay so mangisipeg ed baso ra ed baso na arum. Say too a mangidaulo ed panangitagay so kaslakan a mangibabalikas na pampirawat to ed liket, maong a bunigas, odino andukey a pambilay na sakey a too. Ibalikas met na saramay mibiang ed panangitagay so pipakna ra odino itagey da iray baso ra insan oninum ira. Parad karaklan et singa anggapoy makapuy ed sayan kustombre odino maabig labat iyan gawaen sano walad panduroypo, balet walaray makatunongan a rason no akin ya agmibibiang iray Tasi nen Jehova ed ontan a panangitagay na iinumen.

Ingen, agkabaliksan na saya ya agpipirawaten na saray Kristiano so panliket tan maong a bunigas na arum a too. Sanen sinulat na mananguley ya ulop iray kongregasyon nen inmunan siglo, say sulat da so anampot ed saray salitan nipatalos a “maong komon so palabasen yo,” ‘lawas kayo komon a maksil,’ odino “maabig komon so kipapasen yo.” (Gawa 15:29) Tan walaray tuan managdayew ya onia so imbaga ra ed saray ari: “Say katawan ko . . . manbilay komon lawas” odino “Say ari manbilay komon a maando.”​—1 Arari 1:31; Nehemias 2:3.

Balet, iner so nanlapuan na kustombren panangitagay? Inaon na The Watchtower na Enero 1, 1968, so The Encyclopædia Britannica (1910), Tomo 13, pahina 121: “Say kustombren iyinum na sakey a baso na alak pian pirawaten so maong a bunigas parad sakey a mabilay so nayarin nanlapu ed kadaanan a relihyoson ritual ya iyinum parad dirios tan ed saray inaatey. Diad pandurungo na saray Griego tan Romano, sikara so mangiyiibung na alak bilang apay ed dirios da, tan diad saray ponsia a walaay ritual et oniinum ira parad [saray dirios] tan parad inaatey.” Onia so inyarum ni na sayan ensayklopedia: “Maapit a misiglaotan ed sarayan tatawagen a kustombren iyinum bilang sakey a klase na bagat so iyinum pian pirawaten so maong a bunigas na mabilay iran totoo.”

Kasin ontan nin siansia so kabaliksan natan? Onia so imbaga na 1995 International Handbook on Alcohol and Culture: “Nayarin [say panangitagay na iinumen] et aliwan relihyoson agamil natan a nanlapud karaanan iran panangiyapay na sagradon bengatla parad dirios: dala odino alak so kasalat na sakey a kerew, sakey a dasal a sinegek ed saray salitan ‘ondukey ni komon so bilay mo!’ odino ‘maong komon so bunigas mo!’”

Tua, agmet mankabaliksan ya aglan balot nayari parad sakey a tuan managdayew so mangusar na sakey a bengatla, desinyo, odino agamil a walaan na lapuan odino pipadpara ed uusaren na palson relihyon nensaman. Konsideraen pa so bunga na kiew a granadas (pomegranate). Oniay insalaysay na sakey a bantog ya ensayklopedia na Biblia: “Ompatnag ya inusar met nensaman so bunga na granadas bilang sagradon simbolo na saray paganon relihyon.” Anggaman kuan, impaiyan na Dios ed saloy na kawes na atagey a saserdote iray palagaygay a kinon-granadas, tan inusar met iratan bilang dekorasyon ed saray gansan lusek na templo nen Solomon. (Exodo 28:33; 2 Arari 25:17) Niarum ni, say singsing ed kasal so walaan nensaman na relihyoson kabaliksan. Ingen ta ag-amta itan na maslak ed totoo natan lapud ipapasen da labat so singsing ed kasal bilang pakapatnagan a say sakey et walaan lay asawa.

Komusta met so iyinum na alak a walaay pisiglaotan ed saray relihyoson gawa? Singa bilang, walay panaon diad Siquem a saray lalakin mandadayew ed si Baal et “linmoob ira ed abung na dirios da, tan angan ira tan inminum ira, tan inayew da si Abimelec,” ya ilalak nen Gideon. (Uko-ukom 9:22-28) Kasin mibiang ed ontan a panangitagay so sakey a matoor a lingkor nen Jehova,  ya onkerew na tulong na palson dios sumpad si Abimelec? Oniay imbaga nen Amos sanen deneskribe to so panaon a nanrebelde ed si Jehova so dakel ya Israelita: “Dinmukol ira ed abay na kada altar; tan say alak na saramay impanmulta et iinumen da diad abung na dirios da.” (Amos 2:8, NW) Kasin mibiang iray tuan managdayew ed ontan ya agamil, balanglan diad pangiyibung na alak bilang apay ed dirios odino iyinum parad satan a gagala? (Jeremias 7:18) Odino kasin mangitagey na baso na alak so sakey a tuan managdayew pian onkerew na tulong ed sakey a dios a mangontrol ed arapen na arum odino mangibalikas na pampirawat to ed maliket ya arapen na arum?

Balet makapainteres ta itatagey no maminsan na saray managdayew ed si Jehova so kalimaan da tan kekerewen da so maabig a pansumpalan. Itatagey da iray lima ra ya akaarap ed tuan Dios. Oniay nabasa tayo: “Si Solomon nanalagey ed arap na altar nen Jehova . . . tan inyunat to so lima to ya arap ed tawen: Et inkuan to, O Jehova, a Dios na Israel, anggapo so Dios a singa sika . . . ondengel ka komon ed tawen a pasen ya ayaman mo; et sano ondengel ka, perdonaen mo komon.” (1 Arari 8:22, 23, 30) Mipadpara, “si Esdras benendito to si Jehova . . . et amin a baley inmebat, Ontan pa komon, Ontan pa komon, a tekep na impangitagey da ed saray lima ra: et intuek da so saray ulo ra, tan inggalang da si Jehova.” (Nehemias 8:6; 1 Timoteo 2:8) Malinew, sarayan matoor so ag-angitagey na kalimaan da ed tawen pian kerewen so panamendisyon na sakey a dios na suwerti.​—Isaias 65:11.

Ag-ipapasen na dakel a totoo natan a say panangitagay na iinumen et sakey a paraan na ikekerew na tulong odino panamendisyon na sakey a dios, balet agda met nipaliwawa no akin ya itatagey da iray paniinuman day alak ya akaarap ed tawen. Balet agto labay ya ibaga a lapud ag-itan nipaliwawa na totoo et nayari la itan ya aligen na saray tuan Kristiano.

Singa met ed arum a pamaakaran, papaliisan na saray Tasi nen Jehova iray andawes a gagawaen na maslak a totoo. Singa bilang, walaray iyaandawes na totoo no akaarap ira ed bandira na bansa ra; saratan ya andawes et agda ipapasen bilang panangidayew. Balet, ag-iratan pibabalian na saray tuan Kristiano, nisay mibiang ira ed satan. Amta na dakel a Tasi no kapigan so nayarin kagawa na ontan a seremonya, kanian maalwar iran onkikiwas ta pian agda naopendi so arum. Diad antokaman a kipapasen, determinado iran ompaliis ed nasyonalistiko iran andawes, a sumlang ed Biblia. (Exodo 20:4, 5; 1 Juan 5:21) Natan, say panangitagay na iinumen et ag-ipapasen na dakel a totoo bilang relihyoson agamil. Balet, wala niran siansia so makatunongan a rason no akin ya agmibibiang iray Kristiano ed panangitagay, a gagawaen na relihyon nensaman, ya anggan natan et ipapasen ni ya ikekerew na panamendisyon ed ‘tawen,’ a singano kekerewen so tulong na sakey a makapanyari.​—Exodo 23:2.