Kasin Makapaseseg Ka ed Arum?

DIAD sampot na mamaabalaten a kapalandeyan na Anti-Lebanon, wadtan so Palandey Hermon. Say kaatagey to et 2,814 metro tan marakdakep so toktok to. Diad interon taon lawari, asakbongan na niebe so toktok na Hermon, tan saray alingasew ed labi ya ondadalan ditan so magmamaliw a linaew. Sarayan linaew so ompepelag ed nanduruman kakiewan diad abeban kapukdolan tan diad kaubasan ed leksab. Diad Israel nensaman, sarayan makarepreskon linaew so manunan manasalog ed saray tanaman kaleganan na andukey ya amagan tiempo ra.

Diad sakey a kanta a pinuyanan nen Jehova, niyaliling so makapalikliket a pankakasakey na saray lingkor to ed “linaew ed Hermon . . . ya onleksab ed tapew na palpalandey na Sion.” (Salmo 133:1, 3) Singa say Palandey Hermon a mangiiter na makarepreskon linaew ed saray tanaman, makapangiter itayo met na panamaseseg ed saray napilimogan tayo. Panon tayon nagawaan itan?

Makapaseseg ya Ehemplo nen Jesus

Baleg so epekto na walna nen Jesu-Kristo ed arum. Anggan say magano labat a pilimog ed sikato et makapaseseg lan maong. Alimbawa, oniay inkuan na angisulat ed Ebanghelyo a si Marcos: “Inala [nen Jesus iray ugugaw] ed saray taklay to, tan benendisyonan to ra, ya intapew to so saray lima to ed sikara.” (Marcos 10:16) Seguradon manlikliket iraman ya ugugaw ed ginawa to!

Sanen unor lan labi nen Jesus diad dalin, inurasan to so kasalian na saray babangatan to. Say kapaabebaan to so anenyeg ed kapusoan da. Insan inkuan to ed sikara: “Inikdan ta kayo na sakey a pangaligan, pian sikayo gawaen yo met so singa ginawak ed sikayo.” (Juan 13:1-17) On, kaukolan met iran manpaabeba. Anggaman agtampol atalosan na saray apostol so labay ton ibaga, tan diad saginonor na saman a labi et nansasangsangan ira no siopa so sankatalonggaringan ed sikara, agsinmanok si Jesus. Imbes, sikatoy maanos ya akikatunongan ed sikara. (Lucas 22:24-27) Anggan ‘sanen si Jesus so inayew-ayew, agto binmales ya angayew.’ Diad tua, “sanen apagpairap agnaningongot; noag ingen inmatalek to so laman to ed manangiter na tunong.” Talagan makanan aligen so makapaseseg ya ehemplo nen Jesus.​—1 Pedro 2:21, 23.

Inkuan nen Jesus: “Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo.” (Mateo 11:29) Isip yo pay pribilehyon paibangat a mismo ed si Jesus. Sanen nadngel na saray totoo ed dilin baley to so impanbangat to diad sinagoga, ontan lay pankelkelaw da tan inkuan da: “Iner so angalaan na sayan too na kakabatan, tan sarayan makapanyari a gawa?” (Mateo 13:54) Kanian no basaen tayo so nipaakar ed bilay tan ministeryo nen Jesus, dakel so naaralan tayo nipaakar ed pagmaliw a makapaseseg ed arum. Usisaen tayo pa so makapadinayew ya ehemplo nen Jesus diad panamegley na makapabiskeg a pananalita tan inkamatulong to.

Pansiansiaen so Makapabiskeg a Pananalita

Amta tayo a mainomay nin gaygayen so sakey a bilding nen say mangipaalagey na balo. Satan lanlamang a prinsipyo a pangigeba tan  pangipaalagey et onaplika ed pananalita tayo. Lapud amin tayo et ag-ayadyari, walan walay kalilingoan tayo. Oniay inkuan nen Arin Solomon: “Anggapo so maptek a too ed tapew na dalin a manggawa na maong, tan agmankasalanan.” (Eclesiastes 7:20) Agaylay inomay a naimano so kalilingoan na arum tan deralen ira panamegley na ansakit a pananalita. (Salmo 64:2-4) Diad biek a dapag, mairap a pansiansiaen a makapabiskeg so pananalita tayo.

Inusar nen Jesus so abilidad ton mansalita pian pabiskegen so totoo. Inikdan to ra na espiritual a panamaseseg diad impangipaamta to ed maong a balita na Panarian. (Lucas 8:1) Pinabiskeg to met iramay nagmaliw a babangatan to diad impangipakabat to ed Ama to. (Mateo 11:25-27) Agpankelawan a maas-asingger so totoo ed sikato!

Diad kasunian, saray eskriba tan Fariseo so angibaliwala ed saray pankaukolan na arum. Inkuan nen Jesus a “kaliktan day pasen a manuna ed saray panduroypo tan saray yurongan a manuna ed saray sinagoga.” (Mateo 23:6) Diad tua, minelmelag da ray ordinaryon totoo, a kuan da: “Saraya a katooan ya agda amta so ganggan naayew ira.” (Juan 7:49) Talagan makagapol so ugali ra!

Mabetbet a napatnagan ed pananalita tayo so inkatoo tayo tan no antoy pangipapasen tayo ed arum. Inkuan nen Jesus: “Say maong a too ipaway to so maabig dia ed maong a kayamanan na puso to; et say mauges a too ipaway to so kaugsan dia ed mauges a kayamanan; ta dia ed inkadaakan na puso say sangi to mansalita.” (Lucas 6:45) Kanian, antoy gawaen tayo pian naseguron say pananalita tayo et makapaseseg ed arum?

Unona, kaukolan tayoy mannonot nin magano antis a mansalita. Oniay inkuan na Uliran 15:28: “Say puso na maptek aralen to so onebat.” Siempre, agmet la kaukolan a mabaybayag nin aralen so onebat. No mandalepdep itayon magano antis a mansalita, namoria tayo no kasin makapaseseg so ibaga tayo. Nayari tayon tepetan so inkasikatayo: ‘Maaro kasi ibagak? Tua kasi iya, odino dengeldengel labat? Saya kasi et “salita a nipanpanaon?” Napaseseg tan napabiskeg kasi iramay pangibagaan ko?’ (Uliran 15:23, NW) No namoria tayo a negatibo odino agnipanpanaon so ibaga tayo, pansagpotan tayon ekalen la itan ed nonot tayo. Imbes, agta maabig no salatan tayo la itan na mas positibo tan matukoy? Say palpalaran a salita et singa ‘saray saksak na kampilan,’ bangta say positibon balikas et ‘makapakasil.’​—Uliran 12:18.

Say sakey nin makatulong et nonoten tayo no akin a papablien na Dios iray kapara tayon managdayew. Inkuan nen Jesus: “Anggapo so too a makadago ed siak, likud no say Ama ya angibaki ed siak sikato so iyasingger to.” (Juan 6:44) Nenengnengen nen Jehova iray positibon kalidad ed balang matoor a lingkor to, anggan saramay ipapasen tayon mairap a piulopan. No pansagpotan tayon anapen iray maabig a kalidad da, walay rason tayo pian marakep so ibaga tayo nipaakar ed sikara.

 Tulongan so Arum

Sigpot a natatalosan nen Jesus so sasagmaken na saray maniirap. Kanian, “sanen anengneng to ray dakerakel a totoo, inabagey to ra, lapud maermen tan abuybuyak ira, a singa saray karnero ya anggapoy pastol da.” (Mateo 9:36) Balet aglabat ira basta akasian nen Jesus, noagta tinulongan to ra. Oniay imbaga to: “Dago kayo’d siak, amin yon nasasagpotan tan nabebelatan, et ikdan ta kayo’y pampainawa.” Tan impaseguro to: “Say pakok mainomay, tan anlemew so awit ko.”​—Mateo 11:28, 30.

Natan, manbibilay itayo la ed “saray panaon a maatap” a mairap a pidenengan. (2 Timoteo 3:1) Dakel a totoo so nabebelatan lapud “kapagaan ed mundo.” (Mateo 13:22) Arum so naproproblema lapud makapaermen a kipapasen da. (1 Tesalonica 5:14) Panon tayo ran napaseseg? Singa si Kristo, sarag tayon palemewen so aawiten da.

Saray arum a totoo et ibebesngaw day problema ra pian nalemewan ira. No onsingger ed sikatayo so toon naeermenan, kasin ipapanaon tayon dengelen a maong so ibaga ra? Pian nibagan maempatya itayon ondedengel, kaukolan tayon imanoen so ibabaga na sakey a too, imbes a mannonot la na ebat odino solusyon ed problema to. Nipanengneng tayo a mangiyaansakit itayo no ontalineng itayon maong, onnengneng ed sikato, tan onimis no matukoy.

Diad loob na Kristianon kongregasyon, dakel so pankanawnawan napaseseg iray agagi. Singa bilang, sano miaaral, pankanawnawa tayon imanoen iramay naiirapan lapud sakit. No maminsan, say nakaukolan labat pian napabiskeg ira et say pigaran minuton pamaseseg ed sikara, antis odino kayari aral. Imanoen tayo met no sioparay agmakakaatendi ed CBS. Nayarin tawagan tayo ra tan komustaen odino tulongan ira.​—Filipos 2:4.

Ambelat so responsabilidad na saray mamatatken ed kongregasyon. Kanian, no mikoopera itayo tan mapaabeban gawaen so impabtang da ed sikatayo, baleg so nitulong tayo pian napalemew so sasakbaten da. Oniay bilin ed sikatayo na Salita na Dios: “Ontulo’kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipapalinewan: pian sikato ya so gawaen da a sigagayaga, tan aliwa a sieermen: ta saya agmakapaabig ed sikayo.” (Hebreos 13:17) No matulok tan mapasakop itayo, nalemewan iramay ‘manuuley’ odino mangaasikaso ed sikatayo diad maabig a paraan.​—1 Timoteo 5:17.

Lawas Mansalita na Makapabiskeg tan Ontulong

Say makaparepreskon linaew et manlalapud dakerakel tan angkekelag a tedter na danum ya agnaim-imanon ompepelag. Mipara ed satan, say pamaseseg ed arum et agmanlalapu ed maminpinsan a panggawa na kaabigan, noagta diad saray maabig a gawa a kalkalnan natitipon bilang resulta na lawas pangaalig tayo ed saray kalidad nen Kristo.

Oniay insulat nen apostol Pablo: “Nipaakar ed aroan na sanaagi, matamoy komon so aroan na sakey tan sakey, dia ed galang manpapalabian kayo.” (Roma 12:10) Iyaplika tayo iyan simbawa nen Pablo. Tan komon ta say pananalita tan kagagawa tayo et talagan makapaseseg ed arum.

[Saray litrato ed pahina 16]

Say linaew a manlalapud Palandey Hermon et makaparepresko ed saray tanaman

[Litrato ed pahina 17]

Makapaseseg ed arum so toon maempatya ya ondedengel