Manpasakop ed Autoridad nen Jehova

“Saya so aro na Dios, a sumpalen tayo so saray ganggan to: tan saray ganggan to aliwa ran ambelat.”​—1 JUAN 5:3.

1, 2. (a) Akin et aglabay na dakel natan so manpasakop ed autoridad? (b) Talaga kasin anggapoy mangokontrol ed saramay agmalabay a mangunor ed autoridad? Ipaliwawa.

 NATAN, dakel la so agmalabay a manpasakop ed autoridad. Nipapanengneng ed balikas ya “agko labay a walay mangibaga no antoy gawaen ko” so panmoria na saramay agmankaliktan a mangunor ed autoridad. Balet, talaga kasin anggapoy mangokontrol ed sarayan totoo? Andi! Diad tua, maslak ed sikara et alig-alig labat ed saray estandarte na dakel a totoon “miaabobon unong ed sayan mundo.” (Roma 12:2) On, aliwa ran bulos noagta sikaray “aripen na inkabulok,” unong ed salitan inusar na apostol a si Pedro. (2 Ped. 2:19) Manbibilay ira “unong ed kaugalian na sayan mundo, unong ed pangulo na pakayari dagem,” si Satanas a Diablo.​—Efe. 2:2.

² Oniay mapasirayew ya imbaga na sakey ya autor: “Agko aabuloyan a saray ateng ko odino sakey a pari odino ministro . . . odino say Biblia so mandesidi no antoy duga parad siak.” Tua, nayarin aabusoen na arum so autoridad da tan agda kanepegan so pangunor tayo. Balet, solusyon kasi so pangipulisay ed antokaman a nakaukolan a panangigiya? No nengnengen tayon magano iray paulon-balita na peryodiko, naamtaan tayo so makapagonigon ya ebat. Makapaermen ta diad panaon a kakkaukolan na katooan so panangiwanwan, dinmakel laingen so agmalabay a mangawat ed satan.

Say Panmoria Tayo ed Autoridad

3. Panon ya impanengneng na saray Kristiano nen inmunan siglo ya aliwa ran singa bulag ya unor-unor labat ed autoridad na too?

³ Bilang Kristiano, say talindeg tayo et midumaan ed mundo. Balet, aliwa itayon singa bulag  ya unor-unor labat ed amin ya ibabaga’d sikatayo. Diad kasunian, walaray panaon ya agtayo nepeg ya unoren so labay na arum anggan wala ra’d autoridad. Onia so ginawa na saray Kristiano nen inmunan siglo. Singa bilang, sanen papatundaen a manpulong iray apostol, ag-ira tinmakot tan agda inunor so ganggan na atagey a saserdote tan arum a walad autoridad a kabiangan na Sanhedrin. Ginawa ra labat so makanepegan imbes a tuloken so autoridad na too.​—Basaen so Gawa 5:27-29.

4. Antoran alimbawa ed Hebreon Kasulatan so mangipapanengneng ya ag-inalig na dakel a totoo na Dios so gagawaen na karaklan?

⁴ Ontan met so talindeg na amayamay a lingkor na Dios sakbay na panaon nen Jesus. Alimbawa, si Moises et “agto ginabay a nangaranan na anak na saman a marikit nen Faraon; a pinili to a nilabi so mantepel ed irap na saman a baley na Dios,” anggano nansengegan itan na “sanok na ari.” (Heb. 11:24, 25, 27) Say sakey nin alimbawa et si Jose ya angipulisay ed pananagyat na asawa nen Potifar, a walaay pakayarin ombawi tan mamasakit ed sikato. (Gen. 39:7-9) Ontan met si Daniel ya “inggetma to ed puso to ya agto tilolan so inkasikato ed saray kanen na ari,” anggaman say talindeg to ed sayan pamaakaran et ag-inabobonan na manunan opisyal na korte ed Babilonia. (Dan. 1:8-14) Ipapanengneng na sarayan alimbawa ya unong ed awaran et walay mapekder a talindeg na saray totoo na Dios ed no antoy duga, antokaman so pansumpalan. Agda inunor so panlabayan na arum para labat ed pabor. Ontan met so nepeg tayon gawaen.

5. Panon a say panmoria tayo ed autoridad et midumaan ed panmoria na mundo?

⁵ Say mapekder a talindeg tayo et midumaan ed inkaawet na ulo; tan ag-itayo kapara na arum a nanrebelde pian ipanengneng labat ya ag-ira onaabobon ed politika. Imbes, determinado itayon manpasakop ed autoridad nen Jehova nen say autoridad na too. No say ganggan na too et onkontra la’d ganggan na Dios, aliwan mairap a desisyonan no antoy gawaen tayo. Singa saray apostol nen inmunan siglo, unoren tayo so Dios bilang manuley nen saray totoo.

6. Akin et lawas a sankaabigan so pangunor ed saray ganggan nen Jehova?

⁶ Anto so akatulong ed sikatayo a manpasakop ed autoridad na Dios? Mipakna itayo ed ibabaga na Uliran 3:5, 6: “Manmatalek ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Matalek itayon antokaman so pagagawa na Dios ed sikatayo et parad pankaabigan tayo lanlamang. (Basaen so Deuteronomio 10:12, 13.) Diad tua, deniskribe nen Jehova so inkasikato ed saray Israelita bilang say “angibangat ed sika na nipaakar ed nabang mo, a mangitonton ed sika ed dalan a laen mo.” Insan inyarum to: “O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.” (Isa. 48:17, 18) Manmamatalek itayo ed saratan a balikas. Kombinsido itayon say pangunor ed saray ganggan na Dios et lawas a parad pankaabigan tayo.

7. Anto so nepeg tayon gawaen no walay agtayo tanton natatalosan a ganggan a walad Salita na Dios?

⁷ Manpapasakop itayo ed autoridad nen Jehova tan sikatoy uunoren tayo anggan agtayo tanton natatalosan so rason ed arum a kakaukolanen a walad Salita to. Aliwa iyan bulag a panigsisia, noagta panagmatalek. Ipapatnag na saya so impapuson kompiyansa tayo ya amta nen Jehova no antoy maabig parad sikatayo. Say pangunor tayo et pakapatnagan met na panangaro tayo, lapud oniay insulat nen apostol Juan: “Saya so aro na Dios, a sumpalen tayo so saray ganggan to.” (1 Juan 5:3) Balet, wala ni sananey ya aspekto na panangunor tayo ya agnepeg ya ibaliwala.

Ipasal so Pakatebek Tayo

8. Panon a say nipasal a pakatebek tayo so mikonektaan ed panagpasakop ed autoridad nen Jehova?

⁸ Ibabaga na Biblia a nepeg tayon ‘ipasal so pakalikna [odino pakatebek] a mangibiig na maong tan mauges.’ (Heb. 5:14) Kanian, say kalat tayo et aliwa labat lan pian unor-unor ed ganggan na Dios ya agla maniisip; noagta, labay tayon ‘nibiig so maong tan mauges’ base ed estandarte  nen Jehova. Labay tayon natebek no akin a makabat so pangunor ed si Jehova, pian nibaga tayo so inkuan na salmista: “Say ganggan mo wala ed dalem na pusok.”​—Sal. 40:8.

9. Panon tayon nitunos so konsiensia tayo ed saray estandarte nen Jehova, tan akin ya importantin gawaen tayo itan?

⁹ Pian natebek tayo so kakanaan na ganggan nen Jehova a singa impangapresya na salmista, nepeg tayon dalepdepen so nababasa tayo ed Biblia. Singa bilang, sano naaralan tayo so nipaakar ed sakey a kakaukolanen nen Jehova, nayarin itepet tayo: ‘Akin et makabat iyan ganggan odino prinsipyo? Akin et parad pankaabigan ko so pangunor ed saya? Antoray mauges a nansumpalan na saramay angibaliwala ed sayan simbawa na Dios?’ No say konsiensia tayo et mitunosan ed saray estandarte nen Jehova, mas makagawa itayo na saray desisyon a mipakna ed linawa to. Nitultuloy tayon ‘talosan no anto so linawa na Katawan,’ insan panseetan ya unoren itan. (Efe. 5:17) Balet, aliwan naynay a mainomay iya.

Panggugunaetan nen Satanas a Deralan so Autoridad na Dios

10. Anto so sakey ya aspekto a nanggunaetan nen Satanas a deralan so autoridad na Dios?

¹⁰ Abayag lan panggugunaetan nen Satanas a deralan so autoridad na Dios. Sankaimano so agmapasakop ya awawey to ed dakel a paraan. Alaen tayo pan alimbawa so agpanrerespeto ed uksoyan na Dios ed panangasawa. Walaray manaamong ya agkasal, bangta arum so manggagaway paraan pian misian ed asawa ra. Saraya et nayarin mipakna ed sakey a kabkabat ya artistan bii ya angikuan: “Balanglan laki odino bii ka, imposiblin saksakey labat so asawam.” Inyarum to ni: “Anggapo ni kabat kon matoor odino labay to so manmatoor ed asawa to.” Mipadpara, oniay inkuan na sakey a bantog ya artistan laki lapud saray agtinmalonan relasyon to: “Agak segurado no talagan natural ed sikatayo a saksakey labat so labay tayon nakaiba diad interon bilay tayo.” Kaukolan tayon tepetan so inkasikatayo, ‘Manpapasakop ak kasi ed autoridad nen Jehova nipaakar ed panangasawa, odino kasin naimpluensyaan ak la na panmoria na sayan mundo a say panangasawa et aliwan permanente?’

11, 12. (a) Akin et nairapan iray kalangweran a manpasakop ed autoridad nen Jehova? (b) Mangisalaysay na sakey ya eksperiensyan mangipapanengneng a makapuy so pansumpalan na pangibaliwala ed saray ganggan tan prinsipyo nen Jehova.

¹¹ Kasin sakey kan kalangweran ed organisasyon nen Jehova? No ontan, sika so manunan puntirya nen Satanas tan labay ton isipen mo a say autoridad nen Jehova et aliwan parad pankaabigan mo. Lapud “saray ibibeg ya inuugaw” kaiba lay desdes na saray kaedaran mo, nayarin isipen mo a say ganggan na Dios et makapabelat. (2 Tim. 2:22) Agmo aabuloyan a nagawa itan. Panseetan mon talosan no akin a makabat so pangunor ed saray estandarte na Dios. Bilang alimbawa, ibabaga na Biblia ed sika ya ‘ibatikan mo so pilalawanan.’ (1 Cor. 6:18) Diad saya lamet a punto et tepetan mo pay inkasika: ‘Akin et makabat iyan ganggan? Panon a makagunggona ed siak so pangunor ed saya?’ Nayarin walaray kabat mon angibaliwala ed simbawa na Dios insan mauges so nansumpalan da lapud satan a lingo. Talaga kasin maliket ira natan? Kasin mas maabig so bilay da nen say nen wala ni ra’d organisasyon nen Jehova? Talaga kasin walay nalmo ran sekreto na liket ya ag-aromog na saray lingkor na Dios?​—Basaen so Isaias 65:14.

¹² Imanoen pa so inkomento na sakey a Kristianon  manngaran na Sharon pigaran panaon ni labat so apalabas: “Lapud imbaliwalak so ganggan nen Jehova, akala ak na makapatey a sakit ya AIDS. Naynay kon nononoten iramay maliket a taon na impanserbik ed si Jehova.” Amoria ton aliwan makabat so panumlang ed ganggan nen Jehova tan komon et pinabli ton maong iratan. Saray ganggan nen Jehova et parad dilin proteksion tayo. Inatey si Sharon pitoran simba ni labat so apalabas kayari ton insulat iratan a balikas. Unong ya ipapanengneng na makapaermen ya eksperiensya nen Sharon, anggapon balot so maong a niyopresi nen Satanas ed saramay nagmaliw a kabiangan na sayan mauges a sistema. Bilang “ama na tila,” dakel so isisipan to, balet agto iratan totooren a singa ed samay ginawa to’d si Eva. (Juan 8:44) On, lawas sankaabigan so pampasakop ed autoridad nen Jehova.

Ipulisay so Agmapasakop ya Awawey

13. Diad anton aspekto a nepeg tayon ipulisay so agmapasakop ya awawey?

¹³ Diad pamidbir ed autoridad nen Jehova, nepeg tayon ipulisay so agmapasakop ya awawey. Ompan lapud inkamapaatagey et nalikna tayon agtayo kaukolan so panangigiya na siopaman. Singa bilang, nayarin agtayo awaten so simbawa na saramay mangidadaulo ed totoo na Dios. Inyuksoy na Dios a say matoor tan makabat ya aripen so mangitarya na espiritual a tagano diad dugan panaon. (Mat. 24:45-47) Nepeg a mapaabeba tayon bidbiren a satan so paraan na pangaasikaso nen Jehova ed saray totoo to natan. Aligen iray matoor ya apostol. Sanen agapol so arum a babangatan, oniay intepet nen Jesus ed saray apostol: “Labay yo met so ontaynan?” Inmebat si Pedro: “Siopa so laen mi? Wala ed sika so saray salita na maando a bilay.”​—Juan 6:66-68.

14, 15. Akin et nepeg a mapaabeba itayon manpasakop ed simbawa na Biblia?

¹⁴ Say panagpasakop ed autoridad nen Jehova et mankabaliksan na ikiwas unong ed simbawa na Biblia. Alimbawa, papasakbayan itayo na matoor tan makabat ya aripen a “manpuyat itayo tan mandangka itayo.” (1 Tes. 5:6) Dugaruga itan a simbawa ed sarayan kaunoran ya agew ta dakel so ‘maaro ed laman da, maaro ed pilak.’ (2 Tim. 3:1, 2) Nayari itayo kasin naimpluensyaan na sayan kasmak ya ugali? On. No unaen tayo iray sekular a kalat, nayarin makatemeg itayo’d espiritual, odino magmaliw a materyalistiko. (Luc. 12:16-21) Kanian, talagan makabat no unoren so simbawa na Biblia tan paliisan iray sinisiblet a paraan na kabibilay a kasmak ed mundo nen Satanas!​—1 Juan 2:16.

¹⁵ Say espiritual a tagano manlapud matoor tan makabat ya aripen a klase so ipapasabi na saray aturon manangasikaso ed lokal a kongregasyon. Bibilinen itayo na Biblia: “Ontulok kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipapalinewan: pian sikato ya so gawaen da a sigagayaga, tan aliwa a sieermen: ta saya agmakapaabig ed sikayo.” (Heb. 13:17) Labay to kasin ibaga ya agnalilingo iray mamatatken ed kongregasyon? Siempre andi! No ikompara’d too, mas malinew a nanenengneng na Dios so agda inkaperpekto. Anggaman ontan, siansia nin iilaloan ton magmaliw itayon mapasakop. Say pikokoopera ed saray mamatatken, anggano ag-ira perpekto, et mamapaneknek a manpapasakop itayo ed autoridad nen Jehova.

Say Kaimportantian na Inkamapaabeba

16. Panon tayon nipanengneng so respeto ed si Jesus bilang Ulo na Kristianon kongregasyon?

¹⁶ Nepeg a lawas tayon tandaan a si Jesus so  peteg ya Ulo na kongregasyon. (Col. 1:18) Sakey itan a rason no akin a mapaabeba itayon manpapasakop ed panangiwanwan na saray aturon mamatatken, ya iiter tayo ed sikara so “sankabalgan a panamagalang.” (1 Tes. 5:12, 13, Maung a Balita) Siempre, nipatnag met na saray mamatatken a sikaray mapasakop no maalwar dan ipasabi ed kongregasyon so mensahe na Dios, aliwan saray dilin opinyon da. ‘Agda pasusulokay nisulat’ pian ipaseseg labat so personal ya ideya ra.​—1 Cor. 4:6, Maung a Balita.

17. Akin et mapeligro so pagmaliw ya ambisyoso?

¹⁷ Nepeg a manalwar so amin a membro na kongregasyon ompan say piimano da la et say dilin kirayewan da. (Uli. 25:27) Mapatnag ya apalikdo ed satan so sakey a babangatan a kabat nen apostol Juan. Oniay insulat to: ‘Si Diotrefes, a labay ton sikatoy katagtageyan ed limog da et agto kami akoen. Kanian no onsabi ak, ipanonot ko so kagagawa to, a gagawaen to, a pitalabutob to kami na maramsak iran salita.’ (3 Juan 9, 10) Pati sikatayo natan et makaaral ed satan. Walay maabig a rason no akin a nepeg tayon ekalen so antokaman ya ambisyoson awawey a naimano tayo ed inkasikatayo. Ibabaga na Biblia ed sikatayo: “Say mapangta onla ed unaan na kabagbag, tan say mapasang ya espiritu ed unaan na kapelag.” Nepeg a resistian na saramay manpapasakop ed autoridad na Dios so patit na inkamapalakbat, ta no andi et manresulta itan ed kababaingan.​—Uli. 11:2; 16:18.

18. Anto so makatulong ed sikatayon manpasakop ed autoridad nen Jehova?

¹⁸ On, panseetan mon resistian so agmapasakop ya espiritu na mundo tan bidbir mo so autoridad nen Jehova. Diad panapanaon, dalepdep mo so baleg a pribilehyom a manserbi ed si Jehova. Say impagmaliw mon sakey ed saray totoo nen Jehova et ebidensya a sikay inyasingger to panamegley na masanton espiritu to. (Juan 6:44) Agmon balot ibabaliwala so relasyon mo ed Dios. Diad amin ya aspekto na bilay mo et pansagpotan mon ipanengneng ya ipupulisay mo so independentin awawey tan ipatnag mon manpapasakop ka ed autoridad nen Jehova.

Kasin Nanonotan Mo?

• Anto so kabaliksan na panagpasakop ed autoridad nen Jehova?

• Panon a say nipasal a pakatebek tayo so mikonektaan ed panagpasakop ed autoridad nen Jehova?

• Diad antoran aspekto a sasalien nen Satanas a deralan so autoridad na Dios?

• Diad panagpasakop ed autoridad nen Jehova, akin ya importante so inkamapaabeba?

[Tepetepet Parad Panagaral]

[Litrato ed pahina 18]

“Nakaukolan ya unoren mi so Dios, nen saray totoo”

[Litrato ed pahina 20]

Lawas makabat so pangunor ed saray estandarte na Dios