Tepetepet na Saray Manbabasa

Antoy labay ya ibaga nen Jesus sanen imbaga ton say matoor ya aripen to et magmaliw “makabat”?

Pinalesa nen Jesus so tepet a: “Siopa sirin so matoor tan makabat ya aripen, a sikatoy impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to?” (Mateo 24:45) Say “aripen” a mangitatarya na espiritual a “tagano” et say grupo na alanaan na espiritu iran Kristiano. Akin a sikaray tinawag nen Jesus a makabat? *

Natalosan tayon maong manlapud mismon imbangat nen Jesus no antoy labay ton ibaga ed salitan “makabat.” Alimbawa, sanen sinaglawi nen Jesus so “matoor tan makabat ya aripen,” inter to so parabolo a nipaakar ed samploran mamarikit odino birhen a manatalaran ed isabi na nobyo. Irerepresenta na mamarikit iray alanaan a Kristiano sakbay na 1914 a malikeliket a nanalagar ed isabi nen Jesu-Kristo, say matalonggaring a Nobyo. Diad saramay samploran mamarikit, limara so kinmulang na larak sanen sinmabi so nobyo, kanian ag-ira akapibansal. Saramay nakekeraan a limara balet et pinaneknekan dan sikaray makabat, ta tinaryaan day inkasikara na magenap a larak, diad ontan et sikaray tuloy-tuloy a nanliwawa sanen sinmabi so nobyo, kanian sikaray inabuloyan a mibansal.​—Mateo 25:10-12.

Sanen ginmapon nanuley si Jesus ed Panarian to nen 1914, dakel ed saramay alanaan a Kristiano so maniilalon sikaray mankapiulop ed sikaton tampol ed tawen. Balet, dakel ni so kimey a kaukolan dan gawaen diad dalin, tan arum ed sikara so ag-akaparaan. Singa saramay agmakabat a mamarikit, atrasado ran pinabiskeg so espiritualidad da, kanian ag-ira akaparaan a mantultuloy a manangakbibit na liwawa. Balet, maslak ed sikara so kinmiwas a makabat tekep na karunongan tan inkatudio, tan sikaray apabiskeg a maong ed espiritual. Sanen naamtaan dan dakel ni trabahoen da, sikara so magayaga tan desididon manumpal ed satan. Kanian, pinaneknekan dan sikaray “matoor tan makabat ya aripen.”

Isipen pa met so impangusar nen Jesus ed salitan “makabat” ed Mateo 7:24. Inkuan to: “Ganagana sirin a makadngel na saraya a salita, et sumpalen to ra, sikato niulibay ed sakey a toon makalakal [“makabat,” NW], ya impaalagey toy abung to ed tapew na baton dampay.” Say makabat odino makalakal a too so angipaalagey na malet ya abung pian paraanay onsabi iran bagyo. Bangbalet, say andi-kalakal so angipaalagey ed buer tan nagbay abung to. Kanian, say makabat a patumbok nen Jesus et samay toon natetebek toy makapuy iran pansumpalan na panumbok ed kakabatan na too. Say pakatebek tan inkamaisip to so rason no akin ya ibabase ton maong so pananisia, saray desisyon, tan bangabangat to ed imbangat nen Jesus. Ontan met so gagawaen na “matoor tan makabat ya aripen.”

Imanoen pa met so inkausar na salitan “makabat” ed dakel iran bersion na Hebreon Kasulatan. Singa bilang, si Jose so tinuro nen Faraon a mangasikaso ed abaston tagano na Ehipto. Kabiangan iya na uksoyan nen Jehova pian taryaan na tagano iray totoo to. Balet, akin a si Jose so apili? Oniay inkuan nen Faraon ed sikato: “Anggapon balot so maisip tan marunong a singa sika.” (Genesis 41:33-39; 45:5) Mipadpara, ibabaga na Biblia a si Abigail et “makatalos a maong.” Sikatoy angiter na tagano ed say nilanaan nen Jehova, a si David, tan saray bataan to. (1 Samuel 25:3, 11, 18) Si Jose tan Abigail so natawag a makabat lapud atebek da no antoy linawa na Dios tan kinmiwas ira tekep na inkatudio tan inkamaisip

Kanian, sanen deneskribe nen Jesus a say matoor ya aripen et makabat, ipapabitar to a saramay irerepresenta na satan ya aripen so mangipatnag na pakatebek, inkatudio, tan inkamaisip lapud say pangibabasian day pananisia, saray desisyon, tan bangabangat da et say Salita na Dios a katuaan.

[Paimano ed leksab]