Kasin Walay Ag-ompatey a Kamarerwam?

Kasin laman tan dala lambengat so manutugyop ed sikatayo? Odino kasin wala ni arum a walad sikatayo nilikud ed saratan? Kasin antikey labat so bilay tayo natan insan la naandipat? Odino walay agnanengneng a kabiangan tayo a mantultuloy nin manbilay kayari ipatey tayo?

DAKEL a makapawetwet a sisiaen nipaakar ed Biek-a-bilay so pinalesa na saray relihyon ed mundo, balet maslak ed saratan so mipakna ed sayan ideya: Walay bengatla a walad loob na too ya imortal tan mantultuloy a manbilay kayari na ipatey. Panisiaan na dakel a sayan “bengatla” et say kamarerwa. Anto balet so panisiaan mo? Kasin parehon walad sikatayo so laman tan kamarerwa? Anto ta so kamarerwa? Kasin walay ag-ompatey a kamarerwa na too? Importantin tuloy ya amtaen tayo no anton talaga so inkagawa tayo!

‘Say Too Nagmaliw a Mabilay a Kamarerwa’

Kasin say “kamarerwa” et kabiangan na too ya onsian ed laman sano ompatey tan mantultuloy a manbilay? Unong ed Holman Illustrated Bible Dictionary, “say kamarerwa et mabetbet ya ipapasen a say too lanlamang.” Singa bilang, oniay ibabaga na 1 Corinto 15:45: “Say inmunan too, si Adan, nagmaliw a kamarerwan sibibilay.” Kanian si Adan et kamarerwa.

Susuportaan na arum a teksto ed Biblia so pakatalos a say salitan “kamarerwa” et say too lanlamang. Alimbawa, tinukoy na Biblia so kamarerwa a mankikimey. (Levitico 23:30) Atukoy met so kamarerwa bilang apairap, apaermen, apunaw, tan natatakot. (Uko-ukom 16:16; Job 19:2; Salmo 119:28; Gawa 2:43) Diad impanukoy ed kamarerwa bilang too, oniay ibabaga na Roma 13:1: “Ontulok komon so balang kamarerwa ed saray atagtagey a pakauley.” Tan nipaakar ed saramay angawat ed salita nen Pedro, oniay nabasa tayo: “Niarum ed saray binangatan ed saman ya agew, so ngalngalin talon libo a kamarerwa.” (Gawa 2:41) Ag-ipapatnag na sarayan teksto a say kamarerwa et sakey ya agnanengneng a persona a mantultuloy a manbilay kayari na ipatey.

Komusta balet iray ayayep tan tanaman? Kasin kamarerwa ira? Imanoen pa so imbaga na  Biblia nipaakar ed ayayep: “Mangipaakar kayo na sakey ya osos ed kinen Jehova ya iter na totoo na bakal a pinmaway a linma ed bakal: sakey a kamarerwa so alaen ed limanlasus, ed saray totoo man tan saray baka, tan ed saray asno, tan saray manada ya angkekelag ya ayep.” (Numeros 31:28) Kanian amin a mabilay a pinalsa, too man odino ayep, et kamarerwa. Saray tanaman balet so ag-atukoy diad Biblia bilang kamarerwa.

Say salitan “kamarerwa” so nausar diad sananey nin pantalos. Oniay nabasa tayo ed Job 33:22: “Say kamarerwa to onasingger ed kalinsurong, tan say bilay to ed saray managbagbag.” Inusar dia so terminon “kamarerwa” tan “bilay” bilang parehoy kabaliksan, ya impalinew a lalo na salitan “kamarerwa” so kabaliksan na salitan “bilay.” Say “kamarerwa” sirin et nayarin manukoy met ed bilay na sakey, say mabilay a kamarerwa, odino persona. Kanian oniay imbaga na Biblia nipaakar ed si Jesu-Kristo: ‘Say Anak na too et linma dia pian iter toy bilay to a panondon ed amayamay.’​—Mateo 20:28.

Simpli tan mantutunosan so inter na Biblia a kabaliksan na salitan “kamarerwa.” Satan so nayarin manukoy ed sakey a too odino ed sakey ya ayep odino ed say bilay na saray pinalsa bilang mabilay a kamarerwa. Unong a napaneknekan tayo, sayan pakatalos et mitunosan ed say ibabaga na Biblia a nagawa ed kamarerwa sano ompatey.

“Say Kamarerwa a Mankasalanan Ompatey”

Inkuan na Biblia: “Say kamarerwa a mankasalanan ompatey naani.” (Ezequiel 18:4) Say agonigon a maong a Job so angikuan a “say kamarerwak pilien to so . . . patey a lalo nen saray pukel ko.” (Job 7:15) Ontan met, sinalambit na Gawa 3:23 ya “amin a kamarerwa ya ag-ondengel . . . nabagbag naani a sigpot ed saray ombaley.” On, say kamarerwa so ompatey sano ompatey so too, tan ag-itan mantultuloy a manbilay. Kanian no inatey la so sakey a too, nibaga tayo a say kamarerwa so inatey la, lapud say too so kamarerwa.

Balet komusta iramay teksto ed Biblia a mangibabagan ompapaway tan ompapawil so kamarerwa? Nipaakar ed say agawa ed si Raquel sanen sikatoy nan-anak, oniay inkuan na Biblia: “Sanen say kamarerwa to so ompapaway (ta sikato so inatey), sikatoy inngaran to a Ben-oni; balet sikato so tinawag nen ama to a Benjamin.” (Genesis 35:18, NW) Tan nipaakar ed inkioli na samay anak a laki na balon bii, oniay imbaga na  1 Arari 17:22: “Si Jehova dinengel to so boses nen Elias [sanen nampikasi]; et say kamarerwa na ugaw pinmawil ed sikato, tan binmilay.” Kasin ipapatnag na sarayan bersikulo a say kamarerwa et sakey ya agnanengneng odino singa-anino a kabiangan na too a nayarin ontaynan odino onloob ed laman?

Tandaan a say salitan “kamarerwa” et mankabaliksan met na “bilay.” Kanian, sanen say kamarerwa nen Raquel so ompapaway, say bilay to so ompapaway. Diad tua et impatalos na arum a Biblia so balikas a “say kamarerwa to so ompapaway” bilang “nauyos so bilay to” (Maung a Balita) tan “kakauyos na linawa to.” Ontan met ed samay anak na balon bii, say bilay so pinmawil ed sikato.​—1 Arari 17:23.

No Anto so Too

Malinlinew ya ipapaliwawa na Biblia no anto so too. Sikatoy andian na kamarerwa ta sikaton mismo so kamarerwa. Lapu ed satan, antokaman ya ilalon pambilay diad arapen na saray inaatey et akadepende ed kioli ra. Insipan na Biblia: “Agkayo mankelaw ed saya, ta onsabi oras, ya amin so saray wala ed saray lubok narengel da so boses [nen Jesus], et ompaway ira, saray nanggawa na maong, nipaakar ed kioli ed bilay, bang saray nanggawa na mauges, dia met ed kioli ed bilay ed kaukom.” (Juan 5:28, 29) Satan a seguradon sipan a kikioli, aliwan say bangat ya ag-ompatey a kamarerwa, so basiyan parad peteg ya ilalo na saray inaatey.

Talagan importante so pakawalaan na suston pikakabat ed no anto so kikioli tan say kabaliksan na satan parad katooan! Makanakana met so pikakabat ed Dios tan ed Kristo, ta oniay impikasi nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Saray Tasi nen Jehova ed lugar yo so maliket ya ontulong ed sika a manaral na Biblia pian naaruman so pikakabat mo nipaakar ed Dios, ed Anak to, tan ed saray gagala To. Imbitaan mi kan mitalosan ed saray Tasi odino mansulat ka ed saray manangipalapag na sayan magasin.

[Saray litrato ed pahina 4]

Amin da et kamarerwa

[Credit Line]

Kanding: CNPC​—Centro Nacional de Pesquisa de Caprinos (Sobral, CE, Brasil)