Sano Saray Kristiano et Nayakayak a Singa Trigo

SAKBAY na impatey nen Jesus, pinasakbayan to ray papatumbok to: ‘Nia, si Satanas kinerew to kayo, pian nagalpong [odino nayakayak] to kayo a singa trigo.’ (Luc. 22:31) Anto so labay ton ibaga?

Sanen wadiad dalin si Jesus, say panani na trigo et mankaukolan na baleg a sagpot tan panaon. Unona et tiponen na saray managgapas iray trigo. Insan, ipaspas da iratan odino maminpiga dan pasagaran. Lapud saya et mansiasian iray sengeg, taep, tan iyan. Kayari to, isabsabuyag da ed dagem, diad ontan et napelag iramay iyan bangta nipalir iramay taep tan dawa. Insan da natan yakayaken iramay naplag ya iyan pian nalinisan a maong.

Singa imbaga la nen Jesus, si Satanas so andi tundan angataki ed saray papatumbok to nen saman, tan ontan met so gagawaen to ed sikatayo natan. (Efe. 6:11) Tua, aliwan amin a nasasagmakan tayon kairapan et manlalapud si Satanas, ingen ta determinadon gawaen toy amin a nayarian to pian buyaken so integridad tayo. (Ecl. 9:11) Singa bilang, nayarin tuksoen to itayon magmaliw a materyalistiko, mamili na kuestionable iran panagligliwaan, odino manggawa na seksual ya imoralidad. Nayarin usaren to met iray kaklase odino saray katrabaho ontan met ed saray agmananisian kakanayon pian desdesen itayon anamoten so amin ya oportunidad a niyopresi diad eskuelaan odino trabaho. Niarum ni, uusaren met nen Satanas so direktan panamasegsegang pian deralen so katooran tayo ed Dios. Tan siempre wala ni ray arum ya uusaren nen Satanas pian yakayaken itayo, a singa panangibaga.

Panon tayon ontalona sumpad sayan makapanyarin kabusol? Agtayo iya nagawaan ed dilin biskeg tayo, lapud ta mas mabiskeg si Satanas. Ingen, kabat tayo a si Jehova et maminpigapigan mas mabiskeg nen say si Satanas. No sikatayo so sigpot a manmatalek ed si Jehova, masimoon a manpikasi parad kakabatan tan inkakpel pian makapansungdo, tan sigpot a paigiya ed panangiwanwan to, sikatoy mamabiskeg ed sikatayo a resistian so panangataki nen Satanas.​—Sal. 25:4, 5.

Sano nasusubok, nepeg a walaan itayo na abilidad a ‘mangibiig ed maong tan mauges’ pian ag-itayo napalikdo na saray pakana nen Satanas. (Heb. 5:13, 14) Natulongan itayo nen Jehova a bayuboan itan ya abilidad. Insan, kaukolan tayon mansiansia ed maptek a kurang antokaman so nagawa. Sano tumboken tayo so panangiwanwan nen Jehova, sikatoy ag-onsaew a manuporta ed sikatayo diad determinasyon tayon manggawa na maong.​—Efe. 6:10.

Yakayaken man itayo nen Satanas a singa trigo, sikatoy sarag tayon daegen tekep na mabiskeg a pananisia lapud panamabiskeg nen Jehova. (1 Ped. 5:9) On, papaseguroan itayo na Salita nen Jehova: ‘Sumpa yo so Diablo, et sikato so onarawi ed sikayo.’​—Sant. 4:7.