Gegemtanen so Makabkabaliksan a Gagala na Bilay

“Amin a bengatla a wala so panlinlinawa to idayew to si Jehova.”​—SALMO 150:6.

1. Deskribien so panaanap na sakey a malangwer a laki ed gagala na bilay.

 “NANARAL ak na medisina ta labay kon usaren so bilay ko pian tulongan so totoo. Iisipen ko met a magmaliw ak a maliket ta marakdakep so propesyon ko tan baleg so naaalmok bilang doktor.” Ontan so imbalikas nen Seung Jin, a binmaleg ed Korea. * “Adismaya ak sanen amoriak a melmelag manaya so naitulong na sakey a doktor. Kanian nanaral ak ni na sakey a kurso bilang pintor, balet ta saray ipipintak et agtanto makagunggona ed arum, tan liknaen kon masiblet ak ta say dilik labat so napapaliket. Nagmaliw ak a maestro, balet naimanok ed saginonor ya impormasyon lambengat so ninanabang ko imbes a panangigiya, a saya so manresulta komon ed tuan liket.” Singa met ed dakel a totoo, aanapen nen Seung Jin so makabkabaliksan a gagala na bilay.

2. (a) Antoy kabaliksan na pakawalaan tayo na gagala ed bilay? (b) Panon tayon naseguro a say Manamalsa et walaan lay gagala sanen inyan to itayo diad dalin?

² No walaan itayo na tuan gagala na bilay, walaan itayo na rason pian manbilay. Walaan itayo met na malinew a kalat a napangiteenan tayo na saray sagpot tayo. Nawalaan kasi so totoo na ontan a gagala? On! Lapud walay intelihensia, konsiensia, tan abilidad tayon mankatunongan, a saratan so paneknek a walaan na maabig a gagala so Manamalsa diad impangiyan to ed sikatayo diad dalin. No ontan sirin, naromog tan nadampot tayo so tuan gagala tayo diad pambilay lambengat a mitunosan ed gagala na Manamalsa.

3. Anto so lalanoren na gagala na Dios ed totoo?

³ Ipaparungtal na Biblia a dakel a bengatla so lalanoren na say gagala na Dios ed sikatayo. Alimbawa, say makapakelaw ya inkagawa tayo et pakapatnagan na petepeteg a panangaro na Dios ed sikatayo. (Salmo 40:5; 139:14) Kanian say pambilay unong ed gagala na Dios et mankabaliksan ya ipatnag tayo so petepeteg a panangaro ed arum a singa pangipapatnag na Dios. (1 Juan 4:7-11) Lalanoren met na satan so pangunor ed saray bilin na Dios, ya ontulong ed sikatayo pian makapambilay itayo a mitunosan ed maaron gagala to.​—Eclesiastes 12:13; 1 Juan 5:3.

4. (a) Antoy kaukolan tayon gawaen pian nawalaan na peteg a gagala so bilay tayo? (b) Anto so sankaabigan a gagala a nagegemtan na sakey a too?

 ⁴ Gagala met na Dios a say totoo et manbilay a maliket tan walay kareenan ed limog da tan ed arum nin pinalsa. (Genesis 1:26; 2:15) Balet, anto so kaukolan tayon gawaen pian magmaliw itayon maliket, maligen, tan walay deen na nonot? No panon a kaukolan na sakey a melag ya ugaw a nalikna so kiwawala na atateng to pian magmaliw a maliket tan maligen, kaukolan met a nawalaan itayo na maabig a relasyon ed mangatatawen ya Ama tayo pian naromog tayo so tuan kabaliksan tan gagala na bilay. (Hebreos 12:9) Posiblin nawalaan itayo na ontan a relasyon lapud aabuloyan itayo na Dios ya onapit ed sikato tan dedengelen to iray pikakasi tayo. (Santiago 4:8; 1 Juan 5:14, 15) Say ‘pankurang a kaibay Dios’ tekep na pananisia tan pagmaliw a kaaro to so mamaliket tan kirayewan to bilang say mangatatawen ya Ama tayo. (Genesis 6:9, NW; Uliran 23:15, 16; Santiago 2:23) Satan la so sankaabigan a gagala a nagegemtan na sakey a too. Oniay insulat na salmista: “Amin a bengatla a wala so panlinlinawa to idayew to si Jehova.”​—Salmo 150:6.

Anto so Gagala na Bilay Mo?

5. Akin ya aliwan makabat so pangiyuna ed panag-anap na materyal iran bengatla?

⁵ Gagala met na Dios ed sikatayo ya asikasoen tayon maong so mismon bilay tayo tan saray pamilya tayo. Kabiangan ed saya so pangasikaso ed saray pisikal tan espiritual a pankaukolan tayo. Balet nakaukolan dia so inkasimbang ta pian agnatabonan na sekular iran interes tan kapagaan iray bengatlan mas importante, saray espiritual a pamaakaran. (Mateo 4:4; 6:33) Makapaermen ta iteteen na dakel a totoo so intero lawarin bilay da diad panag-anap na saray materyal. Ingen, say pamenek ed amin a pankaukolan tayo diad panamegley lambengat na materyal et aliwan makabat. Ipaparungtal na agano nin impansurbi ed saray milyonaryo diad Asia a dakel ed sikara so “aliwan maligen tan manaaburido, anggaman dederlengen ira na totoo tan ed saray nagagawaan da lapud kayamanan da.”​—Eclesiastes 5:11.

6. Anto so insimbawa nen Jesus ed saramay manggegemtan na kaykayamanan?

⁶ Sinalambit nen Jesus so nipaakar ed “panamalingo na saray kayamanan.” (Marcos 4:19) Panon a manamalingo iray kayamanan? Nayarin isipen na sakey a too a mamaliket iratan ed sikato, balet ta diad tua et andi. Oniay inkuan na makabat ya Arin Solomon: “Say mangaro ed pilak agnapesel ed pilak.” (Eclesiastes 5:10) Posible kasin napanbansag so pangegemtan na materyalistiko iran kalat tan panlingkor ed Dios ed interon-kamarerwa? Andi, imposible itan! Impaliwawa nen Jesus: “Anggapoy too a makapanlingkor ed duaran katawan: ta balangla a gulaen to so sakey et aroen to so sananey; ono andi mansiansia ed sakey et balawen to so sananey. Agyo nayarian so manlingkor ed Dios tan saray kayamanan.” Pinaseseg nen Jesus iray patumbok to ya aliwan saray kayamanan diad dalin so tiponen da, noagta saray ‘kayamanan ed tawen,’ salanti, manggawa ira na maong a ngaran ed Dios, a sikatoy ‘makaamta ed antokaman a kaukolan tayo ed arapen a mankerew tayo ed sikato.’​—Mateo 6:8, 19-25.

7. Panon tayon ‘nabembenan so bilay a peteg’?

⁷ Sanen sinulat nen apostol Pablo so kakimeyan ton si Timoteo, sikatoy mapuersan animbawa nipaakar ed panggegemtan ed kaykayamanan. Oniay inkuan to’d si Timoteo: “Dia ed saray mangayaman dia ed mundo, ibilin mo ed sikara ya . . . agda met igaton so ilalo ra ed saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo. . . , a managpalangkap ira, a mainomay iran mangiter. A mantipon ira na nipaakar ed sikara ed sakey a maabig a pangiletnegan a niparaan ed panaon ya onsabi, pian nabembenan da so bilay, a sikato so bilay a peteg.”​—1 Timoteo 6:17-19.

Anto so “Bilay a Peteg”?

8. (a) Akin a dakel so manpipirawat na kaykayamanan tan inkaprominente? (b) Anto so agnamomoria na saratan a totoo?

⁸ Iisipen na maslak a totoo a say “bilay a peteg” et sakey a mainawa tan maliket a bilay. Oniay inkuan na sakey a peryodiko diad Asia: “Saramay manbabantay na saray pelikula odino TV so makakaaral a manpilalek ed bengatlan  nanenengneng da tan manpirawat ed bengatla a labay dan niwala ed sikara.” Dakel a totoo et gagawaen dan kalat ed bilay da so pakagamor na kaykayamanan tan inkaprominente. Dakel so mangisasakripisyo ed kabiskegan da, bunigas da, bilay na pamilya ra, tan prinsipyo na Dios, pian nagegemtan labat iratan. Dagdaiset so makakamoria a saray ipaparungtal na media et pakapatnagan na “espiritu na mundo”​—say manunan awawey na kanonotan a mangiimpluensya ed binilyon a totoo tan manasagyat ed sikara ya onkiwas a sumlang ed say gagala na Dios ed sikatayo. (1 Corinto 2:12; Efeso 2:2) Agpankelawan a dakdakel so totoo natan ya aliwan maliket!​—Uliran 18:11; 23:4, 5.

9. Anto so agbalot nagawaan na totoo, tan akin?

⁹ Komusta balet iramay mabulbulos a mansasagpot parad pankaabigan na arum, a manggugunaet a mamaandi ed eras, sakit, tan ag-inkahustisya? Dakel a totoo so nagugunggonaan ed maabig tan masakripisyon pansasagpot da. Ingen, anggaman ed sankaabigan laran sagpot da, agdan balot napatunong tan naparakep iyan sistema na bengabengatla. Akin? Lapud diad tua et ‘say sankamundoan so walad silong na pakauley na samay mauges’​—si Satanas​—tan agto labay a nauman itan.​—1 Juan 5:19, Maung a Balita.

10. Kapigan so pakaeksperiensya na matoor iran totoo ed “bilay a peteg”?

¹⁰ Agaylan makapaermen no say paniilaloan labat na sakey a too et say bilay ed sayan peles a mundo! “No say ilalo tayo’d Kristo et diad sayan bilay labat, sikatayo lay pangaskasian ed amin a katooan,” so insulat nen Pablo. “Mangan tan oninum itayo, ta nabuas ompatey itayo” so awawey na saramay manisia ya onia labat iyan bilay. (1 Corinto 15:19, 32, Maung a Balita) Balet wala so arapen tayo, ya “unong ed sipan [na Dios] alagden tayo so saray tawen a balo tan dalin a balo, a sikara so panaayaman na katunongan.” (2 Pedro 3:13) Diad satan a panaon, saray Kristiano so makapanggayaga ed “bilay a peteg,” salanti, say ayadyarin “bilay ya andi-angga,” balanglan diad tawen odino diad silong na maaron pananguley na Panarian na Dios!​—1 Timoteo 6:12.

11. Akin a makabkabaliksan so pansagpot a suportaan so intereses na Panarian na Dios?

¹¹ Say Panarian na Dios lambengat so sigpot a makaresolbe ed saray problema na katooan. Say pansagpot a suportaan so intereses na Panarian  na Dios et talagan makabkabaliksan a kimey a nagegemtan na sakey. (Juan 4:34) Legan itayon mibibiang ed satan a kimey, napanggayagaan tayo so mablin relasyon ed mangatatawen ya Ama tayo. Nalikna tayo met so liket ed panlingkor a kaibay minilyon ya agagi tayo ed espiritual, a mangegemtan ed parehon gagala na bilay.

Manggawa na Dugan Panagsakripisyo

12. Anto so pandumaan na say bilay ed sayan peles a sistema tan say “bilay a peteg”?

¹² Ibabaga na Biblia a sayan peles a mundo et “mangangga, tan saray penel to.” Anggapo so kabiangan na mundo nen Satanas a nipuera ed kadederal, anggan say inkabantog tan kaykayamanan na satan, “sabalet so mangunor ed linawa na Dios onsiansia lawas.” (1 Juan 2:15-17) Aliwan singa say panduaruwaan iran kayamanan, agmanbayag ya inkabantog, tan ataptapew a likeliket ed sayan peles a sistema, say “bilay a peteg,” salanti, say bilay ya andi-anggaan diad silong na Panarian na Dios​—so agbalot mangangga tan alay abig itan a tumang ed pansasakripisyo tayo, daput no duga iratan a panagsakripisyo.

13. Panon a nanggawa na dugan panagsakripisyo so sakey a sanasawa?

¹³ Konsideraen pa si Henry tan si Suzanne. Mabisbiskeg so pananisia ra ed sipan na Dios a tulongan To so amin a mangiyuuna ed Panarian To diad bilay da. (Mateo 6:33) Kanian, denesidi na sayan sanasawa so manayam ed simplin ayaman ta pian mas dakel so panaon da ed espiritual iran aktibidad a kaibay duaran ananak dan bibii, imbes a mantrabaho iran dua. (Hebreos 13:15, 16) Satan a desisyon da so agnatalosan na sakey a kaaro ra ya ompatnag a walaay maabig ya intension. Oniay inkuan to ed si Suzanne: “Amiga, no talagan labay moy manayam ed mas marakep ya abung, kaukolan a walay isakripisyom.” Balet amta nen Henry tan Suzanne a say pangiyuna ra ed si Jehova et ‘walaan na sipan na sayan bilay a peles, tan say onsabi.’ (1 Timoteo 4:8; Tito 2:12) Binmaleg iray ananak da bilang maseseg a sigpot-panaon a managpulong. Momoriaen dan sankapamilyaan ya anggapo so bengatlan asaew da; imbes, nagugunggonaan iran maong diad panggegegemtan da ed “bilay a peteg” bilang kalat da.​—Filipos 3:8; 1 Timoteo 6:6-8.

‘Agyo Aagamilen ya Alablabas so Mundo’

14. Antoray makapasinagem a pansumpalan no lingwanan tayo so tuan gagala na bilay tayo?

¹⁴ Balet, wala so talagan kapeligroan no lingwanan tayo so tuan gagala tayo tan agtayo la gegemtanen so “bilay a peteg.” Ipepeligro tayoy inkasikatayo a ‘nalener ed kapagaan tan kayamanan tan likeliket ed saya a bilay.’ (Lucas 8:14) Say agnapokpokan iran pilalek tan “saray kapagaan ed sayan bilay” et nayarin manresulta ed kigalet ed sayan sistema na bengabengatla. (Lucas 21:34) Makapaermen ta arum so akalotan ed kasmak a pilalek ya onyaman tan “abalbalang ira ed pananisia, tan atalos ira na dakel a kaermenan,” a naandi ni ingen so mablin relasyon da ed si Jehova. Agaylan makapasinagem a resulta na agpansiansian ‘akabemben ed andi-anggaan a bilay’!​—1 Timoteo 6:9, 10, 12; Uliran 28:20.

15. Panon ya agunggonaan so sakey a pamilya diad agda ‘impangagamil ya alablabas ed mundo’?

¹⁵ Binilin nen Pablo ‘iramay mangaagamil ed mundo ya agda komon aagamilen itan ya alablabas.’ (1 Corinto 7:31) Impapuso iya nen Keith tan si Bonnie. Oniay insalaysay nen Keith: “Nagmaliw ak a Tasi nen Jehova sanen magano ak lan nasumpal ed kursok a dentista. Walay napampilian ko. Sarag koy mangawat na dakel a pasyente pian makalmo ak na dakel a kuarta, balet ta amperen na satan so panlilingkor ko ed Dios. Denesidik so agmangawat na dakel a pasyente ta pian mas malaglaem so panaon ko parad espiritual tan emosyonal a pankaabigan na pamilyak, a diad saginonor et nagmaliw a limaran amin so ana’ko a bibii. Anggaman mataltalag a walay malaem a kuarta mi, naaralan mi so manggimper, tan naynay met a naaala mi iray talagan nakaukolan mi. Maap-apit so ulopan na pamilya mi, a maligligsa tan malikeliket kami. Amin mi so awalaan na pankanawnawan manlingkor a sigpot-panaon. Natan et malikeliket iray ana’ko ed kaasawaan da, a talora ed sikara so walaan met la na dilin ananak. Malikeliket met so pamilya ra lapud manunaan lawas ed sikara so gagala nen Jehova.”

 Iyuna Yo ed Bilay Yo so Gagala na Dios

16, 17. Sioparay asalambit ed Biblia a totoon walaan na talento, tan panon iran nanonodnonotan?

¹⁶ Walaray alimbawa diad Biblia nipaakar ed saramay nambilay tan agnambilay unong ed gagala na Dios. Saray leksion manlapud saratan ya alimbawa so onaplika ed amin a totoo antokaman so edad da, kultura ra, tan kipapasen da. (Roma 15:4; 1 Corinto 10:6, 11) Singa bilang, si Nimrod et angipaalagey na angkakabaleg a syudad, balet ginawa to itan bilang isusumpa ed si Jehova. (Genesis 10:8, 9) Saray arum ni balet et maabig ya alimbawa. Singa bilang, si Moises et agto ginawan kalat ed bilay to so pamasiansia ed atagey a posisyon to bilang sakey a dederlengen ed Ehipto. Imbes, impasen to a saray espiritual a pribilehyo to et ‘balbaleg a kayamanan nen saray kayamanan na Ehipto.’ (Hebreos 11:26) Nayarin si doktor a Lucas et tinmulong ed si Pablo tan arum nira pian onabig ed sakit da. Balet mas abalbaleg so nitulong nen Lucas bilang sakey ya ebanghelisador tan managsulat na Biblia. Nipaakar balet ed si Pablo, sikato so akabkabat a sakey a misionaryo, ya ‘apostol na saray Gentiles,’ aliwan bilang eksperto ed Ganggan.​—Roma 11:13.

¹⁷ Si David so mas nanodnonotan, aliwan bilang komander na militar nisay sakey a managtogtog tan managtibukel na kanta, noagta bilang “laki ya unong ed dili a puso [na Dios].” (1 Samuel 13:14) Kabkabat tayo si Daniel lapud impanlingkor to bilang matoor a propeta nen Jehova, aliwan lapud kimey to bilang opisyal ed gobierno na Babilonia; si Ester, bilang ehemplo na inkakpel tan pananisia, aliwan bilang reyna na Persia; si Pedro, Andres, Santiago, tan Juan bilang apostoles nen Jesus, aliwan bilang maong a managsigay. Tan say sankatalonggaringan et si Jesus a mismo, a bibidbiren tayo bilang “Kristo,” aliwan bilang “karpentero.” (Marcos 6:3, NW; Mateo 16:16) Natatalosan a maong na sarayan amin ya antokaman so talento, kaykayarian, odino posisyon a nanggayagaan da, say bilay da et nepeg ya akasentro ed panaglingkor ed Dios, aliwan diad sekular a trabaho ra. Amta ra a say sankaabigan a gagala a pakagamoran da na baleg a tumang et say pagmaliw dan matakot ed Dios.

18. Panon a denesidi na sakey a Kristianon kalangweran no antoy pangusaran to’d bilay to, tan anto so amoria to?

¹⁸ Ontan met so amoria nen Seung Jin, ya asalambit diad gapo. “Imbes ya iyupot koy biskeg ko ed medisina, panagpinta, odino panagbangat, denesidik ya usaren so bilay ko a mitunosan ed dedikasyon ko ed Dios,” so impaliwawa to. “Manlilingkor ak natan ed lugar a baleg so pankaukolan ed saray managbangat na Biblia, ya ontutulong ak ed totoo a makaromog ed dalan ya ompugta ed bilay ya andi-anggaan. Iisipen ko nensaman ya agtanto makapaangat so bilay na sakey a manlilingkor a sigpot-panaon. Balet natan et mas makapaangat so bilay ko, legan kon panggugunaetan a paaligwasen so personalidad ko tan say abilidad kon mangibangat ed totoon nandurumay kultura ra. Namomoriak a magmaliw lambengat a makabkabaliksan so bilay tayo no mitunosan so gagala tayo ed gagala nen Jehova.”

19. Panon tayon naromog so tuan gagala na bilay?

¹⁹ Sikatayoran Kristiano so akaawat na manangiliktar-bilay a pikakabat tan ilalon nilaban. (Juan 17:3) Komon ta agtayo “awaten so grasya na Dios ed andi-kakanaan.” (2 Corinto 6:1) Imbes, usaren tayo iray mablin agew tan taon na bilay tayo pian idayew si Jehova. Inabang tayo ed totoo so pikakabat a mangitarok na tuan liket natan tan mangitonton ed bilay ya andi-anggaan. Diad panggawa ed satan, naeksperiensya tayo so katuaan na saray salita nen Jesus: “Lalo a mapalar so mangiter nen say mangawat.” (Gawa 20:35) Diad ontan et naromog tayo so tuan gagala na bilay.

[Paimano ed leksab]

Kasin Nipaliwawa Yo?

• Anto so sankaabigan a gagala a nagegemtan tayo ed bilay?

• Akin ya aliwan makabat so manbilay diad gagalan mananap na materyal?

• Anto so “bilay a peteg” ya insipan na Dios?

• Panon tayon nausar so bilay tayo a mitunosan ed gagala na Dios?

[Tepetepet Parad Panagaral]

[Saray litrato ed pahina 18]

Nakaukolan a manggawa na dugan panagsakripisyo iray Kristiano