“Say Pilak Kayarian Ko, say Balitok Kayarian Ko”

NEN komanem a siglo B.C.E., imbulos na Ari na Persia a si Ciro iray totoo na Dios manlapud impakautibo ra ed Babilonia. Nilibo ed sikara so pinmawil ed Jerusalem pian mangipaalagey lamet ed templo nen Jehova, a diad saman et aderalderal. Kibangkibang so pinansyal a kipapasen na saraman a pinmawil, tan susumpaen ni kabangibang iran nasyon so pampapaalagey da. Kanian panduaruwaan na arum ed saramay mankikimey no kasin nasumpal da ni iman ya abalbaleg a proyekto ra.

Panamegley nen propeta Aggeo, pinaseguroan nen Jehova iramay mamapaalagey a Sikatoy wala ed sikara: “Panmayegmegen ko naani so saray amin a nasyon: et saray mabli a bengatla na saray amin a nasyon onsabi ra naani; et panoen ko naani so sayan abung ed gayaga,” so inkuan na Dios. Nipaakar ed kapagaan da ed pinansyal, oniay mensahen impasabi nen Aggeo: “Say pilak kayarian ko, say balitok kayarian ko, kuan nen Jehova.” (Aggeo 2:7-9) Diad loob labat na limay taon kayarin imbaga nen Aggeo iraya, asumpal imay proyekto ra.​—Esdras 6:13-15.

Saray salita nen Aggeo so mamapaseseg met ed saray lingkor na Dios diad sarayay agano nin panaon sano walaray angkabaleg a proyekto ra parad panagdayew ed si Jehova. Nen 1879, sanen inggapo na matoor tan makabat ya aripen a klase so pangipalapag ed sayan dyurnal a tinawag nensaman a Zion’s Watch Tower and Herald of Christ’s Presence, walay onian akasulat ditan: “Manisia kamin say manusuporta ed ‘Zion’s Watch Tower’ et si JEHOVA, tan lapud satan, agbalot iya mipayabol odino mikasi ed totoo parad suporta. No Saman a mangibabagan: ‘Amin a balitok tan pilak na palandey et kien ko,’ et agla mangitarya na nakaukolan iran pundo, natalosan mi a panaon la pian itunday pangipapalapag ed satan.”

Agbalot tinmunda so pangipapalapag ed satan a publikasyon. Diad samay unaan a paway et walay niimprintan 6,000 a kopya, a diad Ingles labat. Natan, say aberids a bilang na niimprinta ed kada isyu et 28,578,000, diad 161 a lenguahe. * Sabalet so Awake!, a paris na Say Panag-Bantayan et walay aberids a niiimprinta a 34,267,000 a kopya, diad 80 a lenguahe.

Dakel so proyekto na saray Tasi nen Jehova a say gagala da et mipadparad Say Panag-Bantayan, salanti, say pangitandoro ed si Jehova bilang Soberanon Katawan ed Uniberso tan say pangiyabawag ed maong a balita nipaakar ed Panarian to. (Mateo 24:14; Apocalipsis 4:11) Say kombiksion na saray Tasi natan et mipara ed say nibesngaw ed sayan dyurnal nen 1879. Manisia iran say Dios so manusuporta ed kimey da, sirin et seguradon nitarya iray pundo parad saray proyekton aabobonan to. Balet, panlalapuan kasi pundo na saray Tasi nen Jehova a gagastosen da ed saray kimey da? Tan antoran proyekto so gagawaen da pian nipulong so maong a balita ed sankamundoan?

Panlalapuay Gagastosen ed Kimey?

Sano manpupulong iray Tasi nen Jehova ed publiko, mabetbet la ran natetepetan na, “Walay sueldo yo?” Say ebat et ag-ira suesueldoan. Iiter dan libre so panaon da. Uusaren na sarayan managpulong so dakel a panaon da pian itongtong ed arum so nipaakar ed si Jehova tan say sipan na Biblia a maabig ya arapen, lapud papakiwasen ira na apresasyon da. Papablien da so ginawa na Dios parad sikara tan say inaligwasan lay bilay da tan panmoria ra ed bengabengatla lapud sayan mensahe. Kanian labay da met ya inabang irayan maabig a bengatla ed arum. Diad panggagawa ra ed satan, tutumboken da so prinsipyon imbaga nen Jesus: “Andi bayar ya inawat yo, andibayar met ya iter yo.” (Mateo 10:8) On, say pilalek dan tasian si Jehova tan si Jesus so mamapakiwas ed sikaran  manggastos manlapud dili ran bulsa pian ninabang ed totoo so sisiaen da, anggan diad saramay ararawi panaayaman da.​—Isaias 43:10; Gawa 1:8.

Lapud inkalaknab la na sayan panagpulong a kimey tan ed saray paraan ya uusaren pian napalaknab ni itan​—saray imprintaan, opisina, Assembly Halls, ayaman na misionaryo, tan arum nira​—et kaukolan so baleg a gastos. Iner so panlalapuan na kuarta? Say gagastosen ed sarayan amin et manlalapud boluntaryo iran kontribusyon. Ag-oobligaen na saray Tasi nen Jehova iray kaagian da a mangiter na kuarta pian nasuportaan iray kimey na organisasyon da, tan agda met pababayaran iray ibubunog dan publikasyon. No walay malabay a mandonasyon pian nasuportaan so panagbangat a kimey da, maliket iray Tasi a mangawat ed satan. Natan, pantongtongan tayo pa so sakey labat ed saray paraan a gagawaen na saray Tasi pian nipulong ed sankamundoan so maong a balita, salanti, say panagpatalos.

Saray Publikasyon ed 437 a Lenguahe

Diad dakel lan taon, saray publikasyon na saray Tasi nen Jehova so sakey ed saray nipapatalos ed sankarakelan a lenguahe ed interon mundo. Saray angkelag a babasaen, brosyur, magasin, tan libro ra et nipapatalos la ed 437 a lenguahe. Siempre, singa say arum met iran kimey a misiglaotan ed panangipulong ed maong a balita, mankaukolan na baleg a pundo so panagpatalos. Anto ta’y nalalanor ed proseso na panagpatalos?

Sano asumpal la na saray editor ed saray publikasyon na saray Tasi nen Jehova so sakey ya artikulon Ingles, satan so ipawit ed ulop na saray impapasal a managpatalos ed interon mundo panamegley na Internet. Diad kada lenguahen pangipapatalosan ed sarayan publikasyon, walay mankikimey a sakey ya ulop na managpatalos. Say bilang na membro na kada sakey ed saratan et 5 anggad 25, depende ed karakel na ipapatalos da tan ed inkakomplikado na lenguahen pangipapatalosan da.

Insan tsiken tan danayen a basaen imay artikulon nipatalos. Say kalat da  et nipasabi so mensahe na samay ipapatalos diad sankasustoan tan sankalinewan lan paraan. Walay irap-irap to iyan kimey. Alimbawa, sano walay ipapatalos dan artikulon talagan espisipiko iray nausar a termino, nayarin kaukolan na saray managpatalos tan managbasa (proofreaders) so mansukimat diad saray reperensyan walad lenguahen ipapatalos da (Ingles odino arum niran lenguahe ya ipapatalos, a singa say French, Ruso, odino Español) tan ed lenguahen pangipapatalosan ta pian naseguro ran sustoy pangipatalos da. Alimbawa, no walay artikulo ed Awake! a teknikal odino nipaakar ed awaran, talagan kaukolan ed satan so panagsukimat.

Dakel so managpatalos a say pankikimeyan da et diad sangan opisina na saray Tasi nen Jehova, a walaray sigpot-panaon, wala ra met so part time. Saray arum et diad mismon lugar a manguusar ed lenguahen pangipapatalosan da. Ag-iraya suesueldoan. Saray sigpot-panaon a managpatalos et tataryaan labat na kuarto tan kanen da tan melag a re-imbersmin parad saray manunan sasaliwen a para personal. Diad sankamundoan, walay manga 2,800 a Tasi a managpatalos. Diad kaplesan, 98 a sangan opisina na saray Tasi nen Jehova so kawalaan na saray ulop na managpatalos odino aasikasoen iran ulop na managpatalos a walad arum a pasen. Alimbawa labat, say sanga ed Russia et mangaasikaso na masulok a 230 a sigpot-panaon tan part time a managpatalos a manpapatalos ed manga 30 iran lenguahe, a kaiba la’d satan iray lenguahen agtanto kabat ed samay lugar a kawalaan na opisina, singa say Chuvash, Ossetian, tan Uighur.

Pinaaligwas so Kalidad na Panagpatalos

Singa met ed panagaral na sananey a lenguahe, say suston panagpatalos na komplikado iran ideya et aliwan basta-basta. Say kalat et pian dugay pakapangipasabi ed saray lugan tan mensahe na artikulon ipapatalos diad paraan a natural sano basaen, a singano nisulat itan ed samay angipatalosan a lenguahe. Kaukolan so abilidad pian nagawaan iya. Sabien to ni pigaran taon antis a magmaliw ya eksperiensyado iray balon managpatalos, tan walay panangipasal ya itatarya ed sikara na saray Tasi nen Jehova, a kaplesan a nagagawa. No  maminsan, bibisitaen na saray instruktor iray ulop na managpatalos pian tulongan iran mamaaligwas ed dunong dan manpatalos tan mangusar ed saray program ed kompyuter.

Maabig iray resulta na sayan programa. Alimbawa oniay inreport na sangan opisina na saray Tasi nen Jehova diad Nicaragua: “Diad unona-unan pankanawnawa, saray Miskito a managpatalos mi so akaawat na panangipasal nipaakar ed saray paraan tan metodo na panagpatalos manlapud sakey ya instruktor ed sangay Mexico. Abalbaleg so agawaan na saya ed paraan na panagpatalos da la natan. Baleg so inaligwasan na kalidad na panagpatalos.”

Balikas Iran Ontatanek ed Puso

Saray pansasagpot pian makapawala na Biblia tan literaturan nibase ed Biblia diad lenguahe na totoo et inggagalan manabi ed puso ra, tan ontan a mismo so nagagawa. Nen 2006, saray Tasi nen Jehova ed Bulgaria so nanliket a maong sanen nipaway so New World Translation of the Christian Greek Scriptures ed Bulgarian. Inreport na sangay Bulgaria a dakdakel so naawat dan pisasalamat. Saray membro na kongregasyon et mangibabagan “natan et talagan natatanek na Biblia so kapusoan da, ya aliwa labat a say kanonotan da.” Oniay inkomento na sakey a masiken ed Sofia: “Pigay taon ko lan nababasa so Biblia, balet natan ko labat atalo-talosan lapud sayan patalos a malinlinew tan talagan ontatanek ed puso.” Diad Albania met, sanen naawat na sakey a taga’d man a Tasi so kompleton kopya na New World Translation ed Albanian, oniay inkomento to: “Bali-bali manayay Salita na Dios no basaen ed Albanian! Agaylan pribilehyo a si  Jehova et mansasalita ed sikami ed dili min lenguahe!”

Nayarin sabien toy pigaran taon antis a nasumpal na sakey ya ulop na managpatalos so interon Biblia. No say resulta balet et minilyon a totoo so petepeteg a makarandan ed Salita na Dios diad unona-unan pankanawnawa, agta nibaga yon talagan abawbawi so amin ya impansagpot?

‘Kakimeyan Kami na Dios’

Siempre, say panagpatalos et sakey labat ed dakel iran kimey a nakaukolan pian epektibon nipulong so maong a balita. Say panagsulat, panag-imprinta, tan panangipawit ed saray nibase ed Biblia a publikasyon tan say dakel niran misiglaotan a kimkimey na saray sanga, sirkito, tan kongregasyon na saray Tasi nen Jehova et mankaukolan na baleg a sagpot tan gastos. Balet ta saray totoo na Dios et “yapay da so inkasikara a mabulbulos” pian nasumpal iya. (Salmos 110:3) Ipapasen dan pribilehyo tan kagalangan so pakapankontribusyon da, tan bilang resulta et ipapasen ira nen Jehova a “kakimeyan” to.​—1 Corinto 3:5-9.

Diad tua, samay angibagan “say pilak kayarian ko, tan say balitok et kayarian ko” et agmaniilalo ed pinansyal a tulong tayo pian nasumpal so kimey to. Balet ta pinagalangan nen Jehova iray lingkor to diad impangiter to’d sikara na pribilehyon mibiang ed panamasanto ed ngaran to panamegley na pandonasyon parad kipulong ed “amin a nasyon” na saray katuaan a mangiliktar na bilay. (Mateo 24:14; 28:19, 20) Agta napapakiwas kayon gawaen so amin a nayarian yo pian suportaan iyan kimey ya aglan balot naulit?

[Paimano ed leksab]

[Kahon ed pahina 18]

“TALAGAN PANNONONOTEN KAMI NA SARATAN”

Oniay insulat na sakey a 14 años ya ugaw a bii ed sangan opisina na saray Tasi nen Jehova ed Cameroon: “Kasumpal kon asaliw iray usaren ko ed eskuelaan parad sayan taon, alakok so duaran librok nen imbeneg a taon ed kantidad a 2,500 francs [$5, U.S.]. Idonasyon ko iya tan say kaaruman nin 910 francs [$1.82, U.S.] ya atipon ko. Itultuloy yoy maabig a kimey yo. Salamat ed say Panag-Bantayan tan Awake! Talagan pannononoten kami na saratan.”

[Kahon/Litrato ed pahina 18]

NIDUMADUMAN DONASYON

Say sangan opisina na saray Tasi nen Jehova ed Mexico et akaawat na onian sulat manlapud maapresyan si Manuel a mantaon na anemira. Sikatoy taga Estado na Chiapas. Lapud agto ni amtay mansulat, sikatoy insulatan na sakey a kaaro to. Inkuan nen Manuel: “Inikdan ak nen baik na kaong. Sanen nananak itan, pinilik imay sankatabaan, tan pinabaleg ko diad tulong na saray agagi. Tekep na balbaleg a panangaro, ipawit ko iyan donasyon a nanlakoan ko ed samay baboy. Manbelat iman na 100 kilo, tan alakok na 1,250 pisos [kuarta ed saman a lugar] [$110, U.S.]. Ipangasi yon usaren iyan kuarta parad si Jehova.”

[Kahon ed pahina 19]

‘USAR YO IYA ED PANGIPATALOS NA BIBLIA’

Diad samay 2005 a distriton kombension na saray Tasi nen Jehova ed Ukraine et nipaway so New World Translation of the Christian Greek Scriptures ed Ukrainian. Kaimbuasan to, walay aromog ya onian mensahe ed kahon parad kontribusyon diad kombension: “Mantaon ak na siamera. Salamat na baleg ed Greek Scriptures. Inter nen nanay ko iyan daiset a kuarta ed siak tan ed ading ko pian ipasahe mi’d bus paonla’d eskuelaan. Balet no ag-onuuran, manaakar kami kanian akatipon kami na 50 hryvnia [$10, U.S.]. Labay min sanagi ya usaren yo iya ed pangipatalos na interon Biblia diad Ukrainian.”

[Kahon ed pahina 20, 21]

SARAY PARAAN A PINILI NA ARUM PIAN MANGITER

KONTRIBUSYON PARAD SANKAMUNDOAN A KIMEY

Dakel so mangigagana, odino mangigegetar, na kantidad ya ipelag da ed saray kahon na kontribusyon ya atatakan na “Contributions for the Worldwide Work​—Matthew 24:14.”

Binulan ya ipapawit na saray kongregasyon irayan kantidad diad sangan opisina na saray Tasi nen Jehova a manlilingkor ed mismon bansa ra. Saray boluntaryon donasyon a kuarta et nayari met a direktan ipawit ed Watch Tower Bible and Tract Society of the Philippines, Inc., Attention Treasurer’s Office, P.O. Box 2044, 1060 Manila, odino diad sangan opisina na saray Tasi nen Jehova a manlilingkor ed bansan kawalaan yo. Saray tseke ya ipawit ed address ed tagey so kaukolan ya ingaran ed “Watch Tower.” Nayari met ya idonasyon iray alahas odino arum niran ankablin bengatla. Nepeg ya itekep ed sarayan donasyon so sakey ya antikey a sulat a mangibabagan sakey iratan a direktan langkap.

UKSOYAN A KONDISYONAL A DONASYON

Nayari met ya imatalek ed Watch Tower so kuarta pian nausar ed sankamundoan a kimey. Bangbalet, satan so ipawil sano kerewen la na angimatalek. Parad kaaruman ya impormasyon, ipangasin mitalosan ed Treasurer’s Office diad address ya asalambit la.

NIPLANON PANANULONG

Likud ni ed saray direktan langkap a kuarta, walaray arum nin paraan na panangiter parad sankamundoan a serbisyo ed Panarian. Kabiangan ed saratan so:

Insurance: Say Watch Tower Bible and Tract Society of the Philippines, Inc. et nayarin iyan bilang benepisyaryo na life insurance policy odino retirement/pension plan.

Saray Deposito ed Bangko: Saray deposito ed bangko, kaletan nipaakar ed deposito, odino indibidual a deposito ed panretiro so nayarin imatalek odino ingaran ed Watch Tower Bible and Tract Society of the Philippines, Inc., diad ipatey, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Bible and Tract Society of the Philippines, Inc., bilang direktan langkap.

Lote tan Abung: Say lote tan abung a nilako so nayarin iter balanglan direktan langkap odino no abung et ireserba itan a panayaman na angidonar, a makapantultuloy a manayam ditan legan a mabilay. Mitalosan ed sangan opisina diad bansan kawalaan yo sakbay ya iyalis so titulo na antokaman a lote tan abung.

Gift Annuity: Say gift annuity et sakey a reglamento a niyalis na sakey so kuarta odino saray seguridad diad aturon korporasyon ya uusaren na saray Tasi nen Jehova. Bilang kasalat, say angidonar, odino siopaman a pangipiyaan to, so makaawat na pihon bayar ya annuity a tinaon legay bilay. Say angidonar so makaawat na income-tax deduction diad samay taon a niyareglo so gift annuity.

Testamento tan Inmatalek: Saray kayarian odino kuarta so nayarin ipatawir ed Watch Tower Bible and Tract Society of the Philippines, Inc. diad panamegley na sakey a legal a testamento, odino nayarin iyan so Watch Tower Bible and Tract Society of the Philippines, Inc. bilang benepisyaryo na paknaan a pangimatalek. Say inmatalek a parad sakey a relihyoson organisasyon so nayarin mamawala na pigaran bentaha ed panag-buis.

Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian natulongan iray indibidual a malabay ya ontulong ed sankamundoan a kimey na saray Tasi nen Jehova panamegley na pigaran nengneng na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Sayan brosyur so inimprinta pian mangitarya na impormasyon nipaakar ed nanduruman paraan na nayarin pangiter ed saray langkap balanglan natan odino ipatawir diad ipatey. Kayari ran abasa so brosyur tan tinmupleg ed saray legal a managkonseho ra ed panag-buis, dakel la so makakatulong pian nasuportaan so sankamundoan a relihyoson kimey tan pananulong ed kaparan too na saray Tasi nen Jehova, tan nagagamoran da met so dakel a benepisyo ed buis legan a gagawaen da itan. Makala kayo na sayan brosyur panamegley na ikerew na kopya manlapud mismon Charitable Planning Office.

Parad kaaruman ya impormasyon, nayarian yoy mitalosan diad Charitable Planning Office, balanglan diad pansulat odino itawag ed telepono, diad address a nilista ed leksab, odino nayarin tawagan yo so sangan opisina na Saray Tasi nen Jehova a manlilingkor ed bansan kawalaan yo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: (02) 411-6090

[Saray litrato ed pahina 19]

Saray managpatalos a Miskito diad sangay Nicaragua