Niyarawi Balet Aglilingwanan

PINASESEG nen apostol Pablo iray kapara ton Kristiano: “Manggawa itayo na maabig ed saray amin, nagkalalo ed saray kaamong na pananisia.” (Gal. 6:10) Natan et siansia nin tutumboken tayo itan a pinuyanan ya instruksion tan manaanap tayoy paraan pian makapanggawa na maabig ed saray kapananisiaan tayo. Kaiba ed saramay mankaukolan tan makanepegan na maaron panangasikaso na kongregasyon et saray pinabli tayon agagi a mamasiken tan akukulaw a manaayam ed saray institusyon odino panagkumponian na saray maedad la.

Tua, diad arum a lugar, maslak a saray pamilya so mangaasikaso ed maedad la ran ateng diad abung. Balet, wala met iray lugar a saray maedad la et manaayam tan aasikasoen diad panagkumponian. Komusta iray maedad lan Kristiano a walad ontan iran panagkumponian? Antoray problema ra? Panon da kasin natalonaan iratan no anggapoy suporta na pamilya ra? Panon iran natulongan na kongregasyon? Tan panon itayo met a nagunggonaan sano regular tayo ran bisitaen?

Saray Problema Ra Diad Panagkumponian

Sano saray maedad lan Kristiano et impaasikaso ed panagkumponian, nayarin say kawalaan da et diad teritorya na arum a kongregasyon ya agda kabisado. Bilang resulta, saray agagi ditan so ag-ombisitan lanang ed sarayan maedad la. Sakey ni, saray kalimog da ditan et dumay sisisiaen da. Lapud saratan, nayarin  nairapan iray agagi tayon mamasiken tan akukulaw.

Singa bilang, walaray nagagawan misa diad arum a panagkumponian. Onia so naimano na sakey a nars: “Arum ed saray maedad lan Tasi ya agla makapansalitan maong so inlugan ed wheelchair pian mimisa, ya agni ra tinepetan no kasin labay da odino andi.” Niarum ni, uusaren na saray empleyado na panagkumponian so agew na inkianak, Krismas, tan arum ni ran selebrasyon pian nauman so rotina na saramay aasikasoen da. Arum a Tasi so inopresian na saray taganon ag-iyabuloy na konsiensia ra a kanen. (Gawa 15:29) No regular tayon bisitaen irayan agagin mamasiken tan akukulaw, natulongan tayo ra ed ontan iran problema.

Suporta na Kongregasyon

Saray inmunan Kristiano et alerto ed responsabilidad da ed saray maedad la ya andian na pamilyan manusuporta’d sikara. (1 Tim. 5:9, NW) Mipadpara, seseguroen na mamatatken ed kongregasyon natan ya agnapapaulyanan iray maedad lan manaayam ed saray panagkumponian. * Onia so imbaga nen Robert, sakey a matatken ed kongregasyon: “Maabig no say sakey a Kristianon manangasikaso et personal ya ombisita ed saray maedad la pian nanengneng ton mismo so kipapasen na panagbilay da tan makapanpikasin kaiba ra. Dakel so nagawaan na kongregasyon pian naasikaso iray pankaukolan da.” No mangigagana tayoy panaon pian bisitaen iray  maedad la, ipapanengneng tayo ya amta tayon im-importante ed si Jehova so pangasikaso ed saray mankaukolan.​—Sant. 1:27.

Saray mamatatken et nepeg ya akaparaan a mangiyuksoy na praktikal a tulong parad saray maedad lan agagi a manaayam ed panagkumponian. Nia so sakey a pankaukolan a naimano nen Robert: “Nepeg tayon pasesegen iray maedad la ya atendian iray Kristianon pantitipon no sarag da ni.” Balet, no agda la sarag so manbiahe paonla’d Kingdom Hall, manggawa na arum ya uksoyan iray mamatatken. Si Jacqueline a manedad lay masulok ya 80 tan walay sakit ton osteoarthritis, et ondedengel ed saray aral panamegley na telepono. Onia so imbaga to: “Nagugunggonaan ak a maong sano narerengel koy aral legan a nagagawa itan. Anggan antoy nagawa et agko labay itan a palampasen!”

No aliwan posible so idengel ed saray aral panamegley na telepono, nayarin iyuksoy na mamatatken ya irekord iratan. Pankanawnawa na agin mangiyakar ed inrekord ya aral a pasesegen imay agin maedad la. Onia so imbaga na sakey a matatken ed kongregasyon: “No balitaan tayo irayan maedad la nipaakar ed saray agagi’d kongregasyon, nalikna ra a kabiangan ni ran siansia na espiritual a pamilya tayo.”

Pansiansiaen so Komunikasyon

Natural labat a manpaga odino nagonigon iray maedad la sano manayam la ra’d panagkumponian. Bilang resulta, nayarin ibiig day inkasikara tan agda la labay so milimog ed arum. Balet, sano kaalis da ed panagkumponian et bisitaen tayo ran tampol tan lawas tayo ran suportaan, baleg so nitulong tayo pian anggan panon et onliket ira tan ondeen lamet so kanonotan da.​—Uli. 17:22.

No bilbilang ta matantan lay panagnonot tan makapuy lay pakadngel da, odino nanairapan la ran mitongtong, ompan isipen na arum ya anggapoy gunggona na ibisita’d sikara. Balet nonoten tayo ya anggan antoy irap na pitongtong ed sikara, saray sagpot tayon bisitaen iran naynay et mangipanengneng a lawas tayon ‘manunaan ed pangiter na dayew’ odino galang ed saray kapananisiaan tayo. (Roma 12:10, Maung a Balita) No nakakabaw met la ra, pangistoryaen tayo ra na saray eksperiensya ra nensaman, anganko et nipaakar ed impanugaw da odino no panon dan naamtaan so katuaan na Biblia. Antoy gawaen tayo no agda napugta so labay dan ibaga? Maanos ya ondengel tan no matukoy et mamitla na duara odino taloran salita a nayarin aman iramay labay dan ibaga. Odino ibaga tayo ed antikey imay labay dan ibesngaw insan paituloy tayoy istorya ra. No nawewetwet la ra odino nanairapan la ran mansalita tan ngalngali agtayo natalosan, imanoen tayon maong so tonada na panagsalita ra pian natalosan tayoy ibabaga ra.

Panon balet no agla ra makapansalita? Wala ni sarag tayon gawaen. Regular a bibisitaen nen Laurence, sakey a biin payunir, so agin 80 años a si Madeleine. Agla makasalita si Madeleine balet ta onia so inkuan nen Laurence a gagawaen to pian makapitalosan ed sikato: “Sankabembenan koy lima nen Madeleine legan min sankaiba a manpikasi. Insan to’d satan piriten so limak tan ikirem toy mata to pian ibalikas so panamabli ed oniaran makapatenyeg-puson bekta.” Petepeteg a naligliwa iray maedad lan kakaaro tayo sano bembenan tayo so lima ra odino maar-aro tayo ran lakapen.

Importante so Ibisita Yo

Nayarin mas naasikaso iray maedad la no regular yo ran bisitaen. Ngalngali 20 a taon lan ombibisita si Danièle ed saray kaagian diad panagkumponian tan onia so naimano to: “Mas apipigeren na saray nars so pangasikaso ed kukumponien da no naimano ran walaray regular ya ombibisita ed sikato.” Si Robert, ya inaon la nen niman, so angibaga na onia: “Mas dengelen na saray nars so ombibisita a regular nen samay sagpaminsan labat ya ombisita.” Maslak a walaray mareklamon pamilya a napipidenengan na saray nars, kanian apresyaen da no walaray ombisita a misalamat ed sikara. Ontan met, no maong so pidedeneng tayo ed saray nars, mas respetoen da ray prinsipyo tan sisisiaen na saray maedad lan Tasi ya aasikasoen da.

 Mas ondakep so pipiulop tayo ed saray nars no tulongan tayo ra ed saray simplin kimey. Walaray lugar a kulang so kualipikadon nars kanian agnaaasikason maong iray maedad la. Sirin et oniay insuheri na sakey a nars a si Rébecca: “Dakdakel so trabaho sano oras lay panangan, kanian mas maabig no onian oras so ibisita pian tulongan so maedad la ed pangan to.” Agtayo masuyat a tepetan iray nars no panon tayo ran natulongan.

No regular tayon ombisita, nanengneng tayo no antoray pankaukolan na saray kaagian tayon maedad la, tan no iyabuloy na panagkumponian et sikatayo lay manggaway paraan pian niiter iratan a pankaukolan. Alimbawa, nayari tayon parakepen so kuarto ra tan sabitan itan na saray litrato na inad-aro da’d bilay odino drowing na saray ugugaw. Lapud iisipen tayoy pankaabigan da, nayarin iyawitan tayo ira na komportablen kawes odino sabon, pulbo tan arum ni ran usar da. No walay hardin diman ed panagkumponian, sarag tayo ra kasin ipaway pian makasungap met ira na preskon dagem? Onia so imbaga nen Laurence, ya inaon la nen niman: “Pitalaran nen Madeleine so sinimban ibibisitak ed sikato. Sano nanengneng ton walaray kaibak ya ugugaw, tampol a makaimis tan onligsay lupa to!” Baleg so epekto na ontan iran sagpot tayo ed saramay manaayam diad panagkumponian.​—Uli. 3:27.

Nagugunggonaan Tayo Met

Sano regular tayon bisitaen iray mamasiken tan akukulaw, nayarin nasubok so “katooran na aro [tayo].” (2 Cor. 8:8) Diad anton paraan? Nayarin makapaermen a nanengneng so kaaro tayon kalkalnan onkakapuy. Inaksobi nen Laurence: “Nen unaan, kada kayari ibisitak ed si Madeleine et iyaakis ko ta naapektoan ak a maong na ikakapuy to. Balet ta nalmoan kon makatulong so masimoon a pikakasi pian ag-onkapuy so liknaan, diad ontan et mas napaseseg iramay bibisitaen ko.” Pigay taon lan bibisitaen nen Robert so agin manngaran na Larry a walay sakit ton Parkinson’s. Onia so inkuan nen Robert: “Grabe lay sakit nen Larry kanian agko natalosan so anggan sakey a salitan ibabaga to. Balet no manpikasi kamin saniba, naliknak nin siansia so pananisia to.”

Sano bibisitaen tayo ray kapananisiaan tayon maedad la, agtayo labat ira natutulongan, noagta anggan sikatayo et nagugunggonaan met. Say determinasyon dan mansiansian maapit ed si Jehova anggaman duma so sisisiaen na saray kalimog da et mangibabangat ed sikatayo a nepeg itayo met a nawalaan na pananisia tan inkakpel. Say gunaet dan mangawat na espiritual a tagano anggaman makapuy lay mata tan layag da, so mangipapabitar ya “aliwa a say tinapay labat so napambilay na too noag say amin a salitan ombesngaw ed sangi’ Dios.” (Mat. 4:4) Sano nanenengneng tayon panliliketan da ray simplin bengatla, a singa say imis na ugaw odino say pangan a saniiba, nipapanonot da ed sikatayo so pagmaliw a kontento ed no antoy wala. Say panamabli ra ed espiritual iran bengatla so ontulong ed sikatayo a nawalaan met na dugan prayuridad ed bilay.

Talagan nagugunggonaan so interon kongregasyon sano susuportaan tayo iray maedad la. Akin a nibaga tayo itan? Kakkaukolan na saramay maletey ed pisikal so inaagin panangaro, kanian iikdan da so kongregasyon na pankanawnawan mas nipalikna so panangabagey ed sikara. Sirin, anggaman andukey a panaon so pangasikaso’d saray maedad la, ipasen tayon amin a kabiangan itan na panaglingkor tayo ed sakey tan sakey. (1 Ped. 4:10, 11) No idaulo iya na saray mamatatken, natulongan da so arum ya agagi ed kongregasyon a namorian nepeg ya agbalot ibaliwala iyan kimey tayo bilang Kristiano. (Eze. 34:15, 16) No mabulos tan maaro tayon suportaan iray agagin maedad la, papaseguroan tayo ira ya agtayo ran balot lilingwanan.

[Paimano ed leksab]

[Blurb ed pahina 28]

“Mas apipigeren na saray nars so pangasikaso ed kukumponien da no naimano ran walaray regular ya ombibisita ed sikato.”

[Litrato ed pahina 26]

Saray impapuson pikakasi tayo so makatulong ed maedad lan agagi pian ondeen so kanonotan da

[Litrato ed pahina 26]

Napabiskeg iray maedad lan kapananisiaan sano ibalikas tayoy panangaro ed sikara