Koma-124 ya Impangraduar ed Gilead

Saray Misionero et Inyaliling ed Duroduron

KADA anem bulan, say Watchtower Bible School of Gilead et mangiyuuksoy na programa parad pangraduar na saray estudyante, a ditan et imbitado so interon pamilyay Bethel diad Estados Unidos. Nen Marso 8, 2008, say pamilyan Bethel tan saray bisitan nanlapud masulok a 30 a bansa so inmatendi ed impangraduar na koma-124 a klase na Gilead School. Amin na 6,411 ya inmatendi et akiliket ed saray estudyante ed sayan espisyal ya agew da.

Inggapo itan nen Stephen Lett, say tsirman na programa tan membro na Mananguley ya Ulop, panamegley na paliwawa ya apauloan na “Onla Kayo a Kaiba so Simbolikon Duroduron nen Jehova.” Nen 1919, walay melag a grupo na saray alanaan a Kristiano a nagmaliw ya aktibo lamet ed panaglingkor ed si Jehova, tan sayan grupo et inyaliling na Apocalipsis 9:1-4 ed kimuyekyek a duroduron a biglan inmataki. Pinanonotan iray estudyante a bilang kabiangan na ‘arum a karnero’ et sikaray akiiba ed sarayan simbolikon duroduron.​—Juan 10:16.

Say sinmublay a nampaliwawa et si Lon Schilling, membro na Komite na Sanga na Estados Unidos, tan say tema to et “Magmaliw a Kapanoan.” Nibase iya ed ehemplo na sanasawan Kristiano nen inmunan siglo a si Aquila tan Priscila (odino Prisca) a nisulat ed Biblia. (Roma 16:3, 4) Sayan grupo a nangraduar ed Gilead et tutugyopen na 28 a sanasawa. Sikaray pinanonotan a kaukolan dan pansiansiaen a malet so bedber na panamaley da pian magmaliw iran matalona ed misioneron kimey. Sano sasalambiten na Biblia so nipaakar ed si Aquila, kaiban-kaiba so ngaran na akulaw ton si Priscila. Sirin, sayan sanasawa et impasen nen apostol Pablo tan na kongregasyon a talagan saksakey. Mipadpara, saray sanasawan misionero natan et nepeg a mankimey a sankaiba, mandayew ed si Jehova a sankaiba, tan mangarap ed saray nikadkaduman angat ed asainmin da a sankaiba. No ontan so gawaen da, talagan manpanoan ira.​—Gen. 2:18.

Kayari na satan et impaliwawa nen Guy Pierce, membro na Mananguley ya Ulop, so teman “Onkiwas Unong ed Kamaongan nen Jehova.” Impaliwawa ton say pagmaliw a maong et aglabat mankabaliksan na agpanggawa na mauges. Say maong a too et manggawa na kamaongan pian nagunggonaan so arum. Anggapo lay sankamaongan noagta si Jehova a Dios. (Zac. 9:16, 17) Say kamaongan tan panangaro na Dios et mamakiwas ed sikatayon manggawa met na maong ed arum. Diad unor iran balikas nen Brother Pierce et kinomendaan to iray estudyante diad impangikuan ton: “Maong la so nagagawaan yo. Matalek kamin mantultuloy kayon onkiwas unong ed kamaongan na Dios panamegley na panggawa yo ni kamaongan diad antokaman ya asainmin ya iter nen Jehova a Dios ed sikayo.”

Si Michael Burnett, sakey a datin misionero tan diad agano ni et niasain bilang instruktor ed Gilead, so tinmumbok ya angipaliwawa ed teman “Ibedber Mo Itan a Singa Walad Arap na Nanleetan na Saray Matam.” Nepeg a nodnonoten na saray Israelita nensaman so mamilagron impangiliktar nen Jehova ed sikara manlapud Ehipto, a  singa walay ibedber da ed ‘arap na nanleetan na saray mata ra.’ (Exo. 13:16) Pinaseseg nen Brother Burnett iray estudyante a nodnonoten so daakan ya instruksion a naawat da ed Gilead School, ya ibedber da itan ed arap na nanleetan na saray mata ra, a singa panangibaga. Indanet to met a kaukolan day magmaliw a mapaabeba tan mauyamo tan iyaplika iray prinsipyon walad Biblia sano resolbien day antokaman ya ag-impakapitalosan ed saray kapara ran misionero odino ed arum.​—Mat. 5:23, 24.

Si Mark Noumair, sakey ya abayag lan instruktor ed Gilead, so angipaliwawa ed teman “Anto Kasi Ikansion Nipaakar ed Sika?” Nensaman, niyugali so panselebra ed impanalo’d bakal panamegley na kansion. Inwalwal na sakey ed saratan a kansion a say tribu na Ruben, Dan, tan Aser et agda labay so pausar, balet ta indaydayew na satan so tribu na Zabulon lapud inkamasakripisyo ra. (Uko. 5:16-18) Singa saray liriko na sakey a kansion, saray gawa na balang Kristiano et nakabatan lanlamang na arum. Sano say sakey et maseseg ed kimey na Dios tan lawas matoor ed panangidirehi na organisasyon To, napaliket toy Jehova tan  magmaliw a maong ya ehemplo ed saray agagi. Legan a dengdengelen na saray agagi’d kongregasyon so aliling to’y kansion a nisusulat na saray gawa tayo, napapakiwas iran mangalig ed maong ya alimbawa tayo.

Bilang kabiangan na panangipasal ed Gilead, say koma-124 a klase et angusar na manga 3,000 oras ed panagpulong a kimey. Diad teman “Panutumbok ed Panangiwanwan na Masanton Espiritu,” insalaysay na saray estudyante ed si Sam Roberson na Theocratic Schools Department so pigaran eksperiensya ra ed lawak na kimeyan, tan inyakto da ni ingen so arum ed saratan. Kayari na sarayan makapaseseg ya eksperiensya, ininterbio nen Patrick LaFranca, membro na Komite na Sanga na Estados Unidos, so pigaran nanaral ed Gilead tan natan et manlilingkor la’d nanduruman bansa. Apresyaen na saray estudyante iray praktikal a simbawa na sarayan misionero.

Si Anthony Morris, a membro na Mananguley ya Ulop, so unor a nampaliwawa ed teman “Tandaan, Temporaryo Labat Iray Bengatlan Nanengneng.” Papasesegen itayo na Kasulatan ya iteen tayoy imano tayo, aliwan diad saray nasasagmak tayon temporaryon kairapan, noagta diad saray bendisyon nen Jehova ed arapen. (2 Cor. 4:16-18) Say pirmin irap na bilay, ag-inkahustisya, panaglames, sakit, tan ipapatey et aktual a naiimatonan tayo natan. Sarayan makapasinagem a kipapasen et nayari met a naeksperiensyan mismo na saray misionero. Balet, natulongan itayon mansiansian positibo tan mantultuloy ya iyuna si Jehova ed bilay tayo no tandaan tayon sarayan bengatla et temporaryo labat.

Bilang konklusyon na programa, saray nangraduar et wala la’d entablado legan dan tatalinengen so unor la ran bilin nen Brother Lett. Pinaseseg to iran ag-onsusuko tan inkuan to: “Antokaman so subok a naeksperiensya tayo, makapan-anos tan makapanmatoor itayo diad tulong nen Jehova.” Pinaseseg to met irayan balon misionero a magmaliw a singa duroduron, a determinadon itultuloy so panlingkor ed si Jehova tan mansiansian maseseg, matoor, tan matulok ed andi-angga.

[Kahon ed pahina 30]

ESTATISTIKA NA KLASE

Bilang na bansa a nanlapuan: 7

Bilang na bansa ya angibakian: 16

Bilang na estudyante: 56

Aberids ya edad: 33.8

Aberids a taon ed katuaan: 18.2

Aberids a taon ed sigpot-panaon a ministeryo: 13.8

[Litrato ed pahina 31]

Koma-124 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan ya onggapo ed arap paonla’d beneg, tan saray ngaran so akalista manlapud kawigi a manpakawanan ed kada dasig.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Litrato ed pahina 32]

Say kawalaan na Gilead School et diad Watchtower Educational Center