Pirmi tan Manbayag ya Ot-ot

DIAD agano ni et labay a naamtaan na sakey a managsukimat no panon a naapektaan so liknaan na saramay maneermen lapud inkaandi ed bilay na inadaro ra diad ilalabas na panaon. Sikatoy angipawit na tepetepet ya eebatan ed pigaran atateng ya inateyan na ananak pigaran taon lay apalabas. Aliwan amin ya atateng et inmebat. Sakey ya ama a manngaran na Vladimir, a diad saman et limay taon lan naandi ed bilay so anak ton laki, so angipaliwawa ya agto ni sarag a pantongtongan so nipaakar ed anak to. *

Kaslakan la so onian manbayag ya ermen ed saray inateyan ya atateng. Oniay insulat nen William a samploy taon lan naandi ed bilay so 18 años ya anak ton laki lapud nalner, “Pirmi ni ot-ot a naliliknak lapud inkaandi to, tan mansiansia itan legan a mabilay ak.” Onia met so insulat nen Lucy nipaakar ed inkaandi ed bilay na anak ton laki nisengeg ed biglan impansakit to, limay taon lay apalabas: “Diad unonan pigaran agew et pipiliten kon nononoten, ‘Imposible iya.’ Say pakaliknak et singa ak labat mankukugip tan naliing ak met lanlamang. Kayari na pigaran panaon insan ko labat amoria a tudtua manaya, ya agmi lan balot nanengneng. Inatey so anak ko limay taon la so apalabas, balet no maminsan et siansian onaakis ak ni, no bukbukor ko.”

Akin a nalilikna na atateng ya inateyan, a singa di Vladimir, William, tan Lucy so ontan a pirmi tan manbayag ya ot-ot? Konsideraen tayo so pigaran rason.

Akin a Pirmi so Ermen?

Sano nianak so ugaw ed pamilya, naeksperiensya na atateng so pirmin emosyon ya agnadeskribe. Say pangampopo da labat ed melag nin anak da, pangimaton ed kakaugip to, odino say pakanengneng ed masamsamit ya imis to so panlikliketan da lan maong tan mangitarok na inkapnek ed sikara. Papablien a maong na maaron atateng iray ananak da. Ipapasal da iran mankalakal tan magmaliw a magalang. (1 Tesalonica 2:7, 11) Diad ibabaleg tan ibubulaslas na ananak da lapud sarayan sagpot, sikaray ikinon na atateng tan manisip lara na mararakep ya ilaloan ed sikara.

Mantratrabahon maong iray maasikason atateng pian nalegpet daray ananak da. Nayarin mangigagana iran naynay na kuarta odino materyal iran bengatla ta pian natulongan daray ananak da a manpamilya met ed arapen. (2 Corinto 12:14) Sayan baleg a panangipundar na emosyon, panaon, sagpot, tan kuarta so mangipapabitar ed saksakey a katuaan, salanti, papabalegen na atateng iray ananak da pian manbilay, aliwan pian  ompatey. No naandi ed bilay so ugaw, napaer so pamapabaleg ed sikato, tan naandin singa bura so amin ya uugagepen na atateng ed sikato. Naandi la imay ugaw a pangipapaliknaan day aro tan lugor, sinamsam la na ipapatey. Nagmaliw lan luang imay datin pasen na anak da ed puso ra. Saray atateng so makalikna la na pirmin ermen a mairap a naandi.

Pepekderan na Biblia a pirmin sinungdoan na saramay atateng ya inateyan so manbayag ya ot-ot. Imanoen pa no panoy impaneskribe na satan ed alikna na patriarkan si Jacob sanen nadngelan to a pinatey so anak ton si Jose: “Si Jacob pinilatpilat to so kawes to, tan angitapitapi magasal a lupot ed saray ulpo to, tan naninatey ed si anak to ed amayamay ya agew. Et amin a lalaki ya anak to tan bibii ya anak inmalagey ira a manligliwa ed sikato; balet agto ginabay so paligliwa, tan inkuan to, Ta onlasor ak naani ed Sheol ed kinen anak ko a manin-inatey.” Kalabas na pigaran taon, si Jacob so siansia nin maneermen ed anak to, ya abaloan ton inatey la. (Genesis 37:34, 35; 42:36-38) Say sakey nin alimbawa diad Biblia et say nipaakar ed matoor a biin manngaran na Noemi ya inateyan na duaran anak a lalaki. Lapud irap na linawa to, nilabay to lan salatan so ngaran ton Noemi a mankabaliksan na “Say Inkaliket Ko,” na Mara, a mankabaliksan na “Maermen.”​—Rut 1:3-5, 20, 21.

Anggaman ontan, aglabat basta bibidbiren na Biblia so ermen a nililikna na atateng. Noagta ipapanengneng met na satan no panon ya iikdan nen Jehova na biskeg iramay maneermen. Diad ontumbok ya artikulo, konsideraen tayo so pigaran dalan a say Dios so manliligliwa ed saramay maneermen.

[Paimano ed leksab]