Kasin Akapankasalanan Ka ed Masanton Espiritu?

“Wala so kasalanan a makapatey.”​—1 JUAN 5:16.

1, 2. Panon tayon amta a say sakey et posiblin makapankasalanan ed masanton espiritu na Dios?

 “NAYNAY kon pinonot ya akapankasalanan ak ed masanton espiritu.” Onia so insulat na sakey a biin taga-Alemanya, anggaman sikatoy manlilingkor la ed Dios. Talaga kasin posible a makapankasalanan so sakey a Kristiano ed masanton espiritu, odino aktibon puersa na Dios?

² On, posible so pakapankasalanan ed masanton espiritu nen Jehova. “Balang kasalanan tan panayew naperdona ed saray totoo,” so inkuan nen Jesu-Kristo, “balet say panayew sumpa ed espiritu agnaperdona naani.” (Mateo 12:31) Onia so pasakbay ed sikatayo: “No mankasalanan itayo manlapu ed linawa dia ed kayari pangawat ed pakaamta na tua, anggapo la so pankaukolan tayo na bengatlan bagat nisengeg ed saray kasalanan, noag say sakey a makapataktakot a panalagar na kaukom.” (Hebreos 10:26, 27) Tan insulat nen apostol Juan: “Wala so kasalanan a makapatey.” (1 Juan 5:16) Balet kasin samay akapankasalanan na ambelat so mandetermina no kasin sikatoy akagawa na “kasalanan a makapatey”?

Nagamoran so Panamerdona no Walay Panagbabawi

3. Anto so nayarin ipapanengneng na paneermen tayon maong ed kasalanan ya agawa tayo?

³ Si Jehova so Manangukom ed saray managgaway-mauges. On, amin tayo so mikuentaan ed sikato, tan lawas ton gagawaen so maptek. (Genesis 18:25; Roma 14:12) Si Jehova so mandetermina no kasin akagawa itayo na agnaperdonan kasalanan, tan sikato met so makapangekal ed espiritu to ed sikatayo. (Salmo 51:11) Balet, no paneermenan tayon maong so kasalanan ya agawa tayo, maseguron peteg itayon magbabawi. Ingen, anto so labay ya ibaga na peteg a panagbabawi?

4. (a) Anto so kabaliksan na panagbabawi? (b) Akin a makaligliwa iray salita ed Salmo 103:10-14?

⁴ Say kabaliksan na panagbabawi et umanen tayo so awawey tayo nipaakar ed agawa odino agawa tayo lawarin kasalanan. Kabaliksan na satan a paneermenan tayon maong odino pagbabawian tan imbeneg tayo la so makasalanan a kurang tayo. No akapankasalanan itayo na ambelat balet ta ginawa tayo laray nakaukolan a kundang ta pian nipatnag tayo so peteg a panagbabawi, naligliwa itayo ed saray salita na salmista: “Agto ginawa ed sikatayo so unong na kanepegan na saray kasalanan tayo, nisay intumang to ed sikatayo so kanepegan na saray kasulitan tayo. Ta unong a say tawen et atagey nen say dalin, ontan so kabaleg na maaron abig na linawa to ya onkana ed saraman so ontakot ed sikato. Unong na kaarawi’ letakan a manlapu ed seslekan, ontan so kaarawi angibantakan to ed saray impakasumsumpa tayo ya inekal to ed sikatayo. Unong a say sake’ya ama abageyen to so saray anak to, ontan met nen Jehova abageyen to so saray ontakot ed sikato. Ta sikato kabat to so inkagawa tayo; sikato nanodnonotan to a sapok itayo.”​—Salmo 103:10-14.

5, 6. Isalaysay so manunan punto na 1 Juan 3:19-22, tan ipaliwawa so kabaliksan na sarayan salita na apostol.

⁵ Makaligliwa met iray salita nen apostol Juan: “Dia ed saya nabidbir tayo a kien itayo na tua, tan saray kapusoan tayo apaletan ira ed arap to: Ta no say kapusoan tayo et pooten [“kondenaen,” NW] to itayo, babaleg so Dios nen say puso tayo, tan kaba’to so amin a bengatla. Inararok ira, no say kapusoan tayo et agto itayo pooten, wala so katalkan tayo ed Dios; et bengatlan kerewen tayo nagamoran tayo ed sikato, ta sumpalen tayo so saray ganggan to, tan gawaen tayo so bengatla a makapaliket ed imaton to.”​—1 Juan 3:19-22.

 ⁶ Amta tayo a ‘kien itayo na katuaan’ lapud ipapatnag tayo so inaagin panangaro tan agtayo lalamlamen so mankasalanan. (Salmo 119:11) No liknaen tayon singa akondena itayo la lapud antokaman a rason, nepeg tayon nodnonoten a “babaleg so Dios nen say puso tayo tan kaba’to so amin a bengatla.” Kakasian itayo nen Jehova lapud amta to so ‘agnaumas ya aro tayo ed agagi,’ say pipupuligesgesan tayo ed kasalanan, tan say pansasagpot tayon manggawa na linawa to. (1 Pedro 1:22) Say puso tayo so ‘agmangondena ed sikatayo’ no manmatalek itayo ed si Jehova, ipatnag tayo so inaagin panangaro, tan ag-tayo lalamlamen so manggawa na ginagalan kasalanan. Walay “katalkan tayo ed Dios” sano manpikasi itayo ed sikato, tan ebatan to itayo lapud gagawaen tayo iray ganggan to.

Nankasalanan Ira ed Espiritu

7. Anto so pakadeterminaan no kasin say kasalanan et naperdona odino andi?

⁷ Antoran kasalanan so agnaperdona? Pian naebatan iyan tepet, konsideraen tayo so pigaran alimbawa ed Biblia. Makaligliwa iraya ed sikatayo sano talagan nagbabawian tayo la iray ambelat a kasalanan tayo anggaman paneermenan tayo nin maong iratan. Natalosan tayo a say pakadeterminaan no kasin say kasalanan et naperdona odino andi et aliwan say nengneng na kasalanan ya agawa na sakey a too, noagta say motibo to, say kipapasen na puso to, tan no talaga kasin ginagala to so manggaway kasalanan.

8. Panon ya akapankasalanan ed espiritu iray Judion lider na relihyon nen inmunan siglo?

⁸ Saray Judion lider na relihyon nen inmunan  siglo a mauge-uges a sinmumpa ed si Jesu-Kristo so nankasalanan ed masanton espiritu. Naimatonan da so inkurang na masanton espiritu ed si Jesus sanen ginawa to iray milagro ya inkigalangan nen Jehova. Balet, impasen na sarayan mamubusol ed si Kristo a say pakayari to et nanlapud si Satanas a Diablo. Unong ed si Jesus, saramay mangaayew sirin ed masanton espiritu na Dios so makapanggagawa na kasalanan ya agnaperdona “diad saya a bilay, anggan dia ed bilay ya onsabi.”​— Mateo 12:22-32.

9. Anto so panangayew, tan anto so imbaga nen Jesus nipaakar ed satan?

⁹ Say ayew et salitan manamauges, makaderal, odino makapasakit. Lapud say masanton espiritu et nanlapud Dios, say pangibaga na bengatlan sumpad satan et mipadpara ed pansalita na bengatlan sumpad si Jehova. Agbalot naperdona so andiay-panagbabawin pansalita sumpad satan. Diad samay inkagawa a sengegan na impanalambit nen Jesus nipaakar ed satan a kasalanan, mabitabitar a say tutukoyen to et saramay totoo ya gagagalaen day onsumpa ed ikukurang na masanton espiritu na Dios. Saray Fariseo so makasalanan ya angayew ed espiritu lapud anengneng dan mismo so inkurang na espiritu nen Jehova ed si Jesus balet ta impasen da itan a pakayarin nanlapud Diablo. Kanian, oniay inyabawag nen Jesus: “Siopaman a mangayew sumpa ed espiritu santo anggapon balot so kaperdona to, noag ingen mankasalanan ed andi-anggaan a kasalanan.”​—Marcos 3:20-29.

10. Akin a tinawag nen Jesus si Judas ya ‘anak na kadederal’?

¹⁰ Konsideraen met so ginawa nen Judas Iscariote. Aliwan matua so kabibilay to lapud sikato so mantatakew ed kargaan na kuarta a nimatalek ed sikato. (Juan 12:5, 6) Diad saginonor et sikato so linma ed saray manuley a Judio tan intapat to si Jesus diad 30 pirason pilak. Tua a sikatoy akonsiensia tan nanermen a maong kayari na satan, balet ta agton balot nagbabawian so ginagala ton kasalanan. Kanian, si Judas so agmakanepegan a napaoli, tan sikato so tinawag nen Jesus ya ‘anak na kadederal.’​—Juan 17:12; Mateo 26:14-16.

 Ag-ira Nankasalanan ed Espiritu

11-13. Panon ya akapankasalanan si Arin David nipaakar ed si Batseba, tan panon itayon naligliwa ed impideneng na Dios ed sikara?

¹¹ Saray Kristianon angipatua la ed saray ambelat a kasalanan da tan atulongan la ed espiritual na saray mamatatken ed kongregasyon so no maminsan et nagogonigon nin siansia lapud pinonot da so apalabas ya impakasumlang da ed ganggan na Dios. (Santiago 5:14) No ontan so nalilikna tayo, seguradon nagunggonaan itayo diad pangikonsidera ed ibabaga na Kasulatan ed saramay aperdona laray kasalanan da.

¹² Ambelat so kasalanan nen Arin David nipaakar ed si Batseba, say asawa nen Urias. Anengneng ton manaames iyan magangganan de-asawan bii sanen sikatoy inmusdong manlapud tagey na abung to, kanian sikato so impaawit nen David diad palasyo to tan inakdolan to. Sanen akabatan nen David a malukon si Batseba, implano ton piakdolen ed si Batseba so asawa ton si Urias, ta pian nasakoban so impankalugoran da. Sanen agtinmalona iman a pakana, nanggaway paraan si David pian napatey si Urias diad bakal. Kayari na saman, si Batseba so nagmaliw ya asawa nen David tan nanilalak ira balet ta inatey.​—2 Samuel 11:1-27.

¹³ Inasikaso nen Jehova iyan pamaakaran nipaakar ed si David tan Batseba. Si David so pinerdona na Dios, a mapatnag a lapud inkonsidera To so impanbabawi nen David tan say impisipanan ed sikato nipaakar ed Panarian. (2 Samuel 7:11-16; 12:7-14) Mapatnag a nagbabawi met si Batseba lapud sikato so apribilehyoan a magmaliw ya ina nen Arin Solomon tan inmunan ateng nen Jesu-Kristo. (Mateo 1:1, 6, 16) No nankasalanan itayo, maabig no tandaan tayo ya iimanoen nen Jehova so panagbabawi tayo.

14. Panon a nipabitar ed biang nen Arin Manases so laknab na panamerdona na Dios?

¹⁴ Say laknab na panamerdona nen Jehova so nipatnag met ed biang nen Arin Manases na Juda. Mauge-uges so ginawa to ed imaton nen Jehova. Sikatoy angipaalagey na saray altar parad si Baal, a dinayew to so ‘amin ya ehersito diad tawen,’ tan nanggawa ni ingen na saray altar parad palson dirios diad duaran patio na templo. Inyapay to ni ingen iray ilalak to diad apoy, inlagyat to iray gawan espiritismo, tan asagyat to iray manaayam ed Juda tan Jerusalem a ‘manggawa na mas mauges nen say ginawa na saray nasyon a binagbag nen Jehova ed arap na saray anak na Israel.’ Agda dinengel iray impasakbay na saray propeta na Dios. Diad kaunoran, si Manases so dinakep na ari na Asirya. Sanen sikatoy akapangaw, si Manases so nagbabawi tan mapaabeban nampikasi ed Dios, ya amerdona met ed sikato tan angipawil ed sikato ed inkaari diad Jerusalem, a ditan to inyalibansa so tuan panagdayew.​—2 Awaran 33:2-17.

15. Anton inkagawa ed bilay nen apostol Pedro so mangipapabitar a si Jehova et mameperdona ed ‘daakan a paraan’?

¹⁵ Kayari na pigaran siglo, si apostol Pedro so akapankasalanan na ambelat sanen imburi to si Jesus. (Marcos 14:30, 66-72) Balet, si Pedro so pinerdona nen Jehova ed ‘daakan a paraan.’ (Isaias 55:7) Akin? Lapud si Pedro so petepeteg a nagbabawi. (Lucas 22:62) Mapatnag a sikato so aperdona la na Dios lapud kayari na 50 agew, diad panaon na Pentecostes et sikato so apribilehyoan a manpulong a makpel nipaakar ed si Jesus. (Gawa 2:14-36) Sirin, wala kasi so antokaman a rason pian agpanisiaan ya ontan met so pamerdona na Dios ed saray peteg a nagbabawin Kristiano natan? Oniay inkanta na salmista: “No sika, Jehova, et uninengen mo so saray kasulitan, O Katawan, siopa kasi naani makaalagey? Bangbalet wala so panamerdona ed sika.”​—Salmo 130:3, 4.

Naandi so Pakakagonigon Nipaakar ed Kasalanan

16. Anto iray nepeg tayon gawaen ta pian nagamoran so panamerdona na Dios?

¹⁶ Makatulong ed sikatayo iray asalambit lan alimbawa pian naandi so pampapaga tayo ya ompan nankasalanan itayo ed masanton espiritu. Ipapabitar na saratan a perdonaen nen Jehova iray magbabawin akapankasalanan. Importantin tuloy so masimoon a pampikasi ed sikato. No nankasalanan itayo, nayarian tayo so onkerew na panamerdona base ed dondon bagat nen Jesus, panangasi nen Jehova, lapud atawir tayon ag-inkayadyari, tan ed matoor lan impakapanlingkor  tayo ed Dios. Makapanmatalek itayo a perdonaen itayo nen Jehova lapud agkanepegan a panangasi to.​—Efeso 1:7.

17. Anto so nepeg tayon gawaen sano akapankasalanan itayo tan mankaukolan itayo na espiritual a tulong?

¹⁷ Panon to no akapankasalanan itayo balet ta ag-itayo la makapanpikasi lapud kinmapuy itayo lan maong ed espiritual? Nipaakar ed saya, oniay insulat nen babangatan a Santiago: “Mangiinagem so sakey ed sikayo? Patawag to so saray mamasiken na iglesia; tan sikato so ipikasi ra komon, a puyokan da na larak ed ngaran na Katawan. Et say pikakasi pananisia ilaban to so agmakayari, tan say Katawan bangonen to; tan no mankasalanan napaandi’ra ed sikato.”​—Santiago 5:14, 15.

18. Akin a say kasalanan na sakey a toon adispelosip ed kongregasyon et agnibagan aglan balot naperdona?

¹⁸ Anggan say sakey a diad kaplesan et agnambabawi tan adispelosip ed kongregasyon et agnibaga ya aglan balot naperdona so kasalanan to. Onia so insulat nen Pablo nipaakar ed sakey ya alanaan ya adispelosip ed Corinto lapud gawan-mauges: “Masarag la ed ontan a too so satan a dusa ya impasen day dakdakel ed sikayo. Manwarin ontan nepeg yo komon a perdonaen tan ligliwaen yo, agla piga no sayan too nalener ed alabas ya ermen to.” (2 Corinto 2:6-8; 1 Corinto 5:1-5) Balet ta pian onabig ed espiritual iray mankakasalanan, nakaukolan dan awaten so Makasulatan a tulong na saray Kristianon mamatatken tan nepeg dan ipatnag so tuan panagbabawi. Nepeg ya ipanengneng da so “bungabunga a manepeg ed pagbabawi.”​—Lucas 3:8.

19. Anto so makatulong ta pian mansiansian ‘maksil so pananisia’ tayo?

¹⁹ Antoray nayarin makasengeg no akin a nalilikna tayo a say impankasalanan tayo et sumpad masanton espiritu? Saray sengegan et nayarin say sobran inkasensitibo na konsiensia odino makapuy a bunigas tayo. Diad onian kipapasen, makatulong so pikakasi tan magenap a panagpainawa. Agtayon balot aabuloyan si Satanas a manismaya ed sikatayo, ya ontunda itayo lan manlingkor ed Dios. Lapud agpanliketan nen Jehova so ipatey na sakey a mauges, seguradon agto panliketan so ipatey na siopaman ed saray lingkor to. Kanian no natatakot itayo ya ompano akapankasalanan itayo ed espiritu, nepeg a mantultuloy itayon manaral na Salitay Dios, kabiangan laray makaligliwan bersikulo na Salmos. Nakaukolan a regular itayon miaral tan mibiang a naynay ed panangipulong ed Panarian. No gawaen tayo iraya, magmaliw itayon “maksil ed pananisia” tan agtayo napapagaan ya ompano akagawa itayo na agnaperdonan kasalanan.​—Tito 2:2.

20. Antoran panagkatunongan so makatulong ed sakey a too ta pian namoria to a sikatoy agnankasalanan ed masanton espiritu?

²⁰ Onia iray nayarin itepet na siopaman a natatakot ompano sikatoy akapankasalanan ed masanton espiritu: ‘Kasin inayew ko so masanton espiritu? Petepeteg kasi so impagbabawik ed kasalanan ko? Kasin talagan matalek ak a say Dios et manamerdona? Sakey ak kasin apostata ya angipulisay la ed espiritual a liwawa?’ Nayarin namoria na sarayan indibidual ya agda manaya inayew so masanton espiritu na Dios, nisay nagmaliw iran apostata. Sikaray magbabawi, tan lawas iran manmamatalek ed panamerdona nen Jehova. No ontan, ag-ira nankasalanan ed masanton espiritu nen Jehova.

21. Antoran tepet so ebatan ed ontumbok ya artikulo?

²¹ Agaylan bendisyon so pakaseguro ya ag-itayo akapankasalanan ed masanton espiritu! Balet no nipaakar ed masanton espiritu, walaray tepet a konsideraen tayo diad ontumbok ya artikulo. Singa bilang, nayarin itepet tayo: ‘Talaga kasin iwawanwan ak na masanton espiritu na Dios? Napapatnagan kasi ed bilay ko so bungabunga na satan?’

Anto so Ebat Yo?

• Akin a nibaga tayo a posiblin makapankasalanan so sakey sumpad masanton espiritu?

• Anto so kabaliksan na panagbabawi?

• Siopa iray nankasalanan ed espiritu sanen wadiad dalin si Jesus?

• Panon tayon natalonaan so pakakagonigon lapud iisipen tayon akagawa tayo na agnaperdonan kasalanan?

[Tepetepet Parad Panagaral]

[Litrato ed pahina 17]

Akapankasalanan ed masanton espiritu iramay angibaga a say pakayari nen Jesus a manggaway milagro et nanlapud si Satanas

[Litrato ed pahina 18]

Si Pedro so ag-akagawa na agnaperdonan kasalanan anggaman imburi to si Jesus