Say Salita nen Jehova et Mabilay

Saray Pabitar ed Libro ya Apocalipsis​—I

LEGAN a walad prisoan diad isla na Patmos, say masiken lan apostol Juan et akaawat na 16 a nantutumbokan a pasingawey. Diad saratan a pasingawey et anengneng to no antoy gawaen nen Jehova a Dios tan si Jesu-Kristo legan na agew na Katawan​—say panat na panaon a saknapen to so manlapud inkiletneg na Panarian na Dios nen 1914 anggad sampot na Milenyon Uley nen Kristo. Say libron Apocalipsis ya insulat nen Juan nen manga 96 C.E. et makapainteres a salaysay na sarayan pasingawey.

Konsideraen tayo natan iray pabitar ed Apocalipsis 1:1–12:17, a kobrian toy unonan pitora a pasingawey a naawat nen Juan. Makapasagyat irayan pasingawey ed sikatayo ta sasaglawien da no antoy nagagawa’d mundo natan tan mangipapanengneng no panoy ikiwas nen Jehova ed magano lan arapen. Saramay manbabasa ed sarayan pasingawey tekep na pananisia so peteg a naliligliwa tan napapaseseg.​—Heb. 4:12.

NILUKASAN NA “KORDERO” SO ANEMIRA ED PITORAN SELYO

(Apo. 1:1–7:17)

Diad unonan pasingawey, anengneng nen Juan so niglorian Jesu-Kristo, insan akaawat na nantutumbokan a mensahen nepeg ton ‘isulat ed sakey a libro tan ipawit to ed saray pitoran kongregasyon.’ (Apo. 1:10, 11) Say sinmublay ya anengneng to et say trono a walad tawen. Diad nikawanan na Sakey ya akayurong ed trono et walay lukot ya atatakan na pitoran selyo. Say iilaloan a “manepeg a mamuskag” ed lukot et anggapoy arum noagta say “Leon ed poli nen Juda,” odino say “kordero . . . a wala so pitora a saklor to, tan pitora a mata to.”​—Apo. 4:2; 5:1, 2, 5, 6.

Say komatlon pasingawey so mangipaparungtal ed no antoy agawa leleg a mantutumbokan a lukasan na “Kordero” so unonan anemiran selyo. Sanen nilukasan so komanem a selyo, yinmegyeg na maksil tan sinmabi so baleg ya agew na sanok. (Apo. 6:1, 12, 17) Balet impanengneng na sinmublay a pasingawey a ‘popokpokan na apatiran anghel so apatiran dagem na dalin’ ya anggad nakompleton natatakan so 144,000. “Sakey a baleg ya ulop” na saray ag-atatakan so anengneng a ‘manal-alagey ed arap na trono tan ed arap na Kordero.’​—Apo. 7:1, 9.

Makasulatan Iran Tepet a Naebatan:

1:4; 3:1; 4:5; 5:6​—Anto so ipapatnag na balikas a “pitoran espiritu”? Say numeron pitora et mankabaliksan na pagmaliw a kompleto ed panmoria na Dios. Sirin, diad saginonor, say mensahe ed ‘pitoran kongregasyon’ et onaaplika ed amin a totoo na Dios a mandaragup ed masulok ya 100,000 a kongregasyon ed interon dalin. (Apo. 1:11, 20) Ipapagamor nen Jehova so masanton espiritu to unong ed panlabayan to, kanian say balikas a “pitoran espiritu” et ontutukoy ed inkanagnap na ikukurang na satan diad pangiiter na pakatalos tan bendisyon ed saramay mangiimano ed propesiya. Ompatnag a say paraan na impangisalaysay na libron Apocalipsis et base’d pantutumbokan na saray tugyop na pitoran konsepto. Say bilang a pitora dia et mangirerepresenta na inkakompleto, tan diad katuaan to, say libro so manisingbat ed pakakompleto, odino ‘pakasumpal na sagradon sekreto na Dios.’​—Apo. 10:7, NW.

1:8, 17​—Diad siopa ontutukoy so titulon “Alfa tan say Omega,” ontan met na say “Inmuna tan Kaunoran”? Say titulon “Alfa tan say Omega” et ontutukoy ed si Jehova. Idadanet na saya ya anggapo lay arum a makapanyarin-amin a Dios ya akauna’d sikato, nisay wala ni onsalat. Sikato so “sengeg tan say anggaan.” (Apo. 21:6; 22:13) Anggaman atukoy si Jehova bilang “say una tan unor” ed Apocalipsis 22:13 lapud anggapoy akauna tan onsublay ed sikato, say konteksto na unonan kapitulo na Apocalipsis et mangipapatnag a say abitlan titulo ya “Inmuna tan Kaunoran” et ontutukoy ed si Jesu-Kristo. Sikato so  sankaunaan a toon pinaoli ed imortal ya espiritun bilay tan say sankaunoran a pinaoli nen Jehova a mismo ed imortalidad.​—Col. 1:18.

2:7​—Anto so “paraiso na Dios”? Lapud sarayan salita et parad saray alanaan a Kristiano, say asalambit a paraiso et ontutukoy ed singa-paraison ayaman ed tawen, salanti, say mismon kawalaan na Dios. Saray matoor ya alanaan so natumangan diad pangan ed “kiew na bilay.” Sikaray pagamoran na imortalidad.​—1 Cor. 15:53.

3:7​—Kapigan naawat nen Jesus so “tombok nen David,” tan panoy panguusar to’d satan? Sanen abautismoan si Jesus nen 29 C.E., sikatoy nagmaliw a Tinuron-Ari a nanlapu ed poli nen David. Anggaman ontan, naawat lambengat nen Jesus so tombok nen David kasabi 33 C.E. sanen sikato so niyalangon ed nikawanan na Dios ed tawen. Diad satan et atawir ton amin so kanepegan na Davidikon Panarian. Nanlapu la’d saman, uusaren la nen Jesus itan a tombok pian lukasan iray pankanawnawa tan pribilehyo a misiglaotan ed Panarian. Nen 1919, “say tombok na abung nen David” so impasakbat nen Jesus ed “matoor tan makabat ya aripen” diad impanuro ed sayan aripen a klase a mangasikaso ed “amin a kaykayarian to.”​—Isa. 22:22; Mat. 24:45, 47, NW.

3:12​—Anto so ‘balon ngaran’ nen Jesus? Sayan ngaran et walay kipaakaran to ed balon posisyon tan pribilehyo nen Jesus. (Fil. 2:9-11) Anggaman anggapo lay arum a makapikabat ed satan a ngaran a singa ed pakapikabat nen Jesus, isulat to itan ed saray matoor ya agagi to diad tawen, a mas mamaapit ed relasyon da ed sikato. (Apo. 19:12) Inabang to ni ingen iray pribilehyo to ed sikara.

Saray Leksion Parad Sikatayo:

1:3. Lapud “say [“aturon,” NW] panaon [na pangipaakseb ed panangukom na Dios ed sayan mundo nen Satanas et] asingger la,” inkaganatan sirin a nepeg tayon talosan so mensahen walad Apocalipsis tan onkiwas unong ed satan.

3:17, 18. Pian onyaman ed espiritual, kaukolan tayoy mangaliw ed si Jesus na “balitok a ginogolan ed apoy,” salanti, nepeg a manggunaet itayon magmaliw a mayaman ed saray maabig a gawa. (1 Tim. 6:17-19) Kaukolan tayo met ya isulong so “kawekawes ya amputi,” a mangipapabidbir ed sikatayo bilang papatumbok nen Kristo, tan usaren tayoy ‘puyok na mata,’ a singa saray simbawan walad Panag-Bantayan, pian nawalaan itayo na espiritual a pakatebek.​—Apo. 19:8.

7:13, 14. Irerepresenta na 24 a mamasiken so 144,000 diad mangatatawen a gloria ra, ya aglabat ira manlingkor ditan bilang arari noagta magmaliw met iran saserdote. Sikara imay iyaanino na saray saserdote ed Israel nensaman ya inorganisa nen Arin David ed 24 a dibisyon. Sakey ed sarayan mamasiken so angiparungtal ed si Juan na pakabidbiran ed baleg ya ulop. Sirin, say inkioli na saray alanaan a Kristiano so posiblin ginmapo diad saray taon antis na 1935. Akin a nibaga tayo so ontan? Lapud diad satan a taon, say dugan pakabidbiran ed baleg ya ulop so nipaamta ed saray alanaan a lingkor na Dios diad dalin.​—Luc. 22:28-30; Apo. 4:4; 7:9.

SAY IMPANLUKAS ED KOMAPITON SELYO SO ANGITONTON ED IMPAMAKNOL ED PITORAN TRUMPETA

(Apo. 8:1–12:17)

Nilukasan na Kordero so komapiton selyo. Akaawat so pitoran anghel na pitoran trumpeta. Anemira ed saratan ya anghel et amaknol ed trumpeta ra, a mangiyaanunsio ed mensahe na panangukom ed “kakatlo” na katooan​—say Kakristianoan. (Apo. 8:1, 2, 7-12; 9:15, 18) Ontan so anengneng nen Juan ed komaliman pasingawey. Kabiangan si Juan ed sinmublay a pasingawey, a kinan to so melag a lukot tan sinukat toy santuaryo na templo. Kayarin pinaknol so komapiton trumpeta, oniay inyanunsio na maksil iran boses: “Say nanarian na mundo agawa ran nanarian na Katawan tayo tan si Kristo to.”​—Apo. 10:10; 11:1, 15.

Say komapiton pasingawey so mangiiter na kaaruman ya impormasyon nipaakar ed samay walad Apocalipsis 11:15, 17. Walay baleg a tanda ya anengneng ed tawen. Inyanak na mangatatawen a bii so ugaw a laki. Pinatakyas ed tawen so Diablo. Lapud masyadoy sanok to ed sayan mangatatawen a bii, sikatoy linma ‘pian mibakal ed saray nakdaan a kailalakan na bii.’​—Apo. 12:1, 5, 9, 17.

 Makasulatan Iran Tepet a Naebatan:

8:1-5​—Akin a niwalay deen ed tawen, tan anto so imbasileng ed dalin diad saginonor? Niwalay simbolikon deen ed tawen pian “saray pikakasi na lapag na sasantos” ed dalin et narengel. Saya et agawa sanen anampot so inmunan guerra mundial. Aliwan singa ed papanisiaan na dakel, agni sinmegep ed tawen iray alanaan a Kristiano diad impangangga na Panaoy Gentil. Asagmak day makapasubok iran panaon leleg na samay guerra. Kanian maseeseet iran nampikasi ed saraman a bekta parad panangiwanwan na Dios. Bilang ebat ed pikakasi ra, imbasileng na anghel so simbolikon apoy ya amarngat odino amakiwas ed saray alanaan a Kristiano parad dakel a kimey. Anggaman daiset ira, ginapoan day sankamundoan a kampanya na panagpulong, kanian nagmaliw ya ampetang ya isyu so Panarian na Dios, a singa ra anelsel na apoy ed Kakristianoan. Saray singa karol a pasakbay manlapud Biblia et niyabawag, saray sinag na Makasulatan a katuaan so nipakabat, tan say mismon pundasyon na palson relihyon so ayegyeg, singa saray bilding ya ayugayog lapud yegyeg.

8:6-12; 9:1, 13; 11:15​—Kapigan namparaan so pitoran anghel a mamaknol ed trumpeta ra, ontan met, kapigan tan panon so impamaknol da ed saratan? Say panagparaan ed pamaknol ed pitoran trumpeta et laktipen toy impangipagamor na panangiwanwan ed apabiskeg a membro na Juan a klase diad dalin manlapud 1919 anggad 1922. Saraman ya alanaan so nagmaliw ya okupado ed panangorganisa lamet ed publikon ministeryo tan panagpaalagey na saray pasilidad a panag-imprintaan. (Apo. 12:13, 14) Say panangipaknol ed saray trumpeta et irerepresenta toy andi-takot a panangiyabawag ed panangukom nen Jehova ed mundo nen Satanas, a gagawaen na saray totoo nen Jehova diad pikokoopera’d saray anghel. Makatantanda, saya et ginmapo diad samay kombension nen 1922 ed Cedar Point, Ohio tan mantultuloy anggad baleg a kairapan.

8:13; 9:12; 11:14​—Diad anton paraan a say unor a taloran trumpeta et amaknol na saray “ey-ey”? No say tanol na unaan ya apatiran trumpeta et panangiwalwal ed inatey a kipapasen na Kakristianoan, say unor a talora balet et nipaakar ed saray ey-ey a walay kipaakaran to ed espisipiko iran ebento. Say komaliman impamaknol et misiglaotan ed inkibulos na totoo na Dios manlapud “kaaralman” na inka-inaktibo nen 1919 tan ed maseeseet a pibibiang da ed panagpulong a kimey, a saya et nagmaliw a makapairap a salot ed Kakristianoan. (Apo. 9:1) Say komanem et nipaakar ed sankabalgan ya iyaataki na armada na saray kabalyero ed awaran tan say sankamundoan a kampanya na panagpulong a ginmapo nen 1922. Say sankaunoran ya impamaknol et nipaakar ed inkianak na Mesianikon Panarian.

Saray Leksion Parad Sikatayo:

9:10, 19. Say napanmatalkan a nibase’d Biblia iran balikas ed publikasyon na “matoor tan makabat ya aripen” et walaan na makapaot-ot a mensahe. (Mat. 24:45) Sayan mensahe et miulibayan ed ikol na duron a walaay samal a ‘singa ed saray alakdan’ tan ed saray kabayo na kabalyero, a saray “ikol da singa saray ikol na uleg.” Akin ya ontan? Lapud saratan a publikasyon et mangipapasakbay ed ‘agew na panangibales nen Jehova.’ (Isa. 61:2) Makpel tan maseseg itayo komon a mangibunog ed saratan.

9:20, 21. Dakel a mauyamon totoo a manaayam ed tatawagen ya aliwan Kristiano iran bansa et paborablin onkikiwas met ed mensahen iyaabawag tayo. Balet, agtayo iilaloan a dakdakel so nakomberte ed limog na saramay agkabiangan na Kakristianoan, ya atukoy bilang “kera a totoo.” Anggaman ontan, manseseet itayo nin siansia ed ministeryo.

12:15, 16. “Say dalin”​—saray elementon walad mismon sistema nen Satanas, odino saray manguuley a pakapanyari ed nanduruman bansa​—et manusuporta ed kawayangan ed panagdayew. Ginmapo ed dekaday 1940, saratan a pakayari et “inakmon [da] so ilog [na panamasegsegang] ya inyuta na dragon ed sangi to.” Mapatnag sirin a no labayen nen Jehova, sarag ton impluensyaan iray manuley pian nasumpal so linawa to. Duga labat sirin so ibabagay Uliran 21:1: “Say puso na ari wala ed lima nen Jehova a singa saray agus. Sikato so ikiling to ed anggan iner a labay to.” Sayan katuaan et nepeg a mamabiskeg na pananisia tayo ed Dios.