Saray Pabitar ed Libro a Juan tan Judas
Say Salita nen Jehova et Mabilay
Saray Pabitar ed Libro a Juan tan Judas
SARAY taloran sulat nen apostol Juan, a nayarin nisulat ed Efeso nen 98 C.E. et sakey ed saray sankaunoran a libro a manitibukel ed apuyanan a Kasulatan. Say unonan duaran sulat et mamapaseseg ed saray Kristiano a mansiansian manakar ed liwawa tan manresisti ed apostasya. Diad mikatlon sulat to, aglambengat sinalambit nen Juan so panakar ed katuaan noagta impaseseg to met so pikoopera bilang Kristiano.
Samay sulat nen Judas, ya agi nen Jesus ed ina, et nayarin ginawa to ed Palestina nen 65 C.E. Sikatoy amasakbay ed saray kaparan Kristiano sumpad saray mauges a totoo ya akaloob ed kongregasyon, tan angiter na simbawa no panon a naresistian iray mauges ya impluensya. Say pangimano ed mensahe na taloran sulat nen Juan tan say sulat nen Judas et ontulong ed sikatayon makapansiansian mabiskeg ed pananisia anggaman walaray babeng.—Heb. 4:12.
MANSIANSIAN MANAKAR ED LIWAWA, ARO, TAN ED PANANISIA
Lapud inggagala a parad interon ulop na saramay mikasakey ed Kristo, say unonan sulat nen Juan et mangitatarya na maong a simbawa a denesinyo pian ontulong ed saray Kristiano a makatalindeg sumpad apostasya tan mansiansian agnagiing ed katuaan tan inkatunong. Indanet to so pankaukolan a mansiansian manakar ed liwawa, aro, tan ed pananisia.
‘No manakar itayo ed liwawa, a singa say Dios wala ed liwawa,’ so insulat nen Juan, “wala so pankakasakey ed sikatayo.” Tan lapud say Dios et Lapuan na aro, inkuan na apostol: “[Mantultuloy a] manaaroan so sakey tan sakey ed sikatayo.” Legan a say “aro na Dios” et mamapakiwas ed sikatayon ‘sumpalen iray ganggan to,’ dadaegen tayo so mundo panamegley na “pananisia tayo” ed si Jehova a Dios, ed Salita to, tan ed Anak to.—1 Juan 1:7; 4:7; 5:3, 4.
Makasulatan Iran Tepet a Naebatan:
2:7, 8—Anton “gendat” tan ‘balo’ a ganggan so tutukoyen nen Juan? Say tutukoyen to et samay ganggan nipaakar ed masakripisyon inaagin aro. (Juan 13:34) Tinukoy to itan a “gendat” odino daan lapud ginawa itan nen Jesus, 60 taon lay linmabas sakbay ya insulat nen Juan so unonan apuyanan a sulat to. Kanian wala la itan ed saray mananisia “nanlapu ed gapo” na bilay da bilang Kristiano. Sayan ganggan et ‘balo’ met lapud mas ni so nalalanor nen say basta ‘pangaro na sakey ed kapara ton too a singa sikaton dili’ tan mankaukolan iya na masakripisyon aro.—Lev. 19:18; Juan 15:12, 13.
3:2—Anto so ‘agni nipatnag’ ed saray alanaan a Kristiano, tan siopa so nanengneng da ed “dili ya inkasikato”? Say agni nipatnag ed sikara et no antoy itsura na espiritu a laman da sano napaoli la ra ed tawen. (Fil. 3:20, 21) Anggaman ontan, peteg ya amta ra a “no ompanengneng [so Dios], miulibay [ira] ed sikato, ta nanengneng [da] naani a singa dili ya inkasikato,” salanti say “Espiritu.”—2 Cor. 3:17, 18.
5:5-8—Panon a say danum, dala, tan say espiritu et mamaneknek ed katuaan a si “Jesus [et] sikato so Anak na Dios”? Say danum et nagmaliw a pantasi lapud sanen abautismoan si Jesus, imbalikas a mismo nen Jehova so panangabobon To ed sikato bilang say Anak To. (Mat. 3:17) Say dala odino bilay, nen Jesus, a niiter bilang “impanondon ed saray ganagana,” so mamaneknek met a si Jesus et Anak na Dios. (1 Tim. 2:5, 6) Tan say masanton espiritu et amaneknek a si Jesus et Anak na Dios sanen saya et linmeksab ed sikato nen abautismoan, a tinmulong ed sikato a ‘nanakar-akar a nanggawa na maong tan tinambal to so amin a pinairap na Diablo.’—Juan 1:29-34; Gawa 10:38.
Saray Leksion Parad Sikatayo:
2:9-11; 3:15. No abuloyan na Kristiano so siopaman odino antokaman a maneral ed panangaro to’d saray agagi, sikatoy manaakar ed espiritual a kabilungetan ya agto amta so pugtaan to.
MANSIANSIA KAYON ‘MANAKAR ED KATUAAN’
Inggapo nen Juan so komaduan sulat to ed impangibagan: “Say masiken ed bii a pinili, tan saray anak to.” Imbalikas toy liket to ed impakaamtan ‘arum ed saray anak to et manaakar ed katuaan.’—2 Juan 1, 4.
Kayarin angiter na panamaseseg pian nabayuboan so aro, insulat nen Juan: “Saya so [kabaliksan na] aro, a manakar itayo komon unong ed saray ganggan to.” Amasakbay met si Juan sumpad “manamalingo, tan say antikristo.”—2 Juan 5-7.
Makasulatan Iran Tepet a Naebatan:
1, 13—Siopa imay “bii a pinili”? Nayarin say tutukoyen nen Juan et samay indibidual a tinawag ton Kyria, a Griegon salita a kabaliksan toy “bii.” Odino sikatoy manguusar na piguratibon balikas parad sakey a kongregasyon pian nawetwet iray managpairap. No bilbilang ta para iya ed kongregasyon, saray anak na sayan bii et membro na satan tan ‘saray anak na agi to’ et manutukoy ed membro na arum a kongregasyon.
Saray Leksion Parad Sikatayo:
2, 4. Say impakaamta tayo ed “katuaan,” salanti, amin a Kristianon bangat ed Biblia, tan say itulok ed satan et kakkaukolan parad kilalaban tayo.—3 Juan 3, 4.
8-11. No agtayo labay a nabalang so “[agnaparaan a kaabigan na Dios], panangasi, tan kareenan a manlapu ed Dios Ama tan manlapu ed Jesu-Kristo,” ontan met ed maaron pipiulop ed saray kapara tayon mananisia, kaukolan tayon “imanoen” so inkasikatayo pian naseguron mansiasiansia itayo ed bangat nen Kristo tan ipulisay iramay “agmansiansia” ed satan a bangat.—2 Juan 3.
‘MANKATANGBAYAN ED KATUAAN’
Say komatlon sulat nen Juan et parad maapit a kaaro ton si Gaio. Onia so inkuan to: “Anggapo so babaleg a liket ko nen say saya, salanti say pakadngel ko a saray ana’ko manaakar ira ed katuaan.”—3 Juan 4.
Kinomendaan nen Juan si Gaio lapud panggagawa to na “matoor a kimey” parad saray ombibisitan agagi. “Sikatayo . . . nepeg tayo ya akoen so saraya,” inkuan na apostol, pian “mankatangbayan itayo ed katuaan.”—3 Juan 5-8.
Makasulatan Iran Tepet a Naebatan:
11—Akin a mibibiang so arum ed mauges a kondukta? Lapud agpapablien na arum iray Kristianon bangat, agda nanenengneng so Dios ed mata na pakatalos da. Tan onkikiwas iran singa ag-ira naiimatonan na Dios lapud sikatoy agda nanengneng ed literal a mata ra.—Eze. 9:9.
14—Sioparay natutukoy a “kakaaro”? Say terminon “kakaaro” dia et aglambengat manutukoy ed saramay walaan na maapit a siglaotan ed balang sakey. Inusar iya nen Juan pian tukoyen so amin a mananisia.
Saray Leksion Parad Sikatayo:
4. Saray matatken la’d espiritual ya agagi et makakalikna na gayaga ed pakakanengneng da’d saray ugugaw nin kabiangan na kongregasyon a mansiasiansia a ‘manaakar ed katuaan.’ Tan agnaparaan a gayaga so nalikna na saray atateng no matalona ran natulongan iray anak dan magmaliw a lingkor nen Jehova!
5-8. Kabiangan ed saramay impasyan mansasagpot parad saray agagi ra lapud panangaro’d sikara tan ed si Jehova et saray ombiabiahen manangasikaso, misionero, saray manlilingkor ed Bethel odino diad sangan opisina, tan saray payunir. Nepeg tayon aligen so katooran da, tan kanepegan day maaron suporta tayo.
9-12. Say kaukolan tayon aligen et say matoor ya ehemplo nen Demetrio, aliwan say malabir tan managpauges a si Diotrefes.
“MANSIANSIA KAYO ED PANANGARO NA DIOS”
Deniskribe nen Judas iramay akaloob ed kongregasyon bilang “managmeremere, mareklamo nipaakar ed kipapasen da ed bilay, manutumbok ed saray dilin pilalek da.” “Say bunga na sangi ra et panaglastog, legan ya irarayew da so arum a totoo.”—Judas 4, 16, NW.
Panon a naresistian na saray Kristiano iray mauges ya impluensya? “Inararo,” inkuan nen Judas, “nodnonot yo so saray salita a nensaman imbalikas na saray apostoles na Katawan tayo a Jesu-Kristo.” Inyarum to ni: “Mansiansia kayo ed panangaro na Dios.”—Judas 17-21.
Makasulatan Iran Tepet a Naebatan:
3, 4—Akin a pinaseseg nen Judas iray Kristiano a milaban na impasya nisengeg ed pananisia? Lapud saray ‘agmaridios a totoo et manaakar-akar ya ag-amta ed kongregasyon.’ Sarayan totoo et ‘pagmamaliwen dan kaugsan’ so agnaparaan a kaabigan na Dios parad anggapoy baing a kagagawa.
20, 21—Panon itayon ‘makapansiansia ed aro na Dios’? Wala so taloran paraan pian nagawaan tayo iya: (1) diad pamabiskeg tayo ed “sankasantosan a pananisia” tayo panamegley na maseet a panaral na Salita na Dios tan say maseseg a pibiang ed panagpulong a kimey; (2) pampikasi unong ed ‘masanton espiritu,’ odino ikiwas a mitukoyan ed panangiwanwan to; tan (3) panisia ed dondon bagat nen Jesu-Kristo, say alenleneg a paraan pian nawalaan na andi-anggaan a bilay.—Juan 3:16, 36.
Saray Leksion Parad Sikatayo:
5-7. Kasin nibatikan na saray marelmeng so panangukom nen Jehova? Imposiblin nagawa itan, base’d taloran manamasakbay ya alimbawa ya indalatdat nen Judas.
8-10. Kaukolan ya aligen tayo so alimbawa nen Miguel ya arkanghel tan mangipanengneng na respeto ed saramay inikdan nen Jehova na autoridad.
12. Saray apostatan mankuankuanan a maaro et mapeligro ed pananisia tayo. Singa iratan akaamot a batobato ed dalem na dayat a mamipeligro ed saray barko tan lumalangoy. Ompatnag a mabunlok irayan palson managbangat, balet singa ira lurem ya andiay danum lapud nakatan ira ed espiritual. Anggapo so bunga na saraya tan singa ira inatey a kiew ed pansamposampot na autumn. Kadederal so pansumpalan na saraya a singa ira binagot a kiew. Makabat sirin so ipaliis tayo ed sarayan apostata.
22, 23. Kabusol na saray tuan Kristiano so kaugsan. Lapud seseg dan iliktar iray ‘walaan na panduaruwa’ manlapud andi-anggaan a kadederal, saray matatken la’d espiritual, nagkalalo la’d saray manangasikaso ed kongregasyon et mangitatarya na espiritual a tulong.
[Saray litrato ed pahina 28]
Papaneknekan na danum, espiritu, tan dala a “si Jesus sikato so Anak na Dios”