Imanoen so “Dunong Yo ed Panagbangat”

“Ipulong mo so salita, . . . mamaat ka, manimbawa ka, mamilin ka, a sigpot a walaan na andukey a panag-anos tan dunong ed panagbangat.”​—2 TIM. 4:2.

1. Anto so ingganggan nen Jesus ed saray babangatan to, tan anto so intilak ton ehemplo?

 ANGGAMAN mamilagron amaabig si Jesus legan na ministeryo to diad dalin, sikatoy mas kabkabat bilang managbangat, imbes a managtambal odino managmilagro. (Mar. 12:19; 13:1) Prayuridad to so pangiyabawag ed maong a balita na Panarian na Dios, tan ontan met so gagawaen na saray patumbok to natan. Impudir ed saray Kristiano so pangituloy ed kimey a panaggaway babangatan diad panamegley na pangibangat da ed totoo a mangunor ed amin ya ingganggan nen Jesus.​—Mat. 28:19, 20.

2. Anto so kaukolan tayon gawaen pian nasumpal so ingganggan ed sikatayo a panagpulong?

² Pian nasumpal tayo so ingganggan ed sikatayo a panggawa na babangatan, lawas tayon panggugunaetan a paaligwasen so abilidad tayon manbangat. Indanet nen apostol Pablo so kaimportantian na sayan abilidad sanen sinulat to so kaiba to ed panagpulong a si Timoteo. Inkuan to: “Imatonan mo so kaabigan na laman  mo tan say ibabangat mo. Mansiansia ka ed sarayan bengatla; ta no gawaen mo so saraya, nilaban mo so inkasika tan saray ondengel met ed sika.” (1 Tim. 4:16) Say klase na panagbangat a walad nonot nen Pablo et aliwa labat lan say pangipasabi ed impormasyon. Saray epektibon Kristianon ministro et nasasabi ray kapusoan na totoo tan napapakiwas da ran manguman. Satan so dunong. Kanian panon tayon napaaligwas so “dunong ed panagbangat” sano ipupulong tayo so maong a balita na Panarian na Dios?​—2 Tim. 4:2.

Paaligwasen so “Dunong ed Panagbangat”

3, 4. (a) Panon tayon napaaligwas so “dunong ed panagbangat”? (b) Panon itayon natulongan na Teokratikon Eskuelaan Parad Ministeryo pian magmaliw itayon epektibon managbangat?

³ Inkuan na sakey a diksionaryo a say kabaliksan na “dunong” et sakey ya “abilidad a nagamoran diad panaral, pangiyaplika, odino pangobserba.” Kaukolan tayon imanoen irayan taloran aspekto pian magmaliw itayon epektibo a managbangat na maong a balita. Say alenleneg a paraan pian malinew tayon natalosan so sakey a tema et say panaral tekep na pikakasi. (Basaen so Salmo 119:27, 34.) No obserbaan tayo so pangiyaaral na saray epektibon ministro, naaral tayo so paraan da tan naalig tayo ra. Tan no pansagpotan tayo ya iyaplikan naynay so naaaralan tayo, napaaligwas tayo ray abilidad tayo.​—Luc. 6:40; 1 Tim. 4:13-15.

⁴ Si Jehova so Matalonggaring ya Instruktor tayo. Ipapasal ton manpulong iray lingkor to ed dalin diad panamegley na organisasyon to. (Isa. 30:20, 21) Kanian, balang kongregasyon et walaan na sinimban Teokratikon Eskuelaan Parad Ministeryo. Saya so inggetman ontulong ed amin a nampalista a magmaliw ya epektibon manangiyabawag ed Panarian na Dios. Say manunan libro ya uusaren ed sayan eskuelaan et say Biblia. Ibabaga ed sikatayo na pinuyanan a Salita nen Jehova no anto so ibangat tayo. Niarum ni, ipapanengneng na Biblia no antoran metodo so epektibo tan matukoy. Regular itayon papanonotan na Teokratikon Eskuelaan Parad Ministeryo a magmaliw itayon mas maong a managbangat no ibase tayo ed Biblia so ibabangat tayo, mangusar na epektibon tepetepet, mangiyaral a simpli, tan ipanengneng a talagan interesado itayo ed arum. Sansakeyen tayo pan aralen irayan punto. Insan tayo pantongtongan no panon a nasabi so puso na iyaaralan.

Ibase so Ibabangat Yo ed Salita na Dios

5. Anto so nepeg a basiyan na ibabangat tayo, tan akin?

⁵ Si Jesus, a sankatalonggaringan ed amin a totoon managbangat, so angibase ed ibabangat to diad Kasulatan. (Mat. 21:13; Juan 6:45; 8:17) Sikatoy nansalita, aliwan unong ed autoridad to, noag diad autoridad na samay angibaki ed sikato. (Juan 7:16-18) Satan so ehemplon tutumboken tayo. Kanian, sano mankakabkaabungan odino mangiyaaral itayo na Biblia, nepeg a say ibaga tayo et akasentro ed Salita na Dios bilang autoridad. (2 Tim. 3:16, 17) Anggan panon lay inkautek tayon mankatunongan, agtayo naparaan so inkaepektibo tan biskeg na pinuyanan a Kasulatan, lapud walay autoridad na satan. Antokaman a punto so ipapaliwawa tayo ed iyaaralan, say sankaabigan a metodo a nausar tayo et say pangipabasa ed sikato no anto so ibabaga na Biblia.​—Basaen so Hebreos 4:12.

6. Panon a naseguro na mangiyaaral a talagan natatalosan na iyaaralan iray parapo tan teksto a sisingbaten?

 ⁶ Siempre, agkabaliksan na satan a say sakey a Kristianon mangiyaaral et agla kaukolan a manparaan ni ed pangiyaral to na Biblia. Imbes, kaukolan a masakbay to lan nonoten no dinan ed saray nisitan teksto na Biblia so basaen da legan na panagaral. Kaslakan, maabig no say basaen iran teksto et saramay onsuporta ed sisisiaen tayo. Kaukolan met a tulongan so iyaaralan pian natalosan to so kada tekston ipabasa ed sikato.​—1 Cor. 14:8, 9.

Mangusar na Epektibon Tepetepet

7. Akin a say pangusar na tepetepet et epektibon metodo ed pangiyaral?

⁷ Diad maabilidar a pangusar na mangiyaaral ed tepetepet, napannonot tan nasabi to so puso na iyaaralan to. Kanian imbes a sikayon mismo so mangipaliwawa ed saray teksto, paipaliwawa itan ed sikato. No maminsan, makatulong ed sikato so kaaruman a panepet odino anggan say mantutumbokan a panepet pian natalosan to itan. No onian metodo so gawaen yo pian sikatoy nibangat, agto labat itan natalosan noagta nakombinse met ed satan.​—Mat. 17:24-26; Luc. 10:36, 37.

8. Panon tayon naamtaan no anto so walad puso na iyaaralan?

⁸ Diad saray publikasyon tayo, say uusaren ed panagaral et say tepet tan ebat a metodo. Seguradon naebatan a tampol na kaslakan ed saray iyaaralan yo so nitaryan tepet, ya alaen day ebat da ed parapo. Anggaman ontan, no say sakey a mangiyaaral et makatebek, agto labat mankontento ed dugan ebat. Alimbawa, nayarin susto so pangipaliwawa na iyaaralan ed ibabaga na Biblia nipaakar ed pilalawanan. (1 Cor. 6:18) Balet, say mataktikan panepet ed panmoria to so mangipanengneng ed no anton talagay pangipapasen to ed nanaaralan to. Kanian nayarin onia ray itepet na mangiyaaral: “Akin et isesebel na Biblia so pisekso ed agto asawa? Antoy nibagam ed sayan isesebel na Dios? Parad sika, wala kasi pankaabigan na pangunor ed saray estandarte na Dios ed moral?” Nipatnag na ebat to ed saratan a tepet no anto so walad puso to.​—Basaen so Mateo 16:13-17.

Pansiansiaen Itan a Simpli

9. Antoy nepeg tayon nonoten sano inanabang so impormasyon ed Kasulatan?

⁹ Maslak ed saray katuaan a walad Biblia et simpli. Balet, ompan saray iyaaralan tayo na Biblia et awetwet la lapud saray doktrina na palson relihyon. Bilang mangiyaaral et nepeg tayo sirin a pagmaliwen a mainomay a natalosan so Biblia. Saray epektibon managbangat et nipapasabi ra so impormasyon diad simpli, malinew, tan suston paraan. No tumboken tayo iyan panangigiya, agtayo napagmaliw a masoliwet so katuaan. Ag-iyaarum iray detalyin agnakaukolan. Agla nakaukolan a komentoan so amin ya aspekto na teksto a binasa tayo. Iyapasakey tayo labat la’d saray nakaukolan a mamalinew ed punton sisingbaten tayo. Legan ya ondarakel so naaaralan to, kalkalna ton natalosan iray mas aralem a katuaan na Kasulatan.​—Heb. 5:13, 14.

10. Anto iray ikonsidera tayo pian naamtaan no pigaran parapo so iyaral?

¹⁰ Pigaran parapo so nepeg tayon iyaral diad kada sesyon? Saya so mankaukolan na pakatebek.  Nanduruma so abilidad tan kipapasen na iyaaralan tan mangiyaaral. Balet, nepeg tayon tandaan a say gagala tayo et tulongan so iyaaralan ya omputel so pananisia to. Kanian sikatoy ikdan tayo na magenap a panaon a manbasa, mantalos, tan mangawat ed saray katuaan ya ibabangat na Salita na Dios. Agtayo aaralen so dakerakel a parapo ya agto la niyulo. Balet, ag-itayo met matantantan ed panagaral. Sano atalosan la na iyaaralan so sakey a punto, ombaliksat itayo la.​—Col. 2:6, 7.

11. Anton leksion nipaakar ed panagbangat so naaralan tayo ed si apostol Pablo?

¹¹ Impansiansia nen apostol Pablo a simpli so maong a balita sanen akitongtongan to iray balon babangatan. Anggaman atagey so aral to, agto angusar na araralem iran salita. (Basaen so 1 Corinto 2:1, 2.) Saray masimoon a totoo et nasasagyat tan napepenek ed inkasimpli na Kasulatan. Agla kaukolan a say sakey et magmaliw nin mautek pian natalosan to itan.​—Mat. 11:25; Gawa 4:13; 1 Cor. 1:26, 27.

Tulongan Iray Iyaaralan a Manpabli ed Nanaaralan Da

12, 13. Anto so mamakiwas ed iyaaralan pian iyaplika toy nanaaralan to? Iyilustra.

¹² Pian magmaliw itayon epektibon managbangat, kaukolan a nasabi tayo so puso na iyaaralan tayo. Kaukolan a natalosan to no panon ya onaplika ed sikaton mismo so impormasyon, no panon a nagunggonaan ed saratan, tan no panon ya onaligwas so bilay to diad panumbok to ed ibabaga na Biblia.​—Isa. 48:17, 18.

¹³ Singa bilang, nayarin ipapaliwawa tayo ed iyaaralan tayo so Hebreos 10:24, 25 a mamapaseseg ed saray Kristiano a mantitipon pian napabiskeg ed ibabaga na Biblia tan nawalaan na maaron panlilimog. No sikato so agni onaatendi, nayarin itongtong tayo ed sikato no panon a gagawaen so pantitipon tan no antoy sisingbaten ditan. Ibaga tayo a saray pantitipon ed kongregasyon et kabiangan na panagdayew tayo tan ipanengneng tayo a nagugunggonaan itayon mismo ed saratan. Insan tayo imbitaan ya onatendi. Nepeg a say mamakiwas ed sikato a manumpal ed saray ganggan na Biblia et say pilalek ton mangunor ed si Jehova, aliwan say pamagusto ed mangiyaaral.​—Gal. 6:4, 5.

14, 15. (a) Anto so naamtaan na iyaaralan na Biblia nipaakar ed si Jehova? (b) Panon a nagunggonaan so iyaaralan na Biblia sano nakabat to so personalidad na Dios?

¹⁴ Say manunan nagunggona na saray iyaaralan sano aaralen tan iyaaplika ra iray prinsipyo na Biblia et say pakapikabat tan pangaro ra ed si Jehova bilang persona. (Isa. 42:8) Sikatoy aliwa labat lan maaron Ama, Manamalsa, tan Makankayarian ed uniberso noagta ipaparungtal to met so personalidad tan saray abilidad to ed saramay mangaaro tan manlilingkor ed sikato. (Basaen so Exodo 34:6, 7.) Sanen ipaway la nen Moises so nasyon na Israel pian ibulos ira ed panangaripen na Ehipto, impakabat nen Jehova so inkasikato, ya oniay imbalikas to: “Magmaliw ak ed antokaman a pagmaliwan ko.” (Exo. 3:13-15, NW) Impabitar na satan a si Jehova so magmaliw ya antokaman a nakaukolan a pagmaliwan to pian sumpalen iray gagala to nipaakar ed pinili ton totoo. Kanian naamtaan na saray Israelita a si Jehova et Manangiliktar, Bumabakal, Manangitarya, Mananumpal ed saray sipan to, tan ontutulong ed arum ni ran paraan.​—Exo. 15:2, 3; 16:2-5; Jos. 23:14.

¹⁵ Saray iyaaralan tayo et nayarin agda naeksperiensya imay mamilagron impanulong nen Jehova ed si Moises. Anggaman ontan, legan ya ombibiskeg so pananisia tan panamabli ra ed saray nanaaralan da, tan sano gapoan da lan iyaplika iratan, seguradon natebek da a kaukolan iran onkerew ed si Jehova na pakpel, karunongan, tan panangiwanwan. No gawaen da itan, naamtaan da met a si Jehova et makabat tan napanmatalkan a Mananimbawa, Mananalimbeng, tan mabunlok a Manangitarya ed amin a pankaukolan da.​—Sal. 55:22; 63:7; Uli. 3:5, 6.

Ipanengneng Yo so Maaron Interes ed Sikara

16. Akin ya aliwan sankaimportantian so sipor ya inkamaabilidad pian magmaliw itayon epektibon managbangat?

¹⁶ No diad panmoria yo et aliwa kayon  maabilidad a manbangat, anggaman labalabay yo komon, agkayo nadidismaya. Si Jehova tan si Jesus so mangaasikaso ed programan panagbangat a gagawaen natan ed interon mundo. (Gawa 1:7, 8; Apo. 14:6) Bendisyonan da so pansasagpot tayo pian balibali so epekto na ibaga tayo ed saray maptek-impanpuson totoo. (Juan 6:44) Antokaman so sipor a kakapuyan na managbangat, panoan itan na tuan panangaro to ed iyaaralan to. Impanengneng nen apostol Pablo a natatalosan to so kakanaan na panangaro ed saray ibabangat.​—Basaen so 1 Tesalonica 2:7, 8.

17. Panon tayon nipalikna a talagan interesado itayo ed balang sakey ya iyaaralan tayo na Biblia?

¹⁷ Mipadpara ed satan, no ipanaon tayon kabaten so balang sakey ya iyaaralan tayo, nipalikna tayo a talagan interesado itayo ed sikato. Sano isingbat tayo ed sikato iray prinsipyo na Biblia, baleg so posibilidad a naamtaan tayo ray sirkumstansya to. Nayarin naobserbaan tayo ya iyaaplika to la iray arum a punto a naaralan to ed Biblia. Ompan diad arum iran aspekto et wala ni ray kaukolan ton umanen. No ipatebek tayo ya onaplika ed sikato so impormasyon a siningbat legan na panagaral na Biblia, sikatoy maaro tayon natulongan a magmaliw a tuan babangatan nen Kristo.

18. Akin ya importante ya ipikasi tan manpikasi itayo a kaiba so iyaaralan?

¹⁸ Say sankaimportantian et ipikasi tan manpikasi itayo a kaiba so iyaaralan. Nepeg a natebek to a say gagala tayo et sikatoy natulongan a makapikabat a maong ed Manamalsa, napaapit ed Sikato, tan minabang ed panangiwanwan To. (Basaen so Salmo 25:4, 5.) Sano ipikasi tayo a bendisyonan komon nen Jehova so pansasagpot na iyaaralan a mangiyaplika ed saray nanaaralan to, natebek to ya importante so pagmaliw a ‘mananumpal ed salita.’ (Sant. 1:22) Tan kapagno narerengel to so masimoon iran pikakasi tayo, naaralan to met so manpikasi. Peteg a makapaliket so panulong ed saray iyaaralan na Biblia a mamaelet na relasyon dan mismo ed si Jehova!

19. Anto so aralen ed ontumbok ya artikulo?

¹⁹ Makapaseseg a naamtaan a masulok ya anemira tan kapalduan milyon a Tasi ed sankamundoan so okupadon mamapaaligwas ed ‘dunong da ed panagbangat.’ Kalat dan tulongan iray matuan-impanpuson totoo a manumpal ed amin ya ingganggan nen Jesus. Antoy resulta na pampupulong tayo? Aralen ed ontumbok ya artikulo so ebat ed sayan tepet.

Kasin Nanonotan Yo?

• Akin a kaukolan a paaligwasen na saray Kristiano so ‘dunong da ed panagbangat’?

• Anto ray metodon nausar pian mas epektibo so panangiyaral tayo?

• No aliwa tayon maabilidar a manbangat, anto so makatulong pian magmaliw itayon epektibon managbangat?

[Tepetepet Parad Panagaral]

[Litrato ed pahina 9]

Kasin nampalista ka la ed Teokratikon Eskuelaan Parad Ministeryo?

[Litrato ed pahina 10]

Akin et importantin ipabasa so mismon Biblia ed iyaaralan yo?

[Litrato ed pahina 12]

Ipikasi tan manpikasi a kaiba so iyaaralan yo