“Likas Yo so Ministeryo Ya Inawat Yo ed Katawan”

‘Likas mo so ministeryo ya inawat mo ed Katawan, pian satan so nasumpal mo.’​—COL. 4:17.

1, 2. Anto so responsabilidad na saray Kristiano ed katooan?

 AMBELAT so responsabilidad tayo ed saray totoon walad kaliberliber tayo. Saray desisyon a gagawaen da natan so mankabaliksan na pakaliktar da odino pakaderal da ed “baleg ya irap.” (Apo. 7:14) Oniay inkuan na apuyanan a nansulat ed libron Uliran: “Ilaban mo so saray niyakar ed patey, et saraman so maparaan a pateyen nengnengen mo pian baaten [“amperen,” NW] mo ra.” Talagan makapatenyeg iratan a salita! No agtayo nagawaan so responsabilidad tayon pasakbayan iray totoo ed nepeg dan gawaen, eebatan tayo so dala ra. Diad tua, oniay impangituloy na satan lanlamang a bersikulo: “No kuan mo, nia, agmi amta so saya, sikato ta so agnonoten na saman so manimbang ed saray puso? Tan say mangawalo ed kamarerwam, sikato ta so agto amta? Tan agto ta itumang ed balang too so unong ed gawa to?” Malinew, agnayarin ibaga na saray lingkor nen Jehova ya ‘agda amta’ so kapeligroan ya aarapen na katooan.​—Uli. 24:11, 12.

² Papablien nen Jehova so bilay na totoo kanian papasesegen to iray lingkor to a gawaen day anggaay nayarian da ta pian dakel a bilay so nisalba ra. Nepeg ya iyabawag na kada ministro na Dios so manangiliktar-bilay a mensahe a walad Salitay Dios. Say kimey tayo so mipadpara ed samay managbantay a mangipaknol na pasakbay no nanengneng ton walay onsabin kapeligroan. Agtayo labay a walay eebatan tayo ed dala na saray ompatey. (Eze. 33:1-7) Agaylan makana sirin ya itultuloy tayon pansagpotan ya ‘ipulong so salita’!​—Basaen so 2 Timoteo 4:1, 2, 5.

3. Antoran tema so konsideraen ed sayan artikulo tan ed ontumbok nin duaran artikulo?

³ Naaralan tayo ed sayan artikulo no panon tayon talonaan iray babeng ed manangiliktar-bilay a ministeryo tayo tan no panon itayon makatulong ed mas dakel a totoo. Usisaen tayo ed ontumbok ya artikulo no panon tayon paaligwasen so dunong tayo ed pangibangat na importante iran katuaan. Say komatlon artikulo so mangisalaysay ed pigaran makapaseseg a resulta a nagagamoran na saray manangiyabawag na Panarian diad sankamundoan. Balet, sakbay tayon konsideraen irayan tema, maabig no repasoen tayo no akin a mapeligro tan agaylay irap na panaon tayo natan.

No Akin ya Anggapo so Ilalo na Karaklan

4, 5. Anto so sasagmaken na katooan, tan anto so reaksion na karaklan ed sikara?

⁴ Ipapabitar na saray nagagawa ed mundo a manbibilay itayo la ed “kasampotan na sayan sistema na bengabengatla” tan maganggano la so anggaan. Naeeksperiensya na katooan iray nagagawa tan kipapasen ya impropesiya nen Jesus tan saray babangatan to a pakapatnagan na “saray kaunoran ya agew.” “Saray ot-ot na gonigon,” tekep na saray guerra, kakulangan na tagano, yegyeg, tan arum ni ran kalamidad, so mamapairap ed katooan. Kasmak ed nanduruman pasen so inkarebelyoso, inkasiblet, tan agmaridios ya awawey. Anggan parad saray totoo a manguunor ed saray estandarte na Biblia, saraya so “panaon a maatap” a mairap a pidenengan.​—Mat. 24:3, 6-8, 12, NW; 2 Tim. 3:1-5.

⁵ Balet, ag-amta na karaklan a katooan no akin ya onia iray nagagawa ed mundo kanian panaaburidoan da so kaligenan da tan say pamilya  ra. Nalilikna na dakel a totoo so ot-ot lapud saray inad-aro ra et ompapatey odino makakasagmak ira na arum a trahedya. Anggapoy ilalo ra lapud andian ira na suston pikakabat ed no akin ya onia iray nagagawa tan no iner so pakaromogan day solusyon.​—Efe. 2:12.

6. Akin ya ag-atulongan na “Babilonia a Baleg” iray membro to?

⁶ Say “Babilonia a Baleg” a sankamundoan ya empiryo na palson relihyon so agtanton akapangiter na ilalo ed totoo. Imbes, dakel so awetwet ed espiritual lapud “alak na impanlawan to.” Niarum ni, diad inkiwas ton singa balangkantis, say palson relihyon so anagyat tan angontrol ed “saray arari ed dalin,” ya inusar to iray palson doktrina tan espiritismo pian magmaliw ya unor-unor iray totoo ed saray manuuley ed sikara. Sikato sirin so awalaay pakayari tan impluensya, balet ta sigpot ton impulisay so katuaan.​—Apo. 17:1, 2, 5; 18:23.

7. Iner so aarapen na karaklan a katooan, balet panon a natulongan so arum ed sikara?

⁷ Imbangat nen Jesus a karaklan ed totoo so mankukurang ed malapar a dalan a mamaarap ed kadederal. (Mat. 7:13, 14) Arum a totoo so wala ed satan a malapar a dalan lapud ginagala ran impulisay so ibabangat na Biblia. Balet dakel so wadtan lapud sikara so apalikdo, odino walad kabilungetan, nipaakar ed peteg a kakaukolanen nen Jehova ed sikara. Nayarin umanen na arum so kabibilay da no malinew ya ipaliwawa ed sikara manlapud Biblia so rason no akin ya ontan so gawaen da. Ingen, saramay mansiansia ed Babilonia a Baleg tan mantultuloy a mangipulisay ed saray estandarte na Biblia so agmakaliktar ed “baleg ya irap.”​—Apo. 7:14.

‘Ag-Ontutunda’ ed Panagpulong

8, 9. Anto so ginawa na saray Kristiano nen inmunan siglo sanen susumpaen ira, tan akin?

⁸ Imbaga nen Jesus a saray babangatan to so mangipulong ed maong a balita na Panarian tan manggawa na babangatan. (Mat. 28:19, 20) Kanian, lawas ipapasen na saray tuan Kristiano a say pibibiang da ed panagpulong a kimey et pakapatnagan na katooran da ed Dios tan sakey ya importantin kakaukolanen ed pananisia ra. Sirin, nantultuloy iray akadkaunan patumbok nen Jesus anggaman apasegsegang ira. Nanmatalek ira ed biskeg ya iiter nen Jehova, a kinmerew ira na tulong ta pian makapantultuloy iran ‘mansalita a makmakpel.’ Bilang ebat, sikara so pinano nen Jehova na masanton espiritu, kanian sikara so makpel ya angipulong ed salita na Dios.​—Gawa 4:18, 29, 31.

⁹ Sanen sikaray maramsak lan susumpaen, tinmayer kasi so determinasyon na saray patumbok nen Jesus a mangipulong ed maong a balita? Andin balot. Naingongotan iray Judion lider na relihyon ed pampupulong na saray apostol kanian impaerel, pinagyaw, tan impapekpek da ra. Ingen, saray apostol so ‘agtinmunda a nambabangat tan nampupulong a si  Jesus et Kristo.’ Malinew ya atebek da a kaukolan dan ‘unoren so Dios nen saray totoo.’​—Gawa 5:28, 29, 40-42.

10. Antoran subok so aarapen na saray Kristiano natan, ingen anto so nayarin resulta na maabig a gawa ra?

¹⁰ Agmet la kaukolan a sagmaken na maslak a lingkor na Dios natan so panagpekpek odino panangipriso sano manpupulong ira. Balet, amin a tuan Kristiano so nipapaarap ed nanduruman subsubok. Alimbawa, nayarin pakiwasen kayo na konsiensia yo a nipasal ed Biblia ya ipatnag so konduktan aglabay na karaklan odino ipapasen dan nikadkaduma. Nayarin nonoten na saray katrabahoan, kaeskuelaan, odino kakaabay a nikadkaduma kayo lapud saray desisyon yo et ibabase yo ed saray prinsipyo na Biblia. Anggaman kuan, nepeg ya agkayo paaamper ed negatibon awawey da. Say mundo et walad espiritual a kabilungetan, balet saray Kristiano so nepeg ya “[onsinag a] singa silesilew.” (Fil. 2:15) Nayarin saray masimoon a totoo et naobserbaan tan pandinayewan da iray maabig a gawa yo tan bilang resulta et nigloria ra si Jehova.​—Basaen so Mateo 5:16.

11. (a) Anto so reaksion na arum ed panagpulong a kimey? (b) Anton klase na isusumpa so naeksperiensya nen apostol Pablo, tan panon so inkiwas to ed satan?

¹¹ Nakaukolan so inkakpel ta pian makapantultuloy tayo ed panangipulong ed mensahe na Panarian. Nayarin saray arum a totoo pati saray kakanayon yo et balawen da kayo odino diad arum a paraan et dismayaen da kayo. (Mat. 10:36) Si apostol Pablo so aminpigan pinekpek lapud matoor ton sinumpal so ministeryo to. Imanoen pa so inkiwas to ed ontan ya isusumpa sanen insulat to: “Bangta nantepel kami nensaman, tan makapabaing so impakapairap mi . . . apabayani kami ed Dios tayo a mangisalita ed sikayo na ebanghelyo na Dios ed dakel a sumpaan.” (1 Tes. 2:2) Kinaukolan a manpakpel si Pablo pian nitultuloy ton nipulong so maong a balita anggaman sikato so inerel, nilakseban, pinekpek, tan impriso. (Gawa 16:19-24) Anto so akatulong ed sikato ta pian makapantultuloy a manpakpel? Say agmanguman a pilalek ton manumpal ed inter na Dios a ganggan a manpulong.​—1 Cor. 9:16.

12, 13. Antoran mairap a kipapasen so naeeksperiensya na arum, tan panon dan tatalonaan iratan?

¹² Mairap met a pansiansiaen so inkaseseg tayo sano saray totoo diad teritorya tayo et mataltalag a nasabi odino ag-ira interesado ed mensahe na Panarian. Anto so nagawaan tayo ed ontan iran kipapasen? Nayarin nakaukolan tayo so manpakpel nin maong ta pian napitongtongan tayo ira diad impormal a paraan. Nayari met ya umanen tayo so eskedyul tayo odino manpulong itayo diad saray lugar a mas dakel so napitongtongan.​—Ikompara so Juan 4:7-15; Gawa 16:13; 17:17.

¹³ Arum ni ran subok a kaukolan ya arapen na dakel et say itatatken tan makapuy a bunigas, a nayarin manlilimita ed nagawaan da ed panagpulong. Agkayo nadidismaya no ontan so kipapasen yo. Amta nen Jehova iray limitasyon yo tan papablien to so nagagawaan yo. (Basaen so 2 Corinto 8:12.) Antokaman so kairapan a nayarin naeeksperiensya yo​—isusumpa, ag-idedengel na totoo, odino inkamasakit​—gawa yo so anggaay nayarian yo ya inabang so maong a balita ed arum.​—Uli. 3:27; ikompara so Mar. 12:41-44.

‘Likas Yo so Ministeryo Yo’

14. Anton alimbawa so impatnag nen apostol Pablo ed saray kapara ton Kristiano, tan anto so insimbawa to?

¹⁴ Nanseetan nen apostol Pablo so ministeryo to, tan pinaseseg to iray kapananisiaan to ya ontan met so gawaen da. (Gawa 20:20, 21; 1 Cor. 11:1) Say sakey a Kristiano nen inmunan siglo a nagkalalon pinaseseg nen Pablo et si Arquipo. Oniay insulat nen Pablo ed saray taga-Colosas: ‘Ikuan yo ed Arquipo, Likas mo so ministeryo ya inawat mo ed Katawan, pian satan so nasumpal mo.’ (Col. 4:17) Agtayo amta no siopa odino no anto iray kipapasen nen Arquipo, balet mapatnag a walay ministeryo ya inawat to. No sakey kayon dedikadon Kristiano, wala met so naawat yon ministeryo.  Kasin itutultuloy yon ‘lilikasen’ odino iimanoen so ministeryo yo ta pian nasumpal yo itan?

15. Anto so nalalanor ed dedikasyon tayo bilang Kristiano, tan anto iray itepet tayo ed inkasikatayo?

¹⁵ Sakbay itayon nampabautismo, indedika tayo so bilay tayo ed si Jehova diad panamegley na impapuson pikakasi. Kabaliksan na saya a determinado itayon manggawa na linawa to. Kanian nepeg tayon tepetan so inkasikatayo natan, ‘Talaga kasin sankaimportantian ed bilay ko so panggawa na linawa na Dios?’ Nayarin wala iray nanduruman responsabilidad ya iilaloan nen Jehova a gawaen tayo​—a singa say panlegpet tayo ed pamilya tayo. (1 Tim. 5:8) Balet panon tayon uusaren so arum nin panaon tan biskeg tayo? Anto so manunaan ed bilay tayo?​—Basaen so 2 Corinto 5:14, 15.

16, 17. Anto iray posiblin nodnonoten na saray kalangweran a Kristiano odino saramay daiset ni so responsabilidad da?

¹⁶ Kasin sakey kan kalangweran a dedikadon Kristiano ya asumpal la odino magano lan nasumpal a maneskuela? Nayarin anggapo ni so ambelat iran responsabilidad mo ed pamilya. Kanian, anto so planom ed bilay mo? Anto iray desisyon mo ta pian nasumpal mo ed sankaabigan a paraan so insipan mo ed si Jehova a gawaen moy linawa to? Dakel so angorganisa ed saray kimey da ta pian makapanpayunir ira, tan bilang resulta et malikeliket tan napnapnek ira.​—Sal. 110:3; Ecl. 12:1.

¹⁷ Nayarin wala lay sigpot-panaon a trabahom balet ta daiset ni so responsabilidad mo tan say aasikasoen mo labat et say inkasika. Seguradon panliliketan mo so mibiang ed saray kimey ed kongregasyon anggad iyaabuloy na eskedyul mo. Naaruman ni kasi so naliliknam a liket? Kasin inisip mo lay pamalaknab ed pibibiang mo ed ministeryo? (Sal. 34:8; Uli. 10:22) Diad arum a teritorya et dakel nin kimey so kaukolan a gawaen ta pian nipasabi ed amin so manangiter-bilay a mensahe na katuaan. Sarag mo kasi so manggawa na saray pananguman ed bilay mo, a nayarin manlingkor ka ed lugar a kakkaukolan iray manangiyabawag na Panarian?​—Basaen so 1 Timoteo 6:6-8.

18. Anto iran pananguman so ginawa na sakey a sanasawa, tan anto iray resulta?

¹⁸ Konsideraen pa so alimbawa nen Kevin tan Elena, a taga-Estados Unidos. * Singa saray balon kasal diad lugar da, inisip da a kaukolan day manaliw na abung. Pareho iran mantratrabaho a sigpot-panaon kanian sarag day manbilay a mainawa. Ingen, say eskedyul na trabaho  ra tan saray kimey da ed abung et manguupot na dakel a panaon da kanian matalag iran makapanpulong. Amoria ra ya uusaren da la manaya so amin lawarin panaon tan biskeg da ed saray kaykayarian da. Balet, sanen naobserbaan da so simplin panagbilay na sakey a maliket a sanasawan payunir, denesidi nen Kevin tan Elena ya umanen so prayuridad da ed bilay. Kayari na inkerew day panangiwanwan nen Jehova, inlako ra so abung da tan inmalis ira ed sakey ya apartment. Binawasan nen Elena so oras to ed trabaho to tan nampayunir. Lapud apaseseg si Kevin ed maliket iran eksperiensya nen asawa to, sikato so inmekal ed sigpot-panaon a trabaho to tan nampayunir met. Kayari na pigaran panaon, inmalis ira pian manlingkor ed sakey a bansa ed Abalaten Amerika, a ditan et mankakkaukolan na saray manangipulong ed Panarian. “Maliket kamin sanasawa,” so inkuan nen Kevin, “balet sanen pinalaknab mi so panaglingkor mi ed Dios, sikami so nagmaliw a mas maliket.”​—Basaen so Mateo 6:19-22.

19, 20. Akin a say panangipulong ed maong a balita et sankaimportantian a kimey natan?

¹⁹ Say panangipulong ed maong a balita so sankaimportantian a kimey ed dalin natan. (Apo. 14:6, 7) Papasantosen na saya so ngaran nen Jehova. (Mat. 6:9) Kada taon, onaaligwas so bilay na dakerakel a totoo a mangaawat ed mensahe na Biblia, tan saya so pakaliktaran da. Balet, “panon so pakadngel da no anggapo so mangipulong?” so intepet nen apostol Pablo. (Roma 10:14, 15) Panon sirin? Agta mas maabig no gawaen yoy anggaay nayarian yo ta pian nasumpal yoy ministeryo yo?

²⁰ Sakey nin paraan ta pian nipaamta yo ed totoo so kaimportantian na sarayan mapeligron panaon tan no anto iray pansumpalan na desisyon da et diad pamaaligwas yo ed abilidad yon manbangat. Aralen ed ontumbok ya artikulo no panon yon nagawaan iya.

[Paimano ed leksab]

Panon Yon Ebatan?

• Anto so responsabilidad na saray Kristiano ed katooan?

• Panon tayon talonaan iray babeng ed panagpulong tayo?

• Panon tayon nasumpal so ministeryo ya inawat tayo?

[Tepetepet Parad Panagaral]

[Litrato ed pahina 5]

Nakaukolan so inkakpel ta pian makapanpulong itayo anggaman walay isusumpa

[Litrato ed pahina 7]

Anto so gawaen yo no manpupulong kayo ed saray teritoryan matalag ed abung iray totoo?