Inggalgalang nen Job so Ngaran nen Jehova

“Bendito so ngaran nen Jehova.”​—JOB 1:21.

1. Siopa so posiblin angisulat ed libron Job, tan kapigan?

MANGA 40 años nen Moises sanen sikatoy batik ed Midian pian agnapapatey nen Faraon na Ehipto. (Gawa 7:23) Sanlegan ton walad Midian, nayarin nadngel to ray subsubok ed si Job, a manaayam ed asingger a dalin na Uz. Kayari na pigay taon, sanen si Moises tan say nasyon na Israel et akabanda’d asingger ed Uz diad pansamposampot na impanbaroy da’d kalawakan, nayarin akabatan to so agawa’d unor la ran taon nen Job. Unong ed tradisyon na saray Judio, posiblin si Moises so angisulat ed libron Job, ag-abayag kayari impatey nen Job.

2. Diad antoran paraan a papabiskegen na libron Job so pananisia na saray lingkor nen Jehova ed sayan panaon?

² Papabiskegen na libron Job so pananisia na saray lingkor na Dios ed sayan panaon. Diad antoran paraan? Tutulongan itayo na satan a natalosan iray makanan agawa’d tawen a walaan na baleg ya epekto anggad sayan panaon, tan idadanet na satan so sankaimportantian ya isyu na sankatalbaan ya inkasoberano na Dios. Napaaralem met na salaysay na Job so pakatalos tayo ed no antoy kabaliksan na panamasiansiay integridad. Natulongan itayo na satan a natalosan no akin ya aabuloyan nen Jehova a manirap iray lingkor to no maminsan. Niarum ni, tinukoy na libron Job si Satanas a Diablo bilang manunan Kalaban nen Jehova tan kabusol na katooan. Ipapanengneng met na sayan libro a sarag na ag-ayadyarin too a singa si Job so mansiansian matoor ed si Jehova anggaman pinasya so subok. Aralen tayo natan iray pigaran inkagawa a walad libron Job.

Sinubok nen Satanas si Job

3. Siopa si Job, tan akin et sikatoy pinuntirya nen Satanas?

³ Si Job et sakey a lakin mayaman, maimpluensya, tan maong a padre-de-pamilya. Mapatnag a sikatoy respetadon mananimbawa a tinmulong ed saray mankaukolan. Say sankaimportantian ed amin, si Job et matakot ed Dios. Sikatoy indeskribe a “naskey tan matunong, tan sakey a walaay takot ed Dios, tan pinmaliis a nanlapu ed mauges.” Aliwan say inkayaman tan inkamaimpluensya nen Job so sengegan no akin a sikatoy pinuntirya nen Satanas a Diablo, noagta say maridios a debosyon to.​—Job 1:1; 29:7-16; 31:1.

4. Anto so integridad?

⁴ Dedeskribien ed gapo na salaysay na libron Job so sakey a pantitipon ed tawen a saray anghel et inmarap ed si Jehova. Wadman met si Satanas, tan inakusaan to si Job. (Basaen so Job 1:6-11.) Anggaman sinalambit nen Satanas so nipaakar ed kaykayarian nen Job, say manunan kinuestion to et say integridad odino katooran nen Job. Say “integridad” et mankabaliksan na pagmaliw a matunong, naskey, maptek, tan andi-kabalawan. Diad Biblia, say integridad na too et manutukoy ed sigpot a debosyon ed si Jehova.

5. Anto so inyakusa nen Satanas ed si Job?

⁵ Ikakantiaw nen Satanas a mandadayew labat kuno si Job ed Dios lapud walay napipinabangan to, aliwan lapud integridad to. Iyaakusa nen Satanas a manmatoor labat si Job ed si Jehova no itultuloy Toy mamendisyon tan manalimbeng ed sikato. Pian naebatan itan ya akusasyon, inabuloyan nen Jehova si Satanas a suboken iyan matoor a laki. Bilang resulta, diad loob labat na sanagew, saray ayayep nen Job et tinatakew odino pinapatey, dakel ed saray ariripen to et pinapatey met, tan say samploran anak to et inatey lapud desyang. (Job 1:13-19) Kasin inikbanan la nen Job so integridad to lapud sarayan impangataki nen Satanas? Unong ed pinuyanan a rekord,  oniay reaksion nen Job ed sarayan trahedyan asagmak to: “Si Jehova initer to, tan si Jehova inala to; bendito so ngaran nen Jehova.”​—Job 1:21.

6. (a) Antoy agawa diad sananey nin pantitipon ed tawen? (b) Sioparay nononoten nen Satanas sanen kinuestion toy integridad nen Job ed si Jehova?

⁶ Diad saginonor, walay agawan sananey nin pantitipon ed tawen. Tan wala lamet so inyakusa nen Satanas ed si Job. Oniay inkuanto: “Baog tan baog, on, amin a say too wala ed sikato iter to nipaakar ed bilay to. Balet yunat mo so limam natan, tan diwiten mo so pukel to tan laman to, et ikaindan to ka ed lupam.” Imanoen ya aliwa labat lan si Job so aakusaan nen Satanas. Diad impangibaga ton, “Amin a say too wala ed sikato iter to nipaakar ed bilay to,” say kinuestion na Diablo et aliwa labat lan say integridad nen Job, noagta anggan siopan “too” a mandadayew ed Jehova. Kanian, inabuloyan na Dios si Satanas a kabilen si Job na makapasinagem a sakit. (Job 2:1-8) Balet agditan angangga so subsubok ed si Job.

Saray Naaralan ed si Job

7. Panoy impanesdes ed si Job na asawa to tan saramay binmisita ed sikato?

⁷ Diad gapo, parehon irap so naeksperiensya nen Job tan say asawa to. Seguradon say akulaw to et asaksakitan met a maong sanen inatey iray anak da, ontan met ed impakaandi na kaykayamanan da. Tan sanen sankanengneng toy paniirap nen masiken to lapud makapaot-ot a sakit, seguradon sikatoy agonigon. Kanian oniay inkelyaw to’d si Job: “Siansia a bembenan mo ni so inkaskey mo? Ikaindan mo so Dios, tan ompatey ka!” Kabebekta, sinmabi so taloran lalaki​—si Elifaz, Bildad, tan Zofar​—pian ligliwaen komon si Job. Balet ta diad tua’y tua, mapalikdo so panagkatunongan da tan sikaray ‘managpasegsegang a managligliwa.’ Singa bilang, impasiki nen Bildad a saray anak nen Job et nanggaway kasalanan kanian kanepegan da labat so agawa’d sikara. Impasagilig met nen Elifaz a say paniirap nen Job et dusa ed saray kasalanan to’d apalabas. Nanduaruwaan ni ingen nen Elifaz no kasin saramay mansiasiansian matoor et papablien na Dios! (Job 2:9, 11; 4:8; 8:4; 16:2; 22:2, 3) Anggaman pinasyay pananesdes ed si Job, binembenan to nin siansia so integridad to. Tua, sikatoy alingo sanen “pinatunong to so inkasikato a magmaong nen say Dios.” (Job 32:2) Balet, diad sarayan amin, sikatoy nansiansian matoor.

8. Antoy maabig ya ehemplo nen Elihu ed saray mangiiter na simbawa natan?

⁸ Say onsublay a nabasa tayo et nipaakar ed si Elihu, a binmisita met ed si Job. Dinengel nin unona nen Elihu iray panmoria di Job tan saray taloran kakaaro to. Anggaman sikatoy sankaugawan ed sikaran amin, mas malaknab balet so karunongan to. Marespeto so impitongtong to’d si Job. Kinomendaan to so inkamatoor nen Job. Balet ta imbaga to met ya alablabas so impangidepensa nen Job ed dili ton inkatunong. Insan pinaseguroan to si Job a say matoor a panserbi ed Dios et lawas sankaabigan. (Basaen so Job 36:1, 11.) Agaylan abig ya ehemplo parad saramay mangiiter na simbawa natan! Si Elihu et maan-anos,  dinmengel a maong, angiter na komendasyon, tan makapaseseg iray simbawa to.​—Job 32:6; 33:32.

9. Panon a tinulongan nen Jehova si Job?

⁹ Diad kaunoran, nikadkaduma so naeksperiensya nen Job sanen akitongtong si Jehova ed sikato! Oniay inkuan na rekord: “Diad saman si Jehova inmebat ed Job manlapu ed aloboob.” Panamegley na nantutumbokan a tepet, maar-aron sinimbawa nen Jehova si Job pian nipetek so kanonotan to. Mabulos ya inawat nen Job so panamaat, tan oniay inaksobi to: “Daiset so kanepegan ko . . . Magbabawi ak ed dabok tan dapo-dapol.” Kayari impitongtong nen Jehova ed si Job, binaat To so taloran kakaaro nen Job lapud agda imbaga so “maptek” odino katuaan. Kaukolan ya ipikasi ira nen Job. Diad kaunoran et inekal nen Jehova so paniirap nen Job “sanen nampikasi nipaakar ed saray kakaaro to. Et si Jehova inikdan to si Job na mamidua a singa karakel na wala ed sikato nen inmuna.”​—Job 38:1; 40:4; 42:6-10.

Kaunongan Kaaralem so Panangaro Tayo’d si Jehova?

10. Akin et ag-imbaliwala odino agpinatey nen Jehova si Satanas?

¹⁰ Si Jehova so Manamalsa na uniberso, say Soberano na amin a palsa. No ontan sirin, akin et agto la imbaliwala so akusasyon na Diablo? Lapud amta na Dios a say pangibaliwala odino pamatey ed si Satanas et agmanresolbe ed isyu. Papapawayen na Diablo a say matoor a lingkor nen Jehova a si Job et agmansiansian matoor no naandi ray kayamanan to. Ingen ta diad saray subok et ag-agiing so katooran nen Job. Insan inyakusa nen Satanas ya ibeneg na siopaman a too so Dios no makasagmak na irap ed pisikal. Anggaman si Job et awalaay makapasinagem a sakit, agto inikbanay integridad to. Sirin, pinaneknekan na sayan matoor balet ta ag-ayadyarin laki a matila si Satanas. Komusta met iray arum a managdayew na Dios?

11. Panon a sigpot ya inebatan nen Jesus iray angat nen Satanas?

¹¹ Mipadpara, sano say kada lingkor na Dios et mansiasiansian matoor antokaman ni iter nen Satanas a subok, papaneknekan to met a mismo a tila iray akusasyon na sayan maruksan kabusol. Sanen linma diad dalin si Jesus, sigpot ton inebatan iray angat nen Satanas. Ayadyarin too si Jesus, singa say ama tayon si Adan. Say impanmatoor nen Jesus anggad patey et andi-duaruwan amaneknek a matila si Satanas tan saray akusasyon to et aliwan tua.​—Apo. 12:10.

12. Anto so pankanawnawa tan responsabilidad na balang lingkor nen Jehova?

¹² Anggaman ontan, siansia nin susuboken nen Satanas iray managdayew nen Jehova. Pankanawnawa tan responsabilidad na balang sakey ed sikatayo sirin ya ipanengneng so dilin integridad tayo. Nagawaan tayo itan no manlingkor tayo’d si Jehova lapud panangaro, aliwan lapud sinisiblet iran rason. Antoy panmoria tayo ed satan a responsabilidad? Momoriaen tayon baleg a kagalangan so panmatoor ed si Jehova! Makapaligliwa met ed sikatayo so pakaamtan iikdan itayo nen Jehova na biskeg pian makapansungdo, tan singa agawa’d si Job, walay igegeter Ton limitasyon ed saray subok a sagmaken tayo.​—1 Cor. 10:13.

Satanas​—Maangat a Kalaban tan Apostata

13. Diad libron Job, antoran detalye so imparungtal nipaakar ed si Satanas?

¹³ Say Hebreon Kasulatan et mangiiter na saray detalye ed makapabaing a ginawa nen Satanas diad impan-angat to’d si Jehova tan diad impamalikdo to’d katooan. Diad Kristianon Griegon Kasulatan et wala ni ray kaaruman ya impormasyon nipaakar ed insumpa nen Satanas  ed si Jehova, tan diad libron Apocalipsis et naamtaan tayo so nipaakar ed pangiyalangon ed soberanya nen Jehova, tan say kaderal nen Satanas. Mangiiter ni na nagkalalon impormasyon so libron Job ed inkarebelyoso nen Satanas. Sanen sikatoy linma ed saray pantitipon ed tawen, anggapo pay getma ton dayewen si Jehova. Imbes, mauges so motibo tan getma to. Kayari ton inakusaan si Job tan sanen inabuloyan nen Jehova a nasubok iyan laki, “si Satanas pinmaway a nanlapu ed arapan nen Jehova.”​—Job 1:12; 2:7.

14. Panoy impideneng nen Satanas ed si Job?

¹⁴ Diad libron Job et atukoy sirin si Satanas bilang andiay-panangasin kalaban na katooan. Diad baetan na saramay pantitipon ed tawen ya asalambit ed Job 1:6 tan Job 2:1, linmabas so panaon ya agti amta no kaunongan kabayag, a diad satan et maruksan sinubok si Job. Lapud katooran nen Job, sarag nen Jehova ya ibaga ed si Satanas so onia: ‘Siansian bebembenan nen Job so inkaskey to, anggan tinenyeg mo ak sumpa ed sikato pian sikato so bagbagen ya anggapoy makasengeg.’ Balet agnin siansia inawat nen Satanas a tila iray imbagbaga ton akusasyon. Noagta, maangat ton inkuan a kaukolan a suboken lamet si Job. Nibaga sirin a sinubok na Diablo si Job sanen maaligwas ni kabibilay to tan sanen pobri la. Malinlinew, anggapoy panangasi nen Satanas ed saray mairap-bilay odino ed saray akasagmak na trahedya. Kabusol to ray totoon matoor ed Dios. (Job 2:3-5) Anggaman ontan, apaneknekan na katooran nen Job a matila si Satanas.

15. Antoy piparaan nen Satanas ed saray apostata diad sayan panaon?

¹⁵ Si Satanas so sankaunaan a nan-apostata. Saray apostata ed sayan panaon et mipadpara’d Diablo so awawey da. Nayarin asamalan so nonot da lapud makritiko ira ed saray agagi, mamatatken ed kongregasyon, odino ed Mananguley ya Ulop. Wala ni ingen iray apostatan sumpa ed pangusar na madibinon ngaran a Jehova. Ag-ira interesadon nakabat si Jehova odino manlingkor ed sikato. Kaparpara na saray apostata so ama ran si Satanas, ya andi lay pupuntiryaen da et saray matoor a totoo. (Juan 8:44) Agla pankelawan sirin a sigpot iran aarawian na saray lingkor nen Jehova!​—2 Juan 10, 11.

Inggalgalang nen Job so Ngaran nen Jehova

16. Anton awawey so impanengneng nen Job ed si Jehova?

¹⁶ Inusar tan indayew nen Job so ngaran nen Jehova. Anggan sanen pirmi impakagonigon to ed impatey na saray anak to, sikatoy agbalot nansalitay mauges sumpa’d Dios. Anggano abaloan nen Job a say Dios so nanlapuan na agawgawa’d sikato, siansia nin inggalgalang toy ngaran nen Jehova. Diad saginonor et onia so sakey ed saray maanlong ya imbalikas to: “Nia, say takot ed Dios, satan sikato so kakabatan; et say iyarawi ed mauges sikato so pakatalos.”​—Job 28:28.

17. Antoy akatulong ed si Job a pansiansiaen so integridad to?

¹⁷ Antoy akatulong ed si Job a pansiansiaen so  integridad to? Malinlinew, sakbay nin agawa iramay kalamidad, binayuboan to lay maapit a relasyon ed si Jehova. Agtayo napekderan no kasin amta nen Job imay angat nen Satanas ed si Jehova, ingen ta sikatoy determinado a mansiansian matoor. Inkuan to: “Angga ed ompatey ak agko ekalen so inkaskey ko a manlapu ed siak!” (Job 27:5) Panon ton binayuboan itan a maapit a relasyon ed Dios? Seguradon pinabpabli to iramay nadngelan ton impideneng na Dios ed si Abraham, Isaac, tan Jacob, ya arawin kakanayon to. Tan diad impangobserba nen Job ed palsa, atebek to ray kualidad nen Jehova.​—Basaen so Job 12:7-9, 13, 16.

18. (a) Panon ya impanengneng nen Job so debosyon to’d si Jehova? (b) Panon tayon naalig so maabig ya ehemplo nen Job?

¹⁸ Lapud saray naamtaan nen Job, pinilalek ton paliketen si Jehova. Sikatoy regular a mangiyaapay na bagbagat ta ompan saray anak to et makakagawa na agmakapaliket ed si Jehova odino “inkaindan da so Dios ed saray puso ra.” (Job 1:5) Anggan sanen pinasyay subok ed si Job, siansia nin positibo iray imbabalikas to nipaakar ed si Jehova. (Job 10:12) Agaylan maabig ya alimbawa! Mipadpara, kaukolan tayo met so regular a mangasol na suston pikakabat ed si Jehova tan ed saray gagala to. Nepeg a pansiansiaen tayoy maabig a rotina ed espiritual iran aktibidad a singa say panag-aral, iyaatendi’d miting, panagpikasi, tan panangipulong na maong a balita. Niarum ni, gagawaen tayoy anggaay nayarian tayon ipakabat so ngaran nen Jehova. No panon a say integridad nen Job et amaliket ed si Jehova, say integridad na saray lingkor na Dios natan et mamapaliket met ed puso nen Jehova. Saya so pantongtongan tayo ed onsublay ya artikulo.

Kasin Nanonotan Mo?

• Akin et pinuntirya nen Satanas a Diablo si Job?

• Antoran subok so sinungdoan nen Job, tan panoy inkiwas to?

• Singa si Job, anto so makatulong pian napansiansia tayoy integridad tayo?

• Diad libron Job, anto so akabatan tayo nipaakar ed si Satanas?

[Tepetepet Parad Panagaral]

[Litrato ed pahina 4]

Ipapalinew ed sikatayo na libron Job so sankaimportantian ya isyu na sankatalbaan ya inkasoberano na Dios

[Litrato ed pahina 6]

Antoray sirkumstansya a nayarin nasubok so integridad mo?